Yoꞌoꞌ kaꞌán a̱ xaꞌa̱ꞌ sa̱a̱ ni̱ xa̱a̱ Ndiosí xiinꞌ ne̱ Israel kii̱ꞌ ni̱ ki̱e̱e̱ ni̱a̱ nuu̱ꞌ ñu̱ꞌuꞌ Egipto
114
Kii̱ꞌ ni̱ ki̱e̱e̱ ne̱ xii̱ꞌ ya̱taꞌ e̱ꞌ,
ne̱ vi̱ꞌe̱ Israel,
ne̱ nduuꞌ si̱a̱niꞌ xikaꞌ Jacob,
nuu̱ꞌ ñu̱ꞌuꞌ Egipto,
ñu̱u̱ miiꞌ ndieeꞌ ne̱ tukuꞌ ndii,
2 ni̱ na̱ka̱xi̱n Ndiosí ne̱ vi̱ꞌe̱ Judá ja̱a̱nꞌ,
te̱ nduuꞌ ni̱a̱ nde̱e̱ naa yu̱kunꞌ kaꞌnuꞌ miiꞌ nduꞌu̱ꞌ a̱,
te̱ ni̱ na̱ka̱xi̱n tu̱ a̱ ne̱ vi̱ꞌe̱ Israel ja̱a̱nꞌ,
te̱ ka̱ꞌndi̱a̱ tyuunꞌ ni̱a̱.
3 Kii̱ꞌ ni̱ xi̱ni̱ mi̱ni̱ kuaꞌa ku̱a̱xi̱ Ndiosí xiinꞌ ne̱ vi̱ꞌe̱ Israel ja̱a̱nꞌ ndii,
ni̱ nuni̱a̱ꞌ a̱,
te̱ ni̱ ku̱vi̱ xkaꞌndi̱a̱ ni̱a̱,
te̱ sa̱kanꞌ tu̱ ti̱kui i̱ti̱a̱ Jordán ndii,
ni̱ xi̱kuii̱n raꞌ,
te̱ nï̱ na̱kaa̱ ka̱ raꞌ kuꞌu̱n raꞌ.
4 I̱kuꞌ ndii,
ni̱ ka̱nde̱ta̱ a̱ nde̱e̱ naa ti̱xuꞌu̱ꞌ tyiee̱ tiakiꞌ,
te̱ xiki̱ꞌ ndii,
ni̱ ka̱nde̱ta̱ a̱ nde̱e̱ naa mbe̱e̱.
5 Yoꞌó,
mi̱ni̱ kuaꞌa,
¿ndiotyun na ni̱ nuni̱a̱ꞌ i̱tyiꞌ ma̱ꞌiꞌ u̱nꞌ?
Te̱ yoꞌó,
i̱ti̱a̱ Jordán,
¿ndiotyun na ni̱ xi̱kuii̱n u̱nꞌ,
te̱ nï̱ na̱kaa̱ ka̱ ti̱kui u̱nꞌ?
6 Te̱ ndoꞌó,
i̱kuꞌ,
¿ndiotyun na ni̱ ka̱nde̱ta̱ ndo̱ꞌ nde̱e̱ naa ti̱xuꞌu̱ꞌ tyiee̱ tiakiꞌ?
te̱ ndoꞌó,
xiki̱ꞌ,
¿ndiotyun na ni̱ ka̱nde̱ta̱ ndo̱ꞌ nde̱e̱ naa mbe̱e̱?
7 Yoꞌó,
ñu̱ꞌuꞌ i̱i̱n yivi̱ꞌ,
ka̱nda̱ u̱nꞌ nuu̱ꞌ Tákuiꞌe Yahvé kii̱ꞌ ku̱ni̱ ña̱ꞌaꞌ u̱nꞌ,
ka̱nda̱ u̱nꞌ nuu̱ꞌ Ndiosí ña̱ xakaꞌnuꞌ Jacob.
8 Sa̱kanꞌ ña̱ ña̱ ja̱a̱nꞌ ni̱ sa̱na̱nduuꞌ ka̱va̱ꞌ nde̱e̱ naa mi̱ni̱ miiꞌ naá kuaꞌa̱ꞌ ti̱kui,
ndi̱xa̱ nduuꞌ a̱ ndii,
yuu̱ꞌ tiꞌeꞌ ni̱ sa̱na̱nduuꞌ a̱ ti̱ko̱ꞌyoꞌ miiꞌ ni̱ ki̱e̱e̱ kuaꞌa̱ꞌ va̱ ti̱kui.