Yoꞌoꞌ taxiꞌ Ndiosí kuento a̱ nuu̱ꞌ David
Ya̱a̱ ña̱ ni̱ xi̱ta̱ Etán, te̱ vi̱ꞌe̱ Ezra.
89
Nde̱e̱ ndiꞌiꞌ ni̱ kivi̱ꞌ ka̱ta̱ i̱ xaꞌa̱ꞌ ña̱ kuvita i̱ni̱ Yahvé,
te̱ xiinꞌ yu̱ꞌuꞌ i̱ kaꞌa̱n i̱ xaꞌa̱ꞌ ña̱ xatyuunꞌ nda̱ku u̱nꞌ nde̱e̱ ndiꞌiꞌ ni̱ kivi̱ꞌ xaꞌa̱ꞌ i̱ꞌi̱n ti̱ꞌvi̱ ne̱ yivi̱ꞌ,
ne̱ tuví.
2 Te̱ ña̱ ndani̱ xa̱va̱ꞌa̱ u̱nꞌ nduꞌu̱ ndii,
nde̱e̱ ndiꞌiꞌ ni̱ kivi̱ꞌ ko̱o̱ a̱,
te̱ ña̱ xatyuunꞌ nda̱ku u̱nꞌ ndii,
köo̱ꞌ kivi̱ꞌ ndi̱ꞌi̱ a̱ nde̱e̱ naa köo̱ꞌ kivi̱ꞌ ndiꞌiꞌ ndi̱viꞌ.
3 Ni̱ kaꞌa̱n Ndiosí ndii:
“Ni̱ ndoo̱ i̱ kuento xiinꞌ David,
te̱ ni̱ na̱ka̱xi̱n i̱,
te̱ ni̱ tyi̱ka̱ndi̱a̱ i̱ kuento i̱ nuu̱ꞌ David ja̱a̱nꞌ,
te̱ xikaꞌ nuuꞌ nuu̱ꞌ i̱,
kaꞌán i̱ xiinꞌ ra̱ ndii:
4 ‘Ta̱xi̱ i̱ ña̱ ka̱ꞌndi̱a̱ tyuunꞌ te̱ si̱a̱niꞌ xikaꞌ u̱nꞌ nde̱e̱ ndiꞌiꞌ ni̱ kivi̱ꞌ miiꞌ ni̱ xa̱ꞌndi̱a̱ tyuunꞌ yoꞌó,
te̱ ku̱ndi̱e̱e̱ i̱ꞌi̱n ti̱ꞌvi̱ ne̱ tuví miiꞌ xaꞌndia tyuunꞌ u̱nꞌ ja̱a̱nꞌ te̱ ka̱ꞌndi̱a̱ tyuunꞌ ni̱a̱ nde̱e̱ vi̱ti̱n,
te̱ köo̱ꞌ kivi̱ꞌ kuꞌu̱n ndi̱koꞌ ña̱ ka̱ꞌndi̱a̱ tyuunꞌ ni̱a̱,’
ni̱ katyi̱ i̱.’”
Selah
5 Tákuiꞌe Yahvé,
sa̱kuuꞌ ña̱ ndieeꞌ ndi̱viꞌ sa̱kaꞌnuꞌ yoꞌó xaꞌa̱ꞌ tyu̱u̱n kaꞌnuꞌ ña̱ xaaꞌ u̱nꞌ,
te̱ sa̱kaꞌnuꞌ tu̱ sa̱kuuꞌ ángele su̱ꞌu̱n yoꞌó xaꞌa̱ꞌ a̱ ña̱ xatyuunꞌ nda̱ku u̱nꞌ.
6 Sa̱kanꞌ ña̱ köo̱ꞌ nde̱e̱ i̱i̱n ña̱ ndieeꞌ ndi̱viꞌ nakuitá xiinꞌ Yahvé,
te̱ ni̱ nde̱e̱ ángele,
tee̱ꞌ ndee yoo ña̱ kooꞌ tyukuuꞌ xa̱va̱ꞌa̱ a̱ ndii,
köo̱ꞌ nde̱e̱ i̱i̱n a̱ nakuitá xiinꞌ Yahvé ja̱a̱nꞌ.
7 Sa̱kuuꞌ ángele su̱ꞌu̱n ña̱ kooꞌ tyukuuꞌ miiꞌ nakayá kuaꞌa̱ꞌ a̱ ndii,
kiꞌinꞌ kaꞌnuꞌ a̱ yoꞌó,
te̱ sa̱kuuꞌ ña̱ itaꞌ sa̱a̱ xinundu̱u̱ xi̱i̱nꞌ tei̱ kaꞌnuꞌ miiꞌ nduꞌu̱ꞌ u̱nꞌ ndii,
nandani̱ xa̱va̱ꞌa̱ a̱ xaaꞌ u̱nꞌ xaꞌa̱ꞌ a̱ ña̱ ña̱ tyiee̱ xa̱va̱ꞌa̱ nduuꞌ u̱nꞌ.
8 Tákuiꞌe Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ,
Yahvé,
ña̱ sa̱kuuꞌ a̱ ku̱vi̱,
köo̱ꞌ xa̱tyiꞌ ña̱ nakuitá xiinꞌ yoꞌó,
te̱ ña̱ xatyuunꞌ nda̱ku xa̱tyiꞌ nduuꞌ u̱nꞌ.
9 Yoꞌó kumiꞌ ndi̱e̱e̱ꞌ te̱ xikoꞌ niꞌiꞌ u̱nꞌ ti̱kui,
teꞌ nutaꞌ nuu̱ꞌ mi̱ni̱ kaꞌnuꞌ kii̱ꞌ xiꞌé raꞌ,
sa̱kanꞌ ña̱ kii̱ꞌ nutaꞌ ti̱kui nuu̱ꞌ mi̱ni̱ ja̱a̱nꞌ ndii,
yoꞌó saiin kuiín raꞌ.
10 Yoꞌó ni̱ xa̱ꞌni̱ꞌ Rahab,
tiꞌ nduuꞌ ko̱tyiꞌ,
tiꞌ i̱yo̱ va̱ kaaꞌ naá ti̱xi̱n mi̱ni̱,
te̱ xiinꞌ ña̱ ndi̱e̱eꞌ u̱nꞌ ni̱ ki̱ku̱ꞌ u̱nꞌ sa̱kuuꞌ te̱ ndasiꞌ taꞌanꞌ xiinꞌ u̱nꞌ.
11 Ña̱ꞌa̱ yoꞌó nduuꞌ ka̱niiꞌ ndi̱viꞌ,
te̱ sa̱kanꞌ tu̱ ña̱ꞌa̱ yoꞌó nduuꞌ ka̱niiꞌ ñu̱ꞌuꞌ i̱i̱n yivi̱ꞌ,
yoꞌó ni̱ xa̱ꞌa̱ ñu̱ꞌuꞌ i̱i̱n yivi̱ꞌ xiinꞌ sa̱kuuꞌ ña̱ yoo nuu̱ꞌ a̱.
12 Te̱ yoꞌó tu̱ ni̱ xa̱ꞌa̱ nde̱e̱ xíniꞌ ñu̱ꞌuꞌ i̱i̱n yivi̱ꞌ ni̱nu̱ xiinꞌ nde̱e̱ suꞌma̱ꞌ a̱ ninu̱,
i̱kuꞌ ña̱ naniꞌ Tabor xiinꞌ i̱kuꞌ ña̱ naniꞌ Hermón ndii,
xitaꞌ sii̱ꞌ a̱ ya̱a̱ nuu̱ꞌ u̱nꞌ xaꞌa̱ꞌ a̱ ña̱ kiꞌinꞌ kaꞌnuꞌ a̱ yoꞌó.
13 Yoꞌó ndii,
ña̱ ndi̱e̱eꞌ xa̱va̱ꞌa̱ nduuꞌ u̱nꞌ,
te̱ xiinꞌ nda̱ꞌaꞌ u̱nꞌ xaaꞌ u̱nꞌ kuaꞌa̱ꞌ xa̱va̱ꞌa̱ tyu̱u̱n kaꞌnuꞌ,
te̱ ndoniꞌiꞌ u̱nꞌ nda̱ꞌaꞌ ku̱a̱ꞌa̱ u̱nꞌ kii̱ꞌ kanandoo u̱nꞌ te̱ ndasiꞌ taꞌanꞌ xiinꞌ u̱nꞌ.
14 Yoꞌó ndii,
ña̱ nda̱ku xiinꞌ ña̱ xaꞌndia tyuunꞌ nda̱ku tiinꞌ ndiaa u̱nꞌ,
te̱ xaꞌndia tyuunꞌ u̱nꞌ,
te̱ ña̱ kuvita nimá u̱nꞌ xiinꞌ ña̱ ndi̱xa̱ nduuꞌ ña̱ yoo nuu̱ꞌ u̱nꞌ.
15 Tákuiꞌe Yahvé,
va̱ꞌa̱ va̱ kuni ne̱ yivi̱ꞌ,
ne̱ xiní sakaꞌnuꞌ yoꞌó xiinꞌ ña̱ sii̱ꞌ kuni ni̱a̱,
sa̱kanꞌ ña̱ ñuꞌu̱ taxiꞌ yoꞌó ko̱tuu̱n nuu̱ꞌ ni̱a̱ ka̱ka̱ ni̱a̱.
16 Te̱ ndu̱viꞌ nakuatiaꞌ ni̱a̱ xaꞌa̱ꞌ ña̱ kaꞌán va̱ꞌa̱ ne̱ yivi̱ꞌ xaꞌa̱ꞌ u̱nꞌ,
te̱ nakuatiaꞌ tu̱ ni̱a̱ xaꞌa̱ꞌ ña̱ xatyuunꞌ nda̱ku u̱nꞌ.
17 Te̱ yoꞌó nduuꞌ ña̱ taxiꞌ ndi̱e̱e̱ꞌ ne̱ ja̱a̱nꞌ,
te̱ taxiꞌ tu̱ u̱nꞌ ña̱ kaꞌnuꞌ ni̱a̱,
te̱ xaꞌa̱ꞌ a̱ ña̱ va̱ꞌa̱ kuni u̱nꞌ xini u̱nꞌ ndu̱ ndii,
nda̱sa̱ kuaꞌa̱ꞌ ka̱ u̱nꞌ ndi̱e̱e̱ꞌ ndu̱.
18 Sa̱kanꞌ ña̱ Yahvé nduuꞌ nde̱e̱ naa ka̱a̱ tiꞌeꞌ ña̱ tiasi nuu̱ꞌ e̱ꞌ nuu̱ꞌ ña̱ i̱yo̱,
te̱ Ndiosí su̱ꞌu̱n,
ña̱ xakaꞌnuꞌ yooꞌ,
ne̱ vi̱ꞌe̱ Israel,
nduuꞌ rey ña̱ xaꞌndia tyuunꞌ nuu̱ꞌ e̱ꞌ.
19 Xta̱ꞌanꞌ va̱ ndii,
xiinꞌ i̱i̱n ña̱ satuví ni̱ kaꞌa̱n u̱nꞌ xiinꞌ ne̱ su̱ꞌu̱n xikaꞌ nda̱ku i̱tyiꞌ u̱nꞌ,
kaꞌán u̱nꞌ ndii:
“Xa̱ ni̱ na̱ka̱xi̱n i̱ i̱i̱n te̱ ndi̱e̱ni va̱ te̱i̱n ne̱ ndaꞌvi so̱ꞌo̱,
te̱ ni̱ ka̱ni̱ꞌi̱ ña̱ꞌaꞌ i̱ te̱ ku̱ndu̱u̱ ra̱ rey nuu̱ꞌ ni̱a̱.
20 Ni̱ xaꞌa̱n ku̱ni̱ i̱ yoo i̱i̱n te̱ xikaꞌ nuuꞌ nuu̱ꞌ i̱,
te̱ naniꞌ David,
te̱ ni̱ sa̱ñuꞌuꞌ ña̱ꞌaꞌ i̱ xiinꞌ xa̱ꞌa̱n ñuꞌuꞌ i̱,
te̱ ku̱ndu̱u̱ ra̱ rey nuu̱ꞌ ni̱a̱.
21 Te̱ tyi̱ndi̱e̱eꞌ ña̱ꞌaꞌ i̱ nde̱e̱ ndiꞌiꞌ ni̱ kivi̱ꞌ,
te̱ ta̱xi̱ tu̱ i̱ ndi̱e̱e̱ꞌ ra̱ te̱ ku̱ndu̱u̱ ra̱ i̱i̱n te̱ xi̱xa̱ va̱ i̱ni̱.
22 Te̱ tä̱xi̱ i̱ ka̱nandoo ña̱ꞌaꞌ te̱ ndasiꞌ taꞌanꞌ xiinꞌ ra̱,
ni̱ nde̱e̱ tä̱xi̱ tu̱ i̱ vi̱ko̱niꞌiꞌ ña̱ꞌaꞌ te̱ xaaꞌ ña̱ ni̱a̱ꞌa.
23 Te̱ nuu̱ꞌ niꞌnuꞌ ra̱ iinꞌ ra̱ i̱kanꞌ te̱ ka̱ꞌni̱ꞌ i̱ te̱ ndasiꞌ taꞌanꞌ xiinꞌ ra̱,
te̱ sa̱ndiꞌiꞌ xa̱tyiꞌ i̱ sa̱kuuꞌ te̱ ndasiꞌ taꞌanꞌ xiinꞌ ra̱ ja̱a̱nꞌ.
24 Sa̱kuuꞌ kivi̱ꞌ sa̱tyuunꞌ nda̱ku i̱ xaꞌa̱ꞌ ra̱,
te̱ ku̱ndani̱ tu̱ ña̱ꞌaꞌ i̱,
te̱ xiinꞌ ndi̱e̱e̱ꞌ i̱ ndu̱kuaꞌa̱ꞌ va̱ ña̱ ndi̱e̱eꞌ ra̱.
25 Te̱ ta̱xi̱ i̱ ka̱ꞌndi̱a̱ tyuunꞌ ra̱ nde̱e̱ nuu̱ꞌ mi̱ni̱ kaꞌnuꞌ,
te̱ ka̱ꞌndi̱a̱ tyuunꞌ tu̱ ra̱ nuu̱ꞌ sa̱kuuꞌ i̱ti̱a̱.
26 Te̱ kaꞌa̱n ndaꞌvi te̱ ja̱a̱nꞌ xiinꞌ i̱ ndii:
‘Yoꞌó nduuꞌ yu̱vaꞌ i̱,
te̱ nduuꞌ tu̱ u̱nꞌ Ndiosí ña̱ xakaꞌnuꞌ i̱,
te̱ nduuꞌ tu̱ u̱nꞌ nde̱e̱ naa vi̱ꞌe̱ yuu̱ꞌ miiꞌ ku̱vi̱ ku̱vi̱ kaku̱ i̱’,
katyi̱ ra̱.
27 Nda̱sa̱ ndu̱u̱ ña̱ꞌaꞌ i̱ tiaa̱ nu̱uꞌ siꞌe̱ i̱,
te̱ ku̱ndu̱u̱ ra̱ rey,
te̱ kooꞌ tyukuuꞌ ka̱ nuu̱ꞌ sa̱kuuꞌ i̱nga̱ rey te̱ yoo nuu̱ꞌ ñu̱ꞌuꞌ i̱i̱n yivi̱ꞌ sa̱a̱ i̱.
28 Ku̱ndani̱ ña̱ꞌaꞌ i̱ nde̱e̱ ndiꞌiꞌ ni̱ kivi̱ꞌ,
te̱ ku̱vi̱ta i̱ni̱ i̱ xaꞌa̱ꞌ ra̱,
te̱ köo̱ꞌ kivi̱ꞌ kuꞌu̱n ndi̱koꞌ tu̱ kuento i̱ ña̱ ni̱ ndoo̱ i̱ xiinꞌ ra̱.
29 Te̱ si̱a̱niꞌ xikaꞌ ra̱ ka̱ꞌndi̱a̱ tyuunꞌ nde̱e̱ ndiꞌiꞌ ni̱ kivi̱ꞌ nuu̱ꞌ ne̱ yivi̱ꞌ miiꞌ ka̱ꞌndi̱a̱ tyuunꞌ ra̱,
te̱ köo̱ꞌ kivi̱ꞌ kuꞌu̱n ndi̱ꞌi̱ ña̱ ka̱ꞌndi̱a̱ tyuunꞌ ra̱ nde̱e̱ naa köo̱ꞌ kivi̱ꞌ ndiꞌiꞌ ña̱ kanduꞌu̱ꞌ ndi̱viꞌ.
30 Ndisu̱ naaꞌ na̱ko̱o̱ si̱a̱niꞌ xikaꞌ ra̱ tu̱ꞌu̱n nde̱iꞌ i̱,
te̱ na̱ko̱o̱ tu̱ ni̱a̱ ña̱ kandixaꞌ ni̱a̱ ña̱ kaꞌán tyuunꞌ i̱,
31 uun naaꞌ tä̱xi̱ so̱ꞌo̱ ni̱a̱ ña̱ kaꞌán tuní i̱,
te̱ sä̱xinú tu̱ ni̱a̱ ña̱ kaꞌán tyuunꞌ i̱ ja̱a̱nꞌ ndii,
32 ku̱tunꞌ ña̱ꞌaꞌ i̱ xaꞌa̱ꞌ ña̱ xa̱ so̱ꞌo̱ ni̱a̱ ja̱a̱nꞌ,
te̱ su̱ku̱ꞌ yo̱ꞌoꞌ tu̱ ña̱ꞌaꞌ i̱ xaꞌa̱ꞌ ña̱ ni̱a̱ꞌa ña̱ xaaꞌ ni̱a̱.
33 Ndisu̱ köo̱ꞌ kivi̱ꞌ na̱ko̱o̱ i̱ ña̱ ndani̱ ña̱ꞌaꞌ i̱,
te̱ sa̱xinú tu̱ i̱ sa̱kuuꞌ kuento i̱ ña̱ ni̱ ta̱xi̱ i̱ nuu̱ꞌ ni̱a̱.
34 Köo̱ꞌ kivi̱ꞌ na̱ndoso̱ꞌ i̱ xaꞌa̱ꞌ kuento i̱ ña̱ ni̱ ndoo̱ i̱ xiinꞌ ni̱a̱,
ni̱ nde̱e̱ nä̱ma̱ tu̱ i̱ nde̱e̱ i̱i̱n yu̱ꞌuꞌ ña̱ ni̱ kaꞌa̱n i̱ xiinꞌ ni̱a̱.
35 Ni̱ ta̱xi̱ i̱ kuento i̱ nuu̱ꞌ David untaꞌ ku̱i̱ti̱ꞌ,
te̱ xaꞌa̱ꞌ a̱ ña̱ su̱ꞌu̱n va̱ ña̱ nduuꞌ i̱ ndii,
kü̱vi̱ ku̱ni̱ xaꞌanꞌ ña̱ꞌaꞌ i̱.
36 Sa̱kanꞌ na kuiiꞌ köo̱ꞌ kivi̱ꞌ ndi̱ꞌi̱ ne̱ si̱a̱niꞌ ra̱,
te̱ köo̱ꞌ kivi̱ꞌ kuꞌu̱n ndi̱koꞌ ña̱ ka̱ꞌndi̱a̱ tyuunꞌ ni̱a̱ nde̱e̱ naa xaaꞌ ñu̱ꞌu̱ nduꞌu̱ꞌ a̱ nuu̱ꞌ i̱ ndi̱viꞌ sa̱a̱ kivi̱ꞌ.
37 Te̱ sa̱kanꞌ tu̱ ka̱ꞌndi̱a̱ tyuunꞌ ni̱a̱ nde̱e̱ ndiꞌiꞌ ni̱ kivi̱ꞌ nde̱e̱ naa xaaꞌ yoo̱ꞌ nduꞌu̱ꞌ a̱ ndi̱viꞌ,
te̱ nduuꞌ a̱ nde̱e̱ naa te̱ ndieeꞌ yu̱ꞌuꞌ nda̱ku xaꞌa̱ꞌ ña̱ saxinú xna̱ꞌa̱ Ndiosí kuento a̱ ña̱ ni̱ ta̱xi̱ a̱ nuu̱ꞌ e̱ꞌ.”
Selah
38 Ndisu̱ yoꞌó vi̱ti̱n ndii,
ni̱ sa̱xi̱o̱o̱ u̱nꞌ rey,
te̱ ni̱ na̱ka̱xi̱n u̱nꞌ ja̱a̱nꞌ,
te̱ ni̱ na̱ko̱o̱ ña̱ꞌaꞌ u̱nꞌ xata̱ꞌ u̱nꞌ,
te̱ ni̱ na̱saa̱ꞌ tu̱ u̱nꞌ ni̱ xi̱ni̱ u̱nꞌ ra̱.
39 Ni̱ xaꞌnu̱ tu̱ u̱nꞌ kuento u̱nꞌ ña̱ ni̱ ta̱xi̱ u̱nꞌ nuu̱ꞌ ra̱,
te̱ ni̱ tu̱ꞌu̱n tu̱ u̱nꞌ corona,
tunꞌ nduꞌu̱ꞌ xíniꞌ rey ja̱a̱nꞌ,
nda̱ꞌaꞌ ra̱,
te̱ ni̱ sa̱kanaꞌ u̱nꞌ nu̱ꞌ nde̱e̱ ñu̱ꞌuꞌ.
40 Ni̱ sa̱nduva u̱nꞌ ka̱niiꞌ nama̱ ña̱ ndasi i̱ꞌnu̱ kutu̱ꞌ ñu̱u̱ ra̱ te̱ kü̱vi̱ ko̱ꞌni̱ te̱ ndasiꞌ ña̱ꞌaꞌ,
te̱ ni̱ sa̱nduxín ndo̱o̱ u̱nꞌ vi̱ꞌe̱ sukun ña̱ tiasi ña̱ꞌaꞌ nuu̱ꞌ te̱ ndasiꞌ taꞌanꞌ xiinꞌ ra̱.
41 Te̱ sa̱kuuꞌ ne̱ yivi̱ꞌ,
ne̱ xkaꞌndíá kuaꞌa̱n i̱tyiꞌ,
xakuiꞌnaꞌ ña̱ꞌa̱ ra̱,
te̱ ne̱ ndieeꞌ ya̱ti̱n vi̱ꞌe̱ ra̱ ndii,
xandiꞌiꞌ ku̱i̱ti̱ꞌ ni̱a̱ xiinꞌ ra̱.
42 Te̱ ni̱ ta̱xi̱ u̱nꞌ ndi̱e̱e̱ꞌ te̱ ndasiꞌ taꞌanꞌ xiinꞌ ra̱,
te̱ ni̱ sa̱kuatiaꞌ tu̱ u̱nꞌ nimá sa̱kuuꞌ te̱ ndasiꞌ taꞌanꞌ xiinꞌ ra̱ ja̱a̱nꞌ.
43 Ni̱ sa̱ku̱xitín u̱nꞌ ityi̱ rey,
te̱ ni̱ na̱ka̱xi̱n u̱nꞌ ja̱a̱nꞌ,
te̱ nï̱ xi̱i̱n u̱nꞌ tyi̱ndi̱e̱eꞌ ña̱ꞌaꞌ u̱nꞌ kii̱ꞌ ni̱ xaꞌa̱n ti̱i̱n ra̱ ñuꞌu̱.
44 Ni̱ sa̱ndiꞌiꞌ ndo̱o̱ u̱nꞌ ña̱ kaꞌnuꞌ ra̱ nuu̱ꞌ ne̱ yivi̱ꞌ,
te̱ ni̱ sa̱nduva xa̱tyiꞌ u̱nꞌ tei̱ kaꞌnuꞌ miiꞌ nduꞌu̱ꞌ ra̱ xaꞌndia tyuunꞌ ra̱.
45 Ni̱ sa̱kuixaꞌ kiꞌi̱ꞌ va̱ tu̱ ña̱ꞌaꞌ u̱nꞌ,
te̱ ni̱ sa̱kaꞌanꞌ ña̱ꞌaꞌ u̱nꞌ nuu̱ꞌ tyituꞌ.
Selah
46 Tákuiꞌe Yahvé,
¿ñáá köo̱ꞌ kivi̱ꞌ kuꞌu̱n ndi̱koꞌ u̱nꞌ ña̱ tisi̱ꞌe u̱nꞌ nuu̱ꞌ ndu̱?
¿A̱ma̱ vi̱ꞌ tu̱ kuꞌu̱n ndi̱koꞌ u̱nꞌ ña̱ xiꞌé u̱nꞌ xini u̱nꞌ ndu̱,
te̱ nduuꞌ a̱ nde̱e̱ naa ñuꞌu̱ ndatin?
47 Na̱ka̱ꞌanꞌ u̱nꞌ ña̱ kuiti va̱ kivi̱ꞌ ñu̱u̱ i̱ nuu̱ꞌ ñu̱ꞌuꞌ i̱i̱n yivi̱ꞌ yoꞌoꞌ,
te̱ naaꞌ sa̱kanꞌ nduuꞌ a̱ ndii,
köo̱ꞌ nde̱e̱ i̱i̱n xaꞌa̱ꞌ ni̱ xa̱ꞌa̱ u̱nꞌ nduꞌu̱ ne̱ yivi̱ꞌ i̱i̱n yivi̱ꞌ.
48 Nde̱e̱ i̱i̱n ne̱ yivi̱ꞌ kü̱vi̱ ku̱ti̱a̱ku̱ nde̱e̱ ndiꞌiꞌ ni̱ kivi̱ꞌ,
sa̱kuuꞌ ni̱a̱ ku̱vi̱,
te̱ nde̱e̱ i̱i̱n tu̱ ni̱a̱ kü̱vi̱ kaku̱,
te̱ küꞌu̱n ni̱a̱ yavi̱ ndi̱i̱.
Selah
49 Tákuiꞌe Ndiosí,
¿miiꞌ kuaꞌa̱n ña̱ kuvita i̱ni̱ u̱nꞌ ña̱ köo̱ꞌ kivi̱ꞌ ndiꞌiꞌ?
Ni̱ ta̱xi̱ u̱nꞌ kuento u̱nꞌ nuu̱ꞌ David kii̱ꞌ ni̱ tyi̱ka̱ndi̱a̱ u̱nꞌ ña̱ xatyuunꞌ nda̱ku u̱nꞌ.
50 Na̱ka̱ꞌanꞌ u̱nꞌ ña̱ sa̱kaꞌanꞌ ne̱ yivi̱ꞌ yuꞌu̱,
te̱ xikaꞌ nuuꞌ nuu̱ꞌ u̱nꞌ,
nakaꞌanꞌ i̱ sa̱kuuꞌ ña̱ kaꞌán ki̱ni̱ kuaꞌa̱ꞌ ne̱ yivi̱ꞌ xiinꞌ i̱.
51 Tákuiꞌe Yahvé,
te̱ ndasiꞌ taꞌanꞌ xiinꞌ u̱nꞌ ndii,
xandiꞌiꞌ ra̱ xiinꞌ i̱,
te̱ kani̱a̱ꞌa ra̱ xaꞌa̱ꞌ yuꞌu̱,
te̱ nduuꞌ rey,
te̱ ni̱ na̱ka̱xi̱n u̱nꞌ miiꞌ ka̱ kuaꞌa̱n i̱.
52 Kaꞌnuꞌ va̱ ña̱ nduuꞌ Yahvé nde̱e̱ ndiꞌiꞌ ni̱ kivi̱ꞌ.
Sa̱kanꞌ na ku̱ndu̱u̱ a̱,
sa̱kanꞌ na ku̱ndu̱u̱ a̱.