Yoꞌoꞌ kaꞌán a̱ xaꞌa̱ꞌ a̱ ña̱ xitoꞌ Ndiosí ne̱ nduuꞌ kuenta a̱
111
Kaꞌnuꞌ va̱ ña̱ nduuꞌ Ndiosí.
Xakaꞌnuꞌ i̱ Yahvé xiinꞌ i̱i̱n ka̱niiꞌ nimá i̱
kii̱ꞌ ndu̱i̱i̱n i̱ xiinꞌ sa̱kuuꞌ ne̱ xatyuunꞌ nda̱ku nakayá xakaꞌnuꞌ nuu̱ꞌ a̱.
2 Kaꞌnuꞌ va̱ tyu̱u̱n ña̱ xaaꞌ Yahvé,
te̱ sa̱kuuꞌ ne̱ ndani̱ a̱ ndii,
va̱ꞌa̱ kuni ni̱a̱ kii̱ꞌ xitoꞌ ndiꞌe̱ꞌ ni̱a̱ ña̱ ja̱a̱nꞌ.
3 Sa̱kuuꞌ ña̱ xaaꞌ Ndiosí ndii,
niaꞌá a̱ ña̱ nda̱tu̱nꞌ va̱ ña̱ nduuꞌ a̱,
te̱ kaꞌnuꞌ va̱ tu̱ ña̱ nduuꞌ a̱,
te̱ köo̱ꞌ kivi̱ꞌ ndiꞌiꞌ ña̱ xatyuunꞌ nda̱ku a̱.
4 Te̱ sanakaꞌanꞌ a̱ yooꞌ xaꞌa̱ꞌ sa̱kuuꞌ tyu̱u̱n kaꞌnuꞌ nda̱tu̱nꞌ ña̱ xaaꞌ a̱ ja̱a̱nꞌ.
Yahvé ndii,
ña̱ kaꞌnuꞌ i̱ni̱ va̱ nduuꞌ a̱,
te̱ kuvita i̱ni̱ a̱ xaꞌa̱ꞌ ne̱ yivi̱ꞌ.
5 Taxiꞌ a̱ ña̱ xaxi̱ꞌ yooꞌ,
ne̱ xitoꞌ kaꞌnuꞌ ña̱ꞌaꞌ,
te̱ nde̱e̱ ndiꞌiꞌ ni̱ kivi̱ꞌ na̱ka̱ꞌanꞌ a̱ xaꞌa̱ꞌ kuento a̱ ña̱ ni̱ ta̱xi̱ a̱ nuu̱ꞌ e̱ꞌ.
6 Ni̱ niaꞌa̱ nuu̱ꞌ e̱ꞌ ña̱ ndi̱e̱eꞌ kooꞌ tyukuuꞌ a̱ xiinꞌ tyu̱u̱n kaꞌnuꞌ ña̱ ni̱ xa̱a̱ a̱ xaꞌa̱ꞌ e̱ꞌ
kii̱ꞌ ni̱ ta̱xi̱ a̱ ñu̱ꞌuꞌ ne̱ tukuꞌ nda̱ꞌaꞌ ne̱ xii̱ꞌ ya̱taꞌ e̱ꞌ ku̱ndu̱u̱ ña̱ꞌa̱ ni̱a̱.
7 Te̱ sa̱kuuꞌ ña̱ xaaꞌ a̱ ndii,
ña̱ nda̱ku xiinꞌ ña̱ ndi̱xa̱ nduuꞌ a̱,
te̱ sa̱kuuꞌ ña̱ kaꞌán tyuunꞌ a̱ ndii,
ku̱vi̱ i̱ni̱ e̱ꞌ ku̱ni̱ e̱ꞌ e̱.
8 Sa̱kanꞌ ña̱ köo̱ꞌ kivi̱ꞌ nama̱ nde̱e̱ i̱i̱n a̱ nde̱e̱ ndiꞌiꞌ ni̱ kivi̱ꞌ,
te̱ ni̱ xa̱ꞌa̱ ña̱ꞌaꞌ Ndiosí xiinꞌ ña̱ ndi̱xa̱,
te̱ ni̱ xa̱ꞌa̱ tu̱ ña̱ꞌaꞌ a̱ xiinꞌ ña̱ xatyuunꞌ nda̱ku a̱.
9 Mi̱iꞌ a̱ ni̱ sa̱kakú a̱ ne̱ nduuꞌ kuenta a̱ ja̱a̱nꞌ,
te̱ nde̱e̱ ndiꞌiꞌ ni̱ kivi̱ꞌ ka̱nduꞌu̱ꞌ kuento a̱ ña̱ ni̱ ndoo̱ a̱ nuu̱ꞌ ni̱a̱.
Te̱ ña̱ su̱ꞌu̱n va̱ nduuꞌ a̱,
te̱ kaꞌnuꞌ va̱ tu̱ ña̱ nduuꞌ a̱.
10 Ña̱ yiꞌvi e̱ꞌ Yahvé nduuꞌ xaꞌndu̱ ña̱ xini tuní,
te̱ sa̱kuuꞌ ne̱ saxinú ña̱ kaꞌán tyuunꞌ a̱ nduuꞌ ne̱ niaꞌá ña̱ ne̱ xini tuní nduuꞌ ni̱a̱.
Na sa̱kaꞌnuꞌ ña̱ꞌaꞌ e̱ꞌ nde̱e̱ ndiꞌiꞌ ni̱ kivi̱ꞌ.