Yoꞌoꞌ kaꞌán a̱ ña̱ sakakú Ndiosí yooꞌ naaꞌ kaꞌa̱n ndaꞌvi e̱ꞌ xiinꞌ a̱
107
Na sa̱kaꞌnuꞌ e̱ꞌ Yahvé,
sa̱kanꞌ ña̱ ña̱ va̱ꞌa̱ va̱ nduuꞌ a̱,
te̱ nde̱e̱ ndiꞌiꞌ ni̱ kivi̱ꞌ kuvita i̱ni̱ a̱ xaꞌa̱ꞌ e̱ꞌ.
2 Na kaꞌa̱n sa̱kuuꞌ ne̱ ni̱ sa̱kakú Yahvé xaꞌa̱ꞌ a̱.
Na kaꞌa̱n sa̱kuuꞌ yooꞌ,
ne̱ ni̱ sa̱kakú a̱,
te̱ ni̱ sa̱ndoó ndiká a̱ nda̱ꞌaꞌ ne̱ ndasiꞌ taꞌanꞌ xiinꞌ e̱ꞌ xaꞌa̱ꞌ a̱.
3 Na kaꞌa̱n sa̱kuuꞌ yooꞌ,
ne̱ ni̱ na̱ka̱ya̱ Ndiosí kuaꞌa̱ꞌ ñu̱u̱ ña̱ ñuꞌuꞌ nuu̱ꞌ i̱i̱n yivi̱ꞌ,
naa kuuꞌ ne̱ ni̱ ndiee̱ nde̱e̱ miiꞌ ketaꞌ ñu̱ꞌu̱,
xiinꞌ ne̱ ni̱ ndiee̱ nde̱e̱ miiꞌ ketá a̱,
xiinꞌ naa kuuꞌ ne̱ ni̱ ndiee̱ xíniꞌ ñu̱ꞌuꞌ i̱i̱n yivi̱ꞌ ni̱nu̱,
xiinꞌ ne̱ ni̱ ndiee̱ suꞌma̱ꞌ ñu̱ꞌuꞌ i̱i̱n yivi̱ꞌ ninu̱.
4 Sa̱kuuꞌ ne̱ xii̱ꞌ ya̱taꞌ e̱ꞌ ni̱ xika̱ ndo̱so̱ꞌ miiꞌ i̱tyi kaaꞌ,
te̱ nï̱ xi̱ni̱ ni̱a̱ miiꞌ kuaꞌa̱n i̱tyiꞌ ña̱ kuꞌu̱n ni̱a̱ te̱ na̱xaa̱ ni̱a̱ i̱i̱n ñu̱u̱ miiꞌ ku̱vi̱ ku̱ndi̱e̱e̱ ni̱a̱.
5 Ni̱ xiꞌi̱ va̱ ni̱a̱ so̱ko̱,
te̱ ni̱ ityi̱ va̱ tu̱ ni̱a̱ ti̱kui,
te̱ ndee tyaaꞌ va̱ te̱ ku̱vi̱ xa̱tyiꞌ ni̱a̱ xaꞌa̱ꞌ a̱ ña̱ ni̱ ku̱vi̱ta va̱ ni̱a̱.
6 Sa̱kanꞌ te̱ ni̱ kaꞌa̱n ndaꞌvi ni̱a̱ nuu̱ꞌ Yahvé xaꞌa̱ꞌ ña̱ ndoꞌoꞌ nimá ni̱a̱,
te̱ ni̱ sa̱kakú ña̱ꞌaꞌ a̱ nuu̱ꞌ ña̱ ndoꞌoꞌ ni̱a̱ ja̱a̱nꞌ.
7 Te̱ ni̱ xa̱ka̱ ña̱ꞌaꞌ a̱ kuaꞌa̱n a̱ xiinꞌ ni̱a̱ i̱tyiꞌ nda̱ku
nde̱e̱ ni̱ na̱xaa̱ ni̱a̱ ñu̱u̱ miiꞌ ku̱ndi̱e̱e̱ ni̱a̱.
8 Na sa̱kaꞌnuꞌ e̱ꞌ Yahvé xaꞌa̱ꞌ a̱ ña̱ ndani̱ va̱ a̱ yooꞌ
xiinꞌ xaꞌa̱ꞌ kuaꞌa̱ꞌ tyu̱u̱n kaꞌnuꞌ ña̱ ni̱ xa̱a̱ a̱ xaꞌa̱ꞌ ne̱ ja̱a̱nꞌ.
9 Sa̱kanꞌ ña̱ ña̱ ja̱a̱nꞌ nduuꞌ ña̱ taxiꞌ ti̱kui xiꞌiꞌ ne̱ ityí i̱ni̱,
te̱ taxiꞌ a̱ kuaꞌa̱ꞌ va̱ ña̱ xaxi̱ꞌ sa̱kuuꞌ ne̱ xiꞌí so̱ko̱.
10 Sa̱va̱ ne̱ xii̱ꞌ ya̱taꞌ e̱ꞌ ja̱a̱nꞌ ndii,
ni̱ xika̱ ndoꞌoꞌ va̱ ni̱a̱ i̱i̱n yivi̱ꞌ,
te̱ ne̱ xa̱ yoo ku̱vi̱ ni̱ nduu̱ ni̱a̱,
ni̱ ñuꞌu̱ ni̱a̱ vi̱ꞌe̱ ka̱a̱,
te̱ ni̱ tii̱n tu̱ ni̱a̱ xiinꞌ karena vie̱ va̱.
11 Ni̱ ndo̱ꞌo̱ ni̱a̱ sa̱kanꞌ xaꞌa̱ꞌ a̱ ña̱ ni̱ xa̱teiꞌ ni̱a̱ nuu̱ꞌ kuento ña̱ ni̱ kaꞌa̱n Yahvé xiinꞌ ni̱a̱,
te̱ ni̱ ku̱ndi̱ꞌi̱ tu̱ ni̱a̱ xiinꞌ tu̱ꞌu̱n nde̱iꞌ Ndiosí ña̱ nduꞌu̱ꞌ ndi̱e̱nu̱.
12 Sa̱kanꞌ na kuiiꞌ ni̱ sa̱ndoꞌoꞌ ña̱ꞌaꞌ a̱ xiinꞌ tyu̱u̱n vie̱ va̱,
te̱ kii̱ꞌ ni̱ ka̱kiꞌi̱ ni̱a̱,
te̱ ni̱ ndu̱va̱ ni̱a̱ ndii,
köo̱ꞌ ni̱ tyindieeꞌ xa̱tyiꞌ ña̱ꞌaꞌ te̱ ndo̱koo̱ ni̱a̱ nuu̱ꞌ tyu̱u̱n vie̱ ja̱a̱nꞌ.
13 Ndisu̱ kii̱ꞌ ni̱ xa̱ꞌaꞌ ndiꞌni̱ va̱ nimá ni̱a̱ ndii,
ni̱ kaꞌa̱n ndaꞌvi ni̱a̱ xiinꞌ Yahvé,
te̱ ni̱ sa̱kakú ña̱ꞌaꞌ a̱ nuu̱ꞌ ña̱ ndoꞌoꞌ ni̱a̱ ja̱a̱nꞌ.
14 Ni̱ ta̱va̱ꞌ ña̱ꞌaꞌ a̱ miiꞌ ni̱ xika̱ ndoꞌoꞌ va̱ ni̱a̱ i̱i̱n yivi̱ꞌ,
te̱ ni̱ nduu̱ ni̱a̱ nde̱e̱ naa ne̱ xa̱ yoo ku̱vi̱,
te̱ ni̱ sa̱kuatyiꞌ a̱ karena vie̱ va̱ ña̱ tiín ni̱a̱.
15 Na sa̱kaꞌnuꞌ e̱ꞌ Yahvé xaꞌa̱ꞌ a̱ ña̱ ndani̱ va̱ a̱ yooꞌ
xiinꞌ xaꞌa̱ꞌ kuaꞌa̱ꞌ tyu̱u̱n kaꞌnuꞌ ña̱ ni̱ xa̱a̱ a̱ xaꞌa̱ꞌ ne̱ ja̱a̱nꞌ.
16 Sa̱kanꞌ ña̱ ni̱ ta̱ꞌviꞌ a̱ vitu̱ꞌ ka̱a̱ ña̱ ni̱ ku̱a̱ꞌa̱ xiinꞌ ka̱a̱ bronce ña̱ ndasiꞌ yiꞌeꞌ vi̱ꞌe̱ ka̱a̱ miiꞌ ñuꞌuꞌ ni̱a̱,
te̱ ni̱ xaꞌnu̱ tu̱ a̱ ka̱a̱ ña̱ taꞌnuꞌ ndi̱xi̱n te̱ ndasi yiꞌeꞌ vi̱ꞌe̱ ka̱a̱ ja̱a̱nꞌ.
17 Sa̱va̱ ne̱ xii̱ꞌ ya̱taꞌ e̱ꞌ ja̱a̱nꞌ,
ne̱ küuꞌ kaxiꞌ ndii,
ni̱ xa̱teiꞌ ni̱a̱ nuu̱ꞌ Ndiosí,
xaꞌa̱ꞌ a̱ ja̱a̱nꞌ na ni̱ sa̱ndoꞌoꞌ ña̱ꞌaꞌ a̱ xaꞌa̱ꞌ ña̱ ni̱a̱ꞌa ña̱ ni̱ xa̱a̱ ni̱a̱ ja̱a̱nꞌ.
18 Te̱ xaꞌa̱ꞌ a̱ ña̱ ndi̱e̱eꞌ va̱ kuni ku̱vi̱ ni̱a̱ ndii,
nde̱e̱ i̱i̱n nuu̱ꞌ ña̱ xaxi̱ꞌ nï̱ ku̱vi̱ ka̱ ka̱xi̱ꞌ ni̱a̱,
sa̱kanꞌ na kuiiꞌ ndee tyaaꞌ va̱ te̱ ku̱vi̱ xa̱tyiꞌ ni̱a̱.
19 Ndisu̱ kii̱ꞌ ni̱ xa̱ꞌaꞌ ndiꞌni̱ va̱ nimá ni̱a̱ ndii,
ni̱ kaꞌa̱n ndaꞌvi ni̱a̱ xiinꞌ Yahvé,
te̱ ni̱ sa̱kakú ña̱ꞌaꞌ a̱ nuu̱ꞌ ña̱ ndoꞌoꞌ ni̱a̱ ja̱a̱nꞌ.
20 Sa̱kanꞌ te̱ ni̱ ti̱ꞌviꞌ a̱ tu̱ꞌu̱n a̱,
te̱ ni̱ sa̱ndaꞌa ña̱ꞌaꞌ tu̱ꞌu̱n a̱ ja̱a̱nꞌ,
te̱ ni̱ sa̱kakú tu̱ ña̱ꞌaꞌ a̱,
te̱ nï̱ xiꞌi̱ ni̱a̱.
21 Te̱ ni̱ xa̱kaꞌnuꞌ ni̱a̱ Yahvé xaꞌa̱ꞌ a̱ ña̱ ndani̱ va̱ a̱ ña̱ꞌaꞌ a̱
xiinꞌ xaꞌa̱ꞌ kuaꞌa̱ꞌ tyu̱u̱n kaꞌnuꞌ ña̱ ni̱ xa̱a̱ a̱ xaꞌa̱ꞌ ne̱ ja̱a̱nꞌ.
22 Te̱ ya̱a̱ ña̱ ni̱ xi̱ta̱ ni̱a̱ ni̱ nduu̱ nde̱e̱ naa tu̱mani̱ꞌ ña̱ ni̱ na̱soko̱ꞌ ni̱a̱ nuu̱ꞌ a̱,
te̱ va̱ꞌa̱ kuni ni̱a̱,
te̱ ni̱ kaꞌa̱n ni̱a̱ xaꞌa̱ꞌ tyu̱u̱n kaꞌnuꞌ ña̱ ni̱ xa̱a̱ a̱ xaꞌa̱ꞌ ni̱a̱.
23 Sa̱va̱ ne̱ xii̱ꞌ ya̱taꞌ e̱ꞌ ja̱a̱nꞌ ndii,
ni̱ xaꞌa̱n ni̱a̱ nuu̱ꞌ mi̱ni̱ kaꞌnuꞌ xiinꞌ tundo̱oꞌ ni̱a̱,
te̱ ni̱ xi̱ko̱ꞌ ni̱a̱ ña̱ꞌa̱ ni̱a̱ tu̱ku̱ taꞌviꞌ i̱i̱n yivi̱ꞌ.
24 Ni̱ xi̱ni̱ ne̱ ja̱a̱nꞌ kuaꞌa̱ꞌ tyu̱u̱n kaꞌnuꞌ ña̱ ni̱ xa̱a̱ Yahvé,
te̱ ni̱ xi̱ni̱ tu̱ ni̱a̱ kiꞌinꞌ ña̱ nandani̱ ña̱ ni̱ xa̱a̱ a̱ ma̱ꞌiꞌ mi̱ni̱ kaꞌnuꞌ miiꞌ kunu xa̱va̱ꞌa̱.
25 Sa̱kanꞌ ña̱ ni̱ kaꞌa̱n tyuunꞌ Ndiosí,
te̱ ni̱ xa̱ꞌaꞌ tatyi̱ꞌ ndi̱e̱eꞌ xa̱va̱ꞌa̱ xikaꞌ a̱,
te̱ ni̱ xa̱ꞌaꞌ ndi̱e̱eꞌ va̱ tu̱ nutaꞌ ti̱kui nuu̱ꞌ mi̱ni̱ ja̱a̱nꞌ.
26 Te̱ ndi̱e̱eꞌ va̱ tu̱ ni̱ nu̱ta̱ tundo̱oꞌ nde̱e̱ ndi̱viꞌ ndee tyaaꞌ na̱xaa̱ nu̱ꞌ,
te̱ tu̱ku̱ sa̱kanꞌ ni̱ koyo̱ tu̱ku̱u̱ nu̱ꞌ nuu̱ꞌ ti̱kui mi̱ni̱ ja̱a̱nꞌ,
te̱ ni̱ yi̱ꞌvi xa̱va̱ꞌa̱ te̱ xatyuunꞌ xiinꞌ tundo̱oꞌ ja̱a̱nꞌ.
27 Kisiꞌ vi̱ꞌ ña̱ꞌaꞌ a̱,
te̱ sekoꞌ tu̱ a̱ nuu̱ꞌ ra̱ nde̱e̱ naa te̱ xini̱,
te̱ sa̱kuuꞌ ña̱ xini tuní ra̱ ndii,
nï̱ tyi̱ndi̱e̱eꞌ xa̱tyiꞌ ña̱ꞌaꞌ a̱.
28 Sa̱kanꞌ te̱ ni̱ kaꞌa̱n ndaꞌvi ra̱ nuu̱ꞌ Yahvé xaꞌa̱ꞌ ña̱ ndoꞌoꞌ nimá ra̱,
te̱ ni̱ sa̱kakú ña̱ꞌaꞌ a̱ nuu̱ꞌ ña̱ ndoꞌoꞌ ra̱ ja̱a̱nꞌ.
29 Ni̱ sa̱i̱i̱n kuiín a̱ ña̱ i̱yo̱ nuu̱ꞌ mi̱ni̱ ja̱a̱nꞌ,
te̱ ni̱ ku̱taxi̱nꞌ a̱ ndee vaa̱ꞌ ku̱i̱ti̱ꞌ xikaꞌ tatyi̱ꞌ nuu̱ꞌ mi̱ni̱ ja̱a̱nꞌ,
te̱ ni̱ sa̱i̱i̱n kuiín tu̱ a̱ ña̱ ndi̱e̱eꞌ nutaꞌ ti̱kui nuu̱ꞌ mi̱ni̱ ja̱a̱nꞌ.
30 Te̱ kii̱ꞌ ni̱ xi̱ni̱ ra̱ ña̱ ni̱ xi̱kuii̱n ña̱ i̱yo̱ nuu̱ꞌ mi̱ni̱ ja̱a̱nꞌ ndii,
va̱ꞌa̱ va̱ ni̱ ku̱ni̱ ra̱,
te̱ ni̱ xaꞌa̱n ndi̱a̱ka̱ ña̱ꞌaꞌ Ndiosí nde̱e̱ yu̱ꞌuꞌ mi̱ni̱ miiꞌ ni̱ kuni̱ ra̱ kuꞌu̱n ra̱.
31 Te̱ ni̱ xa̱kaꞌnuꞌ ni̱a̱ Yahvé xaꞌa̱ꞌ a̱ ña̱ ndani̱ va̱ a̱ ña̱ꞌaꞌ a̱
xiinꞌ xaꞌa̱ꞌ kuaꞌa̱ꞌ tyu̱u̱n kaꞌnuꞌ ña̱ ni̱ xa̱a̱ a̱ xaꞌa̱ꞌ ne̱ ja̱a̱nꞌ.
32 Ni̱ xa̱kaꞌnuꞌ ña̱ꞌaꞌ sa̱kuuꞌ ni̱a̱ miiꞌ nakayá kuaꞌa̱ꞌ ne̱ yivi̱ꞌ,
te̱ ni̱ xa̱kaꞌnuꞌ tu̱ ña̱ꞌaꞌ ni̱a̱ miiꞌ nakayá kuaꞌa̱ꞌ te̱ xi̱xa̱.
33 Ndiosí ndii,
sananduuꞌ a̱ i̱ti̱a̱ miiꞌ i̱tyi kaaꞌ,
te̱ miiꞌ yoo ti̱ko̱ꞌyoꞌ sananduuꞌ a̱ ñu̱ꞌuꞌ miiꞌ i̱tyi kaaꞌ.
34 Te̱ ñu̱ꞌuꞌ ñaꞌma va̱ ndii,
ni̱ nda̱sa̱ nduuꞌ ña̱ꞌaꞌ Ndiosí ñu̱ꞌuꞌ tiꞌeꞌ miiꞌ köo̱ꞌ ña̱ꞌa̱ ku̱vi̱ tyi̱ꞌi̱ ne̱ yivi̱ꞌ
xaꞌa̱ꞌ ña̱ ni̱a̱ꞌa ña̱ xaaꞌ ne̱ ndieeꞌ nuu̱ꞌ ñu̱ꞌuꞌ i̱kanꞌ.
35 Ndisu̱ miiꞌ i̱tyi kaaꞌ ja̱a̱nꞌ sananduuꞌ a̱ mi̱ni̱ miiꞌ yoo kuaꞌa̱ꞌ ti̱kui,
te̱ miiꞌ nduuꞌ a̱ ñu̱ꞌuꞌ i̱tyi sananduuꞌ a̱ ti̱ko̱ꞌyoꞌ miiꞌ kieeꞌ kuaꞌa̱ꞌ ti̱kui.
36 Te̱ i̱kanꞌ natyindieeꞌ a̱ ne̱ xiꞌí so̱ko̱,
te̱ i̱kanꞌ tu̱ ndasa nduuꞌ ne̱ ja̱a̱nꞌ ñu̱u̱ ni̱a̱ miiꞌ ndieeꞌ ni̱a̱.
37 Tyiꞌiꞌ ni̱a̱ yo̱ꞌoꞌ uva nuu̱ꞌ ñu̱ꞌuꞌ ja̱a̱nꞌ,
te̱ kuaꞌa̱ꞌ va̱ ña̱ savi̱ꞌ nakaya ni̱a̱.
38 Sañuꞌuꞌ ña̱ꞌaꞌ a̱ te̱ so̱ꞌo̱ nduuꞌ kuaꞌa̱ꞌ ka̱ ni̱a̱ xaaꞌ a̱,
te̱ köo̱ꞌ kivi̱ꞌ ndiꞌiꞌ tu̱ si̱ndiki̱ꞌ sana̱ ni̱a̱.
39 Ndisu̱ kii̱ꞌ sandoꞌoꞌ ña̱ꞌaꞌ ne̱ yivi̱ꞌ,
te̱ xaaꞌ tu̱ ni̱a̱ ña̱ ni̱a̱ꞌa xiinꞌ ne̱ ja̱a̱nꞌ,
te̱ sandiꞌni̱ tu̱ ni̱a̱ nimá ne̱ ja̱a̱nꞌ ndii,
kuaꞌa̱ꞌ va̱ ni̱a̱ xiꞌí,
te̱ kundaꞌvi tu̱ ni̱a̱ xaaꞌ ne̱ yivi̱ꞌ ja̱a̱nꞌ.
40 Te̱ mi̱iꞌ Ndiosí sandoꞌoꞌ ne̱ yivi̱ꞌ,
ne̱ sa̱ndoꞌoꞌ ne̱ ja̱a̱nꞌ ja̱a̱nꞌ,
te̱ xikaꞌ ndo̱so̱ꞌ sa̱kuuꞌ ni̱a̱ nuu̱ꞌ ñu̱ꞌuꞌ miiꞌ i̱tyi kaaꞌ miiꞌ köo̱ꞌ i̱tyiꞌ kuaꞌa̱n vi̱ꞌ.
41 Ndisu̱ tyindieeꞌ a̱ ne̱ ndaꞌvi kuuꞌ,
te̱ sanataꞌvíꞌ ña̱ꞌaꞌ a̱ nde̱e̱ naa xaaꞌ mbe̱e̱ nduuꞌ kuaꞌa̱ꞌ riꞌ.
42 Te̱ kii̱ꞌ ku̱ni̱ ne̱ xatyuunꞌ nda̱ku ña̱ ja̱a̱nꞌ ndii,
na̱ku̱a̱tiaꞌ ni̱a̱,
te̱ ne̱ xaaꞌ ña̱ ni̱a̱ꞌa ndii,
köo̱ꞌ xa̱tyiꞌ ka̱ a̱ ku̱vi̱ kaꞌa̱n ni̱a̱.
43 Te̱ ne̱ xini tuní ndii,
na ka̱ni̱ni̱ va̱ꞌa̱ ni̱a̱ xaꞌa̱ꞌ ña̱ kaa̱ꞌ,
te̱ ku̱nda̱ni̱ kaxiꞌ ni̱a̱ ña̱ kuvita va̱ i̱ni̱ Yahvé xaꞌa̱ꞌ ne̱ yivi̱ꞌ.