Yoꞌoꞌ kaꞌán David xiinꞌ Ndiosí, te̱ ta̱xi̱ a̱ ña̱ mani̱ꞌ ko̱o̱ xiinꞌ ne̱ ndieeꞌ ñu̱u̱ Jerusalén
Ya̱a̱ ña̱ ni̱ xi̱ta̱ David nuu̱ꞌ Ndiosí, te̱ ni̱ xi̱ta̱ tu̱ ne̱ yivi̱ꞌ ya̱a̱ kaa̱ꞌ kii̱ꞌ kuaꞌa̱n ki̱e̱ndu̱u̱ ni̱a̱ ñu̱u̱ Jerusalén.
122
Va̱ꞌa̱ va̱ kuni yuꞌu̱ kii̱ꞌ kaꞌán ne̱ yivi̱ꞌ xiinꞌ i̱ ndii:
“Toꞌo̱ꞌ yu̱kunꞌ Yahvé Ndiosí”,
katyi ni̱a̱.
2 Xaꞌa̱ꞌ a̱ ja̱a̱nꞌ na kuiiꞌ ñu̱u̱ Jerusalén,
xa̱ nuu̱ꞌ ki̱e̱ꞌe̱ u̱nꞌ yoꞌoꞌ itaꞌ ndu̱ vi̱ti̱n.
3 Ñu̱u̱ Jerusalén ndii,
i̱i̱n ñu̱u̱ ña̱ va̱ꞌa̱ va̱ ni̱ ku̱a̱ꞌa̱ nduuꞌ a̱,
te̱ nama̱ ña̱ ndasi i̱ꞌnu̱ a̱ ndii,
köo̱ꞌ nde̱e̱ i̱i̱n ne̱ yivi̱ꞌ ku̱vi̱ nu̱niaꞌ a̱ te̱ xkaꞌndi̱a̱ ni̱a̱.
4 Te̱ sa̱kuuꞌ ne̱ vi̱ꞌe̱ Israel,
ne̱ nduuꞌ kuenta Yahvé,
ku̱a̱xi̱ ñu̱u̱ yoꞌoꞌ,
sa̱a̱ niiꞌ kaꞌán tyuunꞌ tu̱ꞌu̱n nde̱iꞌ ña̱ ni̱ ta̱xi̱ Ndiosí nda̱ꞌaꞌ ni̱a̱,
te̱ sa̱kaꞌnuꞌ ni̱a̱ Yahvé.
5 Sa̱kanꞌ ña̱ yoꞌoꞌ itaꞌ tei̱ kaꞌnuꞌ miiꞌ xaꞌndia tyuunꞌ te̱ xaꞌnú ku̱a̱tyi̱,
tei̱ kaꞌnuꞌ miiꞌ ndieeꞌ sa̱kuuꞌ te̱ xaꞌndia tyuunꞌ,
te̱ naꞌiꞌ tyuunꞌ nuu̱ꞌ rey David.
6 Na kaka̱n e̱ꞌ nuu̱ꞌ Ndiosí te̱ ta̱xi̱ a̱ ña̱ mani̱ꞌ ko̱o̱ nimá ne̱ ndieeꞌ ñu̱u̱ Jerusalén,
te̱ köo̱ꞌ ka̱ tu̱ ñuꞌu̱ ko̱o̱,
te̱ na sa̱ñuꞌuꞌ a̱ sa̱kuuꞌ yoo,
ne̱ ndani̱ ñu̱u̱ ja̱a̱nꞌ.
7 Ñu̱u̱ Jerusalén kuaꞌa,
na ko̱o̱ na ña̱ mani̱ꞌ nimá ne̱ ndieeꞌ ti̱xi̱n nama̱ ña̱ ndasiꞌ i̱ꞌnu̱ u̱nꞌ,
te̱ na sa̱ñuꞌuꞌ Ndiosí sa̱kuuꞌ te̱ xaꞌndia tyuunꞌ nuu̱ꞌ u̱nꞌ miiꞌ ndieeꞌ ra̱ nuu̱ꞌ tei̱ kaꞌnuꞌ.
8 Te̱ vi̱ti̱n ndii,
xaꞌa̱ꞌ a̱ ña̱ ndani̱ i̱ ne̱ taꞌanꞌ i̱ xiinꞌ ne̱ xiní taꞌanꞌ xiinꞌ i̱,
na kaꞌán i̱ ndii:
“Na ko̱o̱ na ña̱ mani̱ꞌ xiinꞌ ndo̱ꞌ nde̱e̱ ndiꞌiꞌ ni̱ kivi̱ꞌ”,
katyi i̱.
9 Te̱ xaꞌa̱ꞌ a̱ ña̱ ndani̱ i̱ yu̱kunꞌ Yahvé Ndiosí ndii,
xikán va̱ i̱ nuu̱ꞌ Ndiosí te̱ sa̱ñuꞌuꞌ a̱ yoꞌó,
ñu̱u̱ Jerusalén,
te̱ ko̱o̱ va̱ꞌa̱ u̱nꞌ.