Yoꞌoꞌ kaꞌán a̱ xaꞌa̱ꞌ ña̱ kuvita i̱ni̱ Ndiosí xaꞌa̱ꞌ ne̱ vi̱ꞌe̱ Israel
Ya̱a̱ ña̱ ni̱ xi̱ta̱ tiaa̱ si̱a̱niꞌ Coré nuu̱ꞌ Ndiosí ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ.
85
Tákuiꞌe Yahvé,
va̱ꞌa̱ va̱ ña̱ ni̱ nduu̱ yoꞌó xiinꞌ ñu̱ꞌuꞌ ña̱ nduuꞌ ña̱ꞌa̱ u̱nꞌ miiꞌ ndieeꞌ ndu̱ yoꞌoꞌ,
sa̱kanꞌ ña̱ ni̱ sa̱na̱ndikoꞌ u̱nꞌ nduꞌu̱ꞌ,
ne̱ vi̱ꞌe̱ Israel,
ne̱ ni̱ xi̱kuꞌu̱n nda̱ꞌaꞌ te̱ xíinꞌ,
te̱ ni̱ na̱ta̱ndi̱e̱e̱ va̱ꞌa̱ u̱nꞌ ndu̱.
2 Ni̱ yoo̱ kaꞌnuꞌ i̱ni̱ u̱nꞌ xaꞌa̱ꞌ ña̱ ni̱a̱ꞌa ña̱ ni̱ xa̱a̱ nduꞌu̱,
ne̱ nduuꞌ kuenta u̱nꞌ,
te̱ ni̱ sa̱ndoyoꞌ u̱nꞌ sa̱kuuꞌ ku̱a̱tyi̱ ndu̱.
Selah
3 Ni̱ sa̱i̱i̱n kuiín u̱nꞌ sa̱kuuꞌ ña̱ xiꞌé u̱nꞌ,
te̱ ni̱ na̱ko̱o̱ u̱nꞌ sa̱kuuꞌ ña̱ i̱ꞌniꞌ u̱nꞌ ña̱ nduuꞌ nde̱e̱ naa ñuꞌu̱ ndatin.
4 Tákuiꞌe Ndiosí,
ña̱ sa̱kakú nduꞌu̱ꞌ,
vi̱ti̱n ndii,
sa̱a̱ u̱nꞌ ña̱ va̱ꞌa̱ te̱ na̱ta̱ndi̱e̱e̱ va̱ꞌa̱ tu̱ku̱u̱ u̱nꞌ nduꞌu̱,
te̱ sa̱i̱i̱n kuiín u̱nꞌ ña̱ xiꞌé u̱nꞌ xini u̱nꞌ ndu̱.
5 ¿Ñáá nde̱e̱ ndiꞌiꞌ ni̱ kivi̱ꞌ ka̱siꞌe̱ u̱nꞌ xini u̱nꞌ nduꞌu̱ꞌ?
¿Ñáá köo̱ꞌ kivi̱ꞌ kuꞌu̱n ndi̱koꞌ ña̱ xiꞌé u̱nꞌ xini u̱nꞌ ndu̱?
6 ¿Ñáá köo̱ꞌ kivi̱ꞌ ka̱ sa̱na̱kaá u̱nꞌ kivi̱ꞌ ñu̱u̱ ndu̱,
te̱ ku̱vi̱ va̱ꞌa̱ kuni ndu̱,
ne̱ nduuꞌ kuenta u̱nꞌ,
ku̱ni̱ ndu̱ yoꞌó?
7 Tákuiꞌe Yahvé,
sa̱a̱ u̱nꞌ ña̱ va̱ꞌa̱ te̱ niaꞌa̱ u̱nꞌ ña̱ ku̱vi̱ta i̱ni̱ u̱nꞌ xaꞌa̱ꞌ ndu̱,
te̱ sa̱kakú u̱nꞌ ndu̱.
8 Taxiꞌ so̱ꞌo̱ va̱ i̱ ña̱ kaꞌán Yahvé Ndiosí,
sa̱kanꞌ ña̱ kaꞌán a̱ xaꞌa̱ꞌ ña̱ ku̱ndi̱e̱e̱ mani̱ꞌ yooꞌ,
ne̱ nduuꞌ kuenta Ndiosí,
ne̱ nduuꞌ ne̱ su̱ꞌu̱n,
ko̱to̱ ka̱ na̱ndi̱koꞌ xataꞌ e̱ꞌ te̱ sa̱a̱ e̱ꞌ ña̱ küuꞌ kaxiꞌ ña̱ ni̱ xa̱a̱ e̱ꞌ sa̱aꞌ.
9 Te̱ xa̱ yoo tu̱ꞌva̱ Ndiosí te̱ sa̱kakú a̱ ne̱ saxinú ña̱ kaꞌán tyuunꞌ a̱,
te̱ ko̱o̱ ña̱ kaꞌnuꞌ a̱ nuu̱ꞌ ñu̱ꞌuꞌ e̱ꞌ.
10 Ña̱ kuvita i̱ni̱ Ndiosí xiinꞌ ña̱ ndi̱xa̱ ndii,
ni̱ ndu̱i̱i̱n a̱,
te̱ ña̱ xatyuunꞌ nda̱ku Ndiosí xiinꞌ ña̱ mani̱ꞌ ña̱ taxiꞌ a̱ ndii,
ni̱ tyi̱to yu̱ꞌuꞌ taꞌanꞌ a̱.
11 Nuu̱ꞌ ñu̱ꞌuꞌ i̱i̱n yivi̱ꞌ ka̱ku̱ ña̱ ndi̱xa̱,
te̱ ña̱ xatyuunꞌ nda̱ku u̱nꞌ ndii,
nde̱e̱ ndi̱viꞌ ki̱e̱e̱ a̱ te̱ na̱xaa̱ a̱ nde̱e̱ nuu̱ꞌ ñu̱ꞌuꞌ i̱i̱n yivi̱ꞌ.
12 Mi̱iꞌ Yahvé ta̱xi̱ ña̱ va̱ꞌa̱ nda̱ꞌaꞌ e̱ꞌ,
te̱ ñu̱ꞌuꞌ e̱ꞌ ta̱xi̱ kuaꞌa̱ꞌ ña̱ savi̱ꞌ.
13 Ña̱ xatyuunꞌ nda̱ku niꞌiꞌ i̱tyiꞌ kuaꞌa̱n nuu̱ꞌ Ndiosí,
te̱ miiꞌ niaꞌá xaꞌa̱ꞌ ña̱ xatyuunꞌ nda̱ku ja̱a̱nꞌ kuaꞌa̱n a̱ ndikún Ndiosí kuaꞌa̱n a̱.