Xatyuunꞌ nda̱ku va̱ Yahvé Ndiosí xaꞌa̱ꞌ ne̱ vi̱ꞌe̱ Israel
99
Yahvé nduuꞌ rey,
te̱ te̱i̱n kuaꞌa̱ꞌ ángele iinꞌ tei̱ kaꞌnuꞌ miiꞌ nduꞌu̱ꞌ a̱ xaꞌndia tyuunꞌ a̱.
Na ki̱si̱ vi̱ꞌ a̱ ne̱ tukuꞌ ña̱ yiꞌvi ni̱a̱,
te̱ na ki̱si̱ tu̱ a̱ nde̱e̱ i̱i̱n ka̱niiꞌ ñu̱ꞌuꞌ i̱i̱n yivi̱ꞌ.
2 Kaꞌnuꞌ va̱ ña̱ nduuꞌ Yahvé ñu̱u̱ Jerusalén,
te̱ nduuꞌ a̱ ña̱ xaꞌndia tyuunꞌ nuu̱ꞌ sa̱kuuꞌ ne̱ yivi̱ꞌ i̱i̱n yivi̱ꞌ.
3 Te̱ na sa̱kaꞌnuꞌ sa̱kuuꞌ ne̱ ja̱a̱nꞌ nuu̱ꞌ yoꞌó,
Ndiosí,
ña̱ kaꞌnuꞌ va̱,
te̱ i̱yo̱ xa̱va̱ꞌa̱ kaaꞌ u̱nꞌ,
te̱ ña̱ su̱ꞌu̱n va̱ tu̱ nduuꞌ u̱nꞌ.
4 Yoꞌó nduuꞌ Rey ña̱ kooꞌ tyukuuꞌ xa̱va̱ꞌa̱,
te̱ xtani̱ u̱nꞌ ña̱ xatyuunꞌ nda̱ku,
te̱ mi̱iꞌ u̱nꞌ ni̱ tyi̱ka̱nduꞌu̱ꞌ ña̱ i̱i̱n ni̱ nda̱ꞌaꞌ ku̱u̱ xiinꞌ taꞌanꞌ ne̱ yivi̱ꞌ,
te̱ ni̱ xa̱tyuunꞌ nda̱ku u̱nꞌ i̱i̱n ka̱niiꞌ nuu̱ꞌ ñu̱ꞌuꞌ ne̱ vi̱ꞌe̱ Israel,
te̱ ni̱ xa̱a̱ tu̱ u̱nꞌ xiinꞌ ni̱a̱ sa̱a̱ niiꞌ kaꞌán nde̱iꞌ.
5 Ki̱ꞌi̱n kaꞌnuꞌ ndo̱ꞌ Yahvé Ndiosí ña̱ xakaꞌnuꞌ e̱ꞌ,
te̱ na̱ku̱ndiee̱ ndi̱e̱e̱ ndo̱ꞌ nde̱e̱ nuu̱ꞌ ñu̱ꞌuꞌ nuu̱ꞌ a̱ xaꞌa̱ꞌ a̱ miiꞌ iinꞌ a̱ ña̱ kiꞌinꞌ kaꞌnuꞌ ña̱ꞌaꞌ ndo̱ꞌ,
sa̱kanꞌ ña̱ ña̱ su̱ꞌu̱n va̱ nduuꞌ a̱.
6 Moisés xiinꞌ Aarón ndii,
ni̱ nduu̱ tu̱ te̱ ja̱a̱nꞌ sutu̱ nuu̱ꞌ Ndiosí,
te̱ xikuiꞌní xaꞌa̱ꞌ ne̱ ñu̱u̱ ra̱,
te̱ Samuel ni̱ nduu̱ i̱i̱n te̱ kaꞌán si̱u̱ꞌunꞌ nuu̱ꞌ Ndiosí xaꞌa̱ꞌ ne̱ yivi̱ꞌ,
te̱ kii̱ꞌ ni̱ kaꞌa̱n te̱ ja̱a̱nꞌ xiinꞌ a̱ xaꞌa̱ꞌ ne̱ yivi̱ꞌ ja̱a̱nꞌ ndii,
ni̱ sa̱xinú a̱ ña̱ kaꞌán ra̱ xiinꞌ a̱.
7 Te̱i̱n viko̱ꞌ ni̱ kaꞌa̱n a̱ xiinꞌ ne̱ nduuꞌ kuenta a̱,
te̱ ni̱ sa̱xinú ne̱ ja̱a̱nꞌ tu̱ꞌu̱n nde̱iꞌ a̱,
te̱ ni̱ sa̱xinú tu̱ ni̱a̱ ña̱ ni̱ kaꞌa̱n tyuunꞌ a̱,
ña̱ ni̱ ta̱xi̱ a̱ nda̱ꞌaꞌ ni̱a̱.
8 Tákuiꞌe Yahvé,
Ndiosí,
ña̱ xakaꞌnuꞌ ndu̱,
ni̱ sa̱xinú yoꞌó ña̱ ni̱ xika̱n ne̱ ja̱a̱nꞌ nuu̱ꞌ u̱nꞌ,
te̱ ni̱ nduu̱ tu̱ u̱nꞌ Ndiosí nuu̱ꞌ ni̱a̱ ña̱ yoo kaꞌnuꞌ i̱ni̱ xaꞌa̱ꞌ ku̱a̱tyi̱ ni̱a̱,
ndisu̱ ni̱ sa̱ndoꞌoꞌ ña̱ꞌaꞌ u̱nꞌ kii̱ꞌ ni̱ ku̱xi̱o̱o̱ ni̱a̱ nuu̱ꞌ u̱nꞌ.
9 Ki̱ꞌi̱n kaꞌnuꞌ ndo̱ꞌ Yahvé Ndiosí ña̱ xakaꞌnuꞌ e̱ꞌ,
te̱ ko̱to̱ kaꞌnuꞌ ndo̱ꞌ a̱ i̱kuꞌ su̱ꞌu̱n ña̱ nduuꞌ kuenta a̱,
ña̱ iinꞌ ñu̱u̱ Jerusalén,
sa̱kanꞌ ña̱ ña̱ su̱ꞌu̱n va̱ nduuꞌ Yahvé Ndiosí ña̱ xakaꞌnuꞌ e̱ꞌ.