Yoꞌoꞌ taxiꞌ David kuento ra̱ nuu̱ꞌ Ndiosí ña̱ sä̱a̱ ra̱ ña̱ ni̱a̱ꞌa
Ya̱a̱ ña̱ ni̱ xi̱ta̱ David nuu̱ꞌ Ndiosí.
101
Xaꞌa̱ꞌ ña̱ kuvita i̱ni̱ u̱nꞌ xiinꞌ xaꞌa̱ꞌ ña̱ sanaꞌmá nda̱ku ku̱i̱ti̱ꞌ u̱nꞌ ka̱ta̱ i̱,
Tákuiꞌe Yahvé,
nuu̱ꞌ yoꞌó ku̱i̱ti̱ꞌ ka̱ta̱ yuꞌu̱ ya̱a̱.
2 Ku̱nda̱ni̱ kaxiꞌ i̱ sa̱a̱ ka̱ka̱ i̱ te̱ ku̱ndu̱u̱ i̱ te̱ ndo̱o̱ nimá nuu̱ꞌ u̱nꞌ
kii̱ꞌ ki̱xi̱ u̱nꞌ te̱ tyi̱ndi̱e̱eꞌ u̱nꞌ yuꞌu̱.
Te̱ nde̱e̱ vi̱ꞌe̱ miiꞌ nduꞌu̱ꞌ i̱ xaꞌndia tyuunꞌ i̱ sa̱a̱ kuní Ndiosí ndii,
ku̱ndu̱u̱ i̱ te̱ i̱i̱n nda̱a̱ꞌ nimá.
3 Te̱ kö̱to̱ i̱ miiꞌ yoo ndiaa ka̱ ña̱ ki̱ni̱ uun ña̱ kuäsa̱ꞌ kuní,
ndasiꞌ i̱ ne̱ xätyuunꞌ nda̱ku,
te̱ kï̱ꞌi̱n taꞌanꞌ i̱ xiinꞌ nde̱e̱ i̱i̱n ne̱ ja̱a̱nꞌ.
4 Sa̱xi̱o̱o̱ i̱ sa̱kuuꞌ ne̱ xaaꞌ ña̱ ni̱a̱ꞌa nuu̱ꞌ i̱ miiꞌ nduꞌu̱ i̱ xaꞌndia tyuunꞌ i̱,
te̱ sä̱a̱ i̱ nde̱e̱ i̱i̱n ña̱ ni̱a̱ꞌa ña̱ kuní ne̱ ja̱a̱nꞌ sa̱a̱ i̱.
5 Ne̱ yivi̱ꞌ,
ne̱ tiinꞌ ku̱a̱tyi̱ nianí ne̱ ndieeꞌ ya̱ti̱n vi̱ꞌe̱ ni̱a̱ ndii,
ka̱ꞌni̱ꞌ ña̱ꞌaꞌ i̱,
te̱ kï̱ꞌi̱n taꞌanꞌ tu̱ i̱ xiinꞌ ne̱ kaniꞌiꞌ xiinꞌ miiꞌ,
xiinꞌ ne̱ ñuñuꞌ,
te̱ ta̱xiꞌ tu̱ ña̱ꞌaꞌ i̱ vi̱ꞌe̱ i̱ miiꞌ nduꞌu̱ꞌ i̱ xaꞌndia tyuunꞌ i̱.
6 Süu̱ꞌ ja̱a̱nꞌ ndii,
ndu̱kuꞌ i̱ ne̱ yivi̱ꞌ,
ne̱ xatyuunꞌ nda̱ku ku̱ndi̱a̱ka̱ taꞌanꞌ xiinꞌ i̱,
te̱ ne̱ xatyuunꞌ nda̱ku ja̱a̱nꞌ ku̱i̱ti̱ꞌ ka̱ka̱ nu̱u̱ nuu̱ꞌ i̱ te̱ ku̱vi̱ ka̱ꞌndi̱a̱ tyuunꞌ va̱ꞌa̱ i̱.
7 Tä̱xi̱ xa̱tyiꞌ i̱ ku̱ndi̱e̱e̱ ne̱ vixi̱ ti̱xi̱n vi̱ꞌe̱ i̱ miiꞌ nduꞌu̱ꞌ i̱ xaꞌndia tyuunꞌ i̱,
te̱ köo̱ꞌ kivi̱ꞌ ta̱xi̱ tu̱ i̱ ku̱ya̱ti̱n ne̱ kaꞌán tu̱n vixi̱ miiꞌ nduꞌu̱ꞌ i̱.
8 Te̱ i̱ꞌi̱n kivi̱ꞌ kuaꞌa̱n ka̱ꞌni̱ꞌ i̱ sa̱kuuꞌ ne̱ xaaꞌ ña̱ ni̱a̱ꞌa nuu̱ꞌ ñu̱ꞌuꞌ i̱i̱n yivi̱ꞌ,
sa̱kanꞌ te̱ sa̱ndiꞌiꞌ i̱ sa̱kuuꞌ ne̱ xaaꞌ ña̱ ni̱a̱ꞌa,
ne̱ ndieeꞌ ñu̱u̱,
ña̱ nduuꞌ kuenta mi̱iꞌ Yahvé.