Yoꞌoꞌ kaꞌán a̱ ña̱ Yahvé nduuꞌ ña̱ xitoꞌ yooꞌ
Ya̱a̱ ña̱ ni̱ xi̱ta̱ ne̱ yivi̱ꞌ kii̱ꞌ kuaꞌa̱n ki̱e̱ndu̱u̱ ni̱a̱ ñu̱u̱ Jerusalén.
121
Ndoniꞌiꞌ i̱ nuu̱ꞌ i̱ te̱ xitoꞌ i̱ miiꞌ itaꞌ sa̱kuuꞌ i̱kuꞌ naꞌnuꞌ,
te̱ kaꞌán i̱ ndii:
“Süu̱ꞌ xíniꞌ i̱kuꞌ kaa̱ꞌ ku̱a̱xi̱ ña̱ tyindieeꞌ yuꞌu̱.
2 Süu̱ꞌ ja̱a̱nꞌ ndii,
mi̱iꞌ Yahvé nduuꞌ ña̱ tyindieeꞌ yuꞌu̱,
ña̱ ni̱ xa̱ꞌa̱ ndi̱viꞌ,
te̱ su̱vi̱ tu̱ a̱ ni̱ xa̱ꞌa̱ ñu̱ꞌuꞌ i̱i̱n yivi̱ꞌ.”
3 Köo̱ꞌ kivi̱ꞌ ta̱xi̱ Ndiosí ña̱ tu̱xuꞌví ndo̱ꞌ,
sa̱kanꞌ ña̱ Ndiosí,
ña̱ xitoꞌ ndoꞌó ndii,
köo̱ꞌ kivi̱ꞌ kixín ndi̱tyi̱ a̱.
4 Ko̱to̱ ndo̱ꞌ,
köo̱ꞌ kivi̱ꞌ kixín Ndiosí ña̱ xitoꞌ yooꞌ,
ne̱ vi̱ꞌe̱ Israel,
ni̱ nde̱e̱ köo̱ꞌ kivi̱ꞌ tu̱ kixín ndi̱tyi̱ a̱.
5 Yahvé nduuꞌ ña̱ xitoꞌ ndoꞌó,
te̱ ña̱ ja̱a̱nꞌ yoo xi̱i̱nꞌ ndo̱ꞌ miiꞌ ka̱ kuaꞌa̱n ndo̱ꞌ,
te̱ xitoꞌ a̱ ndoꞌó.
6 Ñu̱ꞌu̱ ndii,
köo̱ꞌ kivi̱ꞌ ka̱ꞌmi̱ a̱ ndoꞌó i̱i̱n keꞌinꞌ,
te̱ sa̱kanꞌ tu̱ yoo̱ꞌ ndii,
sä̱kuiꞌe̱ a̱ xiinꞌ ndo̱ꞌ.
7 Sa̱kanꞌ ña̱ Yahvé ko̱to̱ ndoꞌó nuu̱ꞌ sa̱kuuꞌ ña̱ ni̱a̱ꞌa,
te̱ ko̱to̱ tu̱ a̱ kivi̱ꞌ ñu̱u̱ ndo̱ꞌ nuu̱ꞌ sa̱kuuꞌ ña̱ ni̱a̱ꞌa ja̱a̱nꞌ.
8 Yahvé ko̱to̱ ndoꞌó kii̱ꞌ ki̱e̱e̱ ndo̱ꞌ kuaꞌa̱n ndo̱ꞌ,
te̱ ko̱to̱ tu̱ a̱ ndoꞌó kii̱ꞌ na̱xaa̱ ndo̱ꞌ vi̱ꞌe̱ ndo̱ꞌ,
nde̱e̱ vi̱ti̱n te̱ nde̱e̱ ndiꞌiꞌ ni̱ kivi̱ꞌ.