Yoꞌoꞌ kaꞌán a̱ ña̱ kuní a̱ sa̱kaꞌnuꞌ e̱ꞌ Ndiosí xaꞌa̱ꞌ a̱ ña̱ xatyuunꞌ nda̱ku a̱
Ya̱a̱ Ndiosí.
98
Ka̱ta̱ ndo̱ꞌ i̱i̱n ya̱a̱ xa̱aꞌ nuu̱ꞌ Tákuiꞌe Yahvé,
sa̱kanꞌ ña̱ ni̱ xa̱a̱ a̱ kiꞌinꞌ ña̱ nandani̱ nuu̱ꞌ e̱ꞌ.
Te̱ xiinꞌ nda̱ꞌaꞌ ku̱a̱ꞌa̱ a̱ ni̱ sa̱kakú a̱ yooꞌ,
sa̱kanꞌ ña̱ xiinꞌ ña̱ ndi̱e̱eꞌ a̱ ja̱a̱nꞌ ni̱ sa̱kakú a̱ yooꞌ xiinꞌ nda̱ꞌaꞌ a̱ ña̱ nduuꞌ ña̱ su̱ꞌu̱n.
2 Ni̱ niaꞌa̱ tuviꞌ Yahvé ña̱ xa̱ ni̱ ka̱nandoo a̱,
te̱ ni̱ niaꞌa̱ a̱ nuu̱ꞌ sa̱kuuꞌ ne̱ tukuꞌ ña̱ ña̱ xatyuunꞌ nda̱ku nduuꞌ a̱.
3 Ni̱ na̱ka̱ꞌanꞌ Ndiosí ña̱ kuvita i̱ni̱ a̱ xiinꞌ ña̱ xatyuunꞌ nda̱ku a̱ xaꞌa̱ꞌ yooꞌ,
ne̱ vi̱ꞌe̱ Israel.
Te̱ nde̱e̱ ne̱ yivi̱ꞌ,
ne̱ ndieeꞌ xikaꞌ va̱ i̱i̱n yivi̱ꞌ,
ni̱ xi̱ni̱ ña̱ ni̱ ke̱ta̱ va̱ꞌa̱ Ndiosí,
ña̱ xakaꞌnuꞌ e̱ꞌ,
kii̱ꞌ ni̱ sa̱kakú a̱ yooꞌ.
4 Va̱ꞌa̱ va̱ kuni sa̱kuuꞌ ndoꞌó,
ne̱ yivi̱ꞌ i̱i̱n yivi̱ꞌ,
te̱ ka̱ta̱ ndo̱ꞌ ya̱a̱ nuu̱ꞌ Ndiosí,
tiꞌeꞌ xa̱va̱ꞌa̱ ka̱ta̱ ndo̱ꞌ,
te̱ va̱ꞌa̱ tu̱ kuni ndo̱ꞌ kii̱ꞌ xitaꞌ ndo̱ꞌ nuu̱ꞌ Ndiosí.
5 Ka̱ta̱ ndo̱ꞌ ya̱a̱ nuu̱ꞌ Yahvé xiinꞌ ñuu̱ꞌ ña̱ naniꞌ arpa,
sa̱ndaaꞌ ndo̱ꞌ ñuu̱ꞌ ña̱ naniꞌ arpa ja̱a̱nꞌ,
te̱ ka̱ta̱ ndo̱ꞌ ya̱a̱ nda̱tu̱nꞌ va̱ kuaꞌa̱n nuu̱ꞌ a̱.
6 Va̱ꞌa̱ va̱ kuni sa̱kuuꞌ ndoꞌó,
ne̱ yivi̱ꞌ i̱i̱n yivi̱ꞌ,
te̱ ka̱ta̱ ndo̱ꞌ ya̱a̱ nuu̱ꞌ Yahvé ña̱ nduuꞌ rey nuu̱ꞌ e̱ꞌ,
te̱ ti̱vi̱ tu̱ ndo̱ꞌ nuu̱ꞌ a̱ nda̱tyuunꞌ tunꞌ niꞌiꞌ i̱tyiꞌ xiinꞌ tu̱n yoo̱ꞌ.
7 Te̱ na sa̱kaꞌnuꞌ ña̱ꞌaꞌ mi̱ni̱ kaꞌnuꞌ xiinꞌ sa̱kuuꞌ ña̱ ñuꞌuꞌ ti̱xi̱n a̱,
te̱ na sa̱kaꞌnuꞌ tu̱ ña̱ꞌaꞌ ñu̱ꞌuꞌ i̱i̱n yivi̱ꞌ xiinꞌ sa̱kuuꞌ ña̱ yoo nuu̱ꞌ a̱.
8 Te̱ na sa̱kaꞌnuꞌ tu̱ i̱ti̱a̱ nuu̱ꞌ Ndiosí katu̱ꞌ nda̱ꞌaꞌ a̱ ña̱ va̱ꞌa̱ kuni a̱,
te̱ na ndu̱i̱i̱n tu̱ sa̱kuuꞌ i̱kuꞌ xiinꞌ a̱,
te̱ ka̱ta̱ a̱ ya̱a̱ nuu̱ꞌ Ndiosí.
9 Ka̱ta̱ sa̱kuuꞌ ndo̱ꞌ nuu̱ꞌ Tákuiꞌe Yahvé,
sa̱kanꞌ ña̱ xa̱ ku̱a̱xi̱ a̱ te̱ sa̱naꞌmá ne̱ yivi̱ꞌ i̱i̱n yivi̱ꞌ.
Te̱ ña̱ ja̱a̱nꞌ ndii,
ka̱ꞌndi̱a̱ tyuunꞌ nda̱ku a̱ nuu̱ꞌ ne̱ yivi̱ꞌ i̱i̱n yivi̱ꞌ.
Te̱ i̱i̱n ni̱ nda̱ꞌaꞌ sa̱naꞌmá tu̱ a̱ ne̱ tukuꞌ.