Yoꞌoꞌ kaꞌán a̱ xaꞌa̱ꞌ ña̱ kuaꞌa̱n ka̱a̱ ne̱ yivi̱ꞌ ñu̱u̱ Jerusalén
Ya̱a̱ ña̱ ni̱ xi̱ta̱ ne̱ yivi̱ꞌ kii̱ꞌ kuaꞌa̱n ki̱e̱ndu̱u̱ ni̱a̱ ñu̱u̱ Jerusalén.
120
Kii̱ꞌ ni̱ yoo̱ tu̱ndoꞌo̱ꞌ nuu̱ꞌ i̱ ndii,
ni̱ kaꞌa̱n ndaꞌvi i̱ xiinꞌ Yahvé,
te̱ ni̱ na̱ku̱i̱i̱n a̱ si̱u̱ꞌunꞌ ña̱ ni̱ kaꞌa̱n i̱ xiinꞌ a̱.
2 Tákuiꞌe Yahvé,
sa̱a̱ u̱nꞌ ña̱ va̱ꞌa̱ te̱ sa̱kakú u̱nꞌ yuꞌu̱ nuu̱ꞌ ne̱ kaꞌán tu̱n vixi̱,
te̱ sa̱kakú tu̱ u̱nꞌ yuꞌu̱ nuu̱ꞌ sa̱kuuꞌ ne̱ xini xaꞌanꞌ.
3 Ndaꞌvi va̱ ku̱ndo̱ꞌo̱ ndoꞌó,
ne̱ xini xaꞌanꞌ,
sa̱kanꞌ ña̱ sa̱ndoꞌoꞌ va̱ Ndiosí ndoꞌó,
te̱ kuaꞌa̱ꞌ va̱ nuu̱ꞌ tu̱ndoꞌo̱ꞌ ku̱ndo̱ꞌo̱ ndo̱ꞌ sa̱a̱ a̱.
4 Kuaꞌa̱ꞌ va̱ kuxi̱,
tunꞌ xíinꞌ va̱ nuu̱ꞌ,
tunꞌ ndisoꞌ te̱ ndi̱e̱ni va̱ ti̱i̱n ñuꞌu̱ ku̱xi̱ te̱ yivi̱ꞌ i̱i̱nꞌ ndo̱ꞌ,
te̱ ka̱ꞌmi̱ te̱ yivi̱ꞌ ndoꞌó xiinꞌ ñuꞌu̱ ti̱keí tunꞌ enebro ña̱ ndatin.
5 Ndaꞌvi va̱ ndoꞌoꞌ yuꞌu̱ ña̱ nduuꞌ i̱ nde̱e̱ naa te̱ tukuꞌ,
nduꞌu̱ꞌ i̱ te̱i̱n ne̱ ndieeꞌ nuu̱ꞌ ñu̱ꞌuꞌ Mesec,
te̱ sutyiꞌ va̱ i̱ni̱ i̱ nduꞌu̱ꞌ i̱ miiꞌ itaꞌ vi̱ꞌe̱ toto̱ ndieeꞌ,
te̱ vi̱ꞌe̱ Cedar miiꞌ xikaꞌ va̱.
6 Te̱ xa̱ kuaꞌa̱ꞌ va̱ kivi̱ꞌ kuaꞌa̱n nduꞌu̱ꞌ i̱,
te̱i̱n ne̱ ndasiꞌ ña̱ ku̱ndi̱e̱e̱ mani̱ꞌ ni̱a̱ xiinꞌ ne̱ yivi̱ꞌ.
7 Xtani̱ yuꞌu̱ ku̱nduꞌu̱ꞌ mani̱ꞌ i̱ xiinꞌ ne̱ yivi̱ꞌ ja̱a̱nꞌ,
ndisu̱ kii̱ꞌ kaꞌán i̱ xiinꞌ ni̱a̱ xaꞌa̱ꞌ ña̱ ja̱a̱nꞌ ndii,
kuni ku̱ntaꞌanꞌ ku̱i̱ti̱ꞌ ni̱a̱ xiinꞌ i̱.