Yoꞌoꞌ kaꞌán ña̱ sañuꞌuꞌ va̱ Ndiosí ne̱ xitoꞌ kaꞌnuꞌ ña̱ꞌaꞌ
Kaꞌnuꞌ va̱ ña̱ nduuꞌ Ndiosí.
112
Sa̱ñuꞌuꞌ va̱ Yahvé ne̱ yiꞌvi ña̱ꞌaꞌ,
te̱ va̱ꞌa̱ va̱ kuni ni̱a̱ saxinú ni̱a̱ ña̱ kaꞌán tyuunꞌ a̱.
2 Si̱a̱niꞌ xikaꞌ ni̱a̱ ka̱ꞌndi̱a̱ tyuunꞌ i̱i̱n ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ,
te̱ ki̱e̱e̱ va̱ꞌa̱ sa̱kuuꞌ ne̱ xatyuunꞌ nda̱ku miiꞌ ka̱ ku̱ndi̱e̱e̱ ni̱a̱ nuu̱ꞌ ñu̱ꞌuꞌ i̱i̱n yivi̱ꞌ.
3 Te̱ yooꞌ kuaꞌa̱ꞌ ña̱ va̱ꞌa̱ xiinꞌ ña̱ vikaꞌ vi̱ꞌe̱ ni̱a̱,
te̱ ña̱ va̱ꞌa̱ ña̱ xaaꞌ ni̱a̱ ndii,
nde̱e̱ ndiꞌiꞌ ni̱ kivi̱ꞌ ko̱o̱ a̱.
4 Te̱ yiꞌé ni̱a̱ nuu̱ꞌ ne̱ xaaꞌ ña̱ va̱ꞌa̱ nde̱e̱ naa ñuꞌu̱ miiꞌ i̱i̱n yaví,
ne̱ ja̱a̱nꞌ ndii,
kaꞌnuꞌ va̱ i̱ni̱ ni̱a̱,
te̱ vi̱ta i̱ni̱ ni̱a̱,
te̱ xatyuunꞌ nda̱ku tu̱ ni̱a̱.
5 Ne̱ satatu xu̱ꞌunꞌ ni̱a̱ xiinꞌ ña̱ va̱ꞌa̱ nimá ni̱a̱ ndii,
va̱ꞌa̱ va̱ kieeꞌ ni̱a̱,
te̱ xatyuunꞌ nda̱ku tu̱ ni̱a̱ xiinꞌ sa̱kuuꞌ ña̱ xiko̱ꞌ ni̱a̱.
6 Xaꞌa̱ꞌ a̱ ja̱a̱nꞌ na kuiiꞌ köo̱ꞌ kivi̱ꞌ koyo̱ ne̱ yivi̱ꞌ ja̱a̱nꞌ nuu̱ꞌ tu̱ndiꞌni̱ te̱ nduxi̱n xa̱tyiꞌ ni̱a̱,
te̱ ne̱ xatyuunꞌ nda̱ku ja̱a̱nꞌ ndii,
kuaꞌa̱ꞌ va̱ kivi̱ꞌ na̱ka̱ꞌanꞌ ña̱ꞌaꞌ ne̱ yivi̱ꞌ.
7 Ne̱ ja̱a̱nꞌ ndii,
yïꞌvi ni̱a̱ tee̱ꞌ ndee ku̱ni̱ ni̱a̱ kuento xaꞌa̱ꞌ ña̱ vä̱ꞌa̱,
sa̱kanꞌ ña̱ i̱ni̱ xa̱va̱ꞌa̱ nimá ni̱a̱ xini ni̱a̱ Yahvé.
8 I̱ni̱ ni̱a̱ xikaꞌ ni̱a̱,
te̱ kuäsa̱ꞌ yiꞌvi ni̱a̱
nde̱e̱ ku̱ni̱ ni̱a̱ ña̱ ku̱ndo̱ꞌo̱ sa̱kuuꞌ ne̱ ndasiꞌ taꞌanꞌ xiinꞌ ni̱a̱,
te̱ kuaku̱ ndi̱a̱a̱ ña̱ꞌaꞌ ni̱a̱.
9 Nataꞌviꞌ ni̱a̱ ña̱ vikaꞌ ni̱a̱ te̱ taxiꞌ ni̱a̱ a̱ nda̱ꞌaꞌ ne̱ ndaꞌvi kuuꞌ,
te̱ nde̱e̱ ndiꞌiꞌ ni̱ kivi̱ꞌ na̱ka̱ꞌanꞌ ne̱ yivi̱ꞌ xaꞌa̱ꞌ ña̱ va̱ꞌa̱,
ña̱ xaaꞌ ni̱a̱ ja̱a̱nꞌ.
Käꞌanꞌ nuu̱ꞌ ni̱a̱ xikaꞌ ni̱a̱,
te̱ natiinꞌ ni̱a̱ ña̱ kaꞌán va̱ꞌa̱ ne̱ yivi̱ꞌ xaꞌa̱ꞌ ni̱a̱.
10 Te̱ kii̱ꞌ ku̱ni̱ ne̱ xaaꞌ ña̱ ni̱a̱ꞌa ña̱ ja̱a̱nꞌ ndii,
na̱saa̱ꞌ xa̱va̱ꞌa̱ ni̱a̱ ku̱ni̱ ña̱ꞌaꞌ ni̱a̱,
nde̱e̱ keꞌi̱ꞌ vi̱ꞌ na̱ka̱xi̱ꞌ nu̱ꞌu̱ ni̱a̱ ña̱ xiꞌé va̱ ni̱a̱,
te̱ ku̱nu̱ kaꞌanꞌ nuu̱ꞌ ni̱a̱ xaꞌa̱ꞌ ña̱ nï̱ xinu̱ ña̱ ni̱a̱ꞌa ña̱ kaꞌán nimá ni̱a̱ ku̱ndo̱ꞌo̱ ne̱ xatyuunꞌ nda̱ku ja̱a̱nꞌ.