Yoꞌoꞌ kaꞌán a̱ ña̱ kande̱iꞌ ta̱xi̱ e̱ꞌ ña̱ tyi̱nda̱ni Ndiosí xaꞌa̱ꞌ a̱ ña̱ ni̱ sa̱kakú a̱ yooꞌ
118
Na sa̱kaꞌnuꞌ e̱ꞌ Yahvé,
sa̱kanꞌ ña̱ ña̱ va̱ꞌa̱ va̱ nduuꞌ a̱,
te̱ nde̱e̱ ndiꞌiꞌ ni̱ kivi̱ꞌ kuvita i̱ni̱ a̱ xaꞌa̱ꞌ e̱ꞌ.
2 Na kaꞌa̱n sa̱kuuꞌ yooꞌ,
ne̱ vi̱ꞌe̱ Israel,
vi̱ti̱n ndii:
“Nde̱e̱ ndiꞌiꞌ ni̱ kivi̱ꞌ kuvita i̱ni̱ Ndiosí xaꞌa̱ꞌ e̱ꞌ”,
katyi̱ e̱ꞌ.
3 Na kaꞌa̱n sa̱kuuꞌ ne̱ vi̱ꞌe̱ Aarón ndii:
“Nde̱e̱ ndiꞌiꞌ ni̱ kivi̱ꞌ kuvita i̱ni̱ Ndiosí xaꞌa̱ꞌ e̱ꞌ”,
katyi̱ ni̱a̱.
4 Na kaꞌa̱n sa̱kuuꞌ ne̱ yiꞌvi Yahvé ndii:
“Nde̱e̱ ndiꞌiꞌ ni̱ kivi̱ꞌ kuvita i̱ni̱ Ndiosí xaꞌa̱ꞌ e̱ꞌ”,
katyi̱ ni̱a̱.
5 Kii̱ꞌ ndiꞌni̱ va̱ nimá i̱,
te̱ ni̱ kaꞌa̱n ndaꞌvi i̱ xiinꞌ Yahvé,
te̱ ni̱ na̱ku̱i̱i̱n a̱,
te̱ ni̱ sa̱ndaꞌa a̱ yuꞌu̱ nuu̱ꞌ ña̱ sandiꞌni̱ nimá i̱ ja̱a̱nꞌ.
6 Yahvé yoo xiinꞌ i̱,
xaꞌa̱ꞌ a̱ ja̱a̱nꞌ na kuäsa̱ꞌ yiꞌvi i̱
yo̱o̱ ka̱ nduuꞌ ña̱ ku̱vi̱ sa̱a̱ ne̱ yivi̱ꞌ xiinꞌ i̱.
7 Ña̱ ndi̱xa̱ nduuꞌ a̱ ndii,
Yahvé yoo xiinꞌ i̱,
te̱ ña̱ ja̱a̱nꞌ tyindieeꞌ yuꞌu̱,
sa̱kanꞌ na kuiiꞌ ku̱ni̱ ndu̱tyiꞌ nuu̱ꞌ i̱ ña̱ ka̱nandoo i̱ te̱ ndasiꞌ taꞌanꞌ xiinꞌ i̱.
8 Va̱ꞌa̱ ka̱ nduuꞌ a̱ ña̱ i̱ni̱ e̱ꞌ ku̱ni̱ e̱ꞌ Yahvé,
te̱ sa̱kanꞌ ña̱ i̱ni̱ e̱ꞌ ku̱ni̱ e̱ꞌ ne̱ yivi̱ꞌ.
9 Va̱ꞌa̱ ka̱ nduuꞌ a̱ ña̱ i̱ni̱ e̱ꞌ ku̱ni̱ e̱ꞌ Yahvé,
te̱ sa̱kanꞌ ña̱ i̱ni̱ e̱ꞌ ku̱ni̱ e̱ꞌ kiꞌinꞌ te̱ kaꞌnuꞌ.
10 Sa̱kuuꞌ ne̱ tukuꞌ ni̱ na̱ka̱si̱ nuu̱ꞌ i̱,
ndisu̱ xiinꞌ ña̱ ndi̱e̱eꞌ Yahvé ni̱ xa̱ꞌni̱ꞌ i̱ sa̱kuuꞌ ni̱a̱.
11 Ni̱ na̱ka̱si̱ ni̱a̱ yuꞌu̱,
te̱ ni̱ xika̱ ni̱a̱ ka̱ꞌni̱ꞌ ni̱a̱ yuꞌu̱,
ndisu̱ xiinꞌ ña̱ ndi̱e̱eꞌ Yahvé ni̱ xa̱ꞌni̱ꞌ i̱ sa̱kuuꞌ ni̱a̱.
12 Ni̱ kati̱ ni̱a̱ yuꞌu̱ nde̱e̱ naa yoko̱,
te̱ ni̱ na̱saa̱ꞌ xa̱va̱ꞌa̱ ni̱a̱ ni̱ xi̱ni̱ ni̱a̱ yuꞌu̱ nduuꞌ ni̱a̱ nde̱e̱ naa ñuꞌu̱,
ndisu̱ xiinꞌ ña̱ ndi̱e̱eꞌ Yahvé ni̱ xa̱ꞌni̱ꞌ i̱ sa̱kuuꞌ ni̱a̱.
13 Ne̱ ndasiꞌ taꞌanꞌ xiinꞌ i̱ ndii,
ni̱ xa̱a̱ ni̱a̱ sa̱kuuꞌ ña̱ nduxa̱ꞌ te̱ ka̱ꞌni̱ꞌ ni̱a̱ yuꞌu̱,
ndisu̱ Yahvé ni̱ tyi̱ndi̱e̱eꞌ yuꞌu̱.
14 Yahvé taxiꞌ ndi̱e̱e̱ꞌ i̱,
te̱ xitaꞌ i̱ nuu̱ꞌ a̱,
te̱ su̱vi̱ tu̱ a̱ nduuꞌ ña̱ sakakú yuꞌu̱.
15 Vi̱ꞌe̱ miiꞌ ndieeꞌ ne̱ xatyuunꞌ nda̱ku ndii,
tiakú xitaꞌ sii̱ꞌ ne̱ yivi̱ꞌ xaꞌa̱ꞌ a̱ ña̱ ni̱ ke̱ta̱ va̱ꞌa̱ ni̱a̱,
te̱ xiinꞌ ña̱ ndi̱e̱eꞌ mi̱iꞌ Yahvé xaaꞌ a̱ tyu̱u̱n kaꞌnuꞌ nda̱tu̱nꞌ ja̱a̱nꞌ.
16 Te̱ ña̱ ndi̱e̱eꞌ Yahvé ndii,
ña̱ kooꞌ tyukuuꞌ xa̱va̱ꞌa̱ nduuꞌ a̱,
te̱ xiinꞌ ña̱ ndi̱e̱eꞌ a̱ ja̱a̱nꞌ xaaꞌ a̱ tyu̱u̱n kaꞌnuꞌ nda̱tu̱nꞌ ja̱a̱nꞌ.
17 Kü̱vi̱ yuꞌu̱,
süu̱ꞌ ja̱a̱nꞌ ndii,
ku̱ti̱a̱ku̱ i̱,
te̱ kaꞌa̱n i̱ xiinꞌ ne̱ yivi̱ꞌ xaꞌa̱ꞌ tyu̱u̱n kaꞌnuꞌ ña̱ ni̱ xa̱a̱ Yahvé.
18 Ni̱ sa̱ndoꞌoꞌ xa̱va̱ꞌa̱ Yahvé yuꞌu̱,
ndisu̱ nï̱ ta̱xi̱ a̱ ku̱vi̱ xa̱tyiꞌ i̱.
19 Nu̱niaꞌ ndo̱ꞌ yiꞌeꞌ yu̱kunꞌ nuu̱ꞌ i̱ miiꞌ koꞌniꞌ ne̱ xatyuunꞌ nda̱ku,
te̱ ndiꞌvi̱ i̱,
te̱ ta̱xi̱ i̱ ña̱ tyi̱nda̱ni Yahvé.
20 Te̱ yiꞌeꞌ ja̱a̱nꞌ ndii,
kuenta mi̱iꞌ Yahvé nduuꞌ a̱,
te̱ ne̱ xatyuunꞌ nda̱ku ku̱i̱ti̱ꞌ ko̱ꞌni̱ i̱kanꞌ.
21 Sa̱kaꞌnuꞌ i̱ yoꞌó,
sa̱kanꞌ ña̱ ni̱ xi̱ni̱ so̱ꞌo̱ u̱nꞌ si̱u̱ꞌunꞌ ña̱ ni̱ kaꞌa̱n i̱ xiinꞌ u̱nꞌ,
te̱ sakaꞌnuꞌ tu̱ i̱ yoꞌó xaꞌa̱ꞌ a̱ ña̱ ni̱ sa̱kakú u̱nꞌ yuꞌu̱.
22 Te̱ yuu̱ꞌ,
ña̱ ni̱ na̱ko̱o̱ te̱ xaꞌa vi̱ꞌe̱ ndii,
ni̱ na̱ndu̱u̱ a̱ yuu̱ꞌ kuuꞌ nu̱uꞌ xaꞌa̱ꞌ xiki̱ꞌ vi̱ꞌe̱.
23 Te̱ mi̱iꞌ Yahvé ni̱ xa̱a̱ sa̱kanꞌ,
te̱ ni̱ xkaꞌndi̱a̱ ña̱ ja̱a̱nꞌ,
te̱ nandani̱ xa̱va̱ꞌa̱ yooꞌ xaꞌa̱ꞌ ña̱ ni̱ xa̱a̱ a̱ ja̱a̱nꞌ.
24 Ña̱ ja̱a̱nꞌ nduuꞌ kivi̱ꞌ ña̱ ni̱ xa̱ꞌa̱ Yahvé,
te̱ na na̱ku̱a̱tiaꞌ nimá e̱ꞌ,
te̱ na sii̱ꞌ tu̱ ku̱ni̱ e̱ꞌ xaꞌa̱ꞌ kivi̱ꞌ ja̱a̱nꞌ.
25 Kaꞌán ndaꞌvi ndu̱ xiinꞌ u̱nꞌ,
Tákuiꞌe Yahvé,
ña̱ sa̱a̱ u̱nꞌ ña̱ va̱ꞌa̱ te̱ sa̱kakú u̱nꞌ ndu̱,
kaꞌán ndaꞌvi ndu̱ xiinꞌ u̱nꞌ,
Tákuiꞌe Yahvé,
ña̱ sa̱a̱ u̱nꞌ ña̱ va̱ꞌa̱ te̱ tyi̱ndi̱e̱eꞌ u̱nꞌ ndu̱ te̱ ke̱ta̱ va̱ꞌa̱ ndu̱.
26 Sañuꞌuꞌ va̱ Yahvé ña̱ ku̱a̱xi̱ kuenta a̱,
te̱ nde̱e̱ yu̱kunꞌ a̱ miiꞌ nduꞌu̱ꞌ a̱ xakaꞌnuꞌ ña̱ꞌaꞌ e̱ꞌ.
27 Yahvé nduuꞌ Ndiosí ña̱ xakaꞌnuꞌ e̱ꞌ,
te̱ su̱vi̱ tu̱ a̱ taxiꞌ ñuꞌu̱ tuún nuu̱ꞌ e̱ꞌ.
tTe̱ kii̱ꞌ nakuiín kivi̱ꞌ ña̱ xakaꞌnuꞌ ña̱ꞌaꞌ e̱ꞌ ndii,
sa̱tiín ndo̱ꞌ ki̱tiꞌ,
tiꞌ nasoko̱ꞌ ndo̱ꞌ nuu̱ꞌ ndi̱kiꞌ altar xiinꞌ yo̱ꞌoꞌ.
28 Yoꞌó nduuꞌ Ndiosí i̱,
te̱ xakaꞌnuꞌ i̱ yoꞌó,
yoꞌó nduuꞌ Ndiosí i̱,
te̱ kiꞌinꞌ kaꞌnuꞌ i̱ yoꞌó.
29 Na sa̱kaꞌnuꞌ e̱ꞌ Yahvé,
sa̱kanꞌ ña̱ ña̱ va̱ꞌa̱ va̱ nduuꞌ a̱,
te̱ nde̱e̱ ndiꞌiꞌ ni̱ kivi̱ꞌ kuvita i̱ni̱ a̱ xaꞌa̱ꞌ e̱ꞌ.