Ndani̱ va̱ Ndiosí ñu̱u̱ Jerusalén
Ya̱a̱ ña̱ ni̱ xi̱ta̱ tiaa̱ si̱a̱niꞌ xikaꞌ Coré na ka̱ta̱ e̱ꞌ ya̱a̱ kaa̱ꞌ nuu̱ꞌ Ndiosí.
87
Xíniꞌ i̱kuꞌ su̱ꞌu̱n ni̱ xa̱ni̱ Ndiosí xaꞌa̱ꞌ ñu̱u̱ Jerusalén.
2 Te̱ ndani̱ va̱ a̱ ñu̱u̱ Jerusalén ja̱a̱nꞌ,
yaꞌa̱ ka̱ te̱ sa̱kanꞌ ndiaa ka̱ i̱nga̱ ñu̱u̱ miiꞌ ndieeꞌ ne̱ vi̱ꞌe̱ Israel.
3 Yoꞌó,
ñu̱u̱ kuaꞌa miiꞌ nduꞌu̱ꞌ Ndiosí,
nda̱tu̱nꞌ va̱ ndatuꞌunꞌ ne̱ yivi̱ꞌ xaꞌa̱ꞌ u̱nꞌ.
Selah
4 Te̱ ni̱ kaꞌa̱n Ndiosí ndii:
“Tyi̱kaꞌni̱ i̱ ne̱ ndieeꞌ nuu̱ꞌ ñu̱ꞌuꞌ Egipto xiinꞌ ne̱ ndieeꞌ nuu̱ꞌ ñu̱ꞌuꞌ Babilonia xiinꞌ ne̱ xiní yuꞌu̱,
te̱ tyi̱kaꞌni̱ tu̱ i̱ ne̱ ndieeꞌ nuu̱ꞌ ñu̱ꞌuꞌ te̱ Filisteo xiinꞌ ne̱ ndieeꞌ nuu̱ꞌ ñu̱ꞌuꞌ Tiro,
te̱ nde̱e̱ ne̱ ndieeꞌ xikaꞌ nuu̱ꞌ ñu̱ꞌuꞌ Etiopía tyi̱kaꞌni̱ i̱ xiinꞌ ne̱ xiní yuꞌu̱ ja̱a̱nꞌ,
te̱ vi̱ti̱n ndii,
sa̱kuuꞌ ni̱a̱ na̱ndu̱u̱ ne̱ ñu̱u̱ Jerusalén”,
ni̱ katyi̱ a̱.
5 Te̱ sa̱kuuꞌ ne̱ yivi̱ꞌ kaꞌa̱n ndii:
“Sa̱kuuꞌ ne̱ ndieeꞌ ñu̱u̱ Jerusalén ndii,
xa̱ ñu̱u̱ yoꞌoꞌ ni̱ tuvi̱ ni̱a̱.
Te̱ mi̱iꞌ Ndiosí,
ña̱ nduꞌu̱ꞌ ndi̱viꞌ,
ni̱ tyi̱ka̱nduꞌu̱ꞌ ñu̱u̱ ja̱a̱nꞌ”,
katyi̱ ni̱a̱.
6 Te̱ kii̱ꞌ na̱ko̱so̱ꞌ kivi̱ꞌ sa̱kuuꞌ ne̱ tukuꞌ nuu̱ꞌ tu̱tu̱ Ndiosí,
te̱ kaꞌa̱n a̱ ndii:
“Vi̱ti̱n ndii,
sa̱kuuꞌ ñu̱u̱ ña̱ yoo nuu̱ꞌ ñu̱ꞌuꞌ i̱i̱n yivi̱ꞌ nduuꞌ kuenta ñu̱u̱ Jerusalén”,
katyi̱ a̱.
Selah
7 Te̱ te̱ tivi tu̱n yoo̱ꞌ xiinꞌ ne̱ xitaꞌ ya̱a̱ nuu̱ꞌ Ndiosí kaꞌa̱n ndii:
“Sa̱kuuꞌ te̱ xii̱ꞌ ya̱taꞌ ndu̱ ni̱ ka̱ku̱ ñu̱u̱ Jerusalén yoꞌoꞌ”,
katyi̱ ni̱a̱.