Yoꞌoꞌ kaꞌán a̱ xaꞌa̱ꞌ ña̱ va̱ꞌa̱ yoo a̱ ña̱ sa̱kaꞌnuꞌ e̱ꞌ Ndiosí xaꞌa̱ꞌ ña̱ ndani̱ a̱ yooꞌ
Ya̱a̱ ña̱ xitaꞌ e̱ꞌ kivi̱ꞌ ña̱ xínandiee̱ꞌ e̱ꞌ.
92
Va̱ꞌa̱ yoo a̱ ña̱ sa̱kaꞌnuꞌ ndu̱ yoꞌó,
Tákuiꞌe Yahvé,
te̱ ka̱ta̱ ndu̱ ya̱a̱ nuu̱ꞌ yoꞌó,
Tákuiꞌe,
ña̱ nduꞌu̱ ndi̱viꞌ.
2 Te̱ va̱ꞌa̱ tu̱ yoo a̱ ña̱ kaꞌa̱n ndo̱so̱ꞌ ndu̱ ni̱a̱ꞌa̱ xaꞌa̱ꞌ ña̱ vi̱ta i̱ni̱ u̱nꞌ,
te̱ ñu̱u kaꞌa̱n ndo̱so̱ꞌ ndu̱ xaꞌa̱ꞌ ña̱ saxinú u̱nꞌ sa̱kuuꞌ ña̱ kaꞌán u̱nꞌ.
3 Te̱ ka̱ta̱ ndu̱ ya̱a̱ nuu̱ꞌ u̱nꞌ xiinꞌ ñuu̱ꞌ ña̱ naniꞌ arpa,
ña̱ taꞌnuꞌ uxi̱ taꞌanꞌ tu̱tyi̱ nuu̱ꞌ,
te̱ sa̱ndaaꞌ tu̱ ndu̱ nuu̱ꞌ u̱nꞌ xiinꞌ ñuu̱ꞌ ña̱ naniꞌ lira.
4 Tákuiꞌe Yahvé,
va̱ꞌa̱ va̱ kuni i̱ xaaꞌ u̱nꞌ xaꞌa̱ꞌ sa̱kuuꞌ ña̱ va̱ꞌa̱ ña̱ xaaꞌ u̱nꞌ xaꞌa̱ꞌ i̱,
te̱ va̱ꞌa̱ xa̱va̱ꞌa̱ tu̱ kuni i̱ xitaꞌ i̱ ya̱a̱ nuu̱ꞌ u̱nꞌ xaꞌa̱ꞌ sa̱kuuꞌ ña̱ xaaꞌ u̱nꞌ.
5 Tákuiꞌe Yahvé,
kaꞌnuꞌ va̱ ña̱ nandani̱ ña̱ xaaꞌ yoꞌó,
te̱ köo̱ꞌ nde̱e̱ i̱i̱n ne̱ yivi̱ꞌ,
ne̱ xiní ña̱ xanini yoꞌó.
6 Ne̱ xänini kaxiꞌ ndii,
köo̱ꞌ a̱ xiní xa̱tyiꞌ ni̱a̱ xaꞌa̱ꞌ ña̱ ja̱a̱nꞌ,
te̱ ne̱ na̱a̱ kuuꞌ ndii,
kü̱nda̱ni̱ ni̱a̱ ña̱ ja̱a̱nꞌ.
7 Tee̱ꞌ ndee nda̱tu̱nꞌ va̱ nataꞌvíꞌ ne̱ xaaꞌ ña̱ ni̱a̱ꞌa nde̱e̱ naa i̱ti̱a̱,
te̱ va̱ꞌa̱ va̱ ku̱a̱xi̱ ku̱a̱ꞌnu̱ sa̱kuuꞌ ne̱ xaaꞌ ku̱a̱tyi̱ nde̱e̱ naa xaaꞌ i̱ta̱ ndii,
ne̱ nduxi̱n ku̱i̱ti̱ꞌ ku̱ndu̱u̱ sa̱kuuꞌ ni̱a̱ sa̱a̱ yoꞌó,
Ndiosí,
nde̱e̱ ndiꞌiꞌ ni̱ kivi̱ꞌ.
8 Ndisu̱ yoꞌó,
Tákuiꞌe Yahvé ndii,
nde̱e̱ ndiꞌiꞌ ni̱ kivi̱ꞌ xataꞌa̱n xakaꞌnuꞌ ne̱ yivi̱ꞌ yoꞌó.
9 Tákuiꞌe Yahvé,
ne̱ ndasiꞌ taꞌanꞌ xiinꞌ u̱nꞌ ndii,
ña̱ ndi̱xa̱ xna̱ꞌa̱ nduuꞌ a̱ ña̱ ne̱ ndo̱ñuꞌuꞌ ku̱i̱ti̱ꞌ ku̱ndu̱u̱ sa̱kuuꞌ ni̱a̱,
te̱ kiku̱ ndo̱o̱ ne̱ xaaꞌ ña̱ ni̱a̱ꞌa sa̱a̱ u̱nꞌ.
10 Ndisu̱ yuꞌu̱ ndii,
yoꞌó ni̱ ta̱xi̱ kuaꞌa̱ꞌ ka̱ ndi̱e̱e̱ꞌ i̱,
te̱ ni̱ na̱ku̱naa̱ ndi̱e̱eꞌ i̱ nde̱e̱ naa toro i̱kuꞌ,
te̱ ni̱ xa̱ki̱n tu̱ u̱nꞌ xa̱ꞌa̱n xavixínꞌ ña̱ xa̱aꞌ xíniꞌ i̱.
11 Ni̱ xi̱ni̱ i̱ kii̱ꞌ ni̱ ka̱nandoo u̱nꞌ te̱ ndasiꞌ taꞌanꞌ xiinꞌ i̱,
te̱ ni̱ xi̱ni̱ so̱ꞌo̱ tu̱ i̱ kii̱ꞌ ni̱ ka̱nandoo u̱nꞌ te̱ ndasiꞌ taꞌanꞌ xiinꞌ i̱,
te̱ xaaꞌ ña̱ ni̱a̱ꞌa ja̱a̱nꞌ.
12 Ne̱ xatyuunꞌ nda̱ku ndii,
va̱ꞌa̱ va̱ ku̱a̱ꞌnu̱ ni̱a̱ nde̱e̱ naa va̱ꞌa̱ xaꞌnuꞌ tunꞌ koko,
te̱ ko̱o̱ kuaꞌa̱ꞌ tu̱ ndi̱e̱e̱ꞌ ni̱a̱ nde̱e̱ naa xaaꞌ i̱tunꞌ cedro,
tunꞌ itaꞌ xiki̱ꞌ Líbano.
13 Te̱ ni̱ na̱tyi̱ꞌi̱ ne̱ yivi̱ꞌ nu̱ꞌ ti̱xi̱n vi̱ꞌe̱ Yahvé,
te̱ xa̱a̱ i̱ta̱ nu̱ꞌ nuu̱ꞌ ki̱ꞌe̱ Ndiosí ña̱ xakaꞌnuꞌ e̱ꞌ.
14 Tee̱ꞌ ndee ku̱i̱xa̱ va̱ nu̱ꞌ ndii,
ku̱u̱n naa ku̱u̱n nduu̱ꞌ ta̱ta̱ nda̱ꞌaꞌ nu̱ꞌ,
nde̱e̱ naa xaaꞌ tunꞌ ta̱ta̱ tiakiꞌ,
te̱ ko̱o̱ naa ko̱o̱ tu̱ yuku̱ nu̱ꞌ.
15 Te̱ xiinꞌ ña̱ ja̱a̱nꞌ ku̱ni̱ ne̱ yivi̱ꞌ ña̱ Yahvé nduuꞌ nde̱e̱ naa yuu̱ꞌ ña̱ taxiꞌ ndi̱e̱e̱ꞌ i̱,
te̱ ña̱ xatyuunꞌ nda̱ku nduuꞌ a̱,
te̱ köo̱ꞌ tu̱ ña̱ ni̱a̱ꞌa xaaꞌ a̱.