Yoꞌoꞌ kaꞌán a̱ xaꞌa̱ꞌ ña̱ kaꞌnuꞌ va̱ ña̱ nduuꞌ Ndiosí, te̱ tyindieeꞌ tu̱ a̱ ne̱ ndaꞌvi kuuꞌ
Kaꞌnuꞌ va̱ ña̱ nduuꞌ Ndiosí.
113
Ndoꞌó,
ne̱ xikaꞌ nuuꞌ nuu̱ꞌ Yahvé ndii,
sa̱kaꞌnuꞌ ña̱ꞌaꞌ ndo̱ꞌ,
te̱ sa̱kaꞌnuꞌ tu̱ ndo̱ꞌ ña̱ ndi̱e̱eꞌ ña̱ kumiꞌ Yahvé ja̱a̱nꞌ.
2 Te̱ kaꞌnuꞌ va̱ tu̱ ña̱ nduuꞌ ña̱ ndi̱e̱eꞌ Yahvé nde̱e̱ ndiꞌiꞌ ni̱ kivi̱ꞌ,
nde̱e̱ vi̱ti̱n,
te̱ nde̱e̱ a̱ma̱ ka̱ ni̱.
3 Na sa̱kaꞌnuꞌ sa̱kuuꞌ ne̱ yivi̱ꞌ ña̱ ndi̱e̱eꞌ Yahvé i̱i̱n ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ,
naa kuuꞌ ne̱ ndieeꞌ nde̱e̱ miiꞌ ketaꞌ ñu̱ꞌu̱ xiinꞌ ne̱ ndieeꞌ nde̱e̱ miiꞌ ketá a̱.
4 Yahvé xaꞌndia tyuunꞌ nuu̱ꞌ sa̱kuuꞌ ne̱ tukuꞌ,
te̱ tyiee̱ ka̱ ña̱ kaꞌnuꞌ a̱ te̱ sa̱kanꞌ ndi̱viꞌ.
5 Köo̱ꞌ nakuitá xa̱tyiꞌ xiinꞌ Yahvé,
Ndiosí ña̱ xakaꞌnuꞌ yooꞌ,
ña̱ nduꞌu̱ꞌ nde̱e̱ ndi̱viꞌ,
nuu̱ꞌ tei̱ kaꞌnuꞌ miiꞌ xaꞌndia tyuunꞌ a̱.
6 Te̱ nde̱e̱ i̱kanꞌ nduꞌu̱ꞌ Ndiosí,
te̱ xitoꞌ a̱ ndi̱viꞌ,
te̱ xi̱to̱ tu̱ a̱ nuu̱ꞌ ñu̱ꞌuꞌ i̱i̱n yivi̱ꞌ.
7 Ne̱ ndaꞌvi xa̱va̱ꞌa̱ kuuꞌ ndii,
tyindieeꞌ ña̱ꞌaꞌ a̱,
te̱ tava̱ꞌ a̱ ne̱ natiín nuu̱ꞌ mi̱ꞌiꞌ miiꞌ ndieeꞌ ni̱a̱,
te̱ kaniꞌiꞌ ña̱ꞌaꞌ a̱.
8 Te̱ tyi̱ndi̱e̱e̱ ña̱ꞌaꞌ a̱ miiꞌ ndieeꞌ ne̱ xaꞌndia tyuunꞌ,
tyi̱ndi̱e̱e̱ ña̱ꞌaꞌ a̱ te̱i̱n ne̱ ñu̱u̱ ni̱a̱,
ne̱ xaꞌndia tyuunꞌ.
9 Ña̱ꞌaꞌ ñaꞌ kü̱vi̱ ko̱o̱ siꞌe̱ ndii,
sa̱mani̱ꞌ ña̱ꞌaꞌ Ndiosí ña̱ ku̱vi̱ ko̱o̱ siꞌe̱ aꞌ,
te̱ sa̱na̱kuatiaꞌ ña̱ꞌaꞌ a̱ xaꞌa̱ꞌ a̱ ña̱ yoo siꞌe̱ aꞌ ja̱a̱nꞌ.
Kaꞌnuꞌ va̱ ña̱ nduuꞌ Ndiosí.