Yoꞌoꞌ kaꞌán a̱ ña̱ Ndiosí nduuꞌ ña̱ xaꞌndia tyuunꞌ
97
Tákuiꞌe Yahvé nduuꞌ ña̱ xaꞌndia tyuunꞌ.
Na na̱ku̱a̱tiaꞌ ndoꞌó,
ne̱ ndieeꞌ nuu̱ꞌ ñu̱ꞌuꞌ i̱i̱n yivi̱ꞌ,
te̱ na na̱ku̱a̱tiaꞌ tu̱ ndoꞌó,
ne̱ ndieeꞌ nuu̱ꞌ sa̱kuuꞌ ñu̱ꞌuꞌ ña̱ ñuꞌuꞌ yu̱ꞌuꞌ mi̱ni̱ kaꞌnuꞌ miiꞌ xikaꞌ va̱.
2 Viko̱ꞌ ndiaaꞌ vi̱ꞌ yoo sa̱a̱ xinundu̱u̱ xi̱i̱nꞌ tei̱ kaꞌnuꞌ miiꞌ nduꞌu̱ꞌ a̱ xaꞌndia tyuunꞌ a̱,
te̱ ña̱ nda̱ku xiinꞌ ña̱ xaꞌndia tyuunꞌ nda̱ku tiinꞌ ndiaa tei̱ kaꞌnuꞌ miiꞌ nduꞌu̱ꞌ a̱ xaꞌndia tyuunꞌ a̱.
3 Ñuꞌu̱ ndatin niꞌiꞌ i̱tyiꞌ nuu̱ꞌ a̱ kuaꞌa̱n a̱,
te̱ xaꞌmiꞌ a̱ sa̱kuuꞌ te̱ ndasiꞌ taꞌanꞌ xiinꞌ a̱,
te̱ itaꞌ sa̱a̱ xinundu̱u̱ xi̱i̱nꞌ a̱.
4 Sanayeꞌé a̱ kuaꞌa̱ꞌ ñuꞌu̱ savi̱ꞌ nuu̱ꞌ ñu̱ꞌuꞌ i̱i̱n yivi̱ꞌ,
te̱ kii̱ꞌ xini ñu̱ꞌuꞌ i̱i̱n yivi̱ꞌ ñuꞌu̱ savi̱ꞌ ja̱a̱nꞌ ndii,
kisiꞌ vi̱ꞌ ña̱ꞌaꞌ a̱ ña̱ yiꞌvi xa̱va̱ꞌa̱ a̱.
5 Te̱ sa̱kuuꞌ i̱kuꞌ ndutiaꞌ nde̱e̱ naa ñuma̱ꞌ kii̱ꞌ xini a̱ ku̱a̱xi̱ yoꞌó,
Tákuiꞌe Yahvé,
xaꞌa̱ꞌ a̱ ña̱ yiꞌvi a̱ yoꞌó,
Tákuiꞌe Ndiosí,
ña̱ xiinꞌ ña̱ꞌa̱ i̱i̱n ka̱niiꞌ ñu̱ꞌuꞌ i̱i̱n yivi̱ꞌ.
6 Ndi̱viꞌ kaꞌán ña̱ xatyuunꞌ nda̱ku Ndiosí,
te̱ sa̱kuuꞌ ne̱ tukuꞌ xini ña̱ kaꞌnuꞌ a̱.
7 Te̱ ne̱ xakaꞌnuꞌ ndiosí ña̱ kuäsa̱ꞌ kuní xa̱tyiꞌ ndii,
na ku̱ka̱ꞌa̱n va̱ nuu̱ꞌ ni̱a̱,
ne̱ kaꞌán ñuñuꞌ xaꞌa̱ꞌ ndiosí ña̱ kuäsa̱ꞌ kuní xakaꞌnuꞌ ni̱a̱ ja̱a̱nꞌ.
Sa̱kanꞌ ña̱ sa̱kuuꞌ ña̱ kaꞌán ne̱ yivi̱ꞌ nduuꞌ ndiosí ni̱a̱ ja̱a̱nꞌ ndii,
ku̱i̱ta̱ xitiꞌ a̱ nuu̱ꞌ Ndiosí.
8 Tákuiꞌe Yahvé,
kii̱ꞌ ni̱ xi̱ni̱ so̱ꞌo̱ sa̱kuuꞌ ne̱ ndieeꞌ ñu̱u̱ Jerusalén ña̱ xatyuunꞌ nda̱ku u̱nꞌ ndii,
va̱ꞌa̱ va̱ kuni ni̱a̱,
te̱ va̱ꞌa̱ tu̱ kuni sa̱kuuꞌ ne̱ ndieeꞌ nuu̱ꞌ ñu̱ꞌuꞌ Judá xaꞌa̱ꞌ a̱ ña̱ xatyuunꞌ nda̱ku u̱nꞌ.
9 Sa̱kanꞌ ña̱ ña̱ kaꞌnuꞌ ka̱ nduuꞌ yoꞌó,
Tákuiꞌe Yahvé,
i̱i̱n ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ,
te̱ ña̱ kooꞌ tyukuuꞌ yaꞌa̱ ka̱ nduuꞌ yoꞌó te̱ sa̱kanꞌ sa̱kuuꞌ ndiosí ña̱ kuäsa̱ꞌ kuní xa̱tyiꞌ yoo i̱i̱n yivi̱ꞌ.
10 Ndoꞌó,
ne̱ ndani̱ Yahvé,
ku̱nda̱siꞌ ndo̱ꞌ ña̱ ni̱a̱ꞌa,
sa̱kanꞌ ña̱ xitoꞌ Yahvé ja̱a̱nꞌ ne̱ nduuꞌ kuenta a̱,
te̱ sakakú tu̱ ña̱ꞌaꞌ a̱ nda̱ꞌaꞌ te̱ xaaꞌ ña̱ ni̱a̱ꞌa.
11 Te̱ ñuꞌu̱ Ndiosí yiꞌé nuu̱ꞌ sa̱kuuꞌ ne̱ xatyuunꞌ nda̱ku,
te̱ taxiꞌ a̱ ña̱ sii̱ꞌ kuni ne̱ nda̱ku nimá nuu̱ꞌ a̱.
12 Na na̱ku̱a̱tiaꞌ sa̱kuuꞌ ne̱ xatyuunꞌ nda̱ku ku̱ni̱ ni̱a̱ Tákuiꞌe Yahvé,
te̱ na sa̱kaꞌnuꞌ ña̱ꞌaꞌ sa̱kuuꞌ ni̱a̱,
ku̱a̱tyi̱ ndii,
ña̱ su̱ꞌu̱n va̱ nduuꞌ a̱.