Yoꞌoꞌ kaꞌán a̱ ña̱ na va̱ꞌa̱ kuni e̱ꞌ te̱ sa̱kaꞌnuꞌ e̱ꞌ Ndiosí
95
Ni̱a̱ꞌa̱ ndo̱ꞌ,
te̱ va̱ꞌa̱ kuni e̱ꞌ ka̱ta̱ sii̱ꞌ e̱ꞌ ya̱a̱ nuu̱ꞌ Yahvé,
na ku̱a̱tiaꞌ i̱ni̱ e̱ꞌ te̱ sa̱kaꞌnuꞌ e̱ꞌ Ndiosí ña̱ nduuꞌ nde̱e̱ naa vi̱ꞌe̱ yuu̱ꞌ miiꞌ ku̱vi̱ kaku̱ e̱ꞌ.
2 Na ki̱xi̱n e̱ꞌ nuu̱ꞌ a̱ xiinꞌ ña̱ taxiꞌ e̱ꞌ ña̱ tyi̱nda̱ni a̱,
na ka̱ta̱ e̱ꞌ ya̱a̱ nuu̱ꞌ a̱ xaꞌa̱ꞌ a̱ ña̱ kiꞌinꞌ kaꞌnuꞌ ña̱ꞌaꞌ e̱ꞌ.
3 Sa̱kanꞌ ña̱ Yahvé ndii,
Ndiosí kaꞌnuꞌ xa̱va̱ꞌa̱ ka̱ nduuꞌ a̱,
te̱ i̱i̱n rey kaꞌnuꞌ xa̱va̱ꞌa̱ ka̱ nduuꞌ a̱ te̱ sa̱kanꞌ sa̱kuuꞌ i̱nga̱ ña̱ kaꞌán ne̱ yivi̱ꞌ nduuꞌ ndiosí.
4 Sa̱kanꞌ ña̱ kuenta Ndiosí nduuꞌ ñu̱ꞌuꞌ i̱i̱n yivi̱ꞌ nde̱e̱ miiꞌ kunu yaꞌa̱ ka̱,
te̱ kuenta tu̱ a̱ nduuꞌ nde̱e̱ miiꞌ sukun xa̱va̱ꞌa̱ xíniꞌ sa̱kuuꞌ i̱kuꞌ.
5 Te̱ kuenta tu̱ a̱ nduuꞌ mi̱ni̱ kaꞌnuꞌ,
sa̱kanꞌ ña̱ su̱vi̱ a̱ ni̱ xa̱ꞌa̱ ña̱ꞌaꞌ,
te̱ xiinꞌ nda̱ꞌaꞌ a̱ ni̱ xa̱ꞌa̱ a̱ ñu̱ꞌuꞌ i̱i̱n yivi̱ꞌ.
6 Ni̱a̱ꞌa̱ ndo̱ꞌ,
te̱ sa̱kaꞌnuꞌ e̱ꞌ Yahvé,
te̱ na̱ku̱ndiee̱ ndi̱e̱e̱ e̱ꞌ nde̱e̱ nuu̱ꞌ ñu̱ꞌuꞌ nuu̱ꞌ a̱,
te̱ ku̱i̱ta̱ xitiꞌ tu̱ e̱ꞌ nuu̱ꞌ a̱,
sa̱kanꞌ ña̱ su̱vi̱ a̱ nduuꞌ ña̱ ni̱ xa̱ꞌa̱ yooꞌ.
7 Ku̱a̱tyi̱ ndi̱i,
ña̱ ja̱a̱nꞌ nduuꞌ Ndiosí ña̱ xakaꞌnuꞌ e̱ꞌ,
te̱ ña̱ ja̱a̱nꞌ tu̱ nduuꞌ ña̱ xitoꞌ yooꞌ,
sa̱kanꞌ ña̱ yooꞌ nduuꞌ nde̱e̱ naa mbe̱e̱,
tiꞌ xitoꞌ a̱.
Naaꞌ sa̱kanꞌ te̱ ta̱xi̱ so̱ꞌo̱ ndo̱ꞌ ña̱ kaꞌán Ndiosí xiinꞌ ndo̱ꞌ vi̱ti̱n ndii,
8 sä̱xi̱i̱ ndo̱ꞌ nimá ndo̱ꞌ nuu̱ꞌ a̱ naa ni̱ xa̱a̱ ne̱ xii̱ꞌ ya̱taꞌ e̱ꞌ xta̱ꞌanꞌ kii̱ꞌ ni̱ xkaꞌndi̱a̱ ni̱a̱ miiꞌ naniꞌ Meribá,
sa̱a̱ niiꞌ ni̱ xa̱a̱ tu̱ ne̱ ja̱a̱nꞌ kii̱ꞌ ni̱ xkaꞌndi̱a̱ ni̱a̱ miiꞌ i̱tyi kaaꞌ miiꞌ naniꞌ Masah.
9 Sa̱kanꞌ na kuiiꞌ ni̱ kaꞌa̱n Ndiosí ndii:
“Ni̱ xi̱to̱ ku̱a̱ꞌa̱ ne̱ xii̱ꞌ ya̱taꞌ ndo̱ꞌ yuꞌu̱,
tee̱ꞌ ndee ni̱ xi̱ni̱ ni̱a̱ sa̱kuuꞌ tyu̱u̱n kaꞌnuꞌ ña̱ ni̱ niaꞌa̱ i̱ nuu̱ꞌ ni̱a̱.
10 Te̱ niiꞌ uvi̱ xi̱ko̱ kuiya̱ ni̱ xiꞌe̱ i̱ ni̱ xi̱ni̱ ña̱ꞌaꞌ i̱,
te̱ ni̱ kaꞌa̱n i̱ xiinꞌ ni̱a̱ ndii:
‘Nde̱e̱ naa ne̱ xikaꞌ ndo̱so̱ꞌ i̱i̱n yivi̱ꞌ tiaa̱n tiaa̱n nduuꞌ nimá ndo̱ꞌ,
te̱ küni sa̱xinú ndo̱ꞌ ña̱ kaꞌán tyuunꞌ i̱ xiinꞌ ndo̱ꞌ’.
11 Sa̱kanꞌ na kuiiꞌ ni̱ na̱saa̱ꞌ i̱,
te̱ ni̱ ta̱xi̱ tu̱ i̱ kuento i̱ nuu̱ꞌ ni̱a̱ kaꞌán i̱ xiinꞌ ni̱a̱ ndii:
‘Köo̱ꞌ kivi̱ꞌ ko̱ꞌni̱ ndo̱ꞌ miiꞌ na̱ndiee̱ꞌ ndo̱ꞌ xiinꞌ i̱’,
ni̱ katyi̱ i̱.”