Yoꞌoꞌ kaꞌán a̱ xaꞌa̱ꞌ ña̱ kuní a̱ ta̱xi̱ e̱ꞌ ña̱ tyi̱nda̱ni Ndiosí xaꞌa̱ꞌ a̱ ña̱ sa̱ndaꞌa a̱ yooꞌ
116
Kundani̱ va̱ yuꞌu̱ Yahvé,
sa̱kanꞌ ña̱ xini so̱ꞌo̱ a̱ si̱u̱ꞌunꞌ ña̱ kaꞌán i̱ xiinꞌ a̱,
sa̱kanꞌ ña̱ xini so̱ꞌo̱ a̱ si̱u̱ꞌunꞌ ña̱ kaꞌán ndaꞌvi i̱ xiinꞌ a̱ kii̱ꞌ xikán i̱ ña̱ ku̱vi̱ta i̱ni̱ a̱ xaꞌa̱ꞌ i̱.
2 Ku̱a̱tyi̱ ndii,
xini so̱ꞌo̱ a̱ sa̱kuuꞌ ña̱ kaꞌán i̱ xiinꞌ a̱,
sa̱kanꞌ na kuiiꞌ kaꞌán i̱ si̱u̱ꞌunꞌ xiinꞌ a̱ sa̱kuuꞌ kivi̱ꞌ ña̱ tiaku i̱.
3 Ndi̱e̱eꞌ va̱ ndoꞌoꞌ i̱,
te̱ ndee tyaaꞌ ku̱vi̱ xa̱tyiꞌ i̱,
te̱ ni̱ yi̱ꞌvi xa̱va̱ꞌa̱ i̱ ña̱ kuꞌu̱n i̱ ti̱xi̱n yavi̱ ndi̱i̱,
te̱ ndee xa̱nuu̱ꞌ ña̱ ndiꞌni̱ nimá i̱ xiinꞌ ña̱ uꞌvi̱ xini ku̱i̱ti̱ꞌ i̱ ni̱ yoo̱ nuu̱ꞌ i̱.
4 Sa̱kanꞌ te̱ ni̱ kaꞌa̱n ndaꞌvi i̱ xiinꞌ Yahvé xaꞌa̱ꞌ i̱ ndii:
“Tákuiꞌe Yahvé,
sa̱a̱ u̱nꞌ ña̱ va̱ꞌa̱ te̱ sa̱kakú u̱nꞌ yuꞌu̱”,
ni̱ katyi̱ i̱.
5 Yahvé ndii,
ña̱ kaꞌnuꞌ i̱ni̱ va̱ nduuꞌ a̱,
te̱ ña̱ xatyuunꞌ nda̱ku tu̱ nduuꞌ a̱,
te̱ kuvita va̱ tu̱ i̱ni̱ Ndiosí,
ña̱ xakaꞌnuꞌ e̱ꞌ ja̱a̱nꞌ,
xaꞌa̱ꞌ e̱ꞌ.
6 Yahvé ndii,
xitoꞌ a̱ ne̱ i̱ni̱ xini ña̱ꞌaꞌ nde̱e̱ naa i̱ni̱ ne̱ kualiꞌ xini ni̱a̱ yu̱vaꞌ siꞌiꞌ ni̱a̱,
yuꞌu̱ ndii,
ni̱ ku̱kuiꞌe xa̱va̱ꞌa̱ i̱ kanduꞌu̱ꞌ i̱,
te̱ ni̱ sa̱kakú a̱ yuꞌu̱.
7 Vi̱ti̱n ndii,
xa̱ ku̱vi̱ tu̱ku̱u̱ nandiee̱ꞌ i̱,
sa̱kanꞌ ña̱ xa̱ ni̱ xa̱a̱ Yahvé ña̱ va̱ꞌa̱ xaꞌa̱ꞌ i̱.
8 Ku̱a̱tyi̱ ndii,
ni̱ sa̱kakú a̱ yuꞌu̱ te̱ nï̱ xiꞌi̱ i̱,
te̱ ni̱ sa̱i̱i̱n kuiín tu̱ a̱ ña̱ xakuꞌ i̱,
te̱ nï̱ ta̱xi̱ tu̱ a̱ ña̱ ka̱kiꞌi̱ i̱.
9 Sa̱kanꞌ na kuiiꞌ vi̱ti̱n ña̱ tiaku i̱ i̱i̱n yivi̱ꞌ yoꞌoꞌ ndii,
sa̱a̱ na sa̱a̱ i̱ ña̱ kuní Yahvé.
10 I̱ni̱ xini i̱ yoꞌó,
sa̱kanꞌ na ni̱ kaꞌa̱n i̱ xiinꞌ u̱nꞌ ndii:
“Tákuiꞌe,
kuaꞌa̱ꞌ va̱ ndoꞌoꞌ i̱”,
ni̱ katyi̱ i̱.
11 Te̱ kii̱ꞌ ndiꞌni̱ va̱ nimá i̱,
te̱ ni̱ kaꞌa̱n i̱ ndii:
“Sa̱kuuꞌ ne̱ yivi̱ꞌ i̱i̱n yivi̱ꞌ ndii,
ne̱ vixi̱ va̱ nduuꞌ ni̱a̱”,
ni̱ katyi̱ i̱.
12 Köo̱ꞌ nde̱e̱ i̱i̱n ña̱ ku̱vi̱ sa̱a̱ i̱ te̱ tya̱ꞌvi̱ i̱ Yahvé
xaꞌa̱ꞌ sa̱kuuꞌ ña̱ va̱ꞌa̱ ña̱ ni̱ xa̱a̱ a̱ xaꞌa̱ꞌ i̱.
13 Na sa̱kaꞌnuꞌ i̱ Yahvé xaꞌa̱ꞌ a̱ ña̱ ni̱ sa̱kakú a̱ yuꞌu̱,
te̱ kaꞌa̱n ndaꞌvi i̱ xiinꞌ a̱ ña̱ tyindieeꞌ a̱ yuꞌu̱.
14 Te̱ sa̱xinú tu̱ i̱ kuento i̱ ña̱ ni̱ ta̱xi̱ i̱ nuu̱ꞌ Yahvé
nuu̱ꞌ sa̱kuuꞌ ne̱ yivi̱ꞌ,
ne̱ nduuꞌ kuenta a̱.
15 Ndoꞌoꞌ va̱ nimá Yahvé kii̱ꞌ xiꞌí i̱i̱n ne̱ nduuꞌ kuenta a̱.
16 Tákuiꞌe Yahvé,
te̱ xikaꞌ nuuꞌ nuu̱ꞌ u̱nꞌ nduuꞌ yuꞌu̱,
ndi̱xa̱ nduuꞌ a̱ ndii,
te̱ xikaꞌ nuuꞌ nuu̱ꞌ u̱nꞌ nduuꞌ i̱,
te̱ siꞌe̱ ña̱ꞌaꞌ,
ñaꞌ xikaꞌ nuuꞌ nuu̱ꞌ u̱nꞌ nduuꞌ i̱,
te̱ yoꞌó ni̱ sa̱kakú yuꞌu̱ nuu̱ꞌ ña̱ ndoꞌoꞌ i̱,
ña̱ nduuꞌ nde̱e̱ naa ña̱ naá i̱ vi̱ꞌe̱ ka̱a̱.
17 Te̱ na̱soko̱ꞌ i̱ ya̱a̱ nuu̱ꞌ Yahvé xakaꞌnuꞌ ña̱ꞌaꞌ i̱ xaꞌa̱ꞌ a̱ ña̱ taxiꞌ i̱ ña̱ tyi̱nda̱ni a̱,
te̱ kaꞌa̱n ndaꞌvi i̱ xiinꞌ a̱ xaꞌa̱ꞌ i̱ te̱ tyi̱ndi̱e̱eꞌ a̱ yuꞌu̱.
18 Sa̱xinú i̱ kuento i̱ ña̱ ni̱ ta̱xi̱ i̱ nuu̱ꞌ Yahvé
nuu̱ꞌ sa̱kuuꞌ ne̱ nduuꞌ kuenta a̱,
19 nuu̱ꞌ ki̱ꞌe̱ yu̱kunꞌ kaꞌnuꞌ miiꞌ nakayá ni̱a̱ xakaꞌnuꞌ ña̱ꞌaꞌ ni̱a̱ ma̱ꞌiꞌ ñu̱u̱ Jerusalén.
Kaꞌnuꞌ va̱ ña̱ nduuꞌ Ndiosí.