Yoꞌoꞌ kaꞌán a̱ xaꞌa̱ꞌ ña̱ va̱ꞌa̱ xa̱va̱ꞌa̱ ña̱ nduuꞌ tu̱ꞌu̱n nde̱iꞌ Ndiosí
119
Alef1 Sañuꞌuꞌ va̱ Yahvé Ndiosí ne̱ ya̱a̱ nimá nuu̱ꞌ a̱,
te̱ saxinú ni̱a̱ ña̱ kaꞌán tu̱ꞌu̱n nde̱iꞌ a̱.
2 Sañuꞌuꞌ va̱ Ndiosí ne̱ taxiꞌ so̱ꞌo̱ ña̱ kaꞌán tu̱ꞌu̱n nde̱iꞌ a̱,
te̱ xiinꞌ i̱i̱n ka̱niiꞌ nimá ni̱a̱ ndikún ña̱ꞌaꞌ ni̱a̱.
3 Te̱ ne̱ ja̱a̱nꞌ ndii,
köo̱ꞌ kivi̱ꞌ xaaꞌ ni̱a̱ ña̱ ni̱a̱ꞌa,
süu̱ꞌ ja̱a̱nꞌ ndii,
ña̱ kuní Ndiosí ku̱i̱ti̱ꞌ xaaꞌ ni̱a̱.
4 Kaꞌán tyuunꞌ yoꞌó xiinꞌ ndu̱ ña̱ sa̱xinú ndiꞌi̱ va̱ ndu̱ sa̱kuuꞌ tu̱ꞌu̱n nde̱iꞌ u̱nꞌ.
5 Kaꞌán va̱ nimá i̱ ña̱ sa̱kuuꞌ ña̱ xaaꞌ i̱ ndii,
na̱kuita̱ ndo̱o̱ a̱ xiinꞌ tu̱ꞌu̱n nde̱iꞌ ña̱ kaꞌán tyuunꞌ u̱nꞌ.
6 Sa̱kanꞌ te̱ köo̱ꞌ nde̱e̱ i̱i̱n xaꞌa̱ꞌ ña̱ ku̱tyani i̱,
kii̱ꞌ na̱ka̱ta̱ i̱ ña̱ xaaꞌ i̱ xiinꞌ ña̱ kaꞌán tyuunꞌ tu̱ꞌu̱n nde̱iꞌ u̱nꞌ ja̱a̱nꞌ.
7 Xakaꞌnuꞌ i̱ yoꞌó xiinꞌ nimá ndo̱o̱ va̱,
kii̱ꞌ ku̱nda̱ni̱ i̱ sa̱kuuꞌ ña̱ nda̱ku ña̱ kaꞌán tyuunꞌ tu̱ꞌu̱n nde̱iꞌ u̱nꞌ.
8 Saxinú i̱ sa̱kuuꞌ tu̱ꞌu̱n nde̱iꞌ u̱nꞌ,
ndisu̱ sa̱a̱ u̱nꞌ ña̱ va̱ꞌa̱ te̱ nä̱ko̱o̱ i̱i̱n nda̱a̱ꞌ xa̱tyiꞌ u̱nꞌ yuꞌu̱.
Bet
9 Naaꞌ sa̱xinú te̱ sa̱va̱ kuento ña̱ saniaꞌá ña̱ꞌaꞌ u̱nꞌ ndii,
ku̱vi̱ ka̱ka̱ va̱ꞌa̱ ra̱ i̱i̱n yivi̱ꞌ sa̱a̱ kuní u̱nꞌ.
10 Yuꞌu̱ ndii,
xiinꞌ i̱i̱n ka̱niiꞌ nimá i̱ nandukuꞌ i̱ yoꞌó,
sa̱a̱ u̱nꞌ ña̱ va̱ꞌa̱ te̱ tä̱xi̱ u̱nꞌ ku̱xi̱o̱o̱ i̱ nuu̱ꞌ tu̱ꞌu̱n nde̱iꞌ u̱nꞌ.
11 Te̱ ti̱xi̱n nimá i̱ taxaꞌa i̱ kuento u̱nꞌ,
sa̱kanꞌ te̱ sä̱a̱ i̱ ku̱a̱tyi̱,
sa̱kanꞌ ña̱ xtäni̱ yoꞌó ña̱ ja̱a̱nꞌ.
12 Ña̱ su̱ꞌu̱n va̱ nduuꞌ yoꞌó,
Tákuiꞌe Yahvé,
sa̱a̱ u̱nꞌ ña̱ va̱ꞌa̱ te̱ sa̱niaꞌá u̱nꞌ yuꞌu̱ tu̱ꞌu̱n nde̱iꞌ u̱nꞌ.
13 Xiinꞌ yu̱ꞌuꞌ i̱ kaꞌán ndo̱so̱ꞌ i̱ nuu̱ꞌ ne̱ yivi̱ꞌ
xaꞌa̱ꞌ sa̱kuuꞌ tu̱ꞌu̱n nde̱iꞌ ña̱ ni̱ ta̱xi̱ u̱nꞌ nda̱ꞌaꞌ ndu̱.
14 Nakuatiaꞌ va̱ i̱ xaaꞌ tu̱ꞌu̱n nde̱iꞌ u̱nꞌ,
yaꞌa̱ ka̱ te̱ sa̱kanꞌ ña̱ nakuatiaꞌ i̱ xaaꞌ ña̱ vikaꞌ i̱.
15 Sa̱kuaa̱n ndiꞌi̱ i̱ tu̱ꞌu̱n nde̱iꞌ u̱nꞌ,
te̱ na̱ka̱ni̱ni̱ kaxiꞌ va̱ i̱ xaꞌa̱ꞌ ña̱ saniaꞌá u̱nꞌ.
16 Nakuatiaꞌ va̱ i̱ xaꞌa̱ꞌ ña̱ kaꞌán tuní u̱nꞌ,
te̱ köo̱ꞌ kivi̱ꞌ na̱ndoso̱ꞌ i̱ xaꞌa̱ꞌ kuento ña̱ kaꞌán u̱nꞌ.
17 Mani̱ꞌ ku̱u̱ u̱nꞌ xiinꞌ yuꞌu̱,
te̱ xikaꞌ nuuꞌ nuu̱ꞌ u̱nꞌ,
sa̱kanꞌ te̱ ku̱vi̱ ku̱ti̱a̱ku̱ i̱ te̱ sa̱xinú i̱ kuento yu̱ꞌuꞌ u̱nꞌ.
18 Sa̱a̱ u̱nꞌ ña̱ va̱ꞌa̱ te̱ nu̱niaꞌ u̱nꞌ ndu̱tyiꞌ nuu̱ꞌ i̱,
te̱ ku̱vi̱ ku̱ni̱ i̱ ña̱ nda̱tu̱nꞌ xa̱va̱ꞌa̱ kaꞌán ña̱ saniaꞌá u̱nꞌ.
19 Te̱ tukuꞌ ku̱i̱ti̱ꞌ nduuꞌ i̱ nuu̱ꞌ ñu̱ꞌuꞌ i̱i̱n yivi̱ꞌ yoꞌoꞌ,
sa̱a̱ u̱nꞌ ña̱ va̱ꞌa̱ te̱ tï̱si̱ꞌe u̱nꞌ nde̱e̱ i̱i̱n tu̱ꞌu̱n nde̱iꞌ u̱nꞌ nuu̱ꞌ i̱.
20 Sa̱a̱ kivi̱ꞌ ndoꞌoꞌ nimá i̱
xaꞌa̱ꞌ a̱ ña̱ kuni sa̱xinú i̱ ña̱ kaꞌán tuní u̱nꞌ.
21 Tákuiꞌe Ndiosí,
mi̱iꞌ yoꞌó sandoꞌoꞌ ne̱ yivi̱ꞌ,
ne̱ ñuñuꞌ,
ne̱ xa̱ ni̱ na̱tya̱ꞌa̱n,
ne̱ kuxiooꞌ nuu̱ꞌ tu̱ꞌu̱n nde̱iꞌ u̱nꞌ.
22 Sa̱a̱ u̱nꞌ ña̱ va̱ꞌa̱ te̱ tä̱xi̱ u̱nꞌ ku̱ndi̱ꞌi̱ ne̱ yivi̱ꞌ xiinꞌ i̱,
ni̱ nde̱e̱ tä̱xi̱ tu̱ u̱nꞌ ña̱ ka̱ni̱a̱ꞌa ni̱a̱ xiinꞌ i̱,
sa̱kanꞌ ña̱ saxinú i̱ sa̱kuuꞌ ña̱ kaꞌán tu̱ꞌu̱n nde̱iꞌ u̱nꞌ.
23 Nde̱e̱ te̱ kuuꞌ nu̱uꞌ xikundieé te̱ ndatuꞌunꞌ ra̱ tu̱ꞌu̱n i̱,
ndisu̱ yuꞌu̱ ndii,
xaꞌa̱ꞌ kuento u̱nꞌ ku̱i̱ti̱ꞌ xanini i̱.
24 Xtani̱ yuꞌu̱ sa̱kuuꞌ tu̱ꞌu̱n nde̱iꞌ u̱nꞌ,
sa̱kanꞌ ña̱ ña̱ ja̱a̱nꞌ saniaꞌá yuꞌu̱ tu̱ꞌu̱n nde̱iꞌ va̱ꞌa̱.
Dálet
25 Xa̱ yoo i̱ ku̱vi̱ i̱,
sa̱a̱ u̱nꞌ ña̱ va̱ꞌa̱ te̱ ta̱xi̱ u̱nꞌ kivi̱ꞌ ñu̱u̱ i̱ sa̱a̱ niiꞌ kaꞌán kuento u̱nꞌ.
26 Xa̱ ni̱ kaꞌa̱n i̱ xiinꞌ u̱nꞌ xaꞌa̱ꞌ sa̱kuuꞌ ña̱ xaaꞌ i̱,
te̱ ni̱ na̱ku̱i̱i̱n u̱nꞌ nuu̱ꞌ i̱,
te̱ vi̱ti̱n ndii,
sa̱a̱ u̱nꞌ ña̱ va̱ꞌa̱ te̱ sa̱niaꞌá u̱nꞌ yuꞌu̱ sa̱kuuꞌ tu̱ꞌu̱n nde̱iꞌ u̱nꞌ.
27 Sa̱a̱ u̱nꞌ ña̱ va̱ꞌa̱ te̱ tyi̱ndi̱e̱eꞌ u̱nꞌ yuꞌu̱,
te̱ ku̱nda̱ni̱ i̱ sa̱a̱ kuni katyi̱ tu̱ꞌu̱n nde̱iꞌ u̱nꞌ,
te̱ na̱ka̱ni̱ni̱ i̱ xaꞌa̱ꞌ tyu̱u̱n kaꞌnuꞌ nda̱tu̱nꞌ ña̱ xaaꞌ u̱nꞌ.
28 Xa̱ kuni ityi̱ kuii nimá i̱ ña̱ xakuꞌ va̱ i̱,
sa̱a̱ u̱nꞌ ña̱ va̱ꞌa̱ te̱ sa̱kiꞌví u̱nꞌ yuꞌu̱ xiinꞌ kuento u̱nꞌ.
29 Sa̱a̱ u̱nꞌ ña̱ va̱ꞌa̱ te̱ tä̱xi̱ u̱nꞌ ku̱ndu̱u̱ i̱ te̱ xini xaꞌanꞌ te̱ ku̱ni̱ xaꞌanꞌ i̱ i̱nga̱ ne̱ yivi̱ꞌ,
te̱ xaꞌa̱ꞌ a̱ ña̱ kuvita i̱ni̱ u̱nꞌ xaꞌa̱ꞌ i̱ ndii,
ta̱xi̱ u̱nꞌ na ku̱nda̱ni̱ i̱ ña̱ kaꞌán tu̱ꞌu̱n nde̱iꞌ u̱nꞌ.
30 Ña̱ ndi̱xa̱ ña̱ saniaꞌá yoꞌó,
ni̱ na̱ka̱xi̱n i̱ ku̱ndiku̱n i̱,
te̱ xa̱ i̱i̱n nda̱a̱ꞌ a̱ ni̱ ta̱xi̱ i̱ni̱ i̱ ña̱ ka̱ka̱ i̱ i̱i̱n yivi̱ꞌ sa̱a̱ niiꞌ kaꞌán tyuunꞌ u̱nꞌ.
31 Ndikún ki̱xinꞌ i̱ nde̱iꞌ ña̱ kaꞌán tyuunꞌ u̱nꞌ,
Tákuiꞌe Yahvé,
sa̱a̱ u̱nꞌ ña̱ va̱ꞌa̱ te̱ tä̱xi̱ u̱nꞌ sa̱a̱ i̱ ku̱a̱tyi̱ te̱ sa̱kaꞌanꞌ ne̱ yivi̱ꞌ yuꞌu̱.
32 Ku̱ndiku̱n na ku̱ndiku̱n i̱ sa̱kuuꞌ nde̱iꞌ ña̱ kaꞌán tyuunꞌ u̱nꞌ,
sa̱kanꞌ ña̱ yoꞌó tyindieeꞌ yuꞌu̱ te̱ kundani̱ va̱ꞌa̱ ka̱ i̱ ña̱ kaꞌán a̱.
He
33 Tákuiꞌe Yahvé,
sa̱a̱ u̱nꞌ ña̱ va̱ꞌa̱ te̱ sa̱niaꞌá u̱nꞌ yuꞌu̱ ña̱ kaꞌán tu̱ꞌu̱n nde̱iꞌ u̱nꞌ,
te̱ sa̱xinú i̱ sa̱kuuꞌ a̱ nde̱e̱ xaa̱ kivi̱ꞌ ña̱ ku̱vi̱ i̱.
34 Sa̱a̱ u̱nꞌ ña̱ va̱ꞌa̱ te̱ ta̱xi̱ u̱nꞌ ña̱ ku̱nda̱ni̱ i̱ tu̱ꞌu̱n nde̱iꞌ u̱nꞌ,
te̱ ka̱ka̱ i̱ sa̱a̱ niiꞌ kaꞌán a̱,
te̱ sa̱xinú i̱ sa̱kuuꞌ a̱ xiinꞌ i̱i̱n ka̱niiꞌ nimá i̱.
35 Tyi̱ndi̱e̱eꞌ u̱nꞌ yuꞌu̱ te̱ ka̱ka̱ i̱ i̱tyiꞌ ña̱ kaꞌán tyuunꞌ tu̱ꞌu̱n nde̱iꞌ u̱nꞌ,
sa̱kanꞌ ña̱ ña̱ ja̱a̱nꞌ nduuꞌ ña̱ taxiꞌ ña̱ va̱ꞌa̱ kuni i̱.
36 Sa̱a̱ u̱nꞌ ña̱ va̱ꞌa̱ te̱ tyi̱ndi̱e̱eꞌ u̱nꞌ yuꞌu̱ te̱ kaꞌa̱n nimá i̱ sa̱xinú i̱ tu̱ꞌu̱n nde̱iꞌ u̱nꞌ,
te̱ käꞌa̱n nimá i̱ xaꞌa̱ꞌ ña̱ ko̱o̱ kuaꞌa̱ꞌ xu̱ꞌunꞌ i̱.
37 Sa̱a̱ u̱nꞌ ña̱ va̱ꞌa̱ te̱ sa̱xi̱o̱o̱ u̱nꞌ yuꞌu̱ nuu̱ꞌ ña̱ kuäsa̱ꞌ kuní,
sa̱a̱ u̱nꞌ ña̱ va̱ꞌa̱ te̱ ta̱xi̱ u̱nꞌ kivi̱ꞌ ñu̱u̱ i̱ sa̱a̱ niiꞌ kaꞌán kuento u̱nꞌ.
38 Sa̱xinú u̱nꞌ kuento u̱nꞌ ña̱ ni̱ ta̱xi̱ u̱nꞌ nuu̱ꞌ yuꞌu̱,
te̱ xikaꞌ nuuꞌ nuu̱ꞌ u̱nꞌ,
yuꞌu̱,
te̱ yiꞌvi yoꞌó.
39 Sa̱a̱ u̱nꞌ ña̱ va̱ꞌa̱ te̱ tä̱xi̱ u̱nꞌ sa̱a̱ i̱ ku̱a̱tyi̱ te̱ sa̱kaꞌanꞌ ne̱ yivi̱ꞌ yuꞌu̱ ña̱ xikaꞌ nimá i̱ xini i̱,
sa̱kanꞌ ña̱ nde̱iꞌ ña̱ kaꞌán yoꞌó ndii,
ña̱ va̱ꞌa̱ va̱ nduuꞌ a̱.
40 Kaꞌán va̱ nimá i̱ sa̱xinú i̱ tu̱ꞌu̱n nde̱iꞌ u̱nꞌ,
xaꞌa̱ꞌ a̱ ja̱a̱nꞌ na kuiiꞌ sa̱a̱ u̱nꞌ ña̱ va̱ꞌa̱ te̱ ta̱xi̱ u̱nꞌ kivi̱ꞌ ñu̱u̱ i̱ xaꞌa̱ꞌ a̱ ña̱ xatyuunꞌ nda̱ku u̱nꞌ.
Vau
41 Tákuiꞌe Yahvé,
sa̱a̱ u̱nꞌ ña̱ va̱ꞌa̱ te̱ ku̱vi̱ta i̱ni̱ u̱nꞌ xaꞌa̱ꞌ i̱,
sa̱kakú u̱nꞌ yuꞌu̱ sa̱a̱ niiꞌ ni̱ kaꞌa̱n u̱nꞌ.
42 Sa̱kanꞌ te̱ ku̱vi̱ na̱ku̱i̱i̱n i̱ nuu̱ꞌ ne̱ xandiꞌiꞌ xiinꞌ i̱,
sa̱kanꞌ ña̱ i̱ni̱ xini i̱ kuento yu̱ꞌuꞌ u̱nꞌ.
43 Tü̱ꞌu̱n u̱nꞌ kuento u̱nꞌ ña̱ ndi̱xa̱ yu̱ꞌuꞌ i̱ nde̱e̱ i̱i̱n kivi̱ꞌ,
sa̱kanꞌ ña̱ ña̱ kaꞌán tyuunꞌ yoꞌó ku̱i̱ti̱ꞌ ndiatuꞌ i̱ni̱ i̱ tyi̱ndi̱e̱eꞌ yuꞌu̱.
44 Kaꞌán nimá i̱ ndii,
sa̱a̱ kivi̱ꞌ sa̱xinú i̱ tu̱ꞌu̱n nde̱iꞌ u̱nꞌ,
nde̱e̱ ndiꞌiꞌ ni̱ kivi̱ꞌ,
te̱ nde̱e̱ a̱ma̱ ka̱ ni̱.
45 Sa̱kanꞌ te̱ ku̱vi̱ ka̱ka̱ ndiká i̱,
sa̱kanꞌ ña̱ ña̱ kaꞌán tu̱ꞌu̱n nde̱iꞌ u̱nꞌ ndikún i̱.
46 Kaꞌán i̱ xaꞌa̱ꞌ sa̱kuuꞌ tu̱ꞌu̱n nde̱iꞌ u̱nꞌ nuu̱ꞌ kuaꞌa̱ꞌ te̱ xaꞌndia tyuunꞌ,
te̱ kütyani i̱ kii̱ꞌ xaaꞌ i̱ ña̱ ja̱a̱nꞌ.
47 Sa̱kanꞌ ña̱ ndani̱ i̱ tu̱ꞌu̱n nde̱iꞌ u̱nꞌ ja̱a̱nꞌ,
te̱ va̱ꞌa̱ va̱ kuni i̱ xini e̱ꞌ e̱.
48 Ndaniꞌiꞌ i̱ nda̱ꞌaꞌ i̱ te̱ kiꞌinꞌ kaꞌnuꞌ i̱ tu̱ꞌu̱n nde̱iꞌ u̱nꞌ,
te̱ ndani̱ tu̱ i̱ ña̱ ja̱a̱nꞌ,
xa̱ nuu̱ꞌ xaꞌa̱ꞌ ña̱ ja̱a̱nꞌ xanini i̱.
Zain
49 Na̱ka̱ꞌanꞌ u̱nꞌ xaꞌa̱ꞌ kuento ña̱ ni̱ ta̱xi̱ u̱nꞌ nuu̱ꞌ yuꞌu̱,
te̱ xikaꞌ nuuꞌ nuu̱ꞌ u̱nꞌ,
sa̱kanꞌ ña̱ yoꞌó ni̱ xa̱a̱ sa̱kanꞌ,
te̱ ndiatuꞌ i̱ni̱ i̱ tyi̱ndi̱e̱eꞌ ña̱ ja̱a̱nꞌ yuꞌu̱.
50 Te̱ ña̱ ja̱a̱nꞌ nduuꞌ ña̱ sakiꞌví yuꞌu̱ kii̱ꞌ sutyiꞌ i̱ni̱ i̱,
te̱ su̱vi̱ tu̱ a̱ nduuꞌ ña̱ xitoꞌ kivi̱ꞌ ñu̱u̱ i̱.
51 Ne̱ ñuñuꞌ ndii,
xïkuiín ni̱a̱ ña̱ xandiꞌiꞌ kuaꞌa̱ꞌ ni̱a̱ xiinꞌ i̱,
ndisu̱ yuꞌu̱ ndii,
nä̱ko̱o̱ i̱ ña̱ kaꞌán tu̱ꞌu̱n nde̱iꞌ u̱nꞌ.
52 Tákuiꞌe Yahvé,
kii̱ꞌ nakaꞌanꞌ i̱ xaꞌa̱ꞌ nde̱iꞌ ña̱ ni̱ kaꞌa̱n tyuunꞌ u̱nꞌ xta̱ꞌanꞌ kivi̱ꞌ ndii,
ña̱ ja̱a̱nꞌ sakiꞌví nimá i̱ kii̱ꞌ sutyiꞌ i̱ni̱ i̱.
53 Nasaáꞌ va̱ xíniꞌ i̱ kuuꞌ ne̱ xaaꞌ ña̱ ni̱a̱ꞌa,
sa̱kanꞌ ña̱ saxiooꞌ ni̱a̱ tu̱ꞌu̱n nde̱iꞌ u̱nꞌ.
54 Xaꞌa̱ꞌ ña̱ kaꞌán tu̱ꞌu̱n nde̱iꞌ u̱nꞌ nduuꞌ sa̱kuuꞌ ya̱a̱ ña̱ xitaꞌ i̱,
nuu̱ꞌ ñu̱ꞌuꞌ i̱i̱n yivi̱ꞌ yoꞌoꞌ miiꞌ nduuꞌ i̱ nde̱e̱ naa te̱ tukuꞌ.
55 Tákuiꞌe Yahvé,
nde̱e̱ ñu̱u nakaꞌanꞌ i̱ xaꞌa̱ꞌ ña̱ kaꞌnuꞌ va̱ ña̱ nduuꞌ yoꞌó,
te̱ saxinú i̱ sa̱kuuꞌ tu̱ꞌu̱n nde̱iꞌ u̱nꞌ.
56 Sa̱kanꞌ xaaꞌ i̱ i̱ꞌi̱n kivi̱ꞌ kuaꞌa̱n,
ku̱a̱tyi̱ ndii,
kande̱iꞌ saxinú i̱ tu̱ꞌu̱n nde̱iꞌ u̱nꞌ.
Chet
57 Tákuiꞌe Yahvé,
i̱i̱n nda̱a̱ꞌ yoꞌó ku̱i̱ti̱ꞌ nduuꞌ ña̱ kumiꞌ i̱,
taxiꞌ i̱ kuento i̱ ña̱ saxinú i̱ tu̱ꞌu̱n nde̱iꞌ u̱nꞌ.
58 Xiinꞌ i̱i̱n ka̱niiꞌ nimá i̱ sanduxa̱ꞌ i̱ sa̱a̱ i̱ ña̱ kuní u̱nꞌ,
sa̱a̱ u̱nꞌ ña̱ va̱ꞌa̱ te̱ ku̱vi̱ta i̱ni̱ u̱nꞌ xaꞌa̱ꞌ i̱ sa̱a̱ niiꞌ ni̱ ta̱xi̱ u̱nꞌ kuento u̱nꞌ.
59 Ni̱ xi̱ku̱nduꞌu̱ꞌ i̱ nakanini i̱ xaꞌa̱ꞌ sa̱a̱ xikaꞌ i̱ i̱i̱n yivi̱ꞌ,
te̱ tu̱ku̱ ni̱ sa̱kanꞌ ni̱ xa̱ꞌaꞌ i̱ saxinú i̱ tu̱ꞌu̱n nde̱iꞌ u̱nꞌ.
60 Yatyi̱ va̱ te̱ ni̱ xa̱ꞌaꞌ i̱ saxinú i̱ ña̱ kaꞌán tu̱ꞌu̱n nde̱iꞌ u̱nꞌ ja̱a̱nꞌ,
te̱ nï̱ sa̱kuatyí xiinꞌ miiꞌ xa̱tyiꞌ i̱.
61 Ne̱ ni̱a̱ꞌa ndii,
xikaꞌ ni̱a̱ kuni sa̱nakoꞌ ni̱a̱ yuꞌu̱ nuu̱ꞌ ku̱a̱tyi̱,
ndisu̱ yuꞌu̱ ndii,
kuäsa̱ꞌ nandoso̱ꞌ i̱ xaꞌa̱ꞌ tu̱ꞌu̱n nde̱iꞌ u̱nꞌ.
62 Nañu̱u sa̱va̱ ndokoó i̱,
taxiꞌ i̱ ña̱ tyi̱nda̱ni u̱nꞌ,
xaꞌa̱ꞌ a̱ ña̱ ña̱ xaꞌnú nda̱ku ku̱a̱tyi̱ ne̱ yivi̱ꞌ nduuꞌ u̱nꞌ.
63 Sa̱kuuꞌ ne̱ xitoꞌ yiꞌvi yoꞌó ndii,
ne̱ xiní taꞌanꞌ xiinꞌ i̱ nduuꞌ ni̱a̱,
sa̱kuuꞌ ne̱ saxinú tu̱ꞌu̱n nde̱iꞌ u̱nꞌ.
64 Tákuiꞌe Yahvé,
tyituꞌ vi̱ꞌ i̱i̱n ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ yoo ña̱ kuvita i̱ni̱ u̱nꞌ,
sa̱a̱ u̱nꞌ ña̱ va̱ꞌa̱ te̱ sa̱niaꞌá u̱nꞌ yuꞌu̱ tu̱ꞌu̱n nde̱iꞌ u̱nꞌ.
Tet
65 Tákuiꞌe Yahvé,
xa̱ kuaꞌa̱ꞌ va̱ ña̱ va̱ꞌa̱ ni̱ xa̱a̱ u̱nꞌ xaꞌa̱ꞌ yuꞌu̱,
te̱ xikaꞌ nuuꞌ nuu̱ꞌ u̱nꞌ,
sa̱a̱ niiꞌ ni̱ ta̱xi̱ u̱nꞌ kuento nuu̱ꞌ i̱.
66 Sa̱a̱ u̱nꞌ ña̱ va̱ꞌa̱ te̱ sa̱niaꞌá u̱nꞌ yuꞌu̱ ña̱ xanini va̱ꞌa̱ xiinꞌ ña̱ xini tuní,
sa̱kanꞌ ña̱ kandixaꞌ i̱ tu̱ꞌu̱n nde̱iꞌ u̱nꞌ.
67 Kii̱ꞌ kuní ka̱ ko̱to̱ ku̱a̱ꞌa̱ u̱nꞌ yuꞌu̱ xiinꞌ tu̱ndoꞌo̱ꞌ ndii,
nï̱ sa̱xinú i̱ ña̱ kaꞌán tu̱ꞌu̱n nde̱iꞌ u̱nꞌ,
ndisu̱ vi̱ti̱n ndii,
saxinú i̱ sa̱kuuꞌ ña̱ kaꞌán tu̱ꞌu̱n yu̱ꞌuꞌ u̱nꞌ.
68 Va̱ꞌa̱ va̱ ña̱ nduuꞌ yoꞌó,
te̱ xa̱ mi̱iꞌ ndiꞌiꞌ ña̱ va̱ꞌa̱ ku̱i̱ti̱ꞌ xaaꞌ u̱nꞌ,
sa̱a̱ u̱nꞌ ña̱ va̱ꞌa̱ te̱ sa̱niaꞌá u̱nꞌ yuꞌu̱ tu̱ꞌu̱n nde̱iꞌ u̱nꞌ.
69 Ne̱ ñuñuꞌ ndii,
tiinꞌ ku̱a̱tyi̱ nianí ni̱a̱ yuꞌu̱ tee̱ꞌ ndee köo̱ꞌ a̱ xaaꞌ i̱,
ndisu̱ yuꞌu̱ ndii,
xiinꞌ i̱i̱n ka̱niiꞌ nimá i̱ saxinú i̱ tu̱ꞌu̱n nde̱iꞌ u̱nꞌ.
70 Ne̱ yivi̱ꞌ ja̱a̱nꞌ ndii,
ni̱ ku̱vikaꞌ va̱ ni̱a̱,
sa̱kanꞌ na kuiiꞌ ni̱ ku̱xi̱i̱ va̱ nimá ni̱a̱,
ndisu̱ yuꞌu̱ ndii,
va̱ꞌa̱ va̱ kuni i̱ te̱ xaaꞌ i̱ ña̱ kaꞌán tu̱ꞌu̱n nde̱iꞌ u̱nꞌ.
71 Va̱ꞌa̱ yooꞌ a̱ nuu̱ꞌ yuꞌu̱ ña̱ ni̱ yoo̱ kuaꞌa̱ꞌ tu̱ndoꞌo̱ꞌ nuu̱ꞌ i̱,
sa̱kanꞌ ña̱ ña̱ ja̱a̱nꞌ ni̱ sa̱niaꞌá yuꞌu̱ te̱ saxinú i̱ tu̱ꞌu̱n nde̱iꞌ u̱nꞌ.
72 Nuu̱ꞌ yuꞌu̱ ndii,
ndiaaꞌ yaꞌviꞌ ka̱ tu̱ꞌu̱n nde̱iꞌ ña̱ kaꞌán yoꞌó,
te̱ sa̱kanꞌ ña̱ kumiꞌ i̱ kuaꞌa̱ꞌ va̱ mií xu̱ꞌunꞌ yuu̱ꞌ oro uun xu̱ꞌunꞌ yuu̱ꞌ plata.
Yod
73 Yoꞌó nduuꞌ ña̱ ni̱ sa̱kakuꞌ yuꞌu̱,
te̱ su̱vi̱ tu̱ u̱nꞌ ni̱ xa̱ꞌa̱ yuꞌu̱,
xaꞌa̱ꞌ a̱ ja̱a̱nꞌ na sa̱a̱ u̱nꞌ ña̱ va̱ꞌa̱ te̱ ta̱xi̱ u̱nꞌ ku̱nda̱ni̱ i̱,
te̱ sa̱xinú i̱ tu̱ꞌu̱n nde̱iꞌ u̱nꞌ.
74 Sa̱kuuꞌ ne̱ xitoꞌ kaꞌnuꞌ yoꞌó ndii,
nakuatiaꞌ nimá ni̱a̱ kii̱ꞌ xini ni̱a̱ yuꞌu̱,
sa̱kanꞌ ña̱ i̱ni̱ i̱ xini i̱ kuento u̱nꞌ.
75 Tákuiꞌe Yahvé,
xiní yuꞌu̱ ña̱ tu̱ꞌu̱n nde̱iꞌ u̱nꞌ ndii,
ña̱ nda̱ku nduuꞌ a̱,
te̱ kii̱ꞌ sandoꞌoꞌ u̱nꞌ yuꞌu̱ ndii,
ni̱ xa̱ta̱ꞌa̱n ña̱ sa̱a̱ u̱nꞌ ña̱ ja̱a̱nꞌ xiinꞌ i̱.
76 Ndisu̱ ña̱ kuvita i̱ni̱ u̱nꞌ xaꞌa̱ꞌ i̱ na ku̱ndu̱u̱ ña̱ sa̱kiꞌví yuꞌu̱,
sa̱a̱ niiꞌ ni̱ kaꞌa̱n u̱nꞌ xiinꞌ yuꞌu̱,
te̱ xikaꞌ nuuꞌ nuu̱ꞌ u̱nꞌ.
77 Ko̱to̱ va̱ u̱nꞌ yuꞌu̱ xiinꞌ ña̱ kuvita i̱ni̱ u̱nꞌ xaꞌa̱ꞌ i̱ te̱ ku̱ti̱a̱ku̱ i̱,
sa̱kanꞌ ña̱ va̱ꞌa̱ va̱ kuni i̱ xini i̱ tu̱ꞌu̱n nde̱iꞌ u̱nꞌ.
78 Na ku̱ka̱ꞌa̱n nuu̱ꞌ ne̱ ñuñuꞌ sa̱a̱ u̱nꞌ,
sa̱kanꞌ ña̱ köo̱ꞌ nde̱e̱ i̱i̱n xaꞌa̱ꞌ,
te̱ ni̱ sa̱taví ku̱a̱tyi̱ nianí ni̱a̱ yuꞌu̱,
ndisu̱ yuꞌu̱ ndii,
xaꞌa̱ꞌ tu̱ꞌu̱n nde̱iꞌ ku̱i̱ti̱ꞌ u̱nꞌ ka̱ni̱ni̱ i̱.
79 Na ndu̱i̱i̱n sa̱kuuꞌ ne̱ xitoꞌ kaꞌnuꞌ yoꞌó xiinꞌ yuꞌu̱,
sa̱kuuꞌ ne̱ xiní ña̱ kaꞌán tu̱ꞌu̱n nde̱iꞌ u̱nꞌ.
80 Na ko̱o̱ nda̱ku xa̱tyiꞌ nimá i̱ nuu̱ꞌ tu̱ꞌu̱n nde̱iꞌ u̱nꞌ,
sa̱kanꞌ te̱ köo̱ꞌ nde̱e̱ i̱i̱n xaꞌa̱ꞌ ña̱ ku̱tyani i̱ sa̱a̱ u̱nꞌ.
Caf
81 Xa̱ ni̱ xa̱vi xa̱va̱ꞌa̱ i̱ ndiatuꞌ i̱ ña̱ sa̱kakú u̱nꞌ yuꞌu̱ nda̱ꞌaꞌ te̱ ndasiꞌ yuꞌu̱,
ndisu̱ ndiatuꞌ na ndiatuꞌ i̱ni̱ i̱ ña̱ saxinú u̱nꞌ kuento u̱nꞌ ña̱ ni̱ ta̱xi̱ u̱nꞌ nuu̱ꞌ i̱.
82 Xa̱ ni̱ xa̱vi xa̱va̱ꞌa̱ ndu̱tyiꞌ nuu̱ꞌ i̱ ndiatuꞌ a̱ ña̱ sa̱xinú u̱nꞌ kuento u̱nꞌ ña̱ ni̱ ta̱xi̱ u̱nꞌ nuu̱ꞌ i̱,
kaꞌán i̱ xiinꞌ nimá i̱ ndii:
“¿A̱ma̱ vi̱ꞌ tu̱ sa̱kiꞌví Ndiosí yooꞌ?”,
katyi i̱.
83 Tee̱ꞌ ndee xa̱ ni̱ xa̱vi va̱ i̱,
te̱ ni̱ ku̱u̱ i̱i̱n ndooꞌ i̱,
te̱ kaaꞌ i̱ nde̱e̱ naa mata̱ i̱i̱nꞌ ña̱ xa̱ ni̱ ku̱ñuꞌma̱ ndo̱o̱ ndii,
nï̱ na̱ndoso̱ꞌ i̱ xaꞌa̱ꞌ tu̱ꞌu̱n nde̱iꞌ u̱nꞌ.
84 ¿Sa̱a̱ vi̱ꞌ taꞌanꞌ kivi̱ꞌ ku̱ti̱a̱ku̱ yuꞌu̱,
te̱ xikaꞌ nuuꞌ nuu̱ꞌ u̱nꞌ?
Te̱,
¿a̱ma̱ vi̱ꞌ sandoꞌoꞌ u̱nꞌ ne̱ kuni ka̱ꞌni̱ꞌ yuꞌu̱?
85 Ne̱ ñuñuꞌ ndii,
xa̱ ni̱ xa̱ti̱a̱ ni̱a̱ i̱i̱n poso̱ nuu̱ꞌ i̱ ndiani̱ te̱ na̱ma̱ i̱ i̱kanꞌ,
kaꞌanꞌ ni̱a̱,
te̱ ne̱ ja̱a̱nꞌ ndii,
ndasiꞌ ni̱a̱ tu̱ꞌu̱n nde̱iꞌ u̱nꞌ.
86 Sa̱kuuꞌ tu̱ꞌu̱n nde̱iꞌ u̱nꞌ ndii,
ña̱ ndi̱xa̱ nduuꞌ a̱,
sa̱a̱ u̱nꞌ ña̱ va̱ꞌa̱ te̱ tyi̱ndi̱e̱eꞌ u̱nꞌ yuꞌu̱,
sa̱kanꞌ ña̱ köo̱ꞌ nde̱e̱ i̱i̱n xaꞌa̱ꞌ te̱ kuni ka̱ꞌni̱ꞌ ni̱a̱ yuꞌu̱.
87 Ndee xa̱ku̱ꞌ va̱ te̱ ka̱ꞌni̱ꞌ ni̱a̱ yuꞌu̱,
ndisu̱ nï̱ na̱ko̱o̱ i̱ tu̱ꞌu̱n nde̱iꞌ u̱nꞌ.
88 Sa̱a̱ u̱nꞌ ña̱ va̱ꞌa̱ te̱ sa̱na̱kaá u̱nꞌ kivi̱ꞌ ñu̱u̱ i̱ xaꞌa̱ꞌ a̱ ña̱ kuvita i̱ni̱ u̱nꞌ xaꞌa̱ꞌ i̱,
sa̱kanꞌ te̱ sa̱xinú i̱ tu̱ꞌu̱n nde̱iꞌ u̱nꞌ.
Lámed
89 Tákuiꞌe Yahvé,
köo̱ꞌ kivi̱ꞌ namá kuento u̱nꞌ,
te̱ ndi̱viꞌ kanduꞌu̱ꞌ kutu̱ꞌ ña̱ ja̱a̱nꞌ.
90 Te̱ ña̱ xatyuunꞌ nda̱ku u̱nꞌ xaꞌa̱ꞌ ne̱ yivi̱ꞌ ndii,
köo̱ꞌ kivi̱ꞌ kuꞌu̱n ndi̱koꞌ a̱,
te̱ yoꞌó ni̱ tyi̱ka̱nduꞌu̱ꞌ ñu̱ꞌuꞌ i̱i̱n yivi̱ꞌ,
te̱ ni̱ ndoo̱ a̱ kanduꞌu̱ꞌ a̱.
91 Yoꞌó nduuꞌ ña̱ kaꞌán tyuunꞌ na yooꞌ sa̱kuuꞌ ña̱ꞌa̱ nde̱e̱ kivi̱ꞌ vi̱ti̱n,
sa̱kanꞌ ña̱ sa̱kuuꞌ ña̱ ja̱a̱nꞌ xikaꞌ nuuꞌ nuu̱ꞌ u̱nꞌ.
92 Naaꞌ sa̱kanꞌ te̱ süu̱ꞌ tu̱ꞌu̱n nde̱iꞌ u̱nꞌ nduuꞌ ña̱ xtani̱ va̱ i̱ sa̱xinú i̱ ndii,
xa̱ ni̱ xiꞌi̱ i̱ ni̱ xa̱a̱ ña̱ ndoꞌoꞌ i̱ sa̱aꞌ vi̱ꞌ.
93 Köo̱ꞌ kivi̱ꞌ na̱ndoso̱ꞌ i̱ xaꞌa̱ꞌ tu̱ꞌu̱n nde̱iꞌ u̱nꞌ,
sa̱kanꞌ ña̱ xiinꞌ ña̱ ja̱a̱nꞌ ni̱ ta̱xi̱ u̱nꞌ kivi̱ꞌ ñu̱u̱ i̱.
94 Kuenta yoꞌó nduuꞌ i̱,
sa̱a̱ u̱nꞌ ña̱ va̱ꞌa̱ te̱ sa̱kakú u̱nꞌ yuꞌu̱,
sa̱kanꞌ ña̱ ndi̱e̱eꞌ va̱ xanduxa̱ꞌ i̱ te̱ saxinú i̱ tu̱ꞌu̱n nde̱iꞌ u̱nꞌ.
95 Te̱ xaaꞌ ña̱ ni̱a̱ꞌa ndii,
níániꞌ ra̱ yuꞌu̱ i̱tyiꞌ te̱ ka̱ꞌni̱ꞌ ra̱ yuꞌu̱,
ndisu̱ yuꞌu̱ ndii,
xa̱ nuu̱ꞌ tu̱ꞌu̱n nde̱iꞌ ku̱i̱ti̱ꞌ u̱nꞌ ndiꞌni̱ i̱ sa̱xinú i̱.
96 Sa̱kuuꞌ ña̱ꞌa̱ ña̱ yoo i̱i̱n yivi̱ꞌ yoꞌoꞌ ndoñuꞌuꞌ tee̱ꞌ ndee va̱ꞌa̱ xa̱va̱ꞌa̱ ni̱ kuaꞌa̱ꞌ a̱,
ndisu̱ tu̱ꞌu̱n nde̱iꞌ yoꞌó ndii,
köo̱ꞌ kivi̱ꞌ ndoñuꞌuꞌ a̱.
Mem
97 Tákuiꞌe kuaꞌa,
ndani̱ xa̱va̱ꞌa̱ i̱ tu̱ꞌu̱n nde̱iꞌ u̱nꞌ,
sa̱kuuꞌ kivi̱ꞌ xanini i̱ xaꞌa̱ꞌ a̱.
98 Te̱ tu̱ꞌu̱n nde̱iꞌ u̱nꞌ ja̱a̱nꞌ xaaꞌ sa̱kanꞌ te̱ kuuꞌ xini tuní ka̱ i̱,
te̱ sa̱kanꞌ te̱ ndasiꞌ taꞌanꞌ xiinꞌ i̱.
99 Ni̱ ku̱xini tuní ka̱ i̱ te̱ sa̱kanꞌ te̱ ni̱ sa̱niaꞌá yuꞌu̱,
sa̱kanꞌ ña̱ sa̱a̱ kivi̱ꞌ xanini i̱ xaꞌa̱ꞌ tu̱ꞌu̱n nde̱iꞌ u̱nꞌ.
100 Nde̱e̱ xini tuní ka̱ i̱ te̱ sa̱kanꞌ te̱ xi̱xa̱ va̱,
sa̱kanꞌ ña̱ saxinú i̱ tu̱ꞌu̱n nde̱iꞌ u̱nꞌ.
101 Nde̱e̱ i̱i̱n nuu̱ꞌ ña̱ ni̱a̱ꞌa nï̱ xa̱a̱ i̱,
sa̱kanꞌ te̱ sa̱xinú ndo̱o̱ i̱ ña̱ kaꞌán tu̱ꞌu̱n nde̱iꞌ u̱nꞌ.
102 Nde̱e̱ i̱i̱n kivi̱ꞌ nï̱ ku̱xi̱o̱o̱ i̱ nuu̱ꞌ ña̱ kaꞌán tu̱ꞌu̱n nde̱iꞌ u̱nꞌ,
sa̱kanꞌ ña̱ va̱ꞌa̱ ni̱ sa̱niaꞌá u̱nꞌ yuꞌu̱.
103 Nde̱e̱ naa vixi̱ ñuñu̱ꞌ vi̱ꞌ,
vixi̱ tu̱ꞌu̱n nde̱iꞌ u̱nꞌ nuu̱ꞌ i̱,
vixi̱ a̱ nde̱e̱ naa vixi̱ ñuñu̱ꞌ kii̱ꞌ xiꞌiꞌ e̱ꞌ.
104 Tu̱ꞌu̱n nde̱iꞌ u̱nꞌ xaaꞌ sa̱kanꞌ te̱ nduuꞌ i̱ te̱ ndityi va̱,
xaꞌa̱ꞌ a̱ ja̱a̱nꞌ na kuiiꞌ ndasiꞌ i̱ sa̱kuuꞌ nuu̱ꞌ tu̱n vixi̱.
Nun
105 Tu̱ꞌu̱n nde̱iꞌ u̱nꞌ nduuꞌ nde̱e̱ naa ka̱ndiri ña̱ tuún xaꞌa̱ꞌ i̱ miiꞌ ka̱ kuaꞌa̱n i̱,
te̱ nduuꞌ tu̱ a̱ nde̱e̱ naa ñuꞌu̱ ña̱ tuún nuu̱ꞌ i̱ te̱ xikaꞌ i̱ i̱i̱n yivi̱ꞌ.
106 Ni̱ ta̱xi̱ i̱ kuento i̱ nuu̱ꞌ u̱nꞌ,
te̱ tu̱ku̱ sa̱kanꞌ ta̱xi̱ ni̱ tu̱ku̱u̱ e̱ꞌ
ña̱ sa̱xinú i̱ tu̱ꞌu̱n nde̱iꞌ nda̱ku u̱nꞌ.
107 Tákuiꞌe Yahvé,
xa̱ kuaꞌa̱ꞌ va̱ ni̱ ndo̱ꞌo̱ i̱,
sa̱a̱ u̱nꞌ ña̱ va̱ꞌa̱ te̱ sa̱ndaꞌa u̱nꞌ yuꞌu̱ sa̱a̱ niiꞌ ni̱ ta̱xi̱ u̱nꞌ kuento u̱nꞌ nuu̱ꞌ i̱.
108 Tákuiꞌe Yahvé,
sa̱a̱ u̱nꞌ ña̱ va̱ꞌa̱ te̱ na̱ti̱i̱n u̱nꞌ ya̱a̱ ña̱ xitaꞌ i̱ nuu̱ꞌ u̱nꞌ te̱ xakaꞌnuꞌ i̱ yoꞌó,
ña̱ nduuꞌ nde̱e̱ naa tu̱mani̱ꞌ,
te̱ sa̱niaꞌá u̱nꞌ yuꞌu̱ sa̱kuuꞌ tu̱ꞌu̱n nde̱iꞌ u̱nꞌ.
109 Xa̱u̱u̱n ni̱ te̱ namaꞌ i̱ nuu̱ꞌ ña̱ kueinꞌ ña̱ ku̱vi̱ i̱,
ndisu̱ köo̱ꞌ kivi̱ꞌ na̱ko̱o̱ i̱ ña̱ kaꞌán tu̱ꞌu̱n nde̱iꞌ u̱nꞌ.
110 Ne̱ xaaꞌ ña̱ ni̱a̱ꞌa ndii,
xikaꞌ ni̱a̱ ka̱ꞌni̱ꞌ ni̱a̱ yuꞌu̱,
ndisu̱ yuꞌu̱ ndii,
köo̱ꞌ kivi̱ꞌ ni̱ ku̱xi̱o̱o̱ i̱ nuu̱ꞌ tu̱ꞌu̱n nde̱iꞌ u̱nꞌ.
111 Tu̱ꞌu̱n nde̱iꞌ u̱nꞌ nduuꞌ ña̱ ndiaaꞌ yaꞌviꞌ va̱ ni̱ ta̱xi̱ u̱nꞌ nda̱ꞌaꞌ i̱ nde̱e̱ ndiꞌiꞌ ni̱ kivi̱ꞌ,
te̱ ña̱ ja̱a̱nꞌ nduuꞌ ña̱ xaaꞌ sa̱kanꞌ te̱ va̱ꞌa̱ kuni nimá i̱.
112 Xiinꞌ i̱i̱n ka̱niiꞌ nimá i̱ ni̱ ta̱xi̱ i̱ni̱ i̱ sa̱xinú i̱ tu̱ꞌu̱n nde̱iꞌ u̱nꞌ,
nde̱e̱ ndiꞌiꞌ ni̱ kivi̱ꞌ sa̱xinú i̱ e̱,
te̱ nde̱e̱ kuꞌu̱n ndi̱koꞌ kivi̱ꞌ ña̱ tiaku i̱.
Sámec
113 Ndasiꞌ i̱ sa̱kuuꞌ te̱ yivi̱ꞌ,
te̱ xasuviꞌ xiinꞌ miiꞌ,
ndisu̱ ndani̱ i̱ tu̱ꞌu̱n nde̱iꞌ u̱nꞌ.
114 Yoꞌó nduuꞌ ña̱ tyindieeꞌ yuꞌu̱,
te̱ nduuꞌ tu̱ u̱nꞌ nde̱e̱ naa ka̱a̱ tiꞌeꞌ ña̱ tiasi nuu̱ꞌ i̱ nuu̱ꞌ ña̱ kueinꞌ,
sa̱kanꞌ ña̱ i̱ni̱ i̱ xini i̱ tu̱ꞌu̱n yu̱ꞌuꞌ u̱nꞌ.
115 Sa̱kuuꞌ ndoꞌó,
ne̱ xaaꞌ ña̱ ni̱a̱ꞌa,
ku̱xi̱o̱o̱ ndo̱ꞌ nuu̱ꞌ i̱,
sa̱kanꞌ ña̱ yuꞌu̱ ndii,
tu̱ꞌu̱n nde̱iꞌ Ndiosí,
ña̱ xakaꞌnuꞌ i̱,
kuni sa̱xinú i̱.
116 Tákuiꞌe,
sa̱a̱ u̱nꞌ ña̱ va̱ꞌa̱ te̱ tyi̱ndi̱e̱eꞌ u̱nꞌ yuꞌu̱ sa̱a̱ niiꞌ ni̱ ta̱xi̱ u̱nꞌ kuento u̱nꞌ nuu̱ꞌ i̱,
te̱ ku̱ti̱a̱ku̱ i̱,
te̱ ta̱xi̱ u̱nꞌ ña̱ xinu̱ xna̱ꞌa̱ ña̱ ndiatuꞌ i̱ni̱ i̱ ja̱a̱nꞌ.
117 Tákuiꞌe,
sa̱a̱ u̱nꞌ ña̱ va̱ꞌa̱ te̱ tyi̱ndi̱e̱eꞌ u̱nꞌ yuꞌu̱,
te̱ köo̱ꞌ a̱ ku̱ndo̱ꞌo̱ i̱,
sa̱kanꞌ te̱ sa̱xinú i̱ tu̱ꞌu̱n nde̱iꞌ u̱nꞌ sa̱a̱ kivi̱ꞌ.
118 Sa̱kuuꞌ ne̱ kuxiooꞌ nuu̱ꞌ ña̱ kaꞌán tu̱ꞌu̱n nde̱iꞌ u̱nꞌ ndii,
saxiooꞌ tu̱ ña̱ꞌaꞌ yoꞌó nuu̱ꞌ u̱nꞌ,
sa̱kanꞌ ña̱ xa̱nuu̱ꞌ xaꞌa̱ꞌ ña̱ kuäsa̱ꞌ kuní xanini ni̱a̱.
119 Sa̱kuuꞌ ne̱ xaaꞌ ña̱ ni̱a̱ꞌa nuu̱ꞌ ñu̱ꞌuꞌ i̱i̱n yivi̱ꞌ ndii,
saxiooꞌ ña̱ꞌaꞌ u̱nꞌ nuu̱ꞌ u̱nꞌ nde̱e̱ naa mi̱ꞌiꞌ ku̱i̱ti̱ꞌ,
xaꞌa̱ꞌ a̱ ja̱a̱nꞌ na yuꞌu̱ ndii,
ndani̱ va̱ i̱ tu̱ꞌu̱n nde̱iꞌ u̱nꞌ.
120 Nde̱e̱ kisiꞌ vi̱ꞌ a̱ yuꞌu̱ xaꞌa̱ꞌ a̱ ña̱ yiꞌvi va̱ i̱ yoꞌó kii̱ꞌ yoo i̱ nuu̱ꞌ u̱nꞌ,
te̱ yiꞌvi va̱ tu̱ i̱ xaꞌa̱ꞌ sa̱kuuꞌ ña̱ kaꞌán tu̱ꞌu̱n nde̱iꞌ u̱nꞌ,
sa̱kanꞌ na kuiiꞌ xitoꞌ kaꞌnuꞌ i̱ e̱.
Ayin
121 Tä̱xi̱ u̱nꞌ na̱ti̱i̱n te̱ ndasiꞌ taꞌanꞌ xiinꞌ i̱ yuꞌu̱,
sa̱kanꞌ ña̱ ni̱ xa̱tyuunꞌ nda̱ku i̱,
te̱ ni̱ xika̱ tu̱ i̱ sa̱a̱ kande̱iꞌ.
122 Kaꞌán ndaꞌvi i̱ xiinꞌ u̱nꞌ ña̱ sa̱a̱ u̱nꞌ ña̱ va̱ꞌa̱ te̱ ko̱to̱ u̱nꞌ yuꞌu̱,
te̱ tä̱xi̱ u̱nꞌ ña̱ sa̱ndoꞌoꞌ te̱ ndasiꞌ taꞌanꞌ xiinꞌ i̱ ja̱a̱nꞌ yuꞌu̱.
123 Xa̱ ni̱ xa̱vi xa̱va̱ꞌa̱ ndu̱tyiꞌ nuu̱ꞌ i̱ ndiatuꞌ i̱ ki̱xi̱n u̱nꞌ te̱ sa̱kakú u̱nꞌ yuꞌu̱,
te̱ ku̱ni̱ tu̱ i̱ sa̱xinú u̱nꞌ kuento u̱nꞌ ña̱ ni̱ ta̱xi̱ u̱nꞌ nuu̱ꞌ i̱.
124 Mani̱ꞌ ku̱u̱ u̱nꞌ xiinꞌ yuꞌu̱,
te̱ xikaꞌ nuuꞌ nuu̱ꞌ u̱nꞌ sa̱a̱ niiꞌ kuvita i̱ni̱ u̱nꞌ xaꞌa̱ꞌ i̱,
te̱ sa̱niaꞌá tu̱ u̱nꞌ yuꞌu̱ sa̱kuuꞌ tu̱ꞌu̱n nde̱iꞌ u̱nꞌ.
125 Sa̱a̱ u̱nꞌ ña̱ va̱ꞌa̱ te̱ ta̱xi̱ u̱nꞌ ña̱ ku̱nda̱ni̱ yuꞌu̱,
te̱ xikaꞌ nuuꞌ u̱nꞌ,
sa̱kanꞌ te̱ ku̱nda̱ni̱ i̱ sa̱kuuꞌ tu̱ꞌu̱n nde̱iꞌ u̱nꞌ.
126 Tákuiꞌe Yahvé,
xa̱ ni̱ xa̱a̱ kivi̱ꞌ ña̱ sa̱ndoꞌoꞌ u̱nꞌ ne̱ yivi̱ꞌ,
sa̱kanꞌ ña̱ xa̱ ni̱ xaꞌnu̱ ndo̱o̱ ne̱ xaaꞌ ña̱ ni̱a̱ꞌa ja̱a̱nꞌ tu̱ꞌu̱n nde̱iꞌ u̱nꞌ.
127 Sa̱kanꞌ na kuiiꞌ ndani̱ va̱ yuꞌu̱ tu̱ꞌu̱n nde̱iꞌ u̱nꞌ ja̱a̱nꞌ,
ndani̱ yaꞌa̱ ka̱ i̱ e̱ te̱ sa̱kanꞌ oro uun yaꞌa̱ ka̱ te̱ sa̱kanꞌ oro ña̱ va̱ꞌa̱ ka̱.
128 Sa̱kanꞌ na kuiiꞌ ña̱ nda̱ku ka̱ nduuꞌ sa̱kuuꞌ tu̱ꞌu̱n nde̱iꞌ u̱nꞌ nuu̱ꞌ i̱,
te̱ sa̱kanꞌ sa̱kuuꞌ ña̱ꞌa̱,
te̱ ndasiꞌ i̱ sa̱kuuꞌ i̱tyiꞌ ña̱ xini xaꞌanꞌ ña̱ ndikún ne̱ yivi̱ꞌ.
Pe
129 Nda̱tu̱nꞌ va̱ kaꞌán tu̱ꞌu̱n nde̱iꞌ u̱nꞌ
xaꞌa̱ꞌ a̱ ja̱a̱nꞌ na kuiiꞌ taxaꞌa e̱ꞌ e̱ nimá i̱.
130 Kii̱ꞌ sanakuatyiꞌ i̱i̱n ne̱ yivi̱ꞌ ña̱ kaꞌán tu̱ꞌu̱n nde̱iꞌ u̱nꞌ ndii,
nde̱e̱ ne̱ yivi̱ꞌ,
ne̱ köo̱ꞌ a̱ xiní xa̱tyiꞌ,
kundani̱ a̱.
131 Nde̱e̱ ni̱a̱ꞌa̱ vi̱ꞌ xikán i̱ nuu̱ꞌ u̱nꞌ,
te̱ kaꞌán ndaꞌvi i̱ xiinꞌ u̱nꞌ,
xaꞌa̱ꞌ a̱ ña̱ ndi̱e̱eꞌ va̱ kaꞌán nimá i̱ kuni na̱ti̱i̱n i̱ tu̱ꞌu̱n nde̱iꞌ u̱nꞌ.
132 Ndiosí,
sa̱a̱ u̱nꞌ ña̱ va̱ꞌa̱ te̱ ku̱vi̱ta i̱ni̱ u̱nꞌ xaꞌa̱ꞌ i̱
nde̱e̱ naa xaaꞌ u̱nꞌ xiinꞌ sa̱kuuꞌ ne̱ ndani̱ yoꞌó.
133 Sa̱a̱ u̱nꞌ ña̱ va̱ꞌa̱ te̱ tyi̱ndi̱e̱eꞌ u̱nꞌ yuꞌu̱,
te̱ ka̱ka̱ i̱ sa̱a̱ niiꞌ kaꞌán tu̱ꞌu̱n yu̱ꞌuꞌ u̱nꞌ,
sa̱kanꞌ te̱ vï̱ko̱niꞌiꞌ nde̱e̱ i̱i̱n ña̱ ni̱a̱ꞌa yuꞌu̱.
134 Sa̱a̱ u̱nꞌ ña̱ va̱ꞌa̱ te̱ ko̱to̱ u̱nꞌ yuꞌu̱ nuu̱ꞌ ne̱ xaaꞌ ña̱ ni̱a̱ꞌa te̱ sä̱ndoꞌoꞌ ni̱a̱ yuꞌu̱,
sa̱kanꞌ te̱ ku̱vi̱ sa̱xinú i̱ tu̱ꞌu̱n nde̱iꞌ u̱nꞌ.
135 Sa̱a̱ u̱nꞌ ña̱ va̱ꞌa̱ te̱ va̱ꞌa̱ kuni u̱nꞌ ku̱ni̱ u̱nꞌ yuꞌu̱,
te̱ xikaꞌ nuuꞌ nuu̱ꞌ u̱nꞌ,
te̱ sa̱ñuꞌuꞌ u̱nꞌ yuꞌu̱,
te̱ sa̱niaꞌá tu̱ u̱nꞌ yuꞌu̱ tu̱ꞌu̱n nde̱iꞌ u̱nꞌ.
136 Nde̱e̱ naa kuaꞌa̱ꞌ ti̱kui i̱ti̱a̱ vi̱ꞌ kuaꞌa̱ꞌ ti̱kui kieeꞌ nuu̱ꞌ i̱ ña̱ xakuꞌ i̱
xaꞌa̱ꞌ a̱ ña̱ küni sa̱xinú ne̱ yivi̱ꞌ tu̱ꞌu̱n nde̱iꞌ u̱nꞌ.
Tsade
137 Tákuiꞌe Yahvé,
yoꞌó ndii,
xatyuunꞌ nda̱ku u̱nꞌ,
te̱ ña̱ nda̱ku tu̱ nduuꞌ tu̱ꞌu̱n nde̱iꞌ u̱nꞌ.
138 Sa̱kuuꞌ tu̱ꞌu̱n nde̱iꞌ ndii,
ña̱ nda̱ku nduuꞌ a̱,
te̱ xataꞌa̱n ña̱ i̱ni̱ ndu̱ ku̱ni̱ ndu̱ a̱.
139 Xa̱ yoo i̱ ku̱vi̱ i̱ ña̱ ndoꞌoꞌ i̱ xaꞌa̱ꞌ a̱ ña̱ xiꞌé va̱ i̱,
sa̱kanꞌ ña̱ sa̱kuuꞌ te̱ ndasiꞌ taꞌanꞌ xiinꞌ i̱ ndii,
ni̱ na̱ndoso̱ꞌ ra̱ xaꞌa̱ꞌ tu̱ꞌu̱n nde̱iꞌ u̱nꞌ.
140 Tu̱ꞌu̱n nde̱iꞌ u̱nꞌ ndii,
yaꞌa̱ ña̱ ndo̱o̱ nduuꞌ a̱,
sa̱kanꞌ na kuiiꞌ ndani̱ ña̱ꞌaꞌ yuꞌu̱,
te̱ xikaꞌ nuuꞌ nuu̱ꞌ u̱nꞌ.
141 Yuꞌu̱ ndii,
te̱ ndaꞌvi so̱ꞌo̱ nduuꞌ i̱,
te̱ ndasiꞌ va̱ tu̱ ne̱ yivi̱ꞌ yuꞌu̱,
ndisu̱ nändoso̱ꞌ i̱ nde̱e̱ i̱i̱n tu̱ꞌu̱n nde̱iꞌ u̱nꞌ.
142 Yoꞌó ndii,
nde̱e̱ ndiꞌiꞌ ni̱ kivi̱ꞌ xatyuunꞌ nda̱ku u̱nꞌ,
te̱ tu̱ꞌu̱n nde̱iꞌ u̱nꞌ ndii,
ña̱ ndi̱xa̱ nduuꞌ sa̱kuuꞌ a̱.
143 Te̱ kii̱ꞌ ndiꞌni̱ va̱ i̱ xaꞌa̱ꞌ a̱ ña̱ yoo tu̱ndoꞌo̱ꞌ nuu̱ꞌ i̱ ndii,
tu̱ꞌu̱n nde̱iꞌ u̱nꞌ ja̱a̱nꞌ nduuꞌ ña̱ sakiꞌví nimá i̱.
144 Tu̱ꞌu̱n nde̱iꞌ u̱nꞌ ndii,
nde̱e̱ ndiꞌiꞌ ni̱ kivi̱ꞌ nduuꞌ a̱ ña̱ nda̱ku,
sa̱a̱ u̱nꞌ ña̱ va̱ꞌa̱ te̱ ta̱xi̱ u̱nꞌ ña̱ ku̱nda̱ni̱ i̱ ña̱ kaꞌán a̱,
te̱ ku̱vi̱ ku̱ti̱a̱ku̱ i̱.
Cof
145 Xiinꞌ i̱i̱n ka̱niiꞌ nimá i̱ kaꞌán i̱ si̱u̱ꞌunꞌ xiinꞌ u̱nꞌ,
Yahvé,
sa̱a̱ u̱nꞌ ña̱ va̱ꞌa̱ te̱ na̱ku̱i̱i̱n u̱nꞌ ña̱ kaꞌán i̱,
te̱ sa̱xinú i̱ sa̱kuuꞌ ña̱ kaꞌán tu̱ꞌu̱n nde̱iꞌ u̱nꞌ.
146 Nuu̱ꞌ yoꞌó kaꞌán ndaꞌvi i̱,
sa̱a̱ u̱nꞌ ña̱ va̱ꞌa̱ te̱ sa̱kakú u̱nꞌ yuꞌu̱,
sa̱kanꞌ te̱ ku̱vi̱ sa̱xinú i̱ tu̱ꞌu̱n nde̱iꞌ u̱nꞌ.
147 Ni̱a̱ꞌa̱ va̱ ña̱ kuní ka̱ kitu̱ꞌ ndokoó i̱,
te̱ kaꞌán ndaꞌvi i̱ xiinꞌ u̱nꞌ ña̱ tyi̱ndi̱e̱eꞌ u̱nꞌ yuꞌu̱,
te̱ ndiatuꞌ i̱ni̱ i̱ xini tu̱ꞌu̱n yu̱ꞌuꞌ u̱nꞌ.
148 Niiꞌ ñu̱u kïxín i̱ ña̱ xanini i̱ xaꞌa̱ꞌ tu̱ꞌu̱n nde̱iꞌ u̱nꞌ.
149 Tákuiꞌe Yahvé,
ku̱ni̱ so̱ꞌo̱ u̱nꞌ ña̱ kaꞌán ndaꞌvi i̱ xiinꞌ u̱nꞌ xaꞌa̱ꞌ a̱ ña̱ kuvita i̱ni̱ u̱nꞌ xaꞌa̱ꞌ i̱,
te̱ ko̱to̱ u̱nꞌ kivi̱ꞌ ñu̱u̱ i̱ xaꞌa̱ꞌ a̱ ña̱ xatyuunꞌ nda̱ku u̱nꞌ.
150 Ne̱ sandoꞌoꞌ yuꞌu̱ ndii,
so̱ꞌo̱ xaaꞌ ka̱ ni̱a̱ ña̱ ni̱a̱ꞌa,
te̱ so̱ꞌo̱ ni̱ ku̱xikaꞌ ndi̱ꞌi̱ ni̱a̱ nuu̱ꞌ tu̱ꞌu̱n nde̱iꞌ u̱nꞌ.
151 Tákuiꞌe Yahvé,
yoꞌó ndii,
ya̱ti̱n yoo u̱nꞌ nuu̱ꞌ i̱,
te̱ sa̱kuuꞌ tu̱ꞌu̱n nde̱iꞌ u̱nꞌ ndii,
ña̱ ndi̱xa̱ nduuꞌ a̱.
152 Nde̱e̱ xta̱ꞌanꞌ vi̱ꞌ ni̱ ku̱nda̱ni̱ i̱ ña̱ tu̱ꞌu̱n nde̱iꞌ u̱nꞌ ndii,
ni̱ tyi̱ka̱nduꞌu̱ꞌ u̱nꞌ u̱n,
te̱ yoo a̱ nde̱e̱ ndiꞌiꞌ ni̱ kivi̱ꞌ.
Resh
153 Ko̱to̱ u̱nꞌ sa̱a̱ vi̱ꞌ kuaꞌa̱ꞌ ndoꞌoꞌ i̱,
te̱ sa̱a̱ u̱nꞌ ña̱ va̱ꞌa̱ te̱ sa̱kakú u̱nꞌ yuꞌu̱,
sa̱kanꞌ ña̱ tïaꞌa̱an na̱ndoso̱ꞌ i̱ xaꞌa̱ꞌ tu̱ꞌu̱n nde̱iꞌ u̱nꞌ.
154 Na̱kaꞌa̱n xaꞌa̱ꞌ i̱,
te̱ sa̱kakú tu̱ u̱nꞌ yuꞌu̱,
sa̱a̱ u̱nꞌ ña̱ va̱ꞌa̱ te̱ ko̱to̱ u̱nꞌ kivi̱ꞌ ñu̱u̱ i̱ sa̱a̱ niiꞌ ni̱ ta̱xi̱ u̱nꞌ kuento u̱nꞌ nuu̱ꞌ i̱.
155 Sa̱kuuꞌ ne̱ xaaꞌ ña̱ ni̱a̱ꞌa ndii,
xikaꞌ va̱ yoo ni̱a̱ nuu̱ꞌ ña̱ sa̱kakú ña̱ꞌaꞌ u̱nꞌ,
Tákuiꞌe,
xaꞌa̱ꞌ a̱ ña̱ xäaꞌ ni̱a̱ kuenta kuuꞌ tu̱ꞌu̱n nde̱iꞌ u̱nꞌ.
156 Tákuiꞌe Yahvé,
kuaꞌa̱ꞌ va̱ kuvita i̱ni̱ u̱nꞌ xaꞌa̱ꞌ ne̱ yivi̱ꞌ,
sa̱a̱ u̱nꞌ ña̱ va̱ꞌa̱ te̱ ko̱to̱ u̱nꞌ kivi̱ꞌ ñu̱u̱ i̱ xaꞌa̱ꞌ a̱ ña̱ ña̱ xatyuunꞌ nda̱ku nduuꞌ u̱nꞌ.
157 Kuaꞌa̱ꞌ va̱ te̱ ndasiꞌ taꞌanꞌ xiinꞌ i̱,
te̱ kuni ka̱ꞌni̱ꞌ ra̱ yuꞌu̱,
ndisu̱ yuꞌu̱ ndii,
köo̱ꞌ kivi̱ꞌ na̱ko̱o̱ i̱ ña̱ saxinú i̱ tu̱ꞌu̱n nde̱iꞌ u̱nꞌ.
158 Xtäni̱ xa̱tyiꞌ i̱ ña̱ xaaꞌ te̱ sikiꞌ,
sa̱kanꞌ ña̱ säxinú ra̱ ña̱ kaꞌán tu̱ꞌu̱n nde̱iꞌ u̱nꞌ.
159 Ko̱to̱ u̱nꞌ,
Tákuiꞌe Yahvé,
yuꞌu̱ ndii,
ndani̱ va̱ i̱ tu̱ꞌu̱n nde̱iꞌ u̱nꞌ,
sa̱a̱ u̱nꞌ ña̱ va̱ꞌa̱ te̱ ko̱to̱ u̱nꞌ kivi̱ꞌ ñu̱u̱ i̱ sa̱a̱ niiꞌ kuvita i̱ni̱ u̱nꞌ xaꞌa̱ꞌ i̱.
160 Sa̱kuuꞌ ña̱ kaꞌán tu̱ꞌu̱n yu̱ꞌuꞌ u̱nꞌ ndii,
ña̱ ndi̱xa̱ nduuꞌ a̱,
te̱ ña̱ xaꞌnú nda̱ku u̱nꞌ ku̱a̱tyi̱ ne̱ yivi̱ꞌ ndii,
nde̱e̱ ndiꞌiꞌ ni̱ kivi̱ꞌ ko̱o̱ a̱.
Sin
161 Sandoꞌoꞌ te̱ kuuꞌ nu̱uꞌ yuꞌu̱ tee̱ꞌ ndee köo̱ꞌ nde̱e̱ i̱i̱n xaꞌa̱ꞌ,
ndisu̱ yuꞌu̱ ndii,
tu̱ꞌu̱n nde̱iꞌ yoꞌó ku̱i̱ti̱ꞌ yiꞌvi i̱.
162 Va̱ꞌa̱ va̱ kuni i̱ xini i̱ tu̱ꞌu̱n yu̱ꞌuꞌ u̱nꞌ,
nde̱e̱ naa i̱i̱n te̱ yivi̱ꞌ,
te̱ ni̱ na̱ka̱ya̱ kuaꞌa̱ꞌ xa̱va̱ꞌa̱ ña̱ vikaꞌ.
163 Ndasiꞌ va̱ i̱,
te̱ küni ko̱to̱ xa̱tyiꞌ i̱ tu̱ꞌu̱n vixi̱,
ndisu̱ ndani̱ i̱ tu̱ꞌu̱n nde̱iꞌ u̱nꞌ.
164 Uxa̱ i̱tyiꞌ xakaꞌnuꞌ i̱ yoꞌó i̱ꞌi̱n kivi̱ꞌ kuaꞌa̱n
xaꞌa̱ꞌ a̱ ña̱ ña̱ nda̱ku va̱ nduuꞌ sa̱kuuꞌ tu̱ꞌu̱n nde̱iꞌ u̱nꞌ.
165 Ne̱ yivi̱ꞌ,
ne̱ ndani̱ tu̱ꞌu̱n nde̱iꞌ u̱nꞌ ndii,
ndieeꞌ mani̱ꞌ xa̱va̱ꞌa̱ ne̱ ja̱a̱nꞌ,
te̱ köo̱ꞌ kivi̱ꞌ koyo̱ ni̱a̱ nuu̱ꞌ ña̱ ni̱a̱ꞌa.
166 Tákuiꞌe Yahvé,
kaꞌán nimá i̱ ña̱ sa̱kakú u̱nꞌ yuꞌu̱,
sa̱kanꞌ na kuiiꞌ saxinú i̱ tu̱ꞌu̱n nde̱iꞌ u̱nꞌ.
167 Saxinú i̱ sa̱kuuꞌ tu̱ꞌu̱n nde̱iꞌ u̱nꞌ,
sa̱kanꞌ ña̱ ndani̱ xa̱va̱ꞌa̱ e̱.
168 Saxinú yuꞌu̱ sa̱kuuꞌ tu̱ꞌu̱n nde̱iꞌ u̱nꞌ xiinꞌ ña̱ kaꞌán tyuunꞌ u̱nꞌ,
sa̱kanꞌ ña̱ xiní yoꞌó sa̱kuuꞌ ña̱ xaaꞌ i̱.
Tau
169 Tákuiꞌe Yahvé,
sa̱a̱ u̱nꞌ ña̱ va̱ꞌa̱ te̱ ku̱ni̱ so̱ꞌo̱ u̱nꞌ sa̱kuuꞌ ña̱ kaꞌán ndaꞌvi i̱ xiinꞌ u̱nꞌ,
te̱ ta̱xi̱ u̱nꞌ ña̱ xini tuní,
te̱ ku̱nda̱ni̱ i̱ ña̱ kuní u̱nꞌ sa̱a̱ i̱ sa̱a̱ niiꞌ ni̱ ta̱xi̱ u̱nꞌ kuento u̱nꞌ nuu̱ꞌ i̱.
170 Sa̱a̱ u̱nꞌ ña̱ va̱ꞌa̱ te̱ ku̱ni̱ so̱ꞌo̱ u̱nꞌ si̱u̱ꞌunꞌ ña̱ kaꞌán i̱ xiinꞌ u̱nꞌ,
te̱ sa̱kakú u̱nꞌ yuꞌu̱ sa̱a̱ niiꞌ ni̱ ta̱xi̱ u̱nꞌ kuento u̱nꞌ nuu̱ꞌ i̱.
171 Xa̱ mi̱iꞌ ndiꞌiꞌ ya̱a̱ ña̱ xakaꞌnuꞌ i̱ yoꞌó ka̱ta̱ i̱ nuu̱ꞌ u̱nꞌ,
sa̱kanꞌ ña̱ xa̱ ni̱ sa̱niaꞌá u̱nꞌ yuꞌu̱ tu̱ꞌu̱n nde̱iꞌ u̱nꞌ.
172 Te̱ kaꞌa̱n ndo̱so̱ꞌ i̱ kuento u̱nꞌ,
sa̱kanꞌ ña̱ sa̱kuuꞌ tu̱ꞌu̱n nde̱iꞌ u̱nꞌ ndii,
ña̱ nda̱ku nduuꞌ a̱.
173 Ko̱o̱ tu̱ꞌva̱ va̱ u̱nꞌ te̱ tyi̱ndi̱e̱eꞌ u̱nꞌ yuꞌu̱ kii̱ꞌ yoo i̱ tu̱ndoꞌo̱ꞌ,
sa̱kanꞌ ña̱ xa̱ i̱i̱n nda̱a̱ꞌ a̱ ni̱ ta̱xi̱ i̱ni̱ i̱ ña̱ ku̱ndiku̱n i̱ tu̱ꞌu̱n nde̱iꞌ u̱nꞌ.
174 Tákuiꞌe Yahvé,
kaꞌán va̱ nimá i̱ ña̱ sa̱kakú u̱nꞌ yuꞌu̱,
te̱ va̱ꞌa̱ va̱ kuni i̱ xini i̱ tu̱ꞌu̱n nde̱iꞌ u̱nꞌ.
175 Sa̱a̱ u̱nꞌ ña̱ va̱ꞌa̱ te̱ ta̱xi̱ u̱nꞌ ku̱ti̱a̱ku̱ i̱,
te̱ sa̱kaꞌnuꞌ i̱ yoꞌó,
te̱ na tyi̱ndi̱e̱eꞌ tu̱ tu̱ꞌu̱n nde̱iꞌ u̱nꞌ yuꞌu̱.
176 Xikaꞌ ndo̱so̱ꞌ yuꞌu̱,
te̱ xikaꞌ nuuꞌ nuu̱ꞌ u̱nꞌ,
i̱i̱n yivi̱ꞌ nde̱e̱ naa i̱i̱n mbe̱e̱,
tiꞌ ni̱ xita̱,
ni̱a̱ꞌa̱ kiꞌi̱ꞌ te̱ tyi̱ndi̱e̱eꞌ u̱nꞌ yuꞌu̱,
sa̱kanꞌ ña̱ köo̱ꞌ kivi̱ꞌ ni̱ na̱ndoso̱ꞌ i̱ xaꞌa̱ꞌ tu̱ꞌu̱n nde̱iꞌ u̱nꞌ.