Yoꞌoꞌ kaꞌán a̱ xaꞌa̱ꞌ a̱ ña̱ kuvita i̱ni̱ Ndiosí xaꞌa̱ꞌ e̱ꞌ
Ya̱a̱ ña̱ ni̱ xi̱ta̱ ne̱ yivi̱ꞌ kii̱ꞌ kuaꞌa̱n ki̱e̱ndu̱u̱ ni̱a̱ ñu̱u̱ Jerusalén.
123
Tákuiꞌe Ndiosí,
ña̱ nduꞌu̱ꞌ ndi̱viꞌ,
nuu̱ꞌ yoꞌó ndoniꞌiꞌ i̱ nuu̱ꞌ i̱,
te̱ kaꞌán ndaꞌvi i̱ xiinꞌ u̱nꞌ.
2 Ko̱to̱ ndo̱ꞌ,
kuaꞌa̱n naa kuaꞌa̱n e̱ꞌ ndukuꞌ e̱ꞌ ña̱ ku̱vi̱ta i̱ni̱ Tákuiꞌe Yahvé,
ña̱ nduuꞌ Ndiosí e̱ꞌ,
xaꞌa̱ꞌ e̱ꞌ.
Xaaꞌ e̱ꞌ nde̱e̱ naa xaaꞌ te̱ xikaꞌ nuuꞌ so̱ꞌo̱ xtoꞌniꞌ ra̱ nuu̱ꞌ xto̱ꞌo̱ ra̱,
te̱ yoo tu̱ꞌva̱ ra̱ te̱ sa̱a̱ ra̱ ña̱ kaꞌán tyuunꞌ xto̱ꞌo̱ ra̱ ja̱a̱nꞌ xiinꞌ ra̱,
uun xaaꞌ tu̱ e̱ꞌ nde̱e̱ naa xaaꞌ ña̱ꞌaꞌ ñaꞌ xikaꞌ nuuꞌ so̱ꞌo̱ xtoꞌniꞌ aꞌ nuu̱ꞌ ñaꞌ siꞌi xto̱ꞌo̱ aꞌ,
te̱ yoo tu̱ꞌva̱ aꞌ te̱ sa̱a̱ aꞌ ña̱ kaꞌán tyuunꞌ ñaꞌ ja̱a̱nꞌ xiinꞌ aꞌ.
3 Tákuiꞌe Yahvé,
sa̱a̱ u̱nꞌ ña̱ va̱ꞌa̱ te̱ ku̱vi̱ta i̱ni̱ u̱nꞌ xaꞌa̱ꞌ ndu̱,
sa̱a̱ u̱nꞌ ña̱ va̱ꞌa̱ te̱ ku̱vi̱ta i̱ni̱ u̱nꞌ xaꞌa̱ꞌ ndu̱,
sa̱kanꞌ ña̱ xa̱ ni̱ xa̱vi va̱ ndu̱ ña̱ kani̱a̱ꞌa va̱ ne̱ yivi̱ꞌ xaꞌa̱ꞌ ndu̱.
4 Te̱ xa̱ ni̱ xa̱vi yaꞌa̱ tu̱ ndu̱ ña̱ xandiꞌiꞌ ne̱ ñuñuꞌ xiinꞌ ndu̱,
te̱ xa̱ ni̱ xa̱vi va̱ tu̱ ndu̱ ña̱ ndasiꞌ ne̱ kaniꞌiꞌ xiinꞌ miiꞌ nduꞌu̱.