Yoꞌoꞌ kaꞌán a̱ ña̱ Ndiosí nduuꞌ ña̱ taxiꞌ ndi̱e̱e̱ꞌ nda̱ꞌaꞌ rey te̱ xaꞌndia tyuunꞌ ra̱
Ya̱a̱ ña̱ ni̱ xi̱ta̱ David nuu̱ꞌ Ndiosí.
110
Ni̱ kaꞌa̱n Yahvé xiinꞌ Xto̱ꞌo̱ i̱ ndii:
“Ku̱nduꞌu̱ꞌ nda̱ꞌaꞌ ku̱a̱ꞌa̱ i̱ na sa̱ndoó kuiꞌe xa̱tyiꞌ i̱ te̱ ndasiꞌ yoꞌó,
te̱ ku̱ndu̱u̱ ra̱ nde̱e̱ naa tei̱ siee miiꞌ ku̱i̱ta̱ xaꞌa̱ꞌ u̱nꞌ”,
ni̱ katyi̱ a̱.
2 Nde̱e̱ ñu̱u̱ Jerusalén ta̱xi̱ Yahvé kuꞌu̱n ndi̱koꞌ miiꞌ ka̱ꞌndi̱a̱ tyuunꞌ u̱nꞌ,
te̱ ke̱ta̱ va̱ꞌa̱ u̱nꞌ xiinꞌ sa̱kuuꞌ te̱ ndasiꞌ taꞌanꞌ xiinꞌ u̱nꞌ.
3 Kii̱ꞌ niaꞌa̱ u̱nꞌ ña̱ ndi̱e̱eꞌ u̱nꞌ ndii,
xiinꞌ ña̱ kaꞌán nimá mi̱iꞌ ne̱ ndieeꞌ nuu̱ꞌ ñu̱ꞌuꞌ miiꞌ xaꞌndia tyuunꞌ u̱nꞌ,
te̱ ndu̱u̱ i̱i̱n ni̱a̱ nuu̱ꞌ u̱nꞌ.
Te̱ ku̱ni̱ ni̱a̱ sa̱kuuꞌ ña̱ ndi̱e̱eꞌ u̱nꞌ ña̱ nda̱tu̱nꞌ xa̱va̱ꞌa̱ ña̱ su̱ꞌu̱n va̱.
Te̱ na̱ku̱naa̱ kuaꞌa̱ꞌ va̱ ña̱ ndi̱e̱eꞌ u̱nꞌ sa̱a̱ ni̱a̱ꞌa̱ nde̱e̱ naa yuyuꞌ ña̱ kuunꞌ sa̱a̱ ni̱a̱ꞌa̱ ku̱a̱xi̱ kitúꞌ
4 Ni̱ ta̱xi̱ Yahvé kuento a̱ tiinꞌ ndiaa xiinꞌ miiꞌ mi̱iꞌ a̱,
te̱ ña̱ ja̱a̱nꞌ ndii,
nä̱ma̱ a̱ kuento a̱ kaꞌán a̱ ndii:
“Yoꞌó nduuꞌ sutu̱ kaꞌnuꞌ kuuꞌ nu̱uꞌ nde̱e̱ a̱ma̱ ka̱ kivi̱ꞌ nde̱e̱ naa Melquisedec”,
ni̱ katyi̱ a̱.
5 Mi̱iꞌ Tákuiꞌe Yahvé yoo xiinꞌ u̱nꞌ,
te̱ xitoꞌ a̱ yoꞌó,
te̱ ka̱ꞌni̱ꞌ a̱ sa̱kuuꞌ rey,
te̱ xaꞌndia tyuunꞌ i̱i̱n yivi̱ꞌ,
kii̱ꞌ na̱saa̱ꞌ a̱.
6 Ka̱ꞌni̱ꞌ tu̱ a̱ sa̱kuuꞌ ne̱ tukuꞌ,
te̱ sa̱kutuꞌ a̱ ka̱niiꞌ nuu̱ꞌ ñu̱ꞌuꞌ ni̱a̱ xiinꞌ ñu̱ꞌuꞌ ndeꞌi̱,
ne̱ ni̱ xiꞌi̱,
te̱ ke̱ndoso̱ꞌ a̱ suku̱nꞌ kuaꞌa̱ꞌ xa̱va̱ꞌa̱ ne̱ yivi̱ꞌ ja̱a̱nꞌ,
sa̱a̱ kuaꞌa̱n nuu̱ꞌ ñu̱ꞌuꞌ i̱i̱n yivi̱ꞌ kii̱ꞌ sa̱kanꞌ.
7 Ndi̱ꞌi̱ ja̱a̱nꞌ te̱ ko̱ꞌo̱ a̱ ti̱kui vi̱xi̱n yivi̱ miiꞌ xkaꞌndi̱a̱ a̱ kuaꞌa̱n a̱,
kii̱ꞌ na̱ndi̱koꞌ a̱ ña̱ xa̱ ni̱ ka̱nandoo a̱ te̱ ndasiꞌ taꞌanꞌ xiinꞌ a̱,
te̱ na̱ku̱naa̱ ña̱ ndi̱e̱eꞌ a̱.