Yoꞌoꞌ kaꞌán a̱ ña̱ kuní a̱ ta̱xi̱ sa̱kuuꞌ e̱ꞌ ña̱ tyi̱nda̱ni Ndiosí
Ña̱ yo̱ꞌo̱ꞌ nduuꞌ ya̱a̱ ña̱ xitaꞌ ne̱ yivi̱ꞌ nuu̱ꞌ Ndiosí xaꞌa̱ꞌ a̱ ña̱ taxiꞌ ni̱a̱ ña̱ tyi̱nda̱ni a̱.
100
Na va̱ꞌa̱ kuni sa̱kuuꞌ yooꞌ,
ne̱ yivi̱ꞌ,
ne̱ ndieeꞌ nuu̱ꞌ ñu̱ꞌuꞌ i̱i̱n yivi̱ꞌ,
te̱ ka̱ta̱ e̱ꞌ ya̱a̱ nuu̱ꞌ Ndiosí.
2 Na va̱ꞌa̱ tu̱ kuni e̱ꞌ te̱ ka̱ka̱ nu̱u̱ e̱ꞌ nuu̱ꞌ Yahvé,
te̱ na sii̱ꞌ kuni nimá sa̱kuuꞌ e̱ꞌ te̱ ki̱xi̱n e̱ꞌ nuu̱ꞌ a̱.
3 Na na̱ku̱ni̱ e̱ꞌ ña̱ Yahvé nduuꞌ Ndiosí,
te̱ ña̱ ja̱a̱nꞌ nduuꞌ ña̱ ni̱ xa̱ꞌa̱ yooꞌ,
te̱ süu̱ꞌ ni̱ xa̱ꞌa̱ taꞌanꞌ mi̱iꞌ e̱ꞌ,
sa̱kanꞌ na kuiiꞌ kuenta mi̱iꞌ a̱ nduuꞌ e̱ꞌ,
te̱ nduuꞌ tu̱ e̱ꞌ nde̱e̱ naa mbe̱e̱ sana̱ a̱,
tiꞌ ñuꞌuꞌ xaxi̱ꞌ kuꞌu̱ nuu̱ꞌ ñu̱ꞌuꞌ a̱.
4 Na ndiꞌvi̱ e̱ꞌ yiꞌeꞌ a̱ taxiꞌ e̱ꞌ ña̱ tyi̱nda̱ni a̱,
te̱ na ndiꞌvi̱ e̱ꞌ nuu̱ꞌ ki̱ꞌe̱ a̱ xitaꞌ e̱ꞌ ya̱a̱ xakaꞌnuꞌ ña̱ꞌaꞌ e̱ꞌ.
Na ta̱xi̱ e̱ꞌ ña̱ tyi̱nda̱ni a̱ xakaꞌnuꞌ ña̱ꞌaꞌ e̱ꞌ.
5 Sa̱kanꞌ ña̱ ña̱ va̱ꞌa̱ va̱ nduuꞌ Yahvé xini a̱ yooꞌ,
te̱ köo̱ꞌ kivi̱ꞌ ndiꞌiꞌ ña̱ ndani̱ a̱ yooꞌ,
te̱ nde̱e̱ ndiꞌiꞌ ni̱ kivi̱ꞌ nakaá ña̱ xatyuunꞌ nda̱ku a̱ xaꞌa̱ꞌ i̱ꞌi̱n ti̱ꞌvi̱ ne̱ tuvi̱ kuaꞌa̱n.