Yoꞌoꞌ kaꞌán a̱ xaꞌa̱ꞌ ña̱ nde̱e̱ ndiꞌiꞌ ni̱ kivi̱ꞌ yoo Ndiosí, te̱ ii̱ꞌ va̱ yoo yooꞌ ne̱ yivi̱ꞌ
Ya̱a̱ ña̱ ni̱ xi̱ta̱ Moisés, te̱ ni̱ xika̱ nu̱u̱ nuu̱ꞌ Ndiosí.
90
Tákuiꞌe,
yoꞌó nduuꞌ miiꞌ kakú sa̱kuuꞌ ti̱ꞌvi̱ ndu̱ ne̱ tuví kuaꞌa̱n nde̱e̱ xta̱ꞌanꞌ kivi̱ꞌ,
te̱ nde̱e̱ nuu̱ꞌ kuꞌu̱n e̱ꞌ.
2 Nde̱e̱ kii̱ꞌ kuní ka̱ ku̱a̱ꞌnu̱ sa̱kuuꞌ i̱kuꞌ,
te̱ nde̱e̱ kii̱ꞌ kuní ka̱ tu̱ ko̱o̱ ñu̱ꞌuꞌ i̱i̱n yivi̱ꞌ xiinꞌ nde̱e̱ kii̱ꞌ kuní ka̱ tu̱ ka̱nduꞌu̱ꞌ ka̱niiꞌ i̱i̱n yivi̱ꞌ,
nde̱e̱ xta̱ꞌanꞌ kii̱ꞌ ni̱ xi̱ka̱nduꞌu̱ꞌ i̱i̱n yivi̱ꞌ,
te̱ nde̱e̱ kii̱ꞌ kuꞌu̱n ndi̱koꞌ a̱ ndii,
yoꞌó nduuꞌ Ndiosí.
3 Yoꞌó xaaꞌ sa̱kanꞌ te̱ xiꞌí ne̱ yivi̱ꞌ kii̱ꞌ kaꞌán u̱nꞌ xiinꞌ ni̱a̱ ndii:
“Ku̱vi̱ kiꞌi̱ꞌ ndoꞌó siꞌe̱ Adán,
te̱ na̱ndu̱u̱ tu̱ku̱u̱ ndo̱ꞌ ñu̱ꞌuꞌ nde̱e̱ naa ña̱ ni̱ nduu̱ ndo̱ꞌ ña̱ nu̱uꞌ”,
katyi̱ u̱nꞌ.
4 Sa̱kanꞌ ña̱ i̱i̱n mií kuiya̱ nuu̱ꞌ yoꞌó ndii,
nduuꞌ a̱ nde̱e̱ naa i̱i̱n nda̱a̱ꞌ kivi̱ꞌ ña̱ xa̱ ni̱ xkaꞌndi̱a̱ i̱ku̱ ku̱i̱ti̱ꞌ,
te̱ nduuꞌ tu̱ a̱ nde̱e̱ naa kii̱ꞌ nditoꞌ ne̱ yivi̱ꞌ i̱i̱n nda̱a̱ꞌ ñu̱u ku̱i̱ti̱ꞌ.
5 Ne̱ yivi̱ꞌ i̱i̱n yivi̱ꞌ ndii,
nduuꞌ ni̱a̱ nde̱e̱ naa xa̱ni̱ ku̱i̱ti̱ꞌ nuu̱ꞌ yoꞌó,
i̱i̱n xaꞌni̱ꞌ ku̱i̱ti̱ꞌ u̱nꞌ kuaꞌa̱ꞌ xa̱va̱ꞌa̱ ni̱a̱ nde̱e̱ naa xaaꞌ te̱ñuꞌu̱ꞌ kii̱ꞌ kuunꞌ kuiꞌe̱ savi̱ꞌ.
Te̱ nduuꞌ tu̱ ni̱a̱ nde̱e̱ naa kuꞌu̱ ña̱ nakún ni̱a̱ꞌa̱ ku̱a̱xi̱ kitúꞌ.
6 Ni̱a̱ꞌa̱ ndii,
nuníáꞌ yuku̱ nda̱ꞌaꞌ a̱,
te̱ xaaꞌ i̱ta̱ a̱,
te̱ xa̱kuaa̱ꞌ ndii,
xii a̱ te̱ ityí a̱.
7 Te̱ nde̱e̱ naa sa̱kanꞌ tu̱ saityí ña̱ xiꞌé u̱nꞌ ja̱a̱nꞌ nduꞌu̱,
te̱ kii̱ꞌ nasaáꞌ u̱nꞌ ndii,
yiꞌvi xa̱va̱ꞌa̱ ndu̱.
8 Ni̱ ta̱ndi̱e̱e̱ tuviꞌ u̱nꞌ sa̱kuuꞌ ku̱a̱tyi̱ ndu̱ nuu̱ꞌ u̱nꞌ,
te̱ ni̱ ta̱ndi̱e̱e̱ tuviꞌ tu̱ u̱nꞌ sa̱kuuꞌ ña̱ ni̱a̱ꞌa ña̱ xaaꞌ si̱ꞌe ndu̱,
te̱ ku̱vi̱ xini u̱nꞌ sa̱kuuꞌ a̱.
9 Sa̱kanꞌ na kuiiꞌ sa̱kuuꞌ kivi̱ꞌ ñu̱u̱ ndu̱ ndii,
ña̱ xiꞌé u̱nꞌ xaaꞌ sa̱kanꞌ,
te̱ yatyi̱ va̱ ndiꞌiꞌ a̱,
te̱ kuiya̱ ña̱ xikaꞌ ndu̱ i̱i̱n yivi̱ꞌ ndii,
nduuꞌ a̱ nde̱e̱ naa ña̱ naꞌiꞌ tatyi̱ꞌ ne̱ yivi̱ꞌ untaꞌ ku̱i̱ti̱ꞌ nuu̱ꞌ yoꞌó.
10 Te̱ kivi̱ꞌ ña̱ xikaꞌ ndu̱ i̱i̱n yivi̱ꞌ xaaꞌ u̱nꞌ ndii,
uni̱ xi̱ko̱ uxi̱ kuiya̱ ku̱i̱ti̱ꞌ nduuꞌ a̱,
te̱ sa̱va̱ ndu̱ ndii,
nde̱e̱ ku̱miꞌ xi̱ko̱ kuiya̱ xikaꞌ ndu̱ i̱i̱n yivi̱ꞌ xaaꞌ u̱nꞌ.
Tee̱ꞌ ndee kuaꞌa̱ꞌ va̱ kuiya̱ tiaku ndu̱ te̱ kaꞌni̱ va̱ ña̱ ndi̱e̱eꞌ ndu̱ ndii,
kuaꞌa̱ꞌ va̱ tu̱ndoꞌo̱ꞌ yoo nuu̱ꞌ kivi̱ꞌ ñu̱u̱ ndu̱,
te̱ xatyuunꞌ uꞌvi̱ va̱ ndu̱ te̱ tiaku ndu̱.
Te̱ yatyi̱ va̱ xkaꞌndíá kivi̱ꞌ ñu̱u̱ ndu̱ ja̱a̱nꞌ,
te̱ kuaꞌa̱n ndo̱o̱ ndu̱.
11 Nde̱e̱ i̱i̱n ne̱ yivi̱ꞌ xïní ndee ña̱ sa̱a̱ yoꞌó kii̱ꞌ na̱saa̱ꞌ xa̱va̱ꞌa̱ u̱nꞌ.
Te̱ ña̱ xiꞌé u̱nꞌ ndii,
tyiee̱ xa̱va̱ꞌa̱ a̱ nde̱e̱ nakuitá a̱ xiinꞌ ña̱ yiꞌvi ndu̱ yoꞌó.
12 Sa̱a̱ u̱nꞌ ña̱ va̱ꞌa̱ te̱ sa̱niaꞌá u̱nꞌ ndu̱ te̱ ku̱nda̱ni̱ ndu̱ ña̱ i̱i̱n kani̱ꞌ ku̱i̱ti̱ꞌ xikaꞌ ndu̱ i̱i̱n yivi̱ꞌ,
te̱ ku̱a̱ꞌnu̱ ndu̱ i̱i̱n yivi̱ꞌ xiinꞌ ña̱ xini tuní.
13 Tákuiꞌe Yahvé,
¿a̱ma̱ vi̱ꞌ kuꞌu̱n ndi̱koꞌ u̱nꞌ ña̱ na̱ko̱o̱ i̱i̱n nda̱a̱ꞌ u̱nꞌ ndu̱?
Sa̱a̱ u̱nꞌ ña̱ va̱ꞌa̱ te̱ na̱ndi̱koꞌ tukuuꞌ u̱nꞌ ko̱to̱ u̱nꞌ ndu̱.
Sa̱a̱ u̱nꞌ ña̱ va̱ꞌa̱ te̱ ku̱vi̱ta i̱ni̱ u̱nꞌ xaꞌa̱ꞌ nduꞌu̱,
ne̱ xikaꞌ nuuꞌ nuu̱ꞌ u̱nꞌ.
14 Sa̱a̱ u̱nꞌ ña̱ va̱ꞌa̱ te̱ sa̱kutuꞌ u̱nꞌ nimá ndu̱ sa̱a̱ ni̱a̱ꞌa̱ xiinꞌ ña̱ ndani̱ xa̱va̱ꞌa̱ u̱nꞌ ndu̱,
te̱ va̱ꞌa̱ kuni ndu̱ ka̱ta̱ ndu̱ ya̱a̱ nuu̱ꞌ u̱nꞌ sa̱kuuꞌ kivi̱ꞌ ña̱ xikaꞌ ndu̱ i̱i̱n yivi̱ꞌ.
15 Sa̱a̱ niiꞌ kuaꞌa̱ꞌ kivi̱ꞌ ni̱ sa̱ndoꞌoꞌ u̱nꞌ ndu̱ ndii,
sa̱kanꞌ tu̱ taꞌanꞌ kivi̱ꞌ kuní ndu̱ sa̱na̱ndikoꞌ u̱nꞌ ña̱ va̱ꞌa̱ ku̱ni̱ ndu̱,
te̱ sa̱kanꞌ tu̱ sa̱a̱ niiꞌ kuaꞌa̱ꞌ kuiya̱ ni̱ sa̱ndoꞌoꞌ u̱nꞌ ndu̱ ndii,
niiꞌ sa̱kanꞌ tu̱ taꞌanꞌ kuiya̱ kuní ndu̱ ña̱ ta̱xi̱ u̱nꞌ ña̱ va̱ꞌa̱ nda̱ꞌaꞌ ndu̱.
16 Sa̱a̱ u̱nꞌ ña̱ va̱ꞌa̱ te̱ ta̱xi̱ u̱nꞌ ku̱ni̱ tu̱ku̱u̱ ndu̱,
ne̱ xikaꞌ nuuꞌ nuu̱ꞌ,
tyu̱u̱n kaꞌnuꞌ ña̱ xaaꞌ u̱nꞌ,
te̱ ta̱xi̱ tu̱ u̱nꞌ na ku̱ni̱ si̱a̱niꞌ xikaꞌ ndu̱ ña̱ ña̱ kaꞌnuꞌ va̱ nduuꞌ u̱nꞌ.
17 Na va̱ꞌa̱ ku̱ni̱ Tákuiꞌe Yahvé Ndiosí ku̱ni̱ a̱ sa̱kuuꞌ e̱ꞌ,
te̱ na sa̱ñuꞌuꞌ tu̱ a̱ sa̱kuuꞌ tyu̱u̱n ña̱ xaaꞌ e̱ꞌ.
¡U̱u̱n ndo̱ꞌ,
na sa̱ñuꞌuꞌ a̱ sa̱kuuꞌ tyu̱u̱n ña̱ xaaꞌ e̱ꞌ!