Yoꞌoꞌ kaꞌán a̱ xaꞌa̱ꞌ ña̱ kuní ta̱xi̱ e̱ꞌ ña̱ tyi̱nda̱ni Ndiosí xaꞌa̱ꞌ a̱ ña̱ sañuꞌuꞌ va̱ a̱ yooꞌ
Ya̱a̱ ña̱ ni̱ xi̱ta̱ David nuu̱ꞌ Ndiosí.
103
Nimá mi̱iꞌ i̱,
sa̱kaꞌnuꞌ u̱nꞌ Yahvé,
sa̱kaꞌnuꞌ ña̱ꞌaꞌ u̱nꞌ xiinꞌ i̱i̱n ka̱niiꞌ ña̱ nduuꞌ u̱nꞌ xaꞌa̱ꞌ a̱ ña̱ ña̱ su̱ꞌu̱n va̱ nduuꞌ a̱.
2 Nimá mi̱iꞌ i̱,
sa̱kaꞌnuꞌ u̱nꞌ Yahvé,
sa̱kaꞌnuꞌ ña̱ꞌaꞌ u̱nꞌ xiinꞌ i̱i̱n ka̱niiꞌ ña̱ nduuꞌ u̱nꞌ,
te̱ köo̱ꞌ kivi̱ꞌ na̱ndoso̱ꞌ u̱nꞌ nde̱e̱ i̱i̱n ña̱ va̱ꞌa̱ ña̱ xaaꞌ a̱ xaꞌa̱ꞌ u̱nꞌ.
3 Sa̱kanꞌ ña̱ yoo kaꞌnuꞌ i̱ni̱ a̱ xaꞌa̱ꞌ sa̱kuuꞌ ku̱a̱tyi̱ i̱,
te̱ sandaꞌa tu̱ a̱ sa̱kuuꞌ ña̱ uꞌvi̱ xini i̱.
4 Te̱ ña̱ ja̱a̱nꞌ nduuꞌ ña̱ sakakú yuꞌu̱ kii̱ꞌ ku̱vi̱ i̱ te̱ küꞌu̱n i̱ ñu̱u̱ ndi̱i,
te̱ su̱vi̱ tu̱ a̱ nduuꞌ ña̱ tyindieeꞌ yuꞌu̱,
te̱ kuvita tu̱ i̱ni̱ a̱ xaꞌa̱ꞌ i̱,
te̱ nduuꞌ ña̱ ja̱a̱nꞌ nde̱e̱ naa i̱i̱n corona nduꞌu̱ꞌ xíniꞌ i̱.
5 Ña̱ ja̱a̱nꞌ nduuꞌ ña̱ taxiꞌ kuaꞌa̱ꞌ ña̱ tiaku i̱ nda̱ꞌaꞌ i̱,
te̱ taxiꞌ tu̱ a̱ ña̱ ndi̱e̱eꞌ i̱ te̱ nanduuꞌ i̱ nde̱e̱ naa i̱i̱n te̱ sa̱va̱,
nde̱e̱ naa xaaꞌ tasu̱ꞌ kii̱ꞌ nakoó ndi̱e̱e̱ꞌ riꞌ tee̱ꞌ ndee xi̱xa̱ va̱ riꞌ.
6 Yahvé nduuꞌ ña̱ xatyuunꞌ nda̱ku xaꞌa̱ꞌ ne̱ yivi̱ꞌ,
ne̱ mi̱iꞌ kuuꞌ ne̱ yivi̱ꞌ xiinꞌ,
te̱ nakaꞌán nda̱ku tu̱ a̱ xaꞌa̱ꞌ sa̱kuuꞌ ne̱ ndoꞌoꞌ xaaꞌ ne̱ yivi̱ꞌ.
7 Te̱ nda̱ꞌaꞌ Moisés ni̱ sa̱yaꞌá a̱ ña̱ kaꞌán tuní a̱ xaꞌa̱ꞌ i̱tyiꞌ a̱,
te̱ sa̱kuuꞌ ne̱ vi̱ꞌe̱ Israel ni̱ xi̱ni̱ tyu̱u̱n kaꞌnuꞌ ña̱ ni̱ xa̱a̱ a̱.
8 Yahvé ndii,
ña̱ vi̱ta i̱ni̱ va̱ nduuꞌ a̱,
te̱ nduuꞌ tu̱ a̱ ña̱ yoo kaꞌnuꞌ va̱ i̱ni̱ xaꞌa̱ꞌ ne̱ yivi̱ꞌ.
Te̱ näsaáꞌ yatyi̱ xa̱tyiꞌ a̱,
te̱ ndani̱ kuaꞌa̱ꞌ va̱ a̱ ne̱ yivi̱ꞌ.
9 Te̱ kuäsa̱ꞌ sa̱ndoꞌoꞌ a̱ yooꞌ nde̱e̱ ndiꞌiꞌ ni̱ kivi̱ꞌ,
te̱ ni̱ nde̱e̱ kä̱siꞌe̱ tu̱ a̱ ku̱ni̱ a̱ yooꞌ nde̱e̱ ndiꞌiꞌ ni̱ kivi̱ꞌ.
10 Kuäsa̱ꞌ sa̱ndoꞌoꞌ a̱ yooꞌ sa̱a̱ xataꞌa̱n ku̱ndo̱ꞌo̱ e̱ꞌ xaꞌa̱ꞌ ku̱a̱tyi̱ ña̱ ni̱ xa̱a̱ e̱ꞌ,
ni̱ nde̱e̱ kuäsa̱ꞌ tu̱ tya̱ꞌvi̱ a̱ yooꞌ sa̱a̱ xataꞌa̱n xaꞌa̱ꞌ sa̱kuuꞌ ña̱ ni̱a̱ꞌa ña̱ ni̱ xa̱a̱ e̱ꞌ.
11 Sa̱kanꞌ ña̱ nde̱e̱ naa sukun kanduꞌu̱ꞌ ndi̱viꞌ xata̱ꞌ ñu̱ꞌuꞌ i̱i̱n yivi̱ꞌ vi̱ꞌ ndii,
niiꞌ sa̱kanꞌ vi̱ꞌ tu̱ tyiee̱ ña̱ kuvita i̱ni̱ Ndiosí xaꞌa̱ꞌ ne̱ xitoꞌ kaꞌnuꞌ ña̱ꞌaꞌ.
12 Xikaꞌ xa̱va̱ꞌa̱ ni̱ xa̱ti̱a̱ Ndiosí ku̱a̱tyi̱ e̱ꞌ nuu̱ꞌ e̱ꞌ,
nde̱e̱ naa xikaꞌ yoo miiꞌ ketaꞌ ñu̱ꞌu̱ nuu̱ꞌ miiꞌ ketá a̱.
13 Nde̱e̱ naa xaaꞌ i̱i̱n yu̱vaꞌ ña̱ ndani̱ ra̱ siꞌe̱ ra̱ ndii,
niiꞌ sa̱kanꞌ tu̱ xaaꞌ Yahvé ndani̱ a̱ ne̱ xitoꞌ kaꞌnuꞌ ña̱ꞌaꞌ.
14 Sa̱kanꞌ ña̱ xiní a̱ ña̱ ii̱ꞌ va̱ yoo e̱ꞌ,
te̱ xiní tu̱ a̱ ña̱ ya̱kaꞌ ku̱i̱ti̱ꞌ nduuꞌ e̱ꞌ.
15 Yooꞌ,
ne̱ yivi̱ꞌ i̱i̱n yivi̱ꞌ ndii,
nduuꞌ kivi̱ꞌ ñu̱u̱ e̱ꞌ nde̱e̱ naa kuꞌu̱ ku̱i̱ti̱ꞌ,
te̱ nduuꞌ tu̱ a̱ nde̱e̱ naa i̱ta̱ kuꞌu̱ ña̱ xaaꞌ te̱ numi̱ꞌ va̱ ityí a̱.
16 Kii̱ꞌ ndi̱e̱eꞌ xikaꞌ tatyi̱ꞌ te̱ sakoyó ña̱ꞌaꞌ a̱,
te̱ nde̱e̱ i̱i̱n ne̱ yivi̱ꞌ kü̱vi̱ ku̱ni̱ ka̱ miiꞌ niaꞌá ni̱ ita̱ a̱.
17 Ndisu̱ ña̱ kuvita i̱ni̱ Yahvé xaꞌa̱ꞌ ne̱ xitoꞌ kaꞌnuꞌ ña̱ꞌaꞌ ndii,
yoo a̱ nde̱e̱ ndiꞌiꞌ ni̱ kivi̱ꞌ.
Te̱ köo̱ꞌ kivi̱ꞌ ndiꞌiꞌ ña̱ xatyuunꞌ nda̱ku a̱ nde̱e̱ xaꞌa̱ꞌ si̱a̱niꞌ xikuaꞌ ni̱a̱.
18 Sa̱kanꞌ ña̱ ne̱ saxinú va̱ꞌa̱ sa̱kuuꞌ kuento a̱ ña̱ ni̱ ndoo̱ nuu̱ꞌ ne̱ xii̱ꞌ ya̱taꞌ e̱ꞌ ndii,
kandixaꞌ ni̱a̱ tu̱ꞌu̱n nde̱iꞌ a̱,
te̱ saxinú ni̱a̱ a̱.
19 Yahvé ndii,
ndi̱viꞌ iinꞌ tei̱ kaꞌnuꞌ miiꞌ nduꞌu̱ꞌ a̱,
te̱ nde̱e̱ i̱kanꞌ nduꞌu̱ꞌ a̱ te̱ xaꞌndia tyuunꞌ a̱ i̱i̱n ka̱niiꞌ i̱i̱n yivi̱ꞌ.
20 Sa̱kuuꞌ ndoꞌó,
ángele,
sa̱kaꞌnuꞌ ndo̱ꞌ Yahvé,
ndoꞌó,
ña̱ kooꞌ tyukuuꞌ xiinꞌ ña̱ ndi̱e̱eꞌ ndo̱ꞌ,
ndoꞌó,
ña̱ saxinú ña̱ tyituní a̱ sa̱a̱ a̱,
ndoꞌó,
ña̱ xaaꞌ sa̱kuuꞌ ña̱ kaꞌán tyuunꞌ a̱ xiinꞌ ndo̱ꞌ.
21 Sa̱kuuꞌ ndoꞌó,
te̱ xíinꞌ ndieeꞌ ndi̱viꞌ,
sa̱kaꞌnuꞌ ndo̱ꞌ Yahvé,
ndoꞌó,
te̱ xikaꞌ nuuꞌ nuu̱ꞌ a̱,
te̱ saxinú ndo̱ꞌ ña̱ kuní a̱.
22 Sa̱kuuꞌ ndoꞌó,
ña̱ꞌa̱,
ña̱ ni̱ ku̱a̱ꞌa̱ xiinꞌ nda̱ꞌaꞌ Ndiosí ndii,
na sa̱kaꞌnuꞌ ndo̱ꞌ Yahvé Ndiosí,
te̱ na sa̱kaꞌnuꞌ tu̱ ña̱ꞌaꞌ sa̱kuuꞌ ndoꞌó,
ña̱ yoo miiꞌ xaꞌndia tyuunꞌ a̱.
Nimá mi̱iꞌ i̱,
sa̱kaꞌnuꞌ u̱nꞌ Yahvé.