Yoꞌoꞌ kaꞌán a̱ xaꞌa̱ꞌ a̱ ña̱ xitoꞌ Ndiosí sa̱kuuꞌ ña̱ ni̱ xa̱ꞌa̱ a̱
104
Nimá mi̱iꞌ i̱,
sa̱kaꞌnuꞌ u̱nꞌ Yahvé.
Yahvé Ndiosí,
ña̱ xakaꞌnuꞌ i̱,
ña̱ kaꞌnuꞌ va̱ nduuꞌ u̱nꞌ,
nda̱tu̱nꞌ va̱ ña̱ nduuꞌ u̱nꞌ,
te̱ tyiee̱ va̱ tu̱ ña̱ nduuꞌ u̱nꞌ.
2 Te̱ toto̱ ña̱ niꞌnuꞌ u̱nꞌ ndii,
xa̱ mi̱iꞌ ndiꞌiꞌ ñuꞌu̱ nda̱tu̱nꞌ xa̱va̱ꞌa̱ nduuꞌ a̱,
te̱ sanakaá u̱nꞌ ndi̱viꞌ nde̱e̱ naa xaaꞌ ne̱ yivi̱ꞌ kii̱ꞌ sanakaá ni̱a̱ i̱i̱n toto̱ ndiká.
3 Te̱ xata̱ꞌ viko̱ꞌ ni̱ ku̱xi̱ u̱nꞌ siꞌi̱n vi̱ꞌe̱ nduꞌu̱ꞌ u̱nꞌ,
te̱ viko̱ꞌ ja̱a̱nꞌ nduuꞌ nde̱e̱ naa carreta,
tunꞌ naá u̱nꞌ kuaꞌa̱n u̱nꞌ.
Te̱ ndi̱e̱eꞌ xa̱va̱ꞌa̱ taꞌnuꞌ u̱nꞌ te̱i̱n tatyi̱ꞌ xikaꞌ u̱nꞌ.
4 Te̱ tatyi̱ꞌ ja̱a̱nꞌ nduuꞌ ña̱ kuaꞌa̱n xiinꞌ kuento u̱nꞌ,
te̱ ñuꞌu̱ ndatin sananduuꞌ u̱nꞌ te̱ xikaꞌ nuuꞌ nuu̱ꞌ u̱nꞌ.
5 Te̱ ñu̱ꞌuꞌ i̱i̱n yivi̱ꞌ ndii,
xi̱ꞌna̱ ka̱ xaꞌa̱ꞌ a̱ ni̱ xa̱ꞌa̱ u̱nꞌ te̱ sa̱kanꞌ vi̱ꞌ ni̱ tyi̱ka̱nduꞌu̱ꞌ u̱nꞌ u̱n,
sa̱kanꞌ te̱ köo̱ꞌ kivi̱ꞌ ku̱nu̱ndiaꞌa̱ a̱ i̱kanꞌ.
6 Te̱ i̱i̱n ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ ni̱ nda̱si̱ u̱nꞌ xiinꞌ ti̱kui nde̱e̱ naa ni̱ sa̱na̱kuiꞌnú ña̱ꞌaꞌ u̱nꞌ i̱i̱n xi̱o̱o̱,
te̱ ni̱ nda̱si̱ ti̱kui ja̱a̱nꞌ nde̱e̱ i̱kuꞌ ña̱ sukun xa̱va̱ꞌa̱.
7 Ndisu̱ kii̱ꞌ ni̱ kaꞌa̱n tyuunꞌ u̱nꞌ xiinꞌ raꞌ ndii,
ni̱ xi̱nu̱ raꞌ,
sa̱kanꞌ ña̱ kii̱ꞌ ni̱ xi̱ni̱ so̱ꞌo̱ raꞌ tatyi̱ꞌ u̱nꞌ ña̱ ndeꞌí savi̱ꞌ ndii,
ni̱ ta̱xtaꞌanꞌ ndo̱o̱ raꞌ kuaꞌa̱n raꞌ.
8 Tyaaꞌ raꞌ ni̱ ka̱a̱ xíniꞌ i̱kuꞌ,
te̱ tyaaꞌ tukuꞌ raꞌ ni̱ na̱kaa̱ꞌ yo̱soꞌ ndienu̱
miiꞌ ni̱ xa̱ꞌa̱ u̱nꞌ ku̱naa̱ raꞌ.
9 Ndi̱ꞌi̱ ja̱a̱nꞌ te̱ ni̱ niaꞌa̱ u̱nꞌ nuu̱ꞌ ti̱kui ja̱a̱nꞌ miiꞌ ku̱i̱ti̱ꞌ kuꞌu̱n ndi̱koꞌ raꞌ,
te̱ köo̱ꞌ kivi̱ꞌ ka̱ xkaꞌndi̱a̱ raꞌ i̱kanꞌ,
te̱ nda̱si̱ raꞌ nuu̱ꞌ i̱i̱n yivi̱ꞌ.
10 Yoꞌó nduuꞌ ña̱ xaaꞌ sa̱kanꞌ te̱ kieeꞌ ti̱kui ti̱ko̱ꞌyoꞌ,
te̱ kuaꞌa̱n raꞌ yivi̱ꞌ te̱i̱n i̱kuꞌ,
te̱ naxaá raꞌ i̱ti̱a̱,
te̱ ndukuaꞌa̱ꞌ raꞌ.
11 Te̱ i̱kanꞌ xiꞌiꞌ sa̱kuuꞌ nuu̱ꞌ ki̱tiꞌ i̱kuꞌ ti̱kui,
te̱ sa̱kanꞌ mburru i̱kuꞌ ndii,
i̱kanꞌ xiꞌiꞌ riꞌ ti̱kui.
12 Te̱ yu̱ꞌuꞌ i̱ti̱a̱ ja̱a̱nꞌ xaꞌa tu̱ sa̱a̱ tyoꞌo̱ riꞌ,
te̱ xitaꞌ riꞌ ndieeꞌ riꞌ nda̱ꞌaꞌ i̱tunꞌ i̱kanꞌ.
13 Te̱ nde̱e̱ ndi̱viꞌ nduꞌu̱ꞌ u̱nꞌ te̱ sakuunꞌ u̱nꞌ savi̱ꞌ,
te̱ kosó u̱nꞌ sa̱kuuꞌ i̱kuꞌ naꞌnuꞌ,
te̱ xiinꞌ ña̱ xaaꞌ u̱nꞌ ja̱a̱nꞌ yoo kuaꞌa̱ꞌ ña̱ savi̱ꞌ nuu̱ꞌ ñu̱ꞌuꞌ i̱i̱n yivi̱ꞌ.
14 Sa̱kuaꞌnuꞌ tu̱ u̱nꞌ i̱ti̱a̱ xaxi̱ꞌ sa̱kuuꞌ nuu̱ꞌ ki̱tiꞌ,
te̱ sakuaꞌnuꞌ tu̱ u̱nꞌ ña̱ ta̱ta̱ ña̱ tyiꞌiꞌ ne̱ yivi̱ꞌ te̱ nakaya ni̱a̱ ña̱ savi̱ꞌ xaxi̱ꞌ ni̱a̱.
15 Naa kuuꞌ vino,
teꞌ xiꞌiꞌ ne̱ yivi̱ꞌ te̱ nakuatiaꞌ nimá ni̱a̱,
xiinꞌ naa kuuꞌ xa̱ꞌa̱n oliva,
ña̱ xakin ña̱ꞌaꞌ nuu̱ꞌ ni̱a̱ te̱ nduuꞌ nda̱tu̱nꞌ nuu̱ꞌ ni̱a̱,
xiinꞌ naa kuuꞌ xita̱ꞌ va̱ꞌa̱,
ña̱ xixiꞌ ne̱ yivi̱ꞌ te̱ nakunaá ndi̱e̱e̱ꞌ ni̱a̱.
16 Sa̱kanꞌ tu̱ tunꞌ cedro,
tunꞌ ni̱ tyi̱ꞌi̱ mi̱iꞌ Yahvé nuu̱ꞌ ñu̱ꞌuꞌ Líbano ndii,
yoo kuaꞌa̱ꞌ ti̱kui nuu̱ꞌ ñu̱ꞌuꞌ miiꞌ itaꞌ nu̱ꞌ.
17 Te̱ nda̱ꞌaꞌ tunꞌ ja̱a̱nꞌ xaꞌa sa̱a̱ tyoꞌo̱ riꞌ,
te̱ nde̱e̱ nuu̱ꞌ níiꞌ nu̱ꞌ ndieeꞌ ti̱su̱tiaꞌ.
18 Te̱ xíniꞌ i̱kuꞌ miiꞌ sukun va̱ ndieeꞌ ti̱xuꞌu̱ꞌ i̱kuꞌ,
te̱ te̱i̱n yuu̱ꞌ ñuꞌuꞌ xa̱ko̱.
19 Yoꞌó ni̱ xa̱ꞌa̱ yoo̱ꞌ te̱ niaꞌa̱ a̱ nuu̱ꞌ ndu̱ a̱ma̱ namá yoo̱ꞌ vi̱xi̱n,
te̱ ñu̱ꞌu̱ ndii,
xa̱ xiní tu̱ ña̱ ja̱a̱nꞌ a̱ma̱ keta̱ a̱.
20 Yoꞌó kaꞌán tyuunꞌ tu̱ xiinꞌ ña̱ i̱i̱n yaví te̱ xáñu̱u a̱,
te̱ ñu̱u ja̱a̱nꞌ nduuꞌ ña̱ kieeꞌ tiꞌ i̱kuꞌ xaꞌa̱ꞌ kuꞌu̱ xikaꞌ riꞌ.
21 Te̱ lion sa̱va̱ ndii,
xiña riꞌ kuaꞌa̱n ndu̱kuꞌ riꞌ ki̱tiꞌ ka̱xi̱ꞌ riꞌ,
níániꞌ riꞌ ki̱tiꞌ,
tiꞌ ta̱xi̱ yoꞌó,
Ndiosí,
ka̱xi̱ꞌ riꞌ.
22 Te̱ kii̱ꞌ kitúꞌ,
te̱ ketaꞌ ñu̱ꞌu̱ ndii,
nandikoꞌ riꞌ yavi̱ yuu̱ꞌ miiꞌ ñuꞌuꞌ riꞌ,
te̱ na̱ndiee̱ꞌ riꞌ.
23 Sa̱kanꞌ te̱ kieeꞌ tu̱ ne̱ yivi̱ꞌ kuaꞌa̱n sa̱tyuunꞌ ni̱a̱,
te̱ xaaꞌ ni̱a̱ tyu̱u̱n nuu̱ꞌ ni̱a̱ nde̱e̱ tüviꞌ ka̱.
24 Tákuiꞌe Yahvé,
xa̱ kuaꞌa̱ꞌ nuu̱ꞌ tyu̱u̱n kaꞌnuꞌ ni̱ xa̱ꞌa̱ u̱nꞌ,
te̱ sa̱kuuꞌ ña̱ ja̱a̱nꞌ ni̱ xa̱ꞌa̱ u̱nꞌ xiinꞌ ña̱ xini tuní u̱nꞌ,
tyituꞌ vi̱ꞌ nuu̱ꞌ ñu̱ꞌuꞌ i̱i̱n yivi̱ꞌ yoo sa̱kuuꞌ ña̱ ni̱ xa̱ꞌa̱ u̱nꞌ.
25 Naa kuuꞌ mi̱ni̱ kaꞌnuꞌ,
ña̱ tyiee̱ xa̱va̱ꞌa̱,
te̱ ndiká xa̱va̱ꞌa̱ tu̱ a̱,
te̱ i̱kanꞌ ñuꞌuꞌ kuaꞌa̱ꞌ xa̱va̱ꞌa̱ nuu̱ꞌ ki̱tiꞌ,
tiꞌ kualiꞌ xiinꞌ tiꞌ naꞌnuꞌ va̱.
26 Te̱ nuu̱ꞌ mi̱ni̱ ja̱a̱nꞌ xikaꞌ kuaꞌa̱ꞌ tundo̱oꞌ,
te̱ i̱kanꞌ tu̱ naá i̱i̱n tiꞌ i̱yo̱ va̱ kaaꞌ naniꞌ leviatán,
tiꞌ ni̱ xa̱ꞌa̱ u̱nꞌ te̱ ku̱siki̱ꞌ riꞌ xiinꞌ ti̱kui mi̱ni̱ ja̱a̱nꞌ.
27 Te̱ sa̱kuuꞌ tiꞌ ja̱a̱nꞌ ndiatuꞌ ña̱ ta̱xi̱ yoꞌó ña̱ ka̱xi̱ꞌ riꞌ sa̱va̱ ni̱ ña̱ xiꞌí riꞌ so̱ko̱.
28 Te̱ taxiꞌ xna̱ꞌa̱ u̱nꞌ ña̱ xaxi̱ꞌ riꞌ,
te̱ natiinꞌ riꞌ a̱ nda̱ꞌaꞌ u̱nꞌ xaxi̱ꞌ riꞌ nde̱e̱ ndaꞌni riꞌ.
29 Ndisu̱ naaꞌ na̱ko̱o̱ u̱nꞌ riꞌ,
te̱ tä̱xi̱ ka̱ u̱nꞌ ña̱ ka̱xi̱ꞌ riꞌ ndii,
yiꞌvi xa̱va̱ꞌa̱ riꞌ,
te̱ kii̱ꞌ sandiꞌiꞌ u̱nꞌ tatyi̱ꞌ riꞌ ndii,
xiꞌí riꞌ,
te̱ nanduuꞌ tukuuꞌ riꞌ ya̱kaꞌ ku̱i̱ti̱ꞌ.
30 Te̱ kii̱ꞌ sanadiko tukuuꞌ u̱nꞌ tatyi̱ꞌ riꞌ ja̱a̱nꞌ ndii,
tu̱ku̱ ni̱ sa̱kanꞌ nakoó riꞌ,
te̱ sa̱kanꞌ tu̱ xaaꞌ u̱nꞌ te̱ ndasa xa̱aꞌ u̱nꞌ nuu̱ꞌ ñu̱ꞌuꞌ i̱i̱n yivi̱ꞌ.
31 Na kö̱o̱ kivi̱ꞌ ndi̱ꞌi̱ tyu̱u̱n kaꞌnuꞌ ña̱ xaaꞌ Yahvé,
te̱ na va̱ꞌa̱ kuni Yahvé ku̱ni̱ a̱ sa̱kuuꞌ tyu̱u̱n kaꞌnuꞌ ña̱ xaaꞌ a̱.
32 Te̱ ñu̱ꞌuꞌ i̱i̱n yivi̱ꞌ kii̱ꞌ xitoꞌ Yahvé nuu̱ꞌ a̱ ndii,
kanda vi̱ꞌ a̱,
te̱ sa̱kuuꞌ i̱kuꞌ kii̱ꞌ tondíá nda̱ꞌaꞌ ña̱ꞌaꞌ a̱ ndii,
nde̱e̱ ñuꞌma̱ tava̱ꞌ a̱.
33 Nuu̱ꞌ Yahvé ku̱i̱ti̱ꞌ ka̱ta̱ yuꞌu̱ ña̱ tiaku i̱,
nuu̱ꞌ Ndiosí ku̱i̱ti̱ꞌ sa̱kaꞌnuꞌ i̱ xiinꞌ ya̱a̱ nde̱e̱ xaa̱ kivi̱ꞌ ku̱vi̱ i̱.
34 Kaꞌán va̱ nimá i̱ ña̱ ku̱ta̱ni̱ na Ndiosí sa̱kuuꞌ ña̱ xanini i̱ xaꞌa̱ꞌ nde̱e̱ naa i̱i̱n ña̱ vixi̱,
sa̱kanꞌ ña̱ va̱ꞌa̱ va̱ kuni i̱ xini Yahvé.
35 Na ndo̱ñuꞌuꞌ sa̱kuuꞌ ne̱ xaaꞌ ku̱a̱tyi̱ nuu̱ꞌ ñu̱ꞌuꞌ i̱i̱n yivi̱ꞌ,
te̱ na köo̱ꞌ kivi̱ꞌ ka̱ na̱koo̱ ne̱ yivi̱ꞌ,
ne̱ xaaꞌ ña̱ ni̱a̱ꞌa nuu̱ꞌ ñu̱ꞌuꞌ i̱i̱n yivi̱ꞌ.
Sa̱kaꞌnuꞌ i̱ Yahvé xiinꞌ i̱i̱n ka̱niiꞌ nimá i̱.
Kaꞌnuꞌ va̱ ña̱ nduuꞌ Tákuiꞌe Ndiosí.