Yoꞌoꞌ kaꞌán David xiinꞌ Ndiosí ña̱ vi̱kuiꞌni̱ a̱ xaꞌa̱ꞌ ra̱
Ya̱a̱ ña̱ ni̱ xi̱ta̱ David ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ.
109
Tákuiꞌe Ndiosí,
yoꞌó ña̱ xakaꞌnuꞌ i̱,
sa̱a̱ u̱nꞌ ña̱ va̱ꞌa̱ te̱ na̱ku̱i̱i̱n u̱nꞌ si̱u̱ꞌunꞌ ña̱ kaꞌán ndaꞌvi i̱ xiinꞌ u̱nꞌ.
2 Sa̱kanꞌ ña̱ ne̱ xaaꞌ ña̱ ni̱a̱ꞌa ndii,
sataví ku̱a̱tyi̱ nianí ni̱a̱ yuꞌu̱,
te̱ xa̱ mi̱iꞌ ndiꞌiꞌ tu̱ꞌu̱n vixi̱ kaꞌán ni̱a̱ xaꞌa̱ꞌ i̱.
3 Ki̱ni̱ va̱ kaꞌán ni̱a̱ xiinꞌ i̱ nde̱e̱ naa xa̱ ni̱ xi̱nu̱ndu̱u̱ ni̱a̱ yuꞌu̱ xiinꞌ ña̱ ja̱a̱nꞌ,
te̱ köo̱ꞌ nde̱e̱ i̱i̱n xaꞌa̱ꞌ te̱ kuntaꞌanꞌ ni̱a̱ xiinꞌ i̱.
4 Ndani̱ ña̱ꞌaꞌ yuꞌu̱,
te̱ ne̱ ja̱a̱nꞌ ndii,
kuni sa̱nduxín ni̱a̱ yuꞌu̱ xiinꞌ ña̱ tiinꞌ ku̱a̱tyi̱ ni̱a̱ yuꞌu̱,
ndisu̱ yuꞌu̱ ndii,
kaꞌán i̱ si̱u̱ꞌunꞌ xiinꞌ u̱nꞌ xaꞌa̱ꞌ ni̱a̱.
5 Ña̱ ni̱a̱ꞌa sa̱na̱ndikoꞌ ni̱a̱ nuu̱ꞌ i̱ xaꞌa̱ꞌ ña̱ va̱ꞌa̱ ña̱ xaaꞌ i̱ xaꞌa̱ꞌ ni̱a̱,
te̱ ndasiꞌ ni̱a̱ yuꞌu̱ tee̱ꞌ ndee ndani̱ ña̱ꞌaꞌ i̱.
6 Kaꞌán ni̱a̱ ndii:
“I̱i̱n kuesí,
te̱ xaaꞌ ña̱ ni̱a̱ꞌa,
tyi̱nduꞌu̱ꞌ u̱nꞌ ka̱ꞌndi̱a̱ tyuunꞌ nuu̱ꞌ ra̱,
te̱ xa̱ te̱ nakaꞌán xaꞌa̱ꞌ ra̱ na ku̱ndu̱u̱ te̱ sa̱taví ku̱a̱tyi̱ ña̱ꞌaꞌ.
7 Te̱ kii̱ꞌ xaa̱ ña̱ sa̱naꞌmá ña̱ꞌaꞌ kuesí ndii,
na na̱ꞌi̱ te̱ ja̱a̱nꞌ ku̱a̱tyi̱ ra̱,
te̱ sa̱kuuꞌ si̱u̱ꞌunꞌ ña̱ kaꞌa̱n ra̱ xaꞌa̱ꞌ ra̱ ndii,
na ku̱ndu̱u̱ a̱ ña̱ sa̱taví ku̱a̱tyi̱ ka̱ ña̱ꞌaꞌ.
8 Te̱ na sa̱kuiti yoꞌó,
Ndiosí,
kivi̱ꞌ ñu̱u̱ ra̱,
te̱ atyi̱ ku̱vi̱ ra̱,
te̱ na na̱ꞌi̱ tyuunꞌ tu̱ku̱ te̱ yivi̱ꞌ nuu̱ꞌ ra̱.
9 Na ndoo̱ ndaꞌvi sa̱kuuꞌ siꞌe̱ ra̱ ña̱ köo̱ꞌ ka̱ yu̱vaꞌ ni̱a̱,
te̱ na ndoo̱ kuaa̱nꞌ ñaꞌ siꞌi ra̱.
10 Na ka̱ka̱ ndo̱so̱ꞌ sa̱kuuꞌ siꞌe̱ ra̱ ja̱a̱nꞌ i̱i̱n yivi̱ꞌ,
te̱ kaka̱n tu̱ ni̱a̱ ña̱ ka̱xi̱ꞌ ni̱a̱,
te̱ na ta̱xiꞌ ña̱ꞌaꞌ ne̱ yivi̱ꞌ vi̱ꞌe̱ ni̱a̱,
ña̱ xa̱ ni̱ nduxi̱n ndo̱o̱,
te̱ kuꞌu̱n xikaꞌ ni̱a̱.
11 Te̱ na na̱ꞌi̱ te̱ ndisoꞌ ikaꞌ ni̱a̱ sa̱kuuꞌ ña̱ kumiꞌ ni̱a̱,
te̱ ne̱ tukuꞌ na na̱ka̱ya̱ sa̱kuuꞌ ña̱ ni̱ tyi̱ꞌi̱ ni̱a̱ ka̱xi̱ꞌ ni̱a̱.
12 Na nde̱e̱ i̱i̱n ne̱ yivi̱ꞌ kü̱vi̱ta i̱ni̱ xaꞌa̱ꞌ ni̱a̱,
te̱ na nde̱e̱ i̱i̱n ne̱ yivi̱ꞌ kü̱ndani̱ siꞌe̱ ni̱a̱,
ne̱ ni̱ ndoo̱ ndaꞌvi.
13 Na ku̱vi̱ sa̱kuuꞌ si̱a̱niꞌ xikuaꞌ ni̱a̱,
te̱ na näkaꞌanꞌ xa̱tyiꞌ ka̱ nde̱e̱ i̱i̱n ne̱ yivi̱ꞌ nuu̱ꞌ kuꞌu̱n e̱ꞌ ña̱ ni̱ yoo̱ na si̱a̱niꞌ xikuaꞌ ni̱a̱.
14 Na köo̱ꞌ kivi̱ꞌ na̱ndoso̱ꞌ Yahvé ku̱a̱tyi̱ ña̱ ni̱ xa̱a̱ yu̱vaꞌ ni̱a̱,
te̱ na köo̱ꞌ kivi̱ꞌ sa̱ndoyoꞌ Ndiosí ku̱a̱tyi̱ si̱ꞌiꞌ ni̱a̱ miiꞌ yoso̱ꞌ a̱ nuu̱ꞌ tu̱tu̱ a̱.
15 Na̱ka̱ꞌanꞌ te̱ na̱ka̱ꞌanꞌ Yahvé xaꞌa̱ꞌ ku̱a̱tyi̱ ne̱ ja̱a̱nꞌ,
te̱ na näkaꞌanꞌ xa̱tyiꞌ ka̱ nde̱e̱ i̱i̱n ne̱ yivi̱ꞌ nuu̱ꞌ kuꞌu̱n e̱ꞌ naaꞌ ni̱ yoo̱ ni̱a̱.
16 Sa̱kanꞌ ña̱ nï̱ xi̱i̱n ni̱a̱ ku̱vi̱ta i̱ni̱ ni̱a̱ xaꞌa̱ꞌ ne̱ yivi̱ꞌ,
süu̱ꞌ ja̱a̱nꞌ ndii,
ni̱ ta̱xiꞌ ndo̱o̱ ni̱a̱ ne̱ ndaꞌvi kuuꞌ xiinꞌ ne̱ natiín,
te̱ ni̱ ta̱xiꞌ ni̱a̱ sa̱kuuꞌ ne̱ sutyiꞌ i̱ni̱ nde̱e̱ ni̱ xa̱ꞌni̱ꞌ ni̱a̱ sa̱kuuꞌ ña̱ ndioo̱ꞌ i̱ni̱ ne̱ ja̱a̱nꞌ.
17 Ni̱ xta̱ni̱ va̱ ni̱a̱ sa̱na̱tyaꞌanꞌ ni̱a̱ ne̱ yivi̱ꞌ,
te̱ vi̱ti̱n ndii,
na sa̱na̱tyaꞌanꞌ tu̱ Ndiosí mi̱iꞌ ni̱a̱,
köo̱ꞌ kivi̱ꞌ ni̱ sa̱ñuꞌuꞌ ni̱a̱ nde̱e̱ i̱i̱n ne̱ yivi̱ꞌ,
te̱ vi̱ti̱n ndii,
na sä̱ñuꞌuꞌ tu̱ Ndiosí mi̱iꞌ ni̱a̱.
18 Ña̱ sanatyaꞌanꞌ ni̱a̱ ne̱ yivi̱ꞌ ndii,
ni̱ kaa̱n va̱ ni̱a̱ xaaꞌ ni̱a̱ a̱,
te̱ ni̱ na̱ndu̱u̱ a̱ nuu̱ꞌ ni̱a̱ nde̱e̱ naa toto̱ niꞌnuꞌ ni̱a̱,
te̱ ni̱ ko̱ꞌni̱ a̱ i̱ni̱ ni̱a̱ nde̱e̱ naa koꞌniꞌ ti̱kui ti̱xi̱n e̱ꞌ kii̱ꞌ xiꞌiꞌ e̱ꞌ raꞌ,
te̱ ni̱ ko̱ꞌni̱ a̱ nde̱e̱ i̱kiꞌ ni̱a̱ nde̱e̱ naa xaaꞌ ña̱ xaxi̱ꞌ asi̱nꞌ va̱ koꞌniꞌ a̱ ti̱xi̱n e̱ꞌ kii̱ꞌ xaxi̱ꞌ e̱ꞌ.
19 Te̱ vi̱ti̱n ndii,
na na̱ndi̱koꞌ sa̱kuuꞌ ña̱ sanatyaꞌanꞌ ni̱a̱ ne̱ yivi̱ꞌ ku̱ndo̱ꞌo̱ mi̱iꞌ ni̱a̱,
te̱ na̱suku̱ꞌ ña̱ꞌaꞌ a̱ nde̱e̱ naa xaaꞌ toto̱ niꞌnuꞌ ni̱a̱,
te̱ naa ku̱ꞌniꞌ ña̱ꞌaꞌ a̱ nde̱e̱ naa xaaꞌ i̱i̱nꞌ ña̱ tiín to̱koꞌ ni̱a̱.
20 Te̱ ña̱ sanatyaꞌanꞌ ni̱a̱ ne̱ yivi̱ꞌ ja̱a̱nꞌ na ku̱ndu̱u̱ tu̱ndoꞌo̱ꞌ ña̱ taxiꞌ Yahvé ku̱ndo̱ꞌo̱ mi̱iꞌ ni̱a̱ xaꞌa̱ꞌ a̱ ña̱ tiinꞌ ku̱a̱tyi̱ nianí ni̱a̱ yuꞌu̱,
te̱ sa̱kanꞌ tu̱ ne̱ kaꞌán ki̱ni̱ xaꞌa̱ꞌ i̱,
te̱ sataví ku̱a̱tyi̱ ni̱a̱ yuꞌu̱”,
ni̱ katyi̱ ra̱.
21 Ndisu̱ yuꞌu̱ ndii,
mani̱ꞌ ku̱u̱ u̱nꞌ xiinꞌ i̱,
Tákuiꞌe Yahvé,
Ndiosí ña̱ xakaꞌnuꞌ i̱.
Sa̱a̱ u̱nꞌ ña̱ va̱ꞌa̱ te̱ sa̱kakú u̱nꞌ yuꞌu̱,
sa̱kanꞌ te̱ kiꞌinꞌ kaꞌnuꞌ ne̱ yivi̱ꞌ yoꞌó,
sa̱kanꞌ ña̱ ña̱ xatyuunꞌ nda̱ku va̱ nduuꞌ u̱nꞌ,
te̱ ña̱ va̱ꞌa̱ va̱ tu̱ nduuꞌ u̱nꞌ.
22 Sa̱kanꞌ ña̱ te̱ ndaꞌvi kuuꞌ nduuꞌ i̱,
te̱ natiín va̱ tu̱ i̱ xaꞌa̱ꞌ ña̱ꞌa̱,
te̱ xa̱ ni̱ tu̱xuꞌví va̱ nimá i̱.
23 Te̱ kuiee kuiee kukuiꞌe i̱ kuaꞌa̱n i̱,
nde̱e̱ naa xaaꞌ ka̱tiꞌ xa̱kuaa̱ꞌ kii̱ꞌ ketá ñu̱ꞌu̱,
te̱ nde̱e̱ tatyi̱ꞌ kavikoꞌ yuꞌu̱ nde̱e̱ naa xaaꞌ a̱ xiinꞌ ti̱ka̱ ku̱i̱ti̱ꞌ.
24 Te̱ xaꞌa̱ꞌ a̱ ña̱ yoo ndi̱ti̱a̱ va̱ i̱ ndii,
köo̱ꞌ ka̱ ndi̱e̱e̱ꞌ xaꞌa̱ꞌ i̱,
te̱ ni̱ ku̱kuiꞌe va̱ tu̱ i̱ xaꞌa̱ꞌ a̱ ña̱ xïxiꞌ ka̱ i̱.
25 Nuu̱ꞌ ne̱ yivi̱ꞌ ndii,
nde̱e̱ naa te̱ tava̱ꞌ sii̱ꞌ ku̱i̱ti̱ꞌ nduuꞌ i̱,
te̱ kii̱ꞌ xini ni̱a̱ kuaꞌa̱n i̱ ndii,
kisiꞌ ni̱a̱ xíniꞌ ni̱a̱,
te̱ xiinꞌ ña̱ ja̱a̱nꞌ niaꞌá ni̱a̱ ña̱ ndasiꞌ ni̱a̱ yuꞌu̱,
te̱ xandiꞌiꞌ ni̱a̱ xiinꞌ i̱.
26 Tákuiꞌe Ndiosí ña̱ xakaꞌnuꞌ i̱,
sa̱a̱ u̱nꞌ ña̱ va̱ꞌa̱ te̱ tyi̱ndi̱e̱eꞌ u̱nꞌ yuꞌu̱,
te̱ xaꞌa̱ꞌ a̱ ña̱ kuvita va̱ i̱ni̱ u̱nꞌ xaꞌa̱ꞌ i̱ ndii,
sa̱a̱ u̱nꞌ ña̱ va̱ꞌa̱ sa̱kakú u̱nꞌ yuꞌu̱.
27 Te̱ ku̱ni̱ ne̱ yivi̱ꞌ ña̱ yoꞌó nduuꞌ ña̱ ni̱ xa̱a̱ tyu̱u̱n kaꞌnuꞌ ja̱a̱nꞌ,
ña̱ yoꞌó,
Tákuiꞌe Yahvé,
nduuꞌ ña̱ sakakú yuꞌu̱.
28 Köo̱ꞌ a̱ xaaꞌ a̱ tee̱ꞌ ndee sa̱na̱tyaꞌanꞌ ne̱ yivi̱ꞌ ja̱a̱nꞌ yuꞌu̱,
ndisu̱ yoꞌó ndii,
sa̱ñuꞌuꞌ u̱nꞌ yuꞌu̱,
te̱ kii̱ꞌ kuntaꞌanꞌ ni̱a̱ xiinꞌ i̱ ndii,
sa̱kaꞌanꞌ u̱nꞌ nuu̱ꞌ ni̱a̱,
ndisu̱ yuꞌu̱,
te̱ xikaꞌ nuuꞌ nuu̱ꞌ u̱nꞌ ndii,
na̱ku̱a̱tiaꞌ i̱.
29 Na ku̱ka̱ꞌa̱n xa̱va̱ꞌa̱ nuu̱ꞌ te̱ ndasiꞌ taꞌanꞌ xiinꞌ i̱,
te̱ na ku̱ndu̱u̱ ña̱ sa̱ndoó kuiꞌe ña̱ꞌaꞌ u̱nꞌ ja̱a̱nꞌ nde̱e̱ naa toto̱ ndiká ña̱ ndisuku̱ꞌ ra̱.
30 Ndisu̱ yuꞌu̱ ndii,
ta̱xi̱ i̱ na taxiꞌ i̱ ña̱ tyi̱nda̱ni Tákuiꞌe Yahvé,
te̱ sa̱kaꞌnuꞌ ña̱ꞌaꞌ i̱ nuu̱ꞌ sa̱kuuꞌ ne̱ yivi̱ꞌ.
31 Sa̱kanꞌ ña̱ yoo a̱ xiinꞌ ne̱ natiín,
te̱ xa̱ yoo tu̱ꞌva̱ a̱ te̱ sa̱kakú ña̱ꞌaꞌ a̱ nda̱ꞌaꞌ ne̱ sandoꞌoꞌ ña̱ꞌaꞌ.