Yoꞌoꞌ kaꞌán a̱ xaꞌa̱ꞌ ña̱ sa̱ndaꞌa Ndiosí yooꞌ kii̱ꞌ kuni ku̱vi̱ e̱ꞌ
Ya̱a̱ ña̱ ni̱ xi̱ta̱ tiaa̱ si̱a̱niꞌ Coré ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ. Na ka̱ta̱ e̱ꞌ ya̱a̱ kaa̱ꞌ kii̱ꞌ sutyiꞌ i̱ni̱ e̱ꞌ xaꞌa̱ꞌ ña̱ ndoꞌoꞌ e̱ꞌ. Te̱ nduuꞌ Hemán, te̱ ni̱ ki̱e̱e̱ ñu̱u̱ Ezra, ni̱ ke̱ꞌi̱ ya̱a̱ kaa̱ꞌ.
88
Tákuiꞌe Yahvé,
yoꞌó nduuꞌ Ndiosí ña̱ ku̱vi̱ sakakú yuꞌu̱,
ndu̱viꞌ xiinꞌ niiꞌ ñu̱u kaꞌán ndaꞌvi i̱ nuu̱ꞌ u̱nꞌ.
2 Sa̱a̱ u̱nꞌ ña̱ va̱ꞌa̱ te̱ na̱ti̱i̱n u̱nꞌ si̱u̱ꞌunꞌ ña̱ kaꞌán i̱ xiinꞌ u̱nꞌ,
sa̱a̱ u̱nꞌ ña̱ va̱ꞌa̱ te̱ ku̱ni̱ so̱ꞌo̱ u̱nꞌ si̱u̱ꞌunꞌ ña̱ kaꞌán ndaꞌvi i̱ nuu̱ꞌ u̱nꞌ.
3 Sa̱kanꞌ ña̱ yoo kuaꞌa̱ꞌ va̱ tu̱ndoꞌo̱ꞌ nuu̱ꞌ kivi̱ꞌ ñu̱u̱ i̱,
te̱ xa̱ yoo i̱ ku̱vi̱ xa̱tyiꞌ i̱.
4 Xa̱ kuni ku̱vi̱ kuii i̱,
te̱ xa̱ kuyatinꞌ va̱ kuꞌu̱n i̱ yavi̱ ndi̱i̱,
te̱ xa̱ ni̱ na̱ndu̱u̱ i̱ i̱i̱n te̱ yivi̱ꞌ,
te̱ xa̱ ni̱ ndi̱ꞌi̱ xa̱tyiꞌ ndi̱e̱e̱ꞌ.
5 Te̱ ni̱ ndoo̱ kanduꞌu̱ꞌ te̱i̱n ne̱ xa̱ ni̱ xiꞌi̱,
te̱ nduuꞌ tu̱ i̱ nde̱e̱ naa te̱ xa̱ ni̱ xa̱ꞌni̱ꞌ te̱ yivi̱ꞌ xiinꞌ ityi̱,
te̱ ni̱ ndoo̱ i̱ naá i̱ ti̱xi̱n yavi̱ ndi̱i̱,
te̱ nduuꞌ tu̱ i̱ nde̱e̱ naa te̱ xa̱ ni̱ na̱ndoso̱ꞌ xa̱tyiꞌ u̱nꞌ xaꞌa̱ꞌ,
te̱ nduuꞌ tu̱ i̱ nde̱e̱ naa te̱ xa̱ ni̱ tu̱ꞌu̱n te̱ kuiꞌe̱ nda̱ꞌaꞌ u̱nꞌ.
6 Nde̱e̱ naa ni̱ sko̱ꞌniꞌ u̱nꞌ yuꞌu̱ ti̱xi̱n i̱i̱n poso̱ ña̱ kunu xa̱va̱ꞌa̱,
miiꞌ kunu i̱i̱n yaví ndiaaꞌ vi̱ꞌ.
7 Te̱ sa̱kuuꞌ ña̱ xiꞌé u̱nꞌ xini u̱nꞌ yuꞌu̱ ni̱ sa̱kaaꞌ u̱nꞌ siki̱ꞌ i̱,
te̱ nduuꞌ a̱ nde̱e̱ naa ti̱kui,
teꞌ nutaꞌ nuu̱ꞌ mi̱ni̱ kaꞌnuꞌ,
te̱ sandoꞌoꞌ xa̱va̱ꞌa̱ a̱ yuꞌu̱.
Selah
8 Ni̱ sa̱xi̱o̱o̱ ndo̱o̱ u̱nꞌ te̱ xiní taꞌanꞌ xiinꞌ i̱ nuu̱ꞌ i̱,
te̱ nduuꞌ i̱ nuu̱ꞌ te̱ ja̱a̱nꞌ vi̱ti̱n nde̱e̱ naa i̱i̱n ña̱ kuäsa̱ꞌ kuní xa̱tyiꞌ,
te̱ nduuꞌ i̱ nde̱e̱ naa i̱i̱n te̱ naá vi̱ꞌe̱ ka̱a̱,
te̱ kü̱vi̱ xa̱tyiꞌ ka̱ ke̱ta̱.
9 Ndu̱tyiꞌ nuu̱ꞌ i̱ ndii,
xa̱ kuni nda̱si̱ xa̱tyiꞌ a̱ xaꞌa̱ꞌ a̱ ña̱ xakuꞌ xa̱va̱ꞌa̱ i̱.
Te̱ i̱ꞌi̱n kivi̱ꞌ kuaꞌa̱n kanaꞌ i̱ yoꞌó,
Tákuiꞌe Yahvé,
te̱ tyi̱ndi̱e̱eꞌ u̱nꞌ yuꞌu̱.
Te̱ nuu̱ꞌ yoꞌó kataniꞌ i̱ nda̱ꞌaꞌ i̱,
te̱ xikán i̱ ña̱ ku̱vi̱ta i̱ni̱ u̱nꞌ xaꞌa̱ꞌ i̱.
10 Sa̱kanꞌ ña̱ kü̱vi̱ sa̱a̱ u̱nꞌ tyu̱u̱n kaꞌnuꞌ nuu̱ꞌ ne̱ xa̱ ni̱ xiꞌi̱,
ni̱ nde̱e̱ kü̱vi̱ tu̱ ndo̱koo̱ ne̱ xa̱ ni̱ xiꞌi̱ ja̱a̱nꞌ te̱ sa̱kaꞌnuꞌ ni̱a̱ yoꞌó.
Selah
11 Köo̱ꞌ nde̱e̱ i̱i̱n ne̱ xa̱ ni̱ xiꞌi̱ ñuꞌuꞌ ti̱xi̱n yavi̱ ndi̱i̱ ku̱vi̱ kaꞌa̱n ndo̱so̱ꞌ xaꞌa̱ꞌ ña̱ kuvita i̱ni̱ u̱nꞌ xaꞌa̱ꞌ ne̱ yivi̱ꞌ i̱i̱n yivi̱ꞌ,
te̱ köo̱ꞌ tu̱ nde̱e̱ i̱i̱n ne̱ xa̱ ni̱ xiꞌi̱ ndieeꞌ ñu̱u̱ ndi̱i ku̱vi̱ kaꞌa̱n ndo̱so̱ꞌ xaꞌa̱ꞌ ña̱ xatyuunꞌ nda̱ku u̱nꞌ.
12 Sa̱kanꞌ ña̱ köo̱ꞌ nde̱e̱ i̱i̱n ne̱ ñuꞌuꞌ miiꞌ i̱i̱n yaví ndiaaꞌ ja̱a̱nꞌ ku̱vi̱ kaꞌa̱n ndo̱so̱ꞌ xaꞌa̱ꞌ tyu̱u̱n kaꞌnuꞌ ña̱ xaaꞌ u̱nꞌ,
te̱ köo̱ꞌ tu̱ nde̱e̱ i̱i̱n ne̱ ñuꞌuꞌ ñu̱u̱ miiꞌ ñuꞌuꞌ ne̱ köo̱ꞌ ka̱ nakaꞌanꞌ xaꞌa̱ꞌ ku̱vi̱ kaꞌa̱n ndo̱so̱ꞌ xaꞌa̱ꞌ ña̱ xatyuunꞌ nda̱ku u̱nꞌ.
13 Ndisu̱ yuꞌu̱,
Tákuiꞌe Yahvé ndii,
nuu̱ꞌ yoꞌó kaꞌán ndaꞌvi i̱,
te̱ sa̱a̱ ni̱a̱ꞌa̱ kaꞌán i̱ si̱u̱ꞌunꞌ xiinꞌ u̱nꞌ.
14 Tákuiꞌe Yahvé,
¿ndiotyun na kuiiꞌ saxiooꞌ u̱nꞌ yuꞌu̱ nuu̱ꞌ u̱nꞌ?
Te̱,
¿ndiotyun na küni ku̱ni̱ so̱ꞌo̱ u̱nꞌ ña̱ kaꞌán i̱ xiinꞌ u̱nꞌ?
15 Nde̱e̱ kii̱ꞌ nduuꞌ i̱ te̱ sa̱va̱ vi̱ꞌ,
te̱ ni̱ xa̱ꞌaꞌ kuni ku̱vi̱ i̱,
te̱ xa̱ yoo i̱ ku̱vi̱ i̱,
te̱ köo̱ꞌ ka̱ xa̱tyiꞌ ndi̱e̱e̱ꞌ i̱,
te̱ ndiꞌni̱ va̱ tu̱ nimá i̱ xaꞌa̱ꞌ ña̱ sandoꞌoꞌ va̱ u̱nꞌ yuꞌu̱.
16 Te̱ sa̱kuuꞌ ña̱ xiꞌé u̱nꞌ xini u̱nꞌ yuꞌu̱ ni̱ sa̱kaaꞌ u̱nꞌ siki̱ꞌ i̱,
te̱ nde̱e̱ kü̱vi̱ ka̱ ndo̱koo̱ i̱.
17 Sa̱a̱ kuaꞌa̱n xi̱i̱nꞌ i̱ ni̱ xi̱nu̱ndu̱u̱ ña̱ ja̱a̱nꞌ yuꞌu̱ ni̱ xa̱a̱ u̱nꞌ,
te̱ nduuꞌ a̱ nde̱e̱ naa te̱ñuꞌu̱ꞌ kii̱ꞌ kuunꞌ kuiꞌe̱ savi̱ꞌ,
te̱ xa̱ ni̱ nda̱si̱ i̱ꞌnu̱ xa̱tyiꞌ sa̱kuuꞌ a̱ yuꞌu̱.
18 Ni̱ sa̱xi̱o̱o̱ ndo̱o̱ u̱nꞌ te̱ xiní taꞌanꞌ xiinꞌ nuu̱ꞌ i̱,
te̱ sa̱kanꞌ tu̱ te̱ nitaꞌanꞌ kutu̱ꞌ xiinꞌ i̱,
te̱ vi̱ti̱n ndii,
ña̱ i̱i̱n yaví ku̱i̱ti̱ꞌ nduuꞌ ña̱ xiní taꞌanꞌ va̱ꞌa̱ xiinꞌ i̱ ni̱ xa̱a̱ u̱nꞌ.