Yoꞌoꞌ xikán David nuu̱ꞌ Ndiosí ña̱ tyi̱ndi̱e̱eꞌ ña̱ꞌaꞌ a̱ te̱ ka̱nandoo ra̱ te̱ ndasiꞌ taꞌanꞌ xiinꞌ ra̱.
Ya̱a̱ ña̱ ni̱ xi̱ta̱ David nuu̱ꞌ Ndiosí.
108
Tákuiꞌe Ndiosí,
xa̱ yoo tu̱ꞌva̱ nimá i̱ te̱ sa̱kaꞌnuꞌ i̱ yoꞌó,
xaꞌa̱ꞌ a̱ ja̱a̱nꞌ na kuni ka̱ta̱ i̱ ya̱a̱ nuu̱ꞌ u̱nꞌ xiinꞌ i̱i̱n ka̱niiꞌ nimá i̱,
Ndiosí kuaꞌa mi̱iꞌ i̱.
2 Ndo̱to̱ tu̱ nuu̱ꞌ ndoꞌó,
ñuu̱ꞌ ña̱ xandaaꞌ i̱,
ña̱ nduuꞌ salterio xiinꞌ ñuu̱ꞌ arpa.
Ni̱a̱ꞌa̱ va̱ ndo̱koo̱ i̱ te̱ ka̱ta̱ i̱ ya̱a̱ nuu̱ꞌ Ndiosí.
3 Tákuiꞌe Ndiosí,
ta̱xi̱ i̱ ña̱ tyi̱nda̱ni u̱nꞌ nuu̱ꞌ kuaꞌa̱ꞌ ne̱ yivi̱ꞌ,
te̱ ka̱ta̱ i̱ ya̱a̱ nuu̱ꞌ yoꞌó te̱i̱n kuaꞌa̱ꞌ ne̱ tukuꞌ.
4 Sa̱kanꞌ ña̱ tyiee̱ va̱ ña̱ kuvita i̱ni̱ u̱nꞌ xaꞌa̱ꞌ ne̱ yivi̱ꞌ,
te̱ naxaá a̱ nde̱e̱ ndi̱viꞌ,
te̱ nde̱e̱ nuu̱ꞌ viko̱ꞌ naxaá ña̱ xatyuunꞌ nda̱ku u̱nꞌ.
5 Tákuiꞌe Ndiosí,
na ki̱ꞌi̱n kaꞌnuꞌ sa̱kuuꞌ ne̱ yivi̱ꞌ yoꞌó nde̱e̱ miiꞌ sukun va̱ ndi̱viꞌ miiꞌ nduꞌu̱ꞌ u̱nꞌ,
te̱ ña̱ kaꞌnuꞌ u̱nꞌ ndii,
yoo a̱ i̱i̱n ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ.
6 Sa̱a̱ u̱nꞌ ña̱ va̱ꞌa̱ te̱ sakakú u̱nꞌ nduꞌu̱,
ne̱ ndani̱ u̱nꞌ,
ne̱ nduuꞌ kuenta u̱nꞌ vi̱ti̱n,
sa̱a̱ u̱nꞌ ña̱ va̱ꞌa̱ na̱ku̱i̱i̱n u̱nꞌ ña̱ kaꞌán ndu̱ xiinꞌ u̱nꞌ,
te̱ sa̱kakú u̱nꞌ ndu̱ xiinꞌ ña̱ ndi̱e̱eꞌ u̱nꞌ.
7 Te̱ ni̱ kaꞌa̱n Ndiosí nde̱e̱ yu̱kunꞌ su̱ꞌu̱n miiꞌ nduꞌu̱ꞌ a̱ ndii:
“Vi̱ti̱n ndii,
na̱ku̱a̱tiaꞌ i̱,
te̱ sa̱na̱kuatyiꞌ i̱ ñu̱u̱ Siquem,
te̱ ki̱ꞌi̱n ku̱ꞌva̱ i̱ yo̱soꞌ ña̱ naniꞌ Sucot.
8 Ñu̱ꞌuꞌ Galaad xiinꞌ ñu̱ꞌuꞌ Manasés ndii,
ña̱ꞌa̱ yuꞌu̱ nduuꞌ a̱,
te̱ Efraín nduuꞌ te̱ xitoꞌ ne̱ nduuꞌ kuenta i̱,
te̱ Judá nduuꞌ te̱ niꞌiꞌ ta̱tunꞌ,
te̱ kaꞌán tuní ra̱ tu̱ꞌu̱n nde̱iꞌ i̱.
9 Ndisu̱ te̱ vi̱ꞌe̱ Moab nduuꞌ nde̱e̱ naa xi̱koꞌoꞌ miiꞌ naá ti̱kui teꞌ natiaꞌ i̱ nda̱ꞌaꞌ i̱,
te̱ te̱ vi̱ꞌe̱ Edom ku̱ndu̱u̱ te̱ ko̱ni̱ꞌi̱ ndixa̱nꞌ kiꞌiꞌ i̱.
Te̱ ku̱ni̱ so̱ꞌo̱ ne̱ vi̱ꞌe̱ filisteo kii̱ꞌ ndeꞌi̱ tiꞌeꞌ i̱ nuu̱ꞌ ñu̱ꞌuꞌ ni̱a̱ ña̱ xa̱ ni̱ ka̱nandoo ña̱ꞌaꞌ i̱”,
ni̱ katyi̱ a̱.
10 ¿Yo̱o̱ kuꞌu̱n ndi̱a̱ka̱ yuꞌu̱ ñu̱u̱ ña̱ ndasi i̱ꞌnu̱ kutu̱ꞌ va̱ xiinꞌ nama̱?
¿Yo̱o̱ ta̱xi̱ ndi̱e̱e̱ꞌ i̱ te̱ ke̱ta̱ va̱ꞌa̱ i̱ xiinꞌ ne̱ ndieeꞌ ñu̱u̱ Edom kii̱ꞌ ku̱ntaꞌanꞌ i̱ xiinꞌ ni̱a̱?
11 Su̱u̱ yoꞌó ndo̱ꞌ,
Tákuiꞌe Ndiosí,
te̱ ni̱ na̱ko̱o̱ u̱nꞌ ndu̱,
sa̱kanꞌ ña̱ yoꞌó nduuꞌ ña̱ ni̱ niꞌi̱ i̱tyiꞌ nuu̱ꞌ te̱ xíinꞌ ndu̱ kii̱ꞌ kuaꞌa̱n ku̱ntaꞌanꞌ ndu̱.
12 Sa̱kanꞌ na kuiiꞌ sa̱a̱ u̱nꞌ ña̱ va̱ꞌa̱ te̱ tyi̱ndi̱e̱eꞌ u̱nꞌ ndu̱ kii̱ꞌ ku̱ntaꞌanꞌ ndu̱ xiinꞌ te̱ ndasiꞌ taꞌanꞌ xiinꞌ ndu̱,
sa̱kanꞌ ña̱ tee̱ꞌ ndee kuaꞌa̱ꞌ te̱ yivi̱ꞌ tyi̱ndi̱e̱eꞌ ndu̱ ndii,
kë̱ta̱ va̱ꞌa̱ ndu̱.
13 Te̱ xiinꞌ ña̱ ndi̱e̱eꞌ Ndiosí ndii,
kuaꞌa̱ꞌ tyu̱u̱n kaꞌnuꞌ ku̱vi̱ sa̱a̱ ndu̱.
Te̱ xiinꞌ ña̱ ndi̱e̱eꞌ u̱nꞌ ja̱a̱nꞌ kueꞌni̱ ndo̱so̱ꞌ u̱nꞌ suku̱nꞌ te̱ ndasiꞌ taꞌanꞌ xiinꞌ ndu̱ ja̱a̱nꞌ.