Na ka̱ta̱ e̱ꞌ ya̱a̱ nuu̱ꞌ Ndiosí ña̱ kiꞌinꞌ kaꞌnuꞌ ña̱ꞌaꞌ e̱ꞌ
96
Ka̱ta̱ ndo̱ꞌ i̱i̱n ya̱a̱ xa̱aꞌ nuu̱ꞌ Tákuiꞌe Yahvé,
ka̱ta̱ sa̱kuuꞌ ndoꞌó,
ne̱ ndieeꞌ nuu̱ꞌ ñu̱ꞌuꞌ i̱i̱n yivi̱ꞌ,
ya̱a̱ nuu̱ꞌ Tákuiꞌe Yahvé.
2 Ka̱ta̱ ndo̱ꞌ nuu̱ꞌ Tákuiꞌe Yahvé,
te̱ ki̱ꞌi̱n kaꞌnuꞌ ña̱ꞌaꞌ ndo̱ꞌ,
te̱ i̱ꞌi̱n kivi̱ꞌ kuaꞌa̱n kaꞌa̱n ndo̱so̱ꞌ ndo̱ꞌ tu̱ꞌu̱n va̱ꞌa̱ xaꞌa̱ꞌ a̱,
ña̱ ña̱ ja̱a̱nꞌ nduuꞌ ña̱ sakakú yooꞌ.
3 Kaꞌa̱n ndo̱so̱ꞌ ndo̱ꞌ nuu̱ꞌ ne̱ tukuꞌ ña̱ kaꞌnuꞌ a̱,
te̱ nda̱tuꞌunꞌ ndo̱ꞌ nuu̱ꞌ sa̱kuuꞌ ne̱ yivi̱ꞌ xaꞌa̱ꞌ sa̱kuuꞌ ña̱ nandani̱ ña̱ xaaꞌ a̱.
4 Sa̱kanꞌ ña̱ kaꞌnuꞌ va̱ ña̱ nduuꞌ Yahvé,
te̱ xataꞌa̱n ña̱ sa̱kaꞌnuꞌ xa̱va̱ꞌa̱ ña̱ꞌaꞌ e̱ꞌ,
te̱ i̱i̱n nda̱a̱ꞌ ña̱ ja̱a̱nꞌ ku̱i̱ti̱ꞌ nduuꞌ ña̱ kuní a̱ ku̱yi̱ꞌvi ka̱ e̱ꞌ te̱ sa̱kanꞌ sa̱kuuꞌ i̱nga̱ ña̱ kaꞌán ne̱ yivi̱ꞌ nduuꞌ ndiosí.
5 Ku̱a̱tyi̱ ndii,
sa̱kuuꞌ ña̱ kaꞌán ne̱ tukuꞌ nduuꞌ ndiosí ni̱a̱ ndii,
ña̱ kuäsa̱ꞌ kuní xa̱tyiꞌ nduuꞌ a̱.
Ndisu̱ mi̱iꞌ Yahvé ni̱ xa̱ꞌa̱ ndi̱viꞌ.
6 Ña̱ kiꞌinꞌ kaꞌnuꞌ xiinꞌ ña̱ yiꞌé yoo miiꞌ nduꞌu̱ꞌ a̱,
te̱ ña̱ ndi̱e̱eꞌ xiinꞌ ña̱ nda̱tu̱nꞌ yooꞌ ti̱xi̱n yu̱kunꞌ miiꞌ nduꞌu̱ꞌ a̱.
7 Sa̱kuuꞌ ndoꞌó,
ne̱ tukuꞌ,
ne̱ ndieeꞌ sa̱kuuꞌ ñu̱u̱ ña̱ yoo nuu̱ꞌ ñu̱ꞌuꞌ i̱i̱n yivi̱ꞌ ndii,
sa̱kaꞌnuꞌ ndo̱ꞌ Yahvé,
te̱ na̱ku̱ni̱ ndo̱ꞌ ña̱ i̱i̱n nda̱a̱ꞌ Yahvé nduuꞌ ña̱ kaꞌnuꞌ va̱,
te̱ su̱vi̱ tu̱ a̱ nduuꞌ ña̱ ndi̱e̱eꞌ xa̱va̱ꞌa̱.
8 Te̱ ta̱xi̱ ndo̱ꞌ nda̱ꞌaꞌ Tákuiꞌe Yahvé sa̱kuuꞌ ña̱ kaꞌnuꞌ ña̱ xataꞌa̱n na̱ti̱i̱n a̱,
ko̱ni̱ꞌi̱ ndo̱ꞌ tu̱mani̱ꞌ te̱ kuꞌu̱n ndo̱ꞌ nuu̱ꞌ a̱ nuu̱ꞌ ki̱ꞌe̱ yu̱kunꞌ a̱.
9 Sa̱kaꞌnuꞌ ndo̱ꞌ Yahvé xaꞌa̱ꞌ a̱ ña̱ ña̱ su̱ꞌu̱n ndi̱ꞌi̱ nduuꞌ a̱,
te̱ nda̱tu̱nꞌ tu̱ a̱,
te̱ na ko̱to̱ kaꞌnuꞌ ña̱ꞌaꞌ sa̱kuuꞌ ne̱ yivi̱ꞌ i̱i̱n yivi̱ꞌ nde̱e̱ ki̱si̱ vi̱ꞌ ña̱ꞌaꞌ a̱.
10 Kaꞌa̱n ndo̱so̱ꞌ ndo̱ꞌ nuu̱ꞌ sa̱kuuꞌ ne̱ tukuꞌ ña̱ Yahvé nduuꞌ ña̱ xaꞌndia tyuunꞌ,
te̱ su̱vi̱ tu̱ a̱ ni̱ xa̱a̱ sa̱kanꞌ te̱ kanduꞌu̱ꞌ kutu̱ꞌ ñu̱ꞌuꞌ i̱i̱n yivi̱ꞌ,
te̱ köo̱ꞌ kivi̱ꞌ ku̱nu̱ndiaꞌa̱ ña̱ ja̱a̱nꞌ miiꞌ ni̱ tyi̱nduꞌu̱ꞌ ña̱ꞌaꞌ a̱.
Te̱ i̱i̱n ni̱ nda̱ꞌaꞌ sa̱naꞌmá a̱ sa̱kuuꞌ nuu̱ꞌ ne̱ yivi̱ꞌ i̱i̱n yivi̱ꞌ.
11 Na na̱ku̱a̱tiaꞌ sa̱kuuꞌ ña̱ ndieeꞌ ndi̱viꞌ,
te̱ na sii̱ꞌ tu̱ ku̱ni̱ sa̱kuuꞌ ne̱ ndieeꞌ nuu̱ꞌ ñu̱ꞌuꞌ i̱i̱n yivi̱ꞌ,
te̱ na sa̱kaꞌnuꞌ tu̱ ña̱ꞌaꞌ mi̱ni̱ kaꞌnuꞌ xiinꞌ sa̱kuuꞌ ña̱ ñuꞌuꞌ ti̱xi̱n a̱.
12 Na na̱ku̱a̱tiaꞌ tu̱ ñu̱ꞌuꞌ xaꞌa̱ꞌ kuꞌu̱ xiinꞌ sa̱kuuꞌ ña̱ yoo nuu̱ꞌ a̱,
te̱ na ka̱ta̱ sii̱ꞌ sa̱kuuꞌ tunꞌ itaꞌ xaꞌa̱ꞌ kuꞌu̱ xi̱xa̱ nuu̱ꞌ Ndiosí.
13 Ka̱ta̱ ndo̱ꞌ nuu̱ꞌ Tákuiꞌe Yahvé,
sa̱kanꞌ ña̱ xa̱ ku̱a̱xi̱ a̱,
ku̱a̱xi̱ a̱ te̱ sa̱naꞌmá a̱ ne̱ yivi̱ꞌ i̱i̱n yivi̱ꞌ.
Sa̱naꞌmá nda̱ku a̱ ne̱ yivi̱ꞌ i̱i̱n yivi̱ꞌ,
te̱ ne̱ tukuꞌ ndii,
sa̱naꞌmá ña̱ꞌaꞌ a̱ sa̱a̱ niiꞌ kaꞌán ña̱ ndi̱xa̱ xaꞌa̱ꞌ a̱.