Yoꞌoꞌ ku̱a̱xi̱ si̱u̱ꞌunꞌ ña̱ kaꞌán ne̱ ndoꞌoꞌ
Si̱u̱ꞌunꞌ ña̱ kaꞌán ne̱ ndoꞌoꞌ va̱ xaaꞌ ne̱ ni̱a̱ꞌa, te̱ kaꞌán ndaꞌvi ni̱a̱ xiinꞌ Yahvé xaꞌa̱ꞌ ña̱ ndoꞌoꞌ ni̱a̱ ja̱a̱nꞌ te̱ sa̱kakú ña̱ꞌaꞌ a̱.
102
Tákuiꞌe Yahvé,
sa̱a̱ u̱nꞌ ña̱ va̱ꞌa̱ te̱ ku̱ni̱ so̱ꞌo̱ u̱nꞌ si̱u̱ꞌunꞌ ña̱ kaꞌán i̱ xiinꞌ u̱nꞌ,
te̱ ta̱xi̱ u̱nꞌ na na̱xaa̱ ña̱ kaꞌán ndaꞌvi i̱ xiinꞌ u̱nꞌ nde̱e̱ nuu̱ꞌ u̱nꞌ miiꞌ nduꞌu̱ꞌ u̱nꞌ.
2 Sa̱a̱ u̱nꞌ ña̱ va̱ꞌa̱ te̱ kü̱xi̱o̱o̱ u̱nꞌ nuu̱ꞌ i̱ kii̱ꞌ ndiꞌni̱ va̱ nimá i̱,
sa̱a̱ u̱nꞌ ña̱ va̱ꞌa̱ te̱ ku̱ni̱ so̱ꞌo̱ u̱nꞌ si̱u̱ꞌunꞌ ña̱ kaꞌán i̱ xiinꞌ u̱nꞌ,
sa̱a̱ u̱nꞌ ña̱ va̱ꞌa̱ te̱ numi̱ꞌ va̱ na̱ku̱i̱i̱n u̱nꞌ kii̱ꞌ kaꞌa̱n i̱ xiinꞌ u̱nꞌ.
3 Sa̱kanꞌ ña̱ kivi̱ꞌ ñu̱u̱ i̱ ndii,
ndiꞌiꞌ a̱ so̱ꞌo̱ nde̱e̱ naa ñuꞌma̱ ku̱i̱ti̱ꞌ,
te̱ i̱kiꞌ i̱ ndii,
nduuꞌ a̱ nde̱e̱ naa ñuꞌu̱ ti̱keí ña̱ xixí nuu̱ꞌ ñuꞌu̱ ku̱i̱ti̱ꞌ.
4 Ndiꞌni̱ va̱ nimá i̱,
te̱ xa̱ ni̱ ityi̱ a̱ nde̱e̱ naa kuꞌu̱,
te̱ köo̱ꞌ ka̱ xa̱tyiꞌ ka̱ so̱ko̱ i̱ni̱ i̱ xaꞌa̱ꞌ a̱ ña̱ xa̱vi va̱ xíniꞌ i̱.
5 Te̱ xaꞌa̱ꞌ a̱ ña̱ ndi̱e̱eꞌ va̱ tanaꞌ i̱ ndii,
ni̱ ku̱u̱ kuiꞌe xa̱va̱ꞌa̱ i̱,
te̱ tuviꞌ ndo̱o̱ i̱kiꞌ i̱.
6 Nduuꞌ i̱ nde̱e̱ naa ti̱u̱unꞌ mi̱ni̱,
tiꞌ xikaꞌ i̱i̱n nda̱a̱ꞌ miiꞌ kaaꞌ i̱tyi,
uun nduuꞌ i̱ nde̱e̱ naa ndi̱kuꞌún,
tiꞌ yoo miiꞌ xa̱ ni̱ nduxi̱n ndo̱o̱.
7 Te̱ kü̱vi̱ kusu̱n i̱ tee̱ꞌ ndee nakanduꞌu̱ꞌ i̱,
nduuꞌ i̱ nde̱e̱ naa sa̱a̱,
tiꞌ xikaꞌ i̱i̱n nda̱a̱ꞌ xata̱ꞌ vi̱ꞌe̱ ñu̱u.
8 Te̱ ndasiꞌ taꞌanꞌ xiinꞌ i̱ ndii,
sa̱a̱ kivi̱ꞌ kani̱a̱ꞌa ra̱ xiinꞌ i̱,
xandiꞌiꞌ ra̱ xiinꞌ i̱,
te̱ sanatyaꞌanꞌ tu̱ ra̱ yuꞌu̱.
9 Nuu̱ꞌ a̱ ña̱ ku̱xi̱ i̱ ña̱ xaxi̱ꞌ ndii,
yaa̱ꞌ nuꞌu̱ ku̱i̱ti̱ꞌ nduuꞌ ña̱ xaxi̱ꞌ i̱,
te̱ ti̱kui nuu̱ꞌ i̱ ña̱ xakuꞌ i̱ nasaká xiinꞌ ti̱kui,
teꞌ xiꞌiꞌ i̱
10 xaꞌa̱ꞌ a̱ ña̱ xiꞌé va̱ u̱nꞌ xini u̱nꞌ yuꞌu̱,
te̱ ni̱ na̱saa̱ꞌ xa̱va̱ꞌa̱ tu̱ u̱nꞌ.
Ku̱a̱tyi̱ ndii ni̱ na̱ti̱i̱n u̱nꞌ yuꞌu̱,
te̱ ni̱ sa̱xi̱o̱o̱ ndi̱ꞌi̱ u̱nꞌ yuꞌu̱ nuu̱ꞌ u̱nꞌ.
11 Kivi̱ꞌ ñu̱u̱ i̱ ndii,
yatyi̱ va̱ xkaꞌndíá a̱,
te̱ nduuꞌ a̱ nde̱e̱ naa ka̱tiꞌ xa̱kuaa̱ꞌ,
te̱ ni̱ ityi̱ ka̱niiꞌ ku̱ñu̱ i̱ nde̱e̱ naa xaaꞌ kuꞌu̱ i̱tyi a̱.
12 Ndisu̱ yoꞌó,
Tákuiꞌe Yahvé ndii,
yoo u̱nꞌ nde̱e̱ ndiꞌiꞌ ni̱ kivi̱ꞌ,
te̱ sa̱kuuꞌ ne̱ yivi̱ꞌ,
ne̱ tuvi̱ nuu̱ꞌ kuꞌu̱n e̱ꞌ,
na̱ka̱ꞌanꞌ xaꞌa̱ꞌ ña̱ kaꞌnuꞌ va̱ u̱nꞌ nde̱e̱ ndiꞌiꞌ ni̱ kivi̱ꞌ.
13 Ndo̱ndi̱tyi̱ u̱nꞌ,
te̱ ku̱vi̱ta i̱ni̱ u̱nꞌ xaꞌa̱ꞌ ne̱ ndieeꞌ ñu̱u̱ Jerusalén,
sa̱kanꞌ ña̱ xa̱ ni̱ xa̱a̱ kivi̱ꞌ ña̱ ko̱o̱ kaꞌnuꞌ i̱ni̱ u̱nꞌ xaꞌa̱ꞌ ni̱a̱,
ku̱a̱tyi̱ ndii,
vi̱ti̱n nduuꞌ kivi̱ꞌ ña̱ ni̱ kaꞌa̱n u̱nꞌ tyi̱ndi̱e̱eꞌ ña̱ꞌaꞌ u̱nꞌ.
14 Sa̱kanꞌ ña̱ nduꞌu̱,
ne̱ xikaꞌ nuuꞌ nuu̱ꞌ u̱nꞌ ndii,
ndani̱ ndu̱ i̱ꞌi̱n yuu̱ꞌ ña̱ ni̱ ka̱a̱ vi̱ꞌe̱ ndu̱ xiinꞌ nama̱ ña̱ ndasiꞌ i̱ꞌnu̱ ñu̱u̱ ndu̱ yoꞌoꞌ,
te̱ sutyiꞌ tu̱ i̱ni̱ ndu̱ nde̱e̱ xaꞌa̱ꞌ ña̱ ni̱ nduxi̱n ka̱niiꞌ a̱.
15 Te̱ sa̱kuuꞌ ne̱ tukuꞌ ko̱to̱ kaꞌnuꞌ Yahvé Ndiosí,
sa̱kanꞌ tu̱ sa̱kuuꞌ te̱ xaꞌndia tyuunꞌ nuu̱ꞌ ñu̱ꞌuꞌ i̱i̱n yivi̱ꞌ ndii,
ku̱yi̱ꞌvi va̱ ra̱ kii̱ꞌ ku̱ni̱ ra̱ ña̱ kaꞌnuꞌ yoꞌó.
16 Sa̱kanꞌ ña̱ na̱ka̱sa̱ꞌa̱ xa̱aꞌ Yahvé ñu̱u̱ Jerusalén,
te̱ ki̱xi̱n a̱ xiinꞌ sa̱kuuꞌ ña̱ nda̱tu̱nꞌ a̱.
17 Te̱ ku̱ni̱ so̱ꞌo̱ a̱ si̱u̱ꞌunꞌ ña̱ kaꞌán ne̱ ndaꞌvi kuuꞌ ndoꞌoꞌ xaaꞌ ne̱ yivi̱ꞌ,
te̱ na̱ti̱i̱n mani̱ꞌ a̱ ña̱ kaꞌa̱n ndaꞌvi sa̱kuuꞌ ne̱ ja̱a̱nꞌ xiinꞌ a̱.
18 Te̱ na̱ko̱so̱ꞌ sa̱kuuꞌ ña̱ ja̱a̱nꞌ nuu̱ꞌ i̱i̱n tu̱tu̱,
te̱ ku̱ni̱ sa̱kuuꞌ ne̱ ki̱xi̱n nuu̱ꞌ kuꞌu̱n e̱ꞌ xaꞌa̱ꞌ a̱,
sa̱kanꞌ te̱ sa̱kaꞌnuꞌ sa̱kuuꞌ ne̱ tïaꞌa̱an tuvi̱ Yahvé.
19 Sa̱kanꞌ ña̱ ni̱ xi̱to̱ Ndiosí nuu̱ꞌ ñu̱ꞌuꞌ i̱i̱n yivi̱ꞌ nde̱e̱ miiꞌ nduꞌu̱ꞌ a̱ ti̱xi̱n yu̱kunꞌ a̱ ña̱ iinꞌ ndi̱viꞌ,
te̱ nde̱e̱ miiꞌ nduꞌu̱ꞌ a̱ ndi̱viꞌ ni̱ xi̱to̱ a̱ nuu̱ꞌ ñu̱ꞌuꞌ i̱i̱n yivi̱ꞌ.
20 Te̱ ku̱ni̱ so̱ꞌo̱ a̱ ña̱ tanaꞌ ne̱ ni̱ xi̱kuꞌu̱n nda̱ꞌaꞌ te̱ xíinꞌ te̱ ndieeꞌ ni̱a̱ ñu̱u̱ ja̱a̱nꞌ,
te̱ sa̱ndoó ndiká tu̱ a̱ ne̱ xa̱ yoo ku̱vi̱ sa̱a̱ te̱ yivi̱.
21 Sa̱kanꞌ na kuiiꞌ kaꞌa̱n ndo̱so̱ꞌ ne̱ yivi̱ꞌ xaꞌa̱ꞌ Ndiosí ñu̱u̱ Jerusalén,
te̱ ka̱ta̱ tu̱ ni̱a̱ ya̱a̱ nuu̱ꞌ a̱ ñu̱u̱ Jerusalén ja̱a̱nꞌ
22 kii̱ꞌ na̱kaya̱ kuaꞌa̱ꞌ va̱ ne̱ yivi̱ꞌ,
te̱ ki̱xi̱n tu̱ sa̱kuuꞌ ne̱ ndieeꞌ nuu̱ꞌ tu̱ku̱ ñu̱ꞌuꞌ,
te̱ sakaꞌnuꞌ ni̱a̱ Yahvé.
23 Ni̱ ka̱ndoso̱ꞌ ma̱ꞌiꞌ a̱ ña̱ ndi̱e̱eꞌ i̱ kii̱ꞌ kuní kuaꞌa̱ꞌ ku̱i̱xa̱ i̱,
te̱ ni̱ nda̱sa̱ kuiti va̱ a̱ kivi̱ꞌ ñu̱u̱ i̱ ña̱ xikaꞌ i̱ i̱i̱n yivi̱ꞌ.
24 Sa̱kanꞌ te̱ ni̱ kaꞌa̱n i̱ xiinꞌ a̱ ndii:
“Tákuiꞌe Ndiosí,
sa̱a̱ u̱nꞌ ña̱ va̱ꞌa̱ te̱ kä̱ꞌni̱ꞌ u̱nꞌ yuꞌu̱ vi̱ti̱n kii̱ꞌ i̱i̱n te̱ sa̱va̱ va̱ nduuꞌ i̱,
sa̱kanꞌ ña̱ yoꞌó ndii,
köo̱ꞌ kivi̱ꞌ ndiꞌiꞌ kivi̱ꞌ ñu̱u̱ u̱nꞌ.
25 Yoꞌó nduuꞌ ña̱ ni̱ xa̱ꞌa̱ ñu̱ꞌuꞌ i̱i̱n yivi̱ꞌ nde̱e̱ ña̱ nu̱uꞌ,
te̱ su̱vi̱ tu̱ u̱nꞌ ni̱ xa̱ꞌa̱ ndi̱viꞌ xiinꞌ nda̱ꞌaꞌ u̱nꞌ.
26 Te̱ sa̱kuuꞌ ña̱ ja̱a̱nꞌ ndii,
ndo̱ñuꞌuꞌ a̱,
ndisu̱ yoꞌó ndii,
yoo u̱nꞌ nde̱e̱ ndiꞌiꞌ ni̱ kivi̱ꞌ.
Ndi̱viꞌ xiinꞌ ñu̱ꞌuꞌ i̱i̱n yivi̱ꞌ ndii,
ku̱ya̱taꞌ a̱ nde̱e̱ naa xaaꞌ toto̱ niꞌnuꞌ ne̱ yivi̱ꞌ kii̱ꞌ kuyataꞌ a̱,
te̱ na̱ma̱ u̱nꞌ u̱n nde̱e̱ naa xaaꞌ ne̱ yivi̱ꞌ kii̱ꞌ namaꞌ ni̱a̱ toto̱ ni̱a̱.
27 Ndisu̱ yoꞌó ndii,
su̱vi̱ nduuꞌ u̱nꞌ nde̱e̱ a̱ma̱ ka̱ ni̱ kivi̱ꞌ,
te̱ köo̱ꞌ kivi̱ꞌ ndiꞌiꞌ kuiya̱ ña̱ yoo u̱nꞌ.
28 Te̱ siꞌe̱ nduꞌu̱,
ne̱ xikaꞌ nuuꞌ nuu̱ꞌ u̱nꞌ ndii,
köo̱ꞌ ña̱ i̱yo̱ ku̱ndo̱ꞌo̱ ni̱a̱,
te̱ si̱a̱niꞌ xikaꞌ ndu̱ ndii,
sa̱ñuꞌuꞌ ña̱ꞌaꞌ u̱nꞌ xiinꞌ ña̱ va̱ꞌa̱ xaꞌa̱ꞌ a̱ ña̱ ya̱ti̱n xikaꞌ ni̱a̱ nuu̱ꞌ u̱nꞌ”,
ni̱ katyi̱ i̱ xiinꞌ a̱.