Yoꞌoꞌ kaꞌán ña̱ ndi̱viꞌ nduꞌu̱ꞌ Ndiosí
115
Tákuiꞌe Yahvé,
na ki̱ꞌi̱n kaꞌnuꞌ ne̱ yivi̱ꞌ yoꞌó ku̱i̱ti̱ꞌ,
te̱ kï̱ꞌi̱n kaꞌnuꞌ ni̱a̱ nduꞌu̱,
na ki̱ꞌi̱n kaꞌnuꞌ ne̱ yivi̱ꞌ yoꞌó ku̱i̱ti̱ꞌ xaꞌa̱ꞌ a̱ ña̱ kuvita i̱ni̱ u̱nꞌ xaꞌa̱ꞌ ndu̱ xiinꞌ xaꞌa̱ꞌ a̱ ña̱ xatyuunꞌ nda̱ku u̱nꞌ.
2 Sa̱kanꞌ te̱ käꞌa̱n ne̱ tukuꞌ xiinꞌ ndu̱ ndii:
“¿Miiꞌ nduꞌu̱ꞌ Ndiosí ña̱ xakaꞌnuꞌ ndoꞌó,
ne̱ vi̱ꞌe̱ Israel?”,
katyi̱ ni̱a̱.
3 Ndiosí ña̱ xakaꞌnuꞌ yooꞌ ndii,
ndi̱viꞌ nduꞌu̱ꞌ a̱,
te̱ xaaꞌ a̱ sa̱kuuꞌ ña̱ kaꞌán nimá a̱.
4 Ndisu̱ ndiosí ña̱ xakaꞌnuꞌ ne̱ tukuꞌ ja̱a̱nꞌ ndii,
ni̱ xa̱ꞌa̱ nda̱ꞌaꞌ ku̱i̱ti̱ꞌ te̱ yivi̱ꞌ a̱ xiinꞌ ka̱a̱ oro xiinꞌ ka̱a̱ plata.
5 Yoo yu̱ꞌuꞌ a̱,
ndisu̱ kü̱vi̱ nda̱tuꞌunꞌ a̱,
yoo ndu̱tyiꞌ nuu̱ꞌ a̱,
ndisu̱ kü̱vi̱ ko̱to̱ꞌni̱ a̱.
6 Yoo yavi̱ so̱ꞌo̱ a̱,
ndisu̱ kü̱vi̱ ku̱ni̱ so̱ꞌo̱ a̱,
yoo xiti̱nꞌ a̱,
ndisu̱ kü̱vi̱ ta̱ꞌni̱ a̱ nde̱e̱ i̱i̱n ña̱ꞌa̱.
7 Yoo nda̱ꞌaꞌ a̱,
ndisu̱ kü̱vi̱ tondi̱a̱ a̱ ña̱ꞌa̱,
yoo xaꞌa̱ꞌ a̱,
ndisu̱ kü̱vi̱ ka̱ka̱ a̱,
yoo tu̱nyoo̱ꞌ suku̱nꞌ a̱,
ndisu̱ kü̱vi̱ sa̱kaꞌaꞌ a̱ suku̱nꞌ a̱ nde̱e̱ vaa̱ꞌ vi̱ꞌ.
8 Ne̱ xaꞌa nda̱ꞌaꞌ ndiosí ña̱ xakaꞌnuꞌ ni̱a̱ ja̱a̱nꞌ ndii,
naa iinꞌ mi̱iꞌ ni̱a̱ iinꞌ a̱ ni̱ xa̱a̱ ni̱a̱,
te̱ iinꞌ tu̱ a̱ sa̱a̱ niiꞌ iinꞌ sa̱kuuꞌ ne̱ i̱ni̱ xini ña̱ꞌaꞌ.
9 Ndoꞌó kuaꞌa,
ne̱ taꞌanꞌ i̱,
ne̱ vi̱ꞌe̱ Israel,
Yahvé ku̱i̱ti̱ꞌ i̱ni̱ ndo̱ꞌ ku̱ni̱ ndo̱ꞌ,
sa̱kanꞌ ña̱ ña̱ ja̱a̱nꞌ nduuꞌ nde̱e̱ naa ka̱a̱ tiꞌeꞌ ña̱ tiasi nuu̱ꞌ e̱ꞌ nuu̱ꞌ ña̱ kueinꞌ,
te̱ su̱vi̱ tu̱ a̱ nduuꞌ ña̱ tyindieeꞌ ndoꞌó.
10 Sa̱kuuꞌ ndoꞌó,
kuaꞌa sutu̱,
te̱ nduuꞌ si̱a̱niꞌ xikaꞌ Aarón,
i̱ni̱ ndo̱ꞌ ku̱ni̱ ndo̱ꞌ Yahvé,
sa̱kanꞌ ña̱ ña̱ ja̱a̱nꞌ nduuꞌ ña̱ tyindieeꞌ ndoꞌó,
te̱ su̱vi̱ tu̱ a̱ nduuꞌ nde̱e̱ naa ka̱a̱ tiꞌeꞌ tiasi nuu̱ꞌ ndo̱ꞌ nuu̱ꞌ ña̱ kueinꞌ.
11 Sa̱kuuꞌ yooꞌ,
ne̱ yiꞌvi Yahvé ndii,
i̱ni̱ e̱ꞌ xini e̱ꞌ Yahvé,
sa̱kanꞌ ña̱ ña̱ ja̱a̱nꞌ nduuꞌ ña̱ tyindieeꞌ yooꞌ,
te̱ su̱vi̱ tu̱ a̱ nduuꞌ nde̱e̱ na̱a̱ ka̱a̱ tiꞌeꞌ ña̱ tiasi nuu̱ꞌ e̱ꞌ nuu̱ꞌ ña̱ kueinꞌ.
12 Yahvé ndii,
nakaꞌanꞌ a̱ xaꞌa̱ꞌ e̱ꞌ sa̱kanꞌ na kuiiꞌ sañuꞌuꞌ a̱ yooꞌ,
sañuꞌuꞌ a̱ sa̱kuuꞌ yooꞌ,
ne̱ vi̱ꞌe̱ Israel,
te̱ sañuꞌuꞌ tu̱ a̱ sa̱kuuꞌ sutu̱ si̱a̱niꞌ xikaꞌ Aarón.
13 Sa̱ñuꞌuꞌ Yahvé sa̱kuuꞌ ne̱ yiꞌvi ña̱ꞌaꞌ,
naa kuuꞌ ne̱ kaꞌnuꞌ xiinꞌ ne̱ ndaꞌvi so̱ꞌo̱.
14 Na sa̱ñuꞌuꞌ va̱ na Yahvé ndoꞌó,
te̱ naa sa̱ñuꞌuꞌ tu̱ a̱ sa̱kuuꞌ siꞌe̱ ndo̱ꞌ.
15 Na sa̱ñuꞌuꞌ na Yahvé ndoꞌó,
ña̱ ja̱a̱nꞌ nduuꞌ ña̱ ni̱ xa̱ꞌa̱ ñu̱ꞌuꞌ i̱i̱n yivi̱ꞌ,
te̱ su̱vi̱ tu̱ a̱ ni̱ xa̱ꞌa̱ ndi̱viꞌ.
16 Ndi̱viꞌ ndii,
ña̱ꞌa̱ mi̱iꞌ Yahvé nduuꞌ a̱,
te̱ i̱i̱n ka̱niiꞌ ñu̱ꞌuꞌ i̱i̱n yivi̱ꞌ ni̱ ta̱xi̱ a̱ nda̱ꞌaꞌ yooꞌ,
ne̱ yivi̱ꞌ i̱i̱n yivi̱ꞌ.
17 Ne̱ xa̱ ni̱ xiꞌi̱ ndii,
kü̱vi̱ ka̱ ka̱ta̱ ne̱ ja̱a̱nꞌ ya̱a̱ nuu̱ꞌ Yahvé,
sa̱kanꞌ ña̱ xa̱ kuaꞌa̱n ni̱a̱ ti̱xi̱n yavi̱ ndi̱i̱ miiꞌ taxi̱nꞌ kaaꞌ.
18 Ndisu̱ yooꞌ,
ne̱ tiaku ndii,
ku̱vi̱ xakaꞌnuꞌ e̱ꞌ Yahvé
nde̱e̱ vi̱ti̱n,
te̱ nde̱e̱ a̱ma̱ ka̱ ni̱ kivi̱ꞌ.
Kaꞌnuꞌ va̱ ña̱ nduuꞌ Ndiosí.