Yoꞌoꞌ kaꞌán David xiinꞌ Ndiosí ña̱ ko̱to̱ na xitoꞌ ña̱ꞌaꞌ a̱
Si̱u̱ꞌunꞌ ña̱ ni̱ kaꞌa̱n David xiinꞌ Ndiosí.
86
Tákuiꞌe Yahvé,
sa̱a̱ u̱nꞌ ña̱ va̱ꞌa̱ te̱ ku̱ni̱ so̱ꞌo̱ u̱nꞌ si̱u̱ꞌunꞌ ña̱ kaꞌán i̱ xiinꞌ u̱nꞌ,
na̱ku̱i̱i̱n u̱nꞌ ña̱ kaꞌán i̱,
sa̱kanꞌ ña̱ sutyiꞌ va̱ i̱ni̱ i̱,
te̱ natiín va̱ tu̱ i̱.
2 Ko̱to̱ u̱nꞌ yuꞌu̱,
sa̱kanꞌ ña̱ xikaꞌ nda̱ku i̱ i̱tyiꞌ u̱nꞌ,
sa̱kakú kiꞌi̱ꞌ yuꞌu̱,
sa̱kanꞌ ña̱ xikaꞌ nuuꞌ i̱ nuu̱ꞌ u̱nꞌ,
te̱ i̱ni̱ tu̱ i̱ xini i̱ yoꞌó.
3 Tákuiꞌe Yahvé,
sa̱a̱ u̱nꞌ ña̱ va̱ꞌa̱ te̱ ku̱vi̱ta i̱ni̱ u̱nꞌ xaꞌa̱ꞌ i̱,
sa̱kanꞌ ña̱ ndu̱viꞌ kaꞌán tiꞌeꞌ i̱ xiinꞌ u̱nꞌ.
4 Tákuiꞌe Ndiosí,
sa̱a̱ u̱nꞌ ña̱ va̱ꞌa̱ te̱ ta̱xi̱ u̱nꞌ ña̱ ku̱a̱tiaꞌ yuꞌu̱,
te̱ xikaꞌ nuuꞌ nuu̱ꞌ u̱nꞌ,
sa̱kanꞌ ña̱ nda̱ꞌaꞌ yoꞌó sanakuaꞌa i̱ nimá i̱.
5 Tákuiꞌe Ndiosí,
sa̱kanꞌ ña̱ yoꞌó ndii,
va̱ꞌa̱ va̱ ña̱ nduuꞌ u̱nꞌ,
te̱ sa̱a̱ kivi̱ꞌ yoo tu̱ꞌva̱ u̱nꞌ te̱ ko̱o̱ kaꞌnuꞌ i̱ni̱ u̱nꞌ xaꞌa̱ꞌ ku̱a̱tyi̱ ne̱ yivi̱ꞌ,
te̱ ndani̱ xa̱va̱ꞌa̱ u̱nꞌ sa̱kuuꞌ ne̱ xikán nuu̱ꞌ u̱nꞌ te̱ ko̱o̱ kaꞌnuꞌ i̱ni̱ u̱nꞌ xaꞌa̱ꞌ ni̱a̱.
6 Tákuiꞌe Yahvé,
sa̱a̱ u̱nꞌ ña̱ va̱ꞌa̱ te̱ ku̱ni̱ so̱ꞌo̱ u̱nꞌ si̱u̱ꞌunꞌ ña̱ kaꞌán i̱ xiinꞌ u̱nꞌ,
te̱ tyu̱nxaꞌaꞌ u̱nꞌ si̱u̱ꞌunꞌ ña̱ kaꞌán ndaꞌvi i̱ xiinꞌ u̱nꞌ.
7 Kanaꞌ i̱ yoꞌó kii̱ꞌ sutyiꞌ i̱ni̱ i̱,
sa̱kanꞌ ña̱ nakuiinꞌ u̱nꞌ ña̱ kaꞌán i̱ xiinꞌ u̱nꞌ.
8 Tákuiꞌe Ndiosí,
sa̱kanꞌ ña̱ köo̱ꞌ nde̱e̱ i̱i̱n ndiosí ña̱ kaꞌnuꞌ ka̱ nde̱e̱ naa yoꞌó,
te̱ ni̱ nde̱e̱ kü̱vi̱ tu̱ sa̱a̱ ña̱ ja̱a̱nꞌ tyu̱u̱n kaꞌnuꞌ naa ña̱ xaaꞌ yoꞌó.
9 Tákuiꞌe Ndiosí,
sa̱kuuꞌ ne̱ yivi̱ꞌ,
ne̱ ni̱ xa̱ꞌa̱ u̱nꞌ ki̱xi̱n nuu̱ꞌ u̱nꞌ,
te̱ ku̱i̱ta̱ xitiꞌ ni̱a̱ nuu̱ꞌ u̱nꞌ,
te̱ ki̱ꞌi̱n kaꞌnuꞌ ni̱a̱ yoꞌó,
te̱ sa̱kuuꞌ tu̱ ni̱a̱ sa̱kaꞌnuꞌ yoꞌó.
10 Sa̱kanꞌ ña̱ i̱i̱n nda̱a̱ꞌ yoꞌó ku̱i̱ti̱ꞌ nduuꞌ ña̱ kaꞌnuꞌ xa̱va̱ꞌa̱ ña̱ xaaꞌ tyu̱u̱n kaꞌnuꞌ,
te̱ i̱i̱n nda̱a̱ꞌ tilu̱ꞌ yoꞌó ku̱i̱ti̱ꞌ nduuꞌ Ndiosí.
11 Tákuiꞌe Yahvé,
sa̱a̱ u̱nꞌ ña̱ va̱ꞌa̱ te̱ sa̱niaꞌá u̱nꞌ yuꞌu̱ ka̱ka̱ i̱ i̱i̱n yivi̱ꞌ sa̱a̱ kuní u̱nꞌ,
te̱ ka̱ka̱ i̱ sa̱a̱ kaꞌán ña̱ ndi̱xa̱ ña̱ saniaꞌá u̱nꞌ.
Sa̱a̱ u̱nꞌ ña̱ va̱ꞌa̱ te̱ ta̱xi̱ u̱nꞌ ña̱ ku̱ndu̱u̱ i̱ i̱i̱n te̱ ndo̱o̱ nimá nuu̱ꞌ u̱nꞌ te̱ ki̱ꞌi̱n kaꞌnuꞌ i̱ yoꞌó.
12 Tákuiꞌe Yahvé,
sa̱kaꞌnuꞌ i̱ yoꞌó xiinꞌ i̱i̱n ka̱niiꞌ nimá i̱,
te̱ ki̱ꞌi̱n kaꞌnuꞌ i̱ yoꞌó nde̱e̱ ndiꞌiꞌ ni̱ kivi̱ꞌ.
13 Sa̱kanꞌ ña̱ tyiee̱ xa̱va̱ꞌa̱ ña̱ ndani̱ u̱nꞌ yuꞌu̱,
te̱ nï̱ ta̱xi̱ u̱nꞌ kuꞌu̱n i̱ ñu̱u̱ ndi̱i.
14 Tákuiꞌe Ndiosí,
i̱i̱n ti̱ꞌvi̱ te̱ ñuñuꞌ va̱ ni̱ xa̱ꞌaꞌ mi̱iꞌ va̱ kuuꞌ xiinꞌ i̱,
i̱i̱n ti̱ꞌvi̱ te̱ ndi̱e̱ni va̱ kuni ka̱ꞌni̱ꞌ yuꞌu̱,
te̱ ja̱a̱nꞌ ndii,
xïtoꞌ kaꞌnuꞌ xa̱tyiꞌ ra̱ yoꞌó.
15 Ndisu̱ yoꞌó,
Tákuiꞌe Ndiosí ndii,
ña̱ vi̱ta va̱ i̱ni̱ nduuꞌ u̱nꞌ,
te̱ va̱ꞌa̱ va̱ tu̱ nimá u̱nꞌ xini u̱nꞌ ne̱ yivi̱ꞌ,
te̱ kuiee va̱ tu̱ nasaáꞌ u̱nꞌ,
ndisu̱ kuaꞌa̱ꞌ va̱ ña̱ kuvita i̱ni̱ u̱nꞌ xaꞌa̱ꞌ ne̱ yivi̱ꞌ,
te̱ kuaꞌa̱ꞌ tu̱ ña̱ xatyuunꞌ nda̱ku u̱nꞌ xaꞌa̱ꞌ ne̱ yivi̱ꞌ.
16 Sa̱a̱ u̱nꞌ ña̱ va̱ꞌa̱ te̱ na̱ko̱to̱ꞌni̱ u̱nꞌ nuu̱ꞌ i̱,
te̱ ku̱vi̱ta i̱ni̱ u̱nꞌ xaꞌa̱ꞌ i̱.
Sa̱a̱ u̱nꞌ ña̱ va̱ꞌa̱ te̱ ta̱xi̱ u̱nꞌ ña̱ ndi̱e̱eꞌ u̱nꞌ nda̱ꞌaꞌ yuꞌu̱,
te̱ xikaꞌ nuuꞌ nuu̱ꞌ u̱nꞌ,
te̱ sa̱kakú u̱nꞌ yuꞌu̱,
te̱ nduuꞌ siꞌe̱ ñaꞌ xikaꞌ nuuꞌ nuu̱ꞌ u̱nꞌ.
17 Sa̱a̱ u̱nꞌ ña̱ va̱ꞌa̱ te̱ ti̱ꞌviꞌ u̱nꞌ i̱i̱n ña̱ niaꞌá nuu̱ꞌ i̱ ña̱ tyindieeꞌ u̱nꞌ yuꞌu̱,
sa̱kanꞌ te̱ ku̱ni̱ te̱ ndasiꞌ yuꞌu̱ ña̱ ja̱a̱nꞌ te̱ ku̱ka̱ꞌa̱n nuu̱ꞌ ra̱.
Sa̱kanꞌ ña̱ yoꞌó,
Tákuiꞌe Yahvé,
nduuꞌ ña̱ ni̱ sa̱kakú yuꞌu̱,
te̱ su̱vi̱ tu̱ u̱nꞌ nduuꞌ ña̱ ni̱ sa̱kiꞌví yuꞌu̱.