Yoꞌoꞌ kaꞌán a̱ ña̱ xitoꞌ Ndiosí ne̱ ndukuꞌ ña̱ tyi̱ndi̱e̱eꞌ ña̱ꞌaꞌ a̱
91
Yo̱o̱ ka̱ nduꞌu̱ꞌ si̱ꞌe nda̱ꞌaꞌ Ndiosí ña̱ nduꞌu̱ꞌ ndi̱viꞌ ndii,
ko̱to̱ ña̱ꞌaꞌ Ndiosí,
ña̱ sa̱kuuꞌ a̱ ku̱vi̱,
te̱ na̱ndiee̱ꞌ ni̱a̱ ka̱tiꞌ a̱ xi̱i̱nꞌ a̱.
2 Kaꞌa̱n yuꞌu̱ xiinꞌ Yahvé ndii:
“Yoꞌó nduuꞌ ña̱ ndiatuꞌ i̱ni̱ i̱ tyi̱ndi̱e̱eꞌ yuꞌu̱,
te̱ yoꞌó tu̱ nduuꞌ nde̱e̱ naa vi̱ꞌe̱ sukun miiꞌ ku̱vi̱ ti̱si̱ꞌe i̱ te̱ köo̱ꞌ a̱ ku̱ndo̱ꞌo̱ i̱,
te̱ yoꞌó tu̱ nduuꞌ Ndiosí ña̱ i̱ni̱ i̱ xini i̱”,
katyi i̱ xiinꞌ a̱.
3 Ña̱ ja̱a̱nꞌ ndii,
sa̱kakú a̱ sa̱kuuꞌ yooꞌ nuu̱ꞌ sa̱kuuꞌ tunꞌ ii̱ꞌ,
tunꞌ xataꞌ te̱ kuni ka̱ꞌni̱ꞌ yooꞌ,
te̱ sa̱kakú tu̱ a̱ yooꞌ nuu̱ꞌ kuiꞌe̱ xatu̱ ña̱ xaꞌni̱ꞌ ne̱ yivi̱ꞌ.
4 Te̱ ti̱xi̱n nda̱ꞌaꞌ a̱ ko̱to̱ a̱ yooꞌ,
te̱ ti̱xi̱n nda̱ꞌaꞌ a̱ ja̱a̱nꞌ ndii,
köo̱ꞌ xa̱tyiꞌ a̱ ku̱ndo̱ꞌo̱ e̱ꞌ nde̱e̱ naa xaaꞌ i̱i̱n ndu̱xiꞌ tiata̱nꞌ xitoꞌ riꞌ siꞌe̱ riꞌ ti̱xi̱n ndi̱xi̱n riꞌ.
Te̱ kuento ndi̱xa̱ ña̱ ni̱ ta̱xi̱ a̱ nuu̱ꞌ e̱ꞌ nduuꞌ nde̱e̱ naa ña̱ tiasi nuu̱ꞌ e̱ꞌ nuu̱ꞌ ña̱ kueinꞌ,
te̱ su̱vi̱ tu̱ a̱ xitoꞌ yooꞌ nuu̱ꞌ te̱ ndasiꞌ taꞌanꞌ xiinꞌ e̱ꞌ.
5 Kü̱yi̱ꞌvi e̱ꞌ ña̱ i̱yo̱ ña̱ yoo ñu̱u,
ni̱ nde̱e̱ kü̱yi̱ꞌvi tu̱ e̱ꞌ kuxi̱,
tunꞌ xatia te̱ yivi̱ꞌ i̱i̱n keꞌinꞌ.
6 Ni̱ nde̱e̱ kü̱yi̱ꞌvi tu̱ e̱ꞌ kuiꞌe̱ ña̱ xikaꞌ ñu̱u,
ni̱ nde̱e̱ kü̱yi̱ꞌvi tu̱ e̱ꞌ kuiꞌe̱ ni̱a̱ꞌa va̱,
ña̱ i̱i̱n xaꞌni̱ꞌ ku̱i̱ti̱ꞌ ne̱ yivi̱ꞌ i̱i̱n keꞌinꞌ.
7 Ku̱vi̱ ka̱ꞌni̱ꞌ ña̱ ja̱a̱nꞌ i̱i̱n mií ne̱ yivi̱ꞌ,
ne̱ itaꞌ i̱i̱n taꞌviꞌ xi̱i̱nꞌ u̱nꞌ,
te̱ ka̱ꞌni̱ꞌ tu̱ a̱ uxi̱ mií ne̱ itaꞌ tu̱ku̱ taꞌviꞌ xiinꞌ ku̱a̱ꞌa̱ u̱nꞌ,
ndisu̱ yoꞌó ndii,
köo̱ꞌ xa̱tyiꞌ a̱ sa̱a̱ nde̱e̱ i̱i̱n kuiꞌe̱ ja̱a̱nꞌ xiinꞌ u̱nꞌ.
8 Ko̱to̱ ku̱i̱ti̱ꞌ u̱nꞌ ña̱ xaaꞌ Ndiosí,
te̱ ku̱ni̱ u̱nꞌ sa̱a̱ sa̱ndoꞌoꞌ a̱ ne̱ xaaꞌ ña̱ ni̱a̱ꞌa.
9 Te̱ na Tákuiꞌe Yahvé nduuꞌ ña̱ xitoꞌ yoꞌó,
te̱ Ndiosí nduꞌu̱ꞌ ndi̱viꞌ ja̱a̱nꞌ nduuꞌ nde̱e̱ naa vi̱ꞌe̱ yuu̱ꞌ miiꞌ nduꞌu̱ꞌ u̱nꞌ ndii,
10 nde̱e̱ i̱i̱n ña̱ ni̱a̱ꞌa kü̱ndo̱ꞌo̱ u̱nꞌ,
te̱ nde̱e̱ i̱i̱n tu̱ kuiꞌe̱ kü̱ya̱ti̱n vi̱ꞌe̱ miiꞌ nduꞌu̱ꞌ u̱nꞌ.
11 Sa̱kanꞌ ña̱ kaꞌa̱n tyuunꞌ Ndiosí xiinꞌ ángele ña̱ xikaꞌ nuuꞌ nuu̱ꞌ a̱,
te̱ ko̱to̱ a̱ yoꞌó miiꞌ ka̱ kuaꞌa̱n u̱nꞌ.
12 Te̱ ti̱i̱n tu̱ ña̱ ja̱a̱nꞌ nda̱ꞌaꞌ u̱nꞌ kii̱ꞌ kuaꞌa̱n u̱nꞌ i̱tyiꞌ,
te̱ kä̱kiꞌi̱ xaꞌa̱ꞌ u̱nꞌ xiinꞌ nde̱e̱ i̱i̱n yuu̱ꞌ.
13 Kueꞌni̱ u̱nꞌ lion,
te̱ kueꞌni̱ u̱nꞌ koo̱ꞌ xatu̱,
te̱ tu̱xiꞌ u̱nꞌ xíniꞌ u̱nꞌ lion kuañuꞌu̱,
tiꞌ kuiꞌe̱ xa̱va̱ꞌa̱,
te̱ tu̱xiꞌ tu̱ u̱nꞌ xíniꞌ ko̱tyiꞌ.
14 Sa̱kanꞌ ña̱ kaꞌán Ndiosí ndii:
“Xaꞌa̱ꞌ a̱ ña̱ yuꞌu̱ ndani̱ ra̱ ndii,
sa̱kakú tu̱ ña̱ꞌaꞌ yuꞌu̱,
te̱ ko̱to̱ tu̱ ña̱ꞌaꞌ i̱ nuu̱ꞌ sa̱kuuꞌ ña̱ i̱yo̱ ja̱a̱nꞌ,
sa̱kanꞌ ña̱ i̱ni̱ ra̱ xini ra̱ yuꞌu̱.
15 Kii̱ꞌ kaꞌa̱n ra̱ xiinꞌ i̱ ndii,
na̱ku̱i̱i̱n i̱ ña̱ kaꞌán ra̱,
te̱ tyi̱ndi̱e̱eꞌ tu̱ ña̱ꞌaꞌ i̱ kii̱ꞌ ko̱o̱ tu̱ndoꞌo̱ꞌ nuu̱ꞌ ra̱.
Sa̱kakú ña̱ꞌaꞌ i̱ te̱ ki̱ꞌi̱n kaꞌnuꞌ tu̱ ña̱ꞌaꞌ i̱.
16 Te̱ ta̱xi̱ i̱ kuaꞌa̱ꞌ kivi̱ꞌ ñu̱u̱ ra̱ te̱ ka̱ka̱ ra̱ i̱i̱n yivi̱ꞌ,
te̱ va̱ꞌa̱ ku̱ni̱ ra̱ sa̱a̱ i̱ xaꞌa̱ꞌ a̱ ña̱ ni̱ sa̱kakú ña̱ꞌaꞌ i̱”,
katyi a̱.