Yoꞌoꞌ kaꞌán a̱ xaꞌa̱ꞌ tyu̱u̱n kaꞌnuꞌ ña̱ ni̱ xa̱a̱ Yahvé xaꞌa̱ꞌ ne̱ xii̱ꞌ ya̱taꞌ e̱ꞌ, ne̱ vi̱ꞌe̱ Israel
105
Sa̱kaꞌnuꞌ ndo̱ꞌ Yahvé,
te̱ kaꞌa̱n ndo̱so̱ꞌ ndo̱ꞌ nuu̱ꞌ ne̱ yivi̱ꞌ ña̱ ña̱ kaꞌnuꞌ va̱ nduuꞌ a̱,
te̱ kaꞌa̱n ndo̱so̱ꞌ ndo̱ꞌ nuu̱ꞌ sa̱kuuꞌ ne̱ tukuꞌ xaꞌa̱ꞌ sa̱kuuꞌ tyu̱u̱n kaꞌnuꞌ ña̱ xaaꞌ a̱.
2 Ka̱ta̱ ndo̱ꞌ nuu̱ꞌ ña̱ ja̱a̱nꞌ,
u̱u̱n ndo̱ꞌ,
nuu̱ꞌ ña̱ ja̱a̱nꞌ ku̱i̱ti̱ꞌ ka̱ta̱ ndo̱ꞌ ya̱a̱,
nda̱tuꞌunꞌ ndo̱ꞌ nuu̱ꞌ sa̱kuuꞌ ne̱ yivi̱ꞌ i̱i̱n yivi̱ꞌ xaꞌa̱ꞌ sa̱kuuꞌ tyu̱u̱n kaꞌnuꞌ,
ña̱ nandani̱,
ña̱ xaaꞌ a̱.
3 Na na̱ku̱a̱tiaꞌ ndo̱ꞌ xaꞌa̱ꞌ a̱ ña̱ ña̱ su̱ꞌu̱n va̱ nduuꞌ Ndiosí ña̱ xakaꞌnuꞌ e̱ꞌ,
te̱ na na̱ku̱a̱tiaꞌ va̱ nimá sa̱kuuꞌ yooꞌ,
ne̱ nakuatuꞌ nuu̱ꞌ Yahvé.
4 Na ku̱ya̱ti̱n e̱ꞌ nuu̱ꞌ Yahvé Ndiosí e̱ꞌ ña̱ ndi̱e̱eꞌ kooꞌ tyukuuꞌ,
te̱ na ndu̱kuꞌ ña̱ꞌaꞌ e̱ꞌ i̱ꞌi̱n kivi̱ꞌ kuaꞌa̱n.
5 Na na̱ka̱ꞌanꞌ e̱ꞌ xaꞌa̱ꞌ sa̱kuuꞌ ña̱ nandani̱ va̱ ña̱ ni̱ xa̱a̱ a̱ xaꞌa̱ꞌ ne̱ xii̱ꞌ ya̱taꞌ e̱ꞌ,
te̱ na na̱ka̱ꞌanꞌ tu̱ e̱ꞌ xaꞌa̱ꞌ sa̱kuuꞌ tyu̱u̱n kaꞌnuꞌ ña̱ ni̱ xa̱a̱ a̱ xiinꞌ xaꞌa̱ꞌ sa̱kuuꞌ nde̱iꞌ ña̱ ni̱ kaꞌa̱n tuní a̱.
6 Na na̱ka̱ꞌanꞌ sa̱kuuꞌ e̱ꞌ xaꞌa̱ꞌ ña̱ ja̱a̱nꞌ,
yooꞌ,
ne̱ nduuꞌ si̱a̱niꞌ xikaꞌ Abraham,
te̱ ni̱ xika̱ nu̱u̱ nuu̱ꞌ a̱,
yooꞌ,
ne̱ nduuꞌ si̱a̱niꞌ xikaꞌ Jacob,
ne̱ ni̱ na̱ka̱xi̱n mi̱iꞌ Ndiosí nduuꞌ kuenta a̱.
7 Ña̱ ja̱a̱nꞌ nduuꞌ Yahvé Ndiosí ña̱ xakaꞌnuꞌ e̱ꞌ,
te̱ su̱vi̱ a̱ xaꞌndia tyuunꞌ nda̱ku i̱i̱n ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ.
8 Te̱ köo̱ꞌ kivi̱ꞌ na̱ndoso̱ꞌ a̱ xaꞌa̱ꞌ kuento a̱,
ña̱ ni̱ ndoo̱ a̱ nuu̱ꞌ ne̱ xii̱ꞌ ya̱taꞌ e̱ꞌ xiinꞌ nuu̱ꞌ sa̱kuuꞌ ne̱ ko̱o̱ nuu̱ꞌ kuꞌu̱n e̱ꞌ.
9 Ña̱ ja̱a̱nꞌ nduuꞌ kuento a̱ ña̱ ni̱ ndoo̱ a̱ xiinꞌ Abraham,
te̱ ni̱ ndoo̱ tu̱ a̱ kuento ja̱a̱nꞌ xiinꞌ Isaac.
10 Ni̱ ndoo̱ tu̱ a̱ kuento ja̱a̱nꞌ xiinꞌ Jacob,
te̱ ni̱ na̱ko̱o̱ ña̱ꞌaꞌ a̱ nuu̱ꞌ ra̱ nduuꞌ a̱ nde̱e̱ naa i̱i̱n nde̱iꞌ,
te̱ nuu̱ꞌ sa̱kuuꞌ ne̱ xii̱ꞌ ya̱taꞌ e̱ꞌ,
ne̱ vi̱ꞌe̱ Israel,
ni̱ na̱ko̱o̱ ña̱ꞌaꞌ a̱ nde̱e̱ ndiꞌiꞌ ni̱ kivi̱ꞌ.
11 Kaꞌán a̱ xiinꞌ ni̱a̱ ndii:
“Nda̱ꞌaꞌ ndoꞌó ta̱xi̱ i̱ ñu̱ꞌuꞌ Canaán,
te̱ ndoo̱ a̱ ku̱ndu̱u̱ ña̱ꞌa̱ ndo̱ꞌ,
ña̱ xataꞌa̱n ndoo̱ nda̱ꞌaꞌ ndo̱ꞌ”,
ni̱ katyi̱ a̱.
12 Ni̱ kaꞌa̱n a̱ ña̱ ja̱a̱nꞌ xiinꞌ ni̱a̱ kii̱ꞌ tiäa̱ꞌan na̱taꞌvi̱ꞌ kuaꞌa̱ꞌ ni̱a̱,
te̱ ndieeꞌ ni̱a̱ nuu̱ꞌ ñu̱ꞌuꞌ Canaán ja̱a̱nꞌ nde̱e̱ naa ne̱ tukuꞌ.
13 Te̱ ni̱ xika̱ ndo̱so̱ꞌ tu̱ ni̱a̱ nuu̱ꞌ kiꞌinꞌ ñu̱ꞌuꞌ ni̱ ndiee̱ ni̱a̱,
te̱ sa̱kanꞌ tu̱ ni̱ xaꞌa̱n ni̱a̱ ni̱ ndiee̱ ni̱a̱ kiꞌinꞌ ñu̱u̱ naꞌnuꞌ.
14 Ndisu̱ Ndiosí ndii,
köo̱ꞌ kivi̱ꞌ ni̱ ta̱xi̱ a̱ ña̱ sa̱ndoꞌoꞌ ña̱ꞌaꞌ ne̱ yivi̱ꞌ,
süu̱ꞌ ja̱a̱nꞌ ndii,
ni̱ kaꞌa̱n kaxiꞌ a̱ xiinꞌ sa̱kuuꞌ rey,
te̱ xaꞌndia tyuunꞌ miiꞌ ni̱ ndiee̱ ni̱a̱ ja̱a̱nꞌ ndii:
15 “Sä̱ta̱ñaꞌa̱ꞌ ndo̱ꞌ ne̱ ni̱ na̱ka̱xi̱n i̱ nduuꞌ kuenta i̱,
ni̱ nde̱e̱ sä̱a̱ tu̱ ndo̱ꞌ ña̱ ni̱a̱ꞌa xiinꞌ te̱ kaꞌán tiakú kuento i̱”,
ni̱ katyi̱ a̱.
16 Ni̱ ti̱ꞌviꞌ a̱ so̱ko̱ nuu̱ꞌ ñu̱ꞌuꞌ Canaán ja̱a̱nꞌ,
te̱ ni̱ sa̱ndiꞌiꞌ a̱ sa̱kuuꞌ ña̱ xaxi̱ꞌ ne̱ yivi̱ꞌ,
ne̱ ndieeꞌ i̱kanꞌ.
17 Ndi̱ꞌi̱ ja̱a̱nꞌ,
te̱ ni̱ ti̱ꞌviꞌ a̱ i̱i̱n te̱ yivi̱ꞌ nuu̱ꞌ ñu̱ꞌuꞌ Egipto nuu̱ꞌ ne̱ ja̱a̱nꞌ,
te̱ te̱ ja̱a̱nꞌ nduuꞌ José,
te̱ ni̱ kieꞌvi̱ te̱ ku̱ndu̱u̱ ra̱ te̱ ka̱ka̱ nu̱u̱ so̱ꞌo̱.
18 Ni̱ sa̱tu̱xuꞌví te̱ xíinꞌ xaꞌa̱ꞌ ra̱ xiinꞌ ka̱a̱,
te̱ ni̱ ku̱to̱so̱ vi̱ꞌ ra̱ xaꞌa̱ꞌ a̱ ña̱ ni̱ tyu̱ꞌu̱n tu̱ ra̱ i̱i̱n karena vie̱ va̱ suku̱nꞌ ra̱.
19 Sa̱kanꞌ ni̱ ndo̱ꞌo̱ José ja̱a̱nꞌ nde̱e̱ ni̱ xinu̱ sa̱kuuꞌ ña̱ ni̱ kaꞌa̱n xa̱ni̱ xiinꞌ ra̱,
te̱ nde̱e̱ mi̱iꞌ Ndiosí ni̱ xi̱to̱ ku̱a̱ꞌa̱ ña̱ꞌaꞌ.
20 Sa̱kanꞌ te̱ ni̱ kaꞌa̱n tyuunꞌ rey,
te̱ ni̱ sa̱ndoó ndiká ña̱ꞌaꞌ ra̱,
te̱ mi̱iꞌ rey ja̱a̱nꞌ ni̱ nu̱niaꞌ yiꞌeꞌ vi̱ꞌe̱ ka̱a̱ te̱ ni̱ ke̱ta̱ ndiká José.
21 Te̱ ni̱ sa̱kuisoꞌ tyuunꞌ ña̱ꞌaꞌ ra̱ nuu̱ꞌ sa̱kuuꞌ ña̱ yoo vi̱ꞌe̱ ra̱,
te̱ ka̱ꞌndi̱a̱ tyuunꞌ tu̱ ra̱ nuu̱ꞌ sa̱kuuꞌ ña̱ kumiꞌ rey ja̱a̱nꞌ.
22 Te̱ ni̱ sa̱kuisoꞌ tyuunꞌ rey José ja̱a̱nꞌ te̱ sa̱niaꞌá ra̱ sa̱kuuꞌ i̱nga̱ te̱ xikaꞌ nuuꞌ nuu̱ꞌ rey ja̱a̱nꞌ,
te̱ sa̱niaꞌá tu̱ ra̱ te̱ kaꞌán nde̱iꞌ nuu̱ꞌ rey ja̱a̱nꞌ.
23 Ni̱ yaꞌa̱ te̱ ni̱ xa̱a̱ tu̱ Israel,
te̱ naniꞌ tu̱ Jacob,
nuu̱ꞌ ñu̱ꞌuꞌ Egipto,
te̱ ni̱ nduꞌu̱ꞌ ra̱ nuu̱ꞌ ñu̱ꞌuꞌ Egipto ña̱ nduuꞌ kuenta te̱ vi̱ꞌe̱ Cam.
24 Te̱ ni̱ nda̱sa̱ kuaꞌa̱ꞌ xa̱va̱ꞌa̱ Ndiosí ne̱ xii̱ꞌ ya̱taꞌ e̱ꞌ,
ne̱ vi̱ꞌe̱ Israel,
te̱ ni̱ nda̱sa̱ kooꞌ tyukuuꞌ ka̱ ña̱ꞌaꞌ a̱ te̱ sa̱kanꞌ ne̱ ndasi taꞌanꞌ xiinꞌ ni̱a̱.
25 Ndi̱ꞌi̱ ja̱a̱nꞌ te̱ ni̱ na̱ma̱ Ndiosí nimá ne̱ ndieeꞌ nuu̱ꞌ ñu̱ꞌuꞌ Egipto ja̱a̱nꞌ,
te̱ ni̱ xa̱ꞌaꞌ ni̱a̱ ndasiꞌ ni̱a̱ ne̱ xii̱ꞌ ya̱taꞌ e̱ꞌ,
te̱ ni̱ na̱ka̱ta̱ sa̱kuuꞌ ni̱a̱ kuento ni̱a̱ te̱ ku̱ni̱ xaꞌanꞌ ni̱a̱ ne̱ ja̱a̱nꞌ,
ne̱ xikaꞌ nuuꞌ nuu̱ꞌ Tákuiꞌe Ndiosí.
26 Ndisu̱ ni̱ ti̱ꞌviꞌ Ndiosí Moisés,
te̱ xikaꞌ nuuꞌ nuu̱ꞌ a̱,
xiinꞌ Aarón,
te̱ ni̱ na̱ka̱xi̱n a̱ ku̱ndu̱u̱ sutu̱.
27 Te̱ ni̱ xa̱a̱ te̱ ja̱a̱nꞌ kuaꞌa̱ꞌ va̱ tyu̱u̱n kaꞌnuꞌ te̱i̱n ne̱ ndieeꞌ nuu̱ꞌ ñu̱ꞌuꞌ Egipto ja̱a̱nꞌ,
ni̱ xa̱a̱ ra̱ kuaꞌa̱ꞌ ña̱ nandani̱ nuu̱ꞌ ñu̱ꞌuꞌ Cam ja̱a̱nꞌ.
28 Te̱ ni̱ sa̱ku̱i̱i̱n yaví Ndiosí ka̱niiꞌ nuu̱ꞌ ñu̱ꞌuꞌ Egipto ja̱a̱nꞌ,
sa̱kanꞌ ña̱ ni̱ xa̱so̱ꞌo̱ ne̱ Egipto ja̱a̱nꞌ nuu̱ꞌ a̱ ña̱ nï̱ ta̱xi̱ ni̱a̱ kuꞌu̱n ne̱ nduuꞌ kuenta a̱.
29 Te̱ ni̱ sa̱na̱nduuꞌ a̱ sa̱kuuꞌ ti̱kui ni̱a̱ níiꞌ,
te̱ ni̱ xa̱ꞌni̱ꞌ a̱ sa̱kuuꞌ nuu̱ꞌ ti̱a̱kaꞌ,
tiꞌ ñuꞌuꞌ ti̱xi̱n ti̱kui ñu̱u̱ ja̱a̱nꞌ.
30 Te̱ ni̱ sa̱kutuꞌ a̱ ka̱niiꞌ nuu̱ꞌ ñu̱ꞌuꞌ i̱kanꞌ xiinꞌ kuaꞌa̱ꞌ xa̱va̱ꞌa̱ saꞌva̱,
te̱ ni̱ ko̱ꞌni̱ riꞌ nde̱e̱ vi̱ꞌe̱ rey miiꞌ kixín ra̱.
31 I̱kanꞌ te̱ ni̱ kaꞌa̱n tyuunꞌ Ndiosí xiinꞌ kuaꞌa̱ꞌ va̱ ndi̱ka̱ma̱,
te̱ ni̱ ko̱ꞌni̱ riꞌ nuu̱ꞌ ñu̱ꞌuꞌ Egipto ja̱a̱nꞌ,
te̱ ni̱ xa̱a̱ tu̱ kuaꞌa̱ꞌ xa̱va̱ꞌa̱ ti̱kunꞌ,
te̱ ni̱ ko̱ꞌni̱ riꞌ nuu̱ꞌ ñu̱ꞌuꞌ Egipto ja̱a̱nꞌ.
32 Te̱ nuu̱ꞌ a̱ ña̱ sa̱kuunꞌ a̱ savi̱ꞌ ndii,
iꞌinꞌ ni̱ sa̱kuunꞌ a̱ i̱kanꞌ,
te̱ ni̱ sa̱koyó tu̱ a̱ ñuꞌu̱ ndatin nuu̱ꞌ ñu̱ꞌuꞌ Egipto ja̱a̱nꞌ.
33 Ni̱ sa̱nduxín ndo̱o̱ a̱ yo̱ꞌoꞌ uva ni̱a̱ xiinꞌ tunꞌ ndo̱koꞌ higuera ni̱a̱,
te̱ ni̱ sa̱kuatyiꞌ a̱ sa̱kuuꞌ nuu̱ꞌ i̱tunꞌ,
tunꞌ yoo nuuꞌ ñu̱ꞌuꞌ ja̱a̱nꞌ.
34 Te̱ ni̱ kaꞌa̱n tyuunꞌ a̱,
i̱kanꞌ te̱ ni̱ nde̱ku̱i̱e̱e̱ kuaꞌa̱ꞌ xa̱va̱ꞌa̱ ti̱ka̱,
kuaꞌa̱ꞌ ti̱ka̱ ni̱ xa̱a̱ nde̱e̱ kü̱ndi̱e̱eꞌ e̱ꞌ ka̱ꞌvi̱ e̱ꞌ riꞌ.
35 Te̱ ni̱ xa̱xi̱ꞌ riꞌ sa̱kuuꞌ kuꞌu̱ ña̱ yoo nuu̱ꞌ ñu̱ꞌuꞌ i̱kanꞌ,
te̱ ni̱ xa̱xi̱ꞌ ndooꞌ tu̱ riꞌ ña̱ ni̱ tyi̱ꞌi̱ ne̱ yivi̱ꞌ i̱kanꞌ.
36 Ni̱ xa̱ꞌni̱ꞌ tu̱ Ndiosí sa̱kuuꞌ siꞌe̱ nu̱uꞌ ne̱ ndieeꞌ nuu̱ꞌ ñu̱ꞌuꞌ Egipto ja̱a̱nꞌ,
siꞌe̱ ni̱a̱,
te̱ ni̱ yoo̱ nu̱uꞌ nuu̱ꞌ ni̱a̱ kii̱ꞌ kaꞌni̱ va̱ ña̱ ndi̱e̱eꞌ ni̱a̱.
37 Ndi̱ꞌi̱ ja̱a̱nꞌ te̱ ni̱ ta̱va̱ꞌ Ndiosí ne̱ nduuꞌ kuenta a̱ nuu̱ꞌ ñu̱ꞌuꞌ Egipto ja̱a̱nꞌ,
ndisoꞌ ni̱a̱ kuaꞌa̱ꞌ xa̱va̱ꞌa̱ oro xiinꞌ plata,
te̱ nde̱e̱ i̱i̱n ne̱ xii̱ꞌ ya̱taꞌ e̱ꞌ ja̱a̱nꞌ köo̱ꞌ a̱ ni̱ ndo̱ꞌo̱ i̱tyiꞌ.
38 Te̱ kii̱ꞌ ni̱ ki̱e̱e̱ ne̱ ja̱a̱nꞌ nuu̱ꞌ ñu̱ꞌuꞌ Egipto ja̱a̱nꞌ ndii,
va̱ꞌa̱ xa̱va̱ꞌa̱ ni̱ ku̱ni̱ ne̱ ñu̱u̱ Egipto ja̱a̱nꞌ,
sa̱kanꞌ ña̱ ni̱ yi̱ꞌvi xa̱va̱ꞌa̱ ña̱ꞌaꞌ ni̱a̱.
39 Mi̱iꞌ Ndiosí ni̱ xa̱ki̱n viko̱ꞌ ku̱ndu̱u̱ ka̱tiꞌ xíniꞌ ni̱a̱ i̱tyiꞌ miiꞌ kuaꞌa̱n ni̱a̱,
te̱ ñu̱u ndii,
ñuꞌu̱ ni̱ na̱ku̱nꞌ a̱ nuu̱ꞌ ni̱a̱.
40 Ni̱ xika̱n ni̱a̱ nde̱i̱ꞌ nuu̱ꞌ a̱ ku̱xi̱ ni̱a̱,
te̱ ni̱ ta̱xi̱ a̱ ka̱ñuꞌu̱ꞌ ni̱ xi̱xi̱ ni̱a̱,
ni̱ ta̱xi̱ tu̱ a̱ kuaꞌa̱ꞌ va̱ xita̱ꞌ va̱ꞌa̱ ña̱ naniꞌ maná,
ña̱ ni̱ ki̱e̱e̱ nde̱e̱ ndi̱viꞌ ni̱ xi̱xi̱ ni̱a̱ nde̱e̱ ni̱ nda̱ꞌni̱ ni̱a̱.
41 Ni̱ ta̱ꞌviꞌ a̱ ka̱va̱ꞌ,
te̱ ni̱ ki̱e̱e̱ kuaꞌa̱ꞌ ti̱kui ni̱ xi̱ꞌi̱ ni̱a̱.
Ni̱ na̱kaa̱ raꞌ kuaꞌa̱n raꞌ miiꞌ i̱tyi kaaꞌ,
te̱ ni̱ na̱ndu̱u̱ a̱ nde̱e̱ naa i̱ti̱a̱.
42 Sa̱kanꞌ ña̱ ni̱ na̱ka̱ꞌanꞌ Ndiosí xaꞌa̱ꞌ kuento su̱ꞌu̱n a̱
ña̱ ni̱ ta̱xi̱ a̱ xta̱ꞌanꞌ nuu̱ꞌ Abraham,
te̱ ni̱ xika̱ nuuꞌ nuu̱ꞌ a̱.
43 Sa̱kanꞌ na kuiiꞌ va̱ꞌa̱ va̱ kuni ni̱a̱,
te̱ ni̱ ta̱va̱ꞌ Ndiosí ne̱ nduuꞌ kuenta a̱ ja̱a̱nꞌ nuu̱ꞌ ñu̱ꞌuꞌ Egipto.
Kuatiaꞌ vi̱ꞌ nimá ni̱a̱,
te̱ ni̱ ta̱va̱ꞌ a̱ ne̱ ni̱ na̱ka̱xi̱n a̱ ja̱a̱nꞌ i̱kanꞌ.
44 Te̱ ni̱ ta̱xi̱ a̱ ka̱niiꞌ ñu̱ꞌuꞌ ne̱ tukuꞌ ku̱ndu̱u̱ ña̱ꞌa̱ ne̱ nduuꞌ kuenta a̱ ja̱a̱nꞌ,
te̱ ni̱ na̱ka̱ya̱ tu̱ ni̱a̱ ña̱ savi̱ꞌ ña̱ ni̱ tyi̱ꞌi̱ i̱nga̱ ne̱ yivi̱ꞌ ni̱ xa̱xi̱ꞌ ni̱a̱.
45 Ni̱ xa̱a̱ a̱ sa̱kuuꞌ ña̱ ja̱a̱nꞌ xaꞌa̱ꞌ ni̱a̱,
sa̱kanꞌ te̱ sa̱xinú ni̱a̱ ña̱ kaꞌán tyuunꞌ a̱,
te̱ ta̱xi̱ so̱ꞌo̱ ni̱a̱ nde̱iꞌ ña̱ saniaꞌá ña̱ꞌaꞌ a̱.
Na sa̱kaꞌnuꞌ e̱ꞌ Ndiosí,
Xto̱ꞌo̱ e̱ꞌ.