Yoꞌoꞌ kaꞌán a̱ xaꞌa̱ꞌ ña̱ ni̱ xa̱so̱ꞌo̱ ne̱ vi̱ꞌe̱ e̱ꞌ, ne̱ Israel, nuu̱ꞌ Ndiosí
106
Na sa̱kaꞌnuꞌ e̱ꞌ Yahvé,
xto̱ꞌo̱ e̱ꞌ.
Na sa̱kaꞌnuꞌ ña̱ꞌaꞌ e̱ꞌ,
sa̱kanꞌ ña̱ ña̱ va̱ꞌa̱ va̱ nduuꞌ a̱,
te̱ nde̱e̱ ndiꞌiꞌ ni̱ kivi̱ꞌ kuvita i̱ni̱ a̱ xaꞌa̱ꞌ e̱ꞌ.
2 Köo̱ꞌ nde̱e̱ i̱i̱n ne̱ yivi̱ꞌ,
ne̱ xiní sa̱a̱ taꞌanꞌ kuuꞌ tyu̱u̱n kaꞌnuꞌ ña̱ xaaꞌ Yahvé,
te̱ köo̱ꞌ tu̱ nde̱e̱ i̱i̱n ne̱ yivi̱ꞌ,
ne̱ ku̱vi̱ sa̱kaꞌnuꞌ ña̱ꞌaꞌ,
te̱ köo̱ꞌ kivi̱ꞌ xa̱vi ni̱a̱.
3 Va̱ꞌa̱ va̱ kuni ne̱ yivi̱ꞌ,
ne̱ xatyuunꞌ nda̱ku xaꞌa̱ꞌ ne̱ yivi̱ꞌ,
te̱ xatyuunꞌ nda̱ku ni̱a̱ xiinꞌ ne̱ yivi̱ꞌ i̱ꞌi̱n kivi̱ꞌ kuaꞌa̱n.
4 Sa̱a̱ u̱nꞌ ña̱ va̱ꞌa̱,
Tákuiꞌe Yahvé,
te̱ na̱ka̱ꞌanꞌ u̱nꞌ xaꞌa̱ꞌ i̱ kii̱ꞌ tyi̱ndi̱e̱eꞌ u̱nꞌ nduꞌu̱,
ne̱ nduuꞌ kuenta u̱nꞌ,
te̱ kii̱ꞌ ki̱xi̱n sa̱kakú u̱nꞌ ne̱ nduuꞌ kuenta u̱nꞌ ja̱a̱nꞌ ndii,
nä̱ndoso̱ꞌ u̱nꞌ xaꞌa̱ꞌ i̱.
5 Te̱ na̱ti̱i̱n na̱ i̱ tyaaꞌ ña̱ va̱ꞌa̱ ña̱ na̱ti̱i̱n sa̱kuuꞌ ne̱ ni̱ na̱ka̱xi̱n u̱nꞌ,
sa̱a̱ u̱nꞌ ña̱ va̱ꞌa̱ te̱ ta̱xi̱ u̱nꞌ ña̱ na̱ku̱a̱tiaꞌ ingaꞌ na i̱ xiinꞌ ne̱ nduuꞌ kuenta u̱nꞌ,
te̱ ta̱xi̱ tu̱ u̱nꞌ ña̱ sa̱kaꞌnuꞌ ingaꞌ i̱ yoꞌó xiinꞌ ne̱ nduuꞌ kuenta u̱nꞌ ja̱a̱nꞌ.
6 Ni̱ xa̱a̱ ndu̱ ku̱a̱tyi̱ nuu̱ꞌ u̱nꞌ nde̱e̱ naa ni̱ xa̱a̱ ne̱ xii̱ꞌ ya̱taꞌ ndu̱,
ni̱ xa̱a̱ ndu̱ ña̱ ni̱a̱ꞌa,
te̱ ni̱ xa̱tyuunꞌ ki̱ni̱ tu̱ ndu̱.
7 Kii̱ꞌ ni̱ ndiee̱ ne̱ xii̱ꞌ ya̱taꞌ ndu̱ nu̱uꞌ ñu̱ꞌuꞌ Egipto ndii,
nï̱ xaaꞌ ni̱a̱ kuenta kuuꞌ tyu̱u̱n kaꞌnuꞌ ña̱ ni̱ xa̱a̱ a̱ nuu̱ꞌ ni̱a̱,
te̱ ni̱ nde̱e̱ nï̱ na̱ka̱ꞌanꞌ tu̱ ni̱a̱ xaꞌa̱ꞌ ña̱ ndani̱ kuaꞌa̱ꞌ xa̱va̱ꞌa̱ ña̱ꞌaꞌ a̱.
Süu̱ꞌ ja̱a̱nꞌ ndii,
ni̱ xa̱teiꞌ ni̱a̱ nuu̱ꞌ a̱ yu̱ꞌuꞌ mi̱ni̱ kuaꞌa.
8 Nde̱e̱ sa̱a̱ ka̱ ni̱ ndii,
ni̱ sa̱kakú ña̱ꞌaꞌ a̱ xaꞌa̱ꞌ a̱ ña̱ kiꞌinꞌ kaꞌnuꞌ xiinꞌ miiꞌ mi̱iꞌ a̱,
sa̱kanꞌ te̱ ku̱ni̱ ne̱ yivi̱ꞌ ña̱ ña̱ ndi̱e̱eꞌ kooꞌ tyukuuꞌ nduuꞌ a̱.
9 Ni̱ kaꞌa̱n tyuunꞌ a̱ xiinꞌ mi̱ni̱ kuaꞌa,
te̱ ni̱ na̱ya̱a̱ a̱,
te̱ ni̱ sa̱xkaꞌndíá a̱ ne̱ xii̱ꞌ ya̱taꞌ e̱ꞌ,
ne̱ Israel,
ma̱ꞌiꞌ mi̱ni̱ ja̱a̱nꞌ nde̱e̱ naa ñu̱ꞌuꞌ miiꞌ i̱tyi kaaꞌ.
10 Sa̱kanꞌ ni̱ xa̱a̱ a̱ te̱ ni̱ sa̱kakú ña̱ꞌaꞌ a̱ nda̱ꞌaꞌ ne̱ ndasiꞌ taꞌanꞌ xiinꞌ ni̱a̱,
te̱ ni̱ sa̱ndoó ndiká ña̱ꞌaꞌ a̱ nda̱ꞌaꞌ ne̱ mi̱iꞌ kuuꞌ xiinꞌ ni̱a̱.
11 Ndi̱ꞌi̱ ja̱a̱nꞌ te̱ ni̱ na̱ndi̱koꞌ tukuuꞌ ti̱kui mi̱ni̱ ja̱a̱nꞌ,
te̱ ni̱ xa̱ꞌni̱ꞌ raꞌ sa̱kuuꞌ ne̱ ndasiꞌ taꞌanꞌ xiinꞌ ni̱a̱ ja̱a̱nꞌ,
te̱ nde̱e̱ i̱i̱n ne̱ ndasiꞌ taꞌanꞌ xiinꞌ ni̱a̱ nï̱ kaku̱.
12 Sa̱kanꞌ vi̱ꞌ te̱ ni̱ ka̱ndi̱xaꞌ ne̱ xii̱ꞌ ya̱taꞌ e̱ꞌ ja̱a̱nꞌ kuento ña̱ ni̱ ndoo̱ a̱ nuu̱ꞌ ni̱a̱,
te̱ ni̱ xa̱ꞌaꞌ ni̱a̱ xitaꞌ ni̱a̱ ya̱a̱ nuu̱ꞌ a̱ xakaꞌnuꞌ ña̱ꞌaꞌ ni̱a̱.
13 Nde̱e̱ sa̱a̱ ka̱ ni̱ ndii yatyi̱ va̱ ni̱ na̱ndoso̱ꞌ ni̱a̱ sa̱kuuꞌ ña̱ ni̱ xa̱a̱ Ndiosí xaꞌa̱ꞌ ni̱a̱,
te̱ nï̱ xi̱i̱n ni̱a̱ ku̱ndi̱a̱tu̱ ni̱a̱ tu̱ꞌu̱n nde̱iꞌ ña̱ ni̱ kaꞌa̱n tyuunꞌ a̱ xiinꞌ ni̱a̱.
14 Te̱ kii̱ꞌ ni̱ xika̱ ni̱a̱ miiꞌ i̱tyi kaaꞌ ndii,
ni̱ xa̱a̱ ni̱a̱ ña̱ xikán ki̱ni̱ nimá mi̱iꞌ ni̱a̱,
ni̱ xi̱to̱ ku̱a̱ꞌa̱ ni̱a̱ Ndiosí miiꞌ i̱tyi kaaꞌ miiꞌ köo̱ꞌ nde̱e̱ i̱i̱n ña̱ꞌa̱ yoo.
15 Te̱ ni̱ ta̱xi̱ a̱ ña̱ ni̱ xika̱n ni̱a̱ ja̱a̱nꞌ nuu̱ꞌ a̱ ka̱xi̱ꞌ ni̱a̱,
ndisu̱ ni̱ ti̱ꞌviꞌ tu̱ a̱ kuiꞌe̱ xatu̱ va̱ ni̱ xa̱ꞌni̱ꞌ ña̱ꞌaꞌ.
16 Te̱ kii̱ꞌ ndieeꞌ ni̱a̱ vi̱ꞌe̱ toto̱ ndii,
ni̱ ku̱nda̱si̱ꞌ va̱ nuu̱ꞌ ni̱a̱ ni̱ xi̱ni̱ ni̱a̱ Moisés,
te̱ ni̱ ku̱nda̱si̱ꞌ tu̱ nuu̱ꞌ ni̱a̱ ni̱ xi̱ni̱ ni̱a̱ Aarón,
te̱ nduuꞌ sutu̱ su̱ꞌu̱n,
te̱ xikaꞌ nuuꞌ nuu̱ꞌ Yahvé.
17 Xaꞌa̱ꞌ a̱ ja̱a̱nꞌ na ni̱ nuni̱a̱ꞌ ñu̱ꞌuꞌ,
te̱ ni̱ ko̱koꞌ a̱ Datán xiinꞌ sa̱kuuꞌ ne̱ ndikún xata̱ꞌ ra̱,
te̱ ni̱ na̱ma̱ tu̱ Abirám xiinꞌ sa̱kuuꞌ te̱ ndikún xata̱ꞌ ra̱ ti̱xi̱n ñu̱ꞌuꞌ ja̱a̱nꞌ.
18 Ndi̱ꞌi̱ ja̱a̱nꞌ te̱ ni̱ koyo̱ tu̱ ñuꞌu̱ ndatin nde̱e̱ ndi̱viꞌ,
te̱ ni̱ xa̱ꞌmi̱ a̱ sa̱kuuꞌ ne̱ ndikún ña̱ xaaꞌ uvi̱ sa̱aꞌ te̱ yivi̱ꞌ ja̱a̱nꞌ.
Ni̱ xa̱ꞌmi̱ a̱ sa̱kuuꞌ ne̱ xaaꞌ ña̱ ni̱a̱ꞌa ja̱a̱nꞌ.
19 Ne̱ xii̱ꞌ ya̱taꞌ e̱ꞌ,
kii̱ꞌ ni̱ xa̱a̱ ni̱a̱ miiꞌ iinꞌ i̱kuꞌ Sinaí ndii,
ni̱ xa̱ꞌa̱ ni̱a̱ i̱i̱n ña̱ nianiaꞌ toro siee xiinꞌ ka̱a̱ oro,
te̱ ni̱ xi̱kuita̱ xitiꞌ ni̱a̱,
te̱ ni̱ xa̱kaꞌnuꞌ ni̱a̱ nuu̱ꞌ ña̱ ni̱ xa̱ꞌa̱ nda̱ꞌaꞌ mi̱iꞌ ni̱a̱ ja̱a̱nꞌ.
20 Sa̱kanꞌ ni̱ xa̱a̱ ni̱a̱,
te̱ ni̱ na̱ko̱o̱ ni̱a̱ Ndiosí kaꞌnuꞌ ña̱ xakaꞌnuꞌ ni̱a̱,
te̱ ni̱ xa̱ꞌaꞌ ni̱a̱ xa̱kaꞌnuꞌ ni̱a̱ ña̱ nianiaꞌ i̱i̱n toro siee,
tiꞌ xaxi̱ꞌ kuꞌu̱ ku̱i̱ti̱ꞌ.
21 Te̱ ni̱ na̱ndoso̱ꞌ ndi̱ꞌi̱ ni̱a̱ xaꞌa̱ꞌ Ndiosí ña̱ ni̱ sakakú ña̱ꞌaꞌ,
te̱ ni̱ na̱ndoso̱ꞌ tu̱ ni̱a̱ kuaꞌa̱ꞌ tyu̱u̱n kaꞌnuꞌ ña̱ ni̱ xa̱a̱ a̱ xaꞌa̱ꞌ ni̱a̱ nuu̱ꞌ ñu̱ꞌuꞌ Egipto.
22 Ni̱ na̱ndoso̱ꞌ ni̱a̱ xaꞌa̱ꞌ ña̱ nandani̱ ña̱ ni̱ xa̱a̱ a̱ xaꞌa̱ꞌ ni̱a̱ nuu̱ꞌ ñu̱ꞌuꞌ te̱ vi̱ꞌe̱ Cam
xiinꞌ xaꞌa̱ꞌ kuaꞌa̱ꞌ ña̱ kaꞌnuꞌ kooꞌ tyukuuꞌ ña̱ ni̱ xa̱a̱ a̱ xaꞌa̱ꞌ ni̱a̱ mi̱ni̱ kuaꞌa.
23 Te̱ xaꞌa̱ꞌ a̱ ña̱ ni̱ na̱saa̱ꞌ va̱ Ndiosí ni̱ xi̱ni̱ a̱ ne̱ ja̱a̱nꞌ xaꞌa̱ꞌ ña̱ ni̱ xa̱a̱ ni̱a̱ ja̱a̱nꞌ ndii,
ni̱ kaꞌa̱n a̱ ka̱ꞌni̱ꞌ a̱ sa̱kuuꞌ ni̱a̱,
ndisu̱ Moisés,
te̱ ni̱ na̱ka̱xi̱n a̱,
ni̱ na̱kaꞌa̱n xaꞌa̱ꞌ ni̱a̱ nuu̱ꞌ a̱,
ni̱ kaꞌa̱n ndaꞌvi ra̱ xiinꞌ a̱ xaꞌa̱ꞌ ni̱a̱ te̱ sä̱ndo̱ñuꞌuꞌ ña̱ꞌaꞌ a̱.
24 Nde̱e̱ sa̱a̱ ka̱ ni̱ ndii,
nï̱ xi̱i̱n ne̱ yivi̱ꞌ ja̱a̱nꞌ ko̱ꞌni̱ ni̱a̱ nuu̱ꞌ ñu̱ꞌuꞌ va̱ꞌa̱ ña̱ ni̱ ta̱xi̱ Ndiosí nda̱ꞌaꞌ ni̱a̱,
sa̱kanꞌ ña̱ nï̱ ka̱ndi̱xaꞌ ni̱a̱ kuento ña̱ ni̱ ta̱xi̱ Ndiosí nuu̱ꞌ ni̱a̱ ña̱ ko̱to̱ ña̱ꞌaꞌ a̱.
25 Süu̱ꞌ ja̱a̱nꞌ ndii,
ni̱ kaꞌa̱n i̱ꞌni̱ ni̱a̱ xaꞌa̱ꞌ Yahvé ti̱xi̱n vi̱ꞌe̱ toto̱ miiꞌ ndieeꞌ ni̱a̱,
te̱ nï̱ ta̱xi̱ so̱ꞌo̱ ni̱a̱ ña̱ kaꞌán tyuunꞌ a̱ xiinꞌ ni̱a̱.
26 Xaꞌa̱ꞌ a̱ ja̱a̱nꞌ na ni̱ tyi̱tuní Ndiosí sa̱ndiꞌiꞌ ña̱ꞌaꞌ a̱,
te̱ ni̱ xika̱ a̱ ka̱ꞌni̱ꞌ ña̱ꞌaꞌ a̱ miiꞌ i̱tyi kaaꞌ.
27 Te̱ ki̱ku̱ꞌ a̱ sa̱kuuꞌ si̱a̱niꞌ ni̱a̱ te̱i̱n ne̱ tukuꞌ,
te̱ ki̱ku̱ꞌ tu̱ ña̱ꞌaꞌ a̱ ka̱niiꞌ nuu̱ꞌ ñu̱ꞌuꞌ.
28 Ni̱ yaꞌa̱ te̱ ni̱ xa̱ꞌaꞌ ni̱a̱ xakaꞌnuꞌ ni̱a̱ nuu̱ꞌ ndiosí ña̱ naniꞌ Baal,
ña̱ xakaꞌnuꞌ ne̱ ndieeꞌ xiki̱ꞌ ña̱ naniꞌ Peor,
te̱ ni̱ xi̱xi̱ tu̱ ni̱a̱ nde̱i̱ꞌ ña̱ ni̱ na̱soko̱ꞌ ne̱ yivi̱ꞌ ja̱a̱nꞌ nuu̱ꞌ ndiosí ña̱ kuäsa̱ꞌ tiaku,
ña̱ xakaꞌnuꞌ ne̱ ndieeꞌ ja̱a̱nꞌ.
29 Te̱ xaꞌa̱ꞌ sa̱kuuꞌ ña̱ ni̱ xa̱a̱ ni̱a̱ ja̱a̱nꞌ ndii,
ni̱ sa̱na̱saáꞌ xa̱va̱ꞌa̱ ni̱a̱ Ndiosí,
te̱ kuaꞌa̱ꞌ va̱ ni̱a̱ ni̱ xiꞌi̱ xiinꞌ kuiꞌe̱ xatu̱ ni̱ xa̱a̱ a̱.
30 Ndisu̱ sa̱kanꞌ te̱ ni̱ xa̱ndi̱e̱ni xiinꞌ miiꞌ i̱i̱n te̱ naniꞌ Finees,
te̱ ni̱ xa̱ꞌni̱ꞌ ra̱ te̱ ni̱ xa̱a̱ ña̱ ni̱a̱ꞌa,
te̱ ni̱ xi̱kuii̱n kuiꞌe̱ xatu̱ ña̱ xaꞌni̱ꞌ ne̱ vi̱ꞌe̱ Israel.
31 Te̱ xaꞌa̱ꞌ ña̱ ni̱ xa̱a̱ Finees ja̱a̱nꞌ ndii,
ni̱ kaꞌa̱n Ndiosí ña̱ te̱ nda̱ku nimá nduuꞌ ra̱ nuu̱ꞌ a̱ nde̱e̱ ndiꞌiꞌ ni̱ kivi̱ꞌ,
te̱ sa̱kanꞌ tu̱ sa̱kuuꞌ si̱a̱niꞌ xikaꞌ ra̱,
ne̱ ko̱o̱ nuu̱ꞌ kuꞌu̱n e̱ꞌ ndii,
na̱ka̱ꞌanꞌ ni̱a̱ xaꞌa̱ꞌ ña̱ ni̱ xa̱a̱ ra̱ ja̱a̱nꞌ.
32 Sa̱kanꞌ tu̱ ni̱ sa̱na̱saáꞌ ne̱ vi̱ꞌe̱ Israel ja̱a̱nꞌ Ndiosí i̱i̱n xaanꞌ miiꞌ yoo ti̱ko̱ꞌyoꞌ ña̱ naniꞌ Meribá,
te̱ ni̱ yoo̱ va̱ tu̱ndoꞌo̱ꞌ nuu̱ꞌ Moisés ni̱ xa̱a̱ ni̱a̱.
33 Sa̱kanꞌ ña̱ su̱vi̱ ni̱a̱ ni̱ xa̱a̱ sa̱kanꞌ,
te̱ ni̱ na̱saa̱ꞌ va̱ Moisés,
te̱ ni̱ kaꞌa̱n ra̱ nde̱e̱ naa kaꞌán i̱i̱n te̱ küuꞌ kaxiꞌ.
34 Ne̱ xii̱ꞌ ya̱taꞌ e̱ꞌ ja̱a̱nꞌ ndii,
nï̱ xa̱ꞌni̱ꞌ ni̱a̱ ne̱ tukuꞌ,
ne̱ ndieeꞌ nuu̱ꞌ ñu̱ꞌuꞌ Canaán ja̱a̱nꞌ,
ne̱ ni̱ kaꞌa̱n tyuunꞌ Ndiosí xiinꞌ ni̱a̱ ka̱ꞌni̱ꞌ ni̱a̱,
35 süu̱ꞌ ja̱a̱nꞌ ndii,
ni̱ ndu̱i̱i̱n ndi̱ꞌi̱ ni̱a̱ xiinꞌ ne̱ tukuꞌ ja̱a̱nꞌ,
te̱ ni̱ na̱ti̱i̱n tu̱ ni̱a̱ sa̱kuuꞌ ña̱ ni̱a̱ꞌa ña̱ xaaꞌ ne̱ ja̱a̱nꞌ xaaꞌ ni̱a̱.
36 Te̱ ni̱ xa̱kaꞌnuꞌ tu̱ ni̱a̱ ndiosí saka ña̱ xakaꞌnuꞌ ne̱ ja̱a̱nꞌ,
te̱ ña̱ ja̱a̱nꞌ ni̱ xa̱a̱ sa̱kanꞌ,
te̱ ni̱ ndo̱ñuꞌuꞌ sa̱kuuꞌ ni̱a̱.
37 Nde̱e̱ tiaa̱ siꞌe̱ ni̱a̱ xiinꞌ ña̱ꞌaꞌ siꞌe̱ ni̱a̱ ni̱ xa̱ꞌni̱ꞌ ni̱a̱,
te̱ ni̱ na̱soko̱ꞌ ña̱ꞌaꞌ ni̱a̱ nuu̱ꞌ ndiosí ja̱a̱nꞌ.
38 Ni̱ xa̱ꞌni̱ꞌ ni̱a̱ tiaa̱ siꞌe̱ ni̱a̱ xiinꞌ ña̱ꞌaꞌ siꞌe̱ ni̱a̱,
ne̱ köo̱ꞌ ku̱a̱tyi̱,
te̱ ni̱ nasoko̱ꞌ ni̱a̱ níiꞌ ne̱ ja̱a̱nꞌ nuu̱ꞌ ndiosí saka ña̱ xakaꞌnuꞌ ne̱ ndieeꞌ nuu̱ꞌ ñu̱ꞌuꞌ Canaán ja̱a̱nꞌ.
Te̱ xiinꞌ ña̱ ni̱ xa̱ꞌni̱ꞌ ni̱a̱ siꞌe̱ ni̱a̱,
ne̱ köo̱ꞌ ku̱a̱tyi̱ ja̱a̱nꞌ,
ni̱ sa̱tíviꞌ ni̱a̱ ñu̱ꞌuꞌ Canaán ja̱a̱nꞌ.
39 Ni̱ sa̱tíviꞌ xiinꞌ miiꞌ ni̱a̱ xiinꞌ ña̱ ki̱ni̱ ña̱ ni̱ xa̱a̱ ni̱a̱ ja̱a̱nꞌ,
te̱ ña̱ ndani̱ ni̱a̱ ndiosí saka ña̱ xakaꞌnuꞌ ne̱ ndieeꞌ i̱kanꞌ ndii,
nduuꞌ a̱ nde̱e̱ naa ña̱ kumiꞌ ne̱ yivi̱ꞌ musa ni̱a̱.
40 Xaꞌa̱ꞌ a̱ ja̱a̱nꞌ na ni̱ na̱saa̱ꞌ xa̱va̱ꞌa̱ Yahvé ni̱ xi̱ni̱ a̱ ne̱ nduuꞌ kuenta a̱ ja̱a̱nꞌ,
te̱ ni̱ ku̱nda̱siꞌ a̱ ne̱ ja̱a̱nꞌ tee̱ꞌ ndee kaꞌán va̱ a̱ xaꞌa̱ꞌ ni̱a̱.
41 Te̱ ni̱ sa̱na̱kuaꞌa ña̱ꞌaꞌ a̱ nda̱ꞌaꞌ ne̱ tukuꞌ,
te̱ ni̱ xi̱ko̱ niꞌiꞌ ña̱ꞌaꞌ ne̱ ndasiꞌ taꞌanꞌ xiinꞌ ni̱a̱.
42 Te̱ ni̱ sa̱ndoꞌoꞌ va̱ ña̱ꞌaꞌ ne̱ ndasiꞌ taꞌanꞌ xiinꞌ ni̱a̱ ja̱a̱nꞌ,
te̱ ni̱ sa̱kaꞌanꞌ ña̱ꞌaꞌ ni̱a̱ mi̱iꞌ kuuꞌ ni̱a̱ xiinꞌ ne̱ ja̱a̱nꞌ.
43 Kiꞌinꞌ va̱ i̱tyiꞌ ni̱ sa̱kakú ña̱ꞌaꞌ Ndiosí,
ndisu̱ ne̱ ja̱a̱nꞌ ndii,
ni̱ xa̱teiꞌ ku̱i̱ti̱ꞌ ni̱a̱ nuu̱ꞌ nde̱iꞌ ña̱ ni̱ kaꞌa̱n tyuunꞌ a̱ xiinꞌ ni̱a̱,
te̱ ni̱ sa̱kaꞌanꞌ ña̱ꞌaꞌ ne̱ yivi̱ꞌ soꞌo̱ꞌ ndiꞌiꞌ xaꞌa̱ꞌ ña̱ ni̱ xa̱a̱ ni̱a̱ ja̱a̱nꞌ.
44 Nde̱e̱ sa̱a̱ ka̱ ni̱ ndii,
ni̱ ku̱ndaꞌvi i̱ni̱ a̱ xaꞌa̱ꞌ ña̱ ndoꞌoꞌ ne̱ ja̱a̱nꞌ,
te̱ ni̱ xi̱ni̱ so̱ꞌo̱ a̱ kaꞌán ndaꞌvi ni̱a̱ xiinꞌ a̱.
45 Te̱ ni̱ na̱ka̱ꞌanꞌ tu̱ a̱ xaꞌa̱ꞌ kuento a̱ ña̱ ni̱ ta̱xi̱ a̱ nuu̱ꞌ ne̱ xii̱ꞌ ya̱taꞌ e̱ꞌ,
te̱ xaꞌa̱ꞌ a̱ ña̱ ndani̱ va̱ ña̱ꞌaꞌ a̱ ndii,
nï̱ xi̱ndoo̱ nimá ña̱ ka̱ꞌni̱ꞌ a̱ sa̱kuuꞌ ni̱a̱.
46 Te̱ mi̱iꞌ a̱ ni̱ xa̱a̱ sa̱kanꞌ te̱ te̱ ndasiꞌ taꞌanꞌ xiinꞌ ni̱a̱ ndii,
mani̱ꞌ ni̱ ku̱u̱ sa̱kuuꞌ ra̱ xiinꞌ ni̱a̱ kii̱ꞌ ni̱ xi̱kuꞌu̱n ni̱a̱ nda̱ꞌaꞌ ra̱.
47 Tákuiꞌe Yahvé,
Ndiosí ña̱ xakaꞌnuꞌ ndu̱,
sa̱a̱ u̱nꞌ ña̱ va̱ꞌa̱ te̱ sa̱kakú u̱nꞌ ndu̱,
te̱ sa̱a̱ tu̱ u̱nꞌ ña̱ va̱ꞌa̱ te̱ ta̱va̱ꞌ u̱nꞌ ndu̱ te̱i̱n ne̱ tukuꞌ,
te̱ nda̱sa̱ i̱i̱n ndo̱o̱ tu̱ku̱u̱ u̱nꞌ ndu̱,
te̱ sa̱kaꞌnuꞌ sa̱kuuꞌ ndu̱ yoꞌó,
ña̱ su̱ꞌu̱n va̱,
te̱ va̱ꞌa̱ tu̱ ku̱ni̱ ndu̱ te̱ sa̱kaꞌnuꞌ ndu̱ yoꞌó.
48 Kaꞌnuꞌ va̱ ña̱ nduuꞌ Yahvé,
Ndiosí ña̱ xakaꞌnuꞌ yooꞌ,
ne̱ vi̱ꞌe̱ Israel,
te̱ yoo a̱ nde̱e̱ ndiꞌiꞌ ni̱ kivi̱ꞌ,
te̱ nde̱e̱ a̱ma̱ ka̱ ni̱.
Te̱ na kaꞌa̱n sa̱kuuꞌ e̱ꞌ:
“Sa̱kanꞌ na ku̱ndu̱u̱ a̱.”
Kaꞌnuꞌ va̱ ña̱ nduuꞌ Ndiosí.