Yoꞌoꞌ kaꞌán a̱ xaꞌa̱ꞌ ña̱ va̱ꞌa̱ yoo a̱ ña̱ kaꞌán va̱ nimá e̱ꞌ ku̱ndi̱e̱e̱ e̱ꞌ vi̱ꞌe̱ Ndiosí
Ya̱a̱ ña̱ ni̱ xi̱ta̱ tiaa̱ siꞌe̱ Coré nuu̱ꞌ Ndiosí ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ. Na ka̱ta̱ ndo̱ꞌ ya̱a̱ kaa̱ꞌ xiinꞌ ñuu̱ꞌ ña̱ xandaaꞌ.
84
Tákuiꞌe Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ,
nda̱tu̱nꞌ xa̱va̱ꞌa̱ kaaꞌ vi̱ꞌe̱ nduꞌu̱ꞌ u̱nꞌ.
2 Xikán va̱ i̱ni̱ i̱,
te̱ ndi̱e̱eꞌ va̱ tu̱ kaꞌán nimá i̱ ña̱ ndiꞌvi̱ i̱ nuu̱ꞌ ki̱ꞌe̱ yu̱kunꞌ miiꞌ nduꞌu̱ꞌ yoꞌó,
Yahvé,
te̱ nimá i̱ xiinꞌ ñu̱ꞌuꞌ ndeꞌi̱ i̱ ndii,
xitaꞌ a̱ ya̱a̱ nuu̱ꞌ Ndiosí tiaku.
3 Te̱ nde̱e̱ sa̱a̱ niꞌíꞌ i̱i̱n xaanꞌ ti̱xi̱n vi̱ꞌe̱ u̱nꞌ ja̱a̱nꞌ miiꞌ ku̱vi̱ ku̱ndi̱e̱e̱ riꞌ,
te̱ niꞌíꞌ tu̱ ti̱xkoꞌ miiꞌ ku̱vi̱ xaꞌa riꞌ tyoꞌo̱ riꞌ,
te̱ taꞌvíꞌ siꞌe̱ riꞌ i̱kanꞌ,
ya̱ti̱n miiꞌ itaꞌ altar ti̱xi̱n yu̱kunꞌ u̱nꞌ,
Tákuiꞌe Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ,
yoꞌó,
ña̱ nduuꞌ Rey xaꞌndia tyuunꞌ nuu̱ꞌ i̱,
te̱ nduuꞌ tu̱ u̱nꞌ Ndiosí ña̱ xakaꞌnuꞌ i̱.
4 Va̱ꞌa̱ va̱ kuni ne̱ ku̱vi̱ ndieeꞌ vi̱ꞌe̱ u̱nꞌ,
sa̱kanꞌ ña̱ nde̱e̱ ndiꞌiꞌ ni̱ kivi̱ꞌ ka̱ta̱ ni̱a̱ ya̱a̱ nuu̱ꞌ u̱nꞌ.
Selah
5 Va̱ꞌa̱ va̱ kuni ne̱ yivi̱ꞌ,
ne̱ natiinꞌ ndi̱e̱e̱ꞌ yoꞌó,
te̱ xiinꞌ i̱i̱n ka̱niiꞌ nimá ni̱a̱ kuni ki̱xi̱n ni̱a̱ nde̱e̱ yu̱kunꞌ u̱nꞌ ña̱ iinꞌ ñu̱u̱ Jerusalén.
6 Kii̱ꞌ xikaꞌ ni̱a̱ yo̱soꞌ miiꞌ i̱tyi va̱ kaaꞌ ña̱ naniꞌ miiꞌ xakuꞌ ne̱ yivi̱ꞌ ndii,
nde̱e̱ naa ti̱ko̱ꞌyoꞌ nduuꞌ a̱ nuu̱ꞌ ni̱a̱ sa̱a̱ u̱nꞌ,
te̱ kii̱ꞌ kuunꞌ yatyi̱ savi̱ꞌ ndii,
sañuꞌuꞌ ña̱ꞌaꞌ a̱.
7 Te̱ kii̱ꞌ nakaá ni̱a̱ kuaꞌa̱n ni̱a̱ ndii,
so̱ꞌo̱ nakoó ka̱ ndi̱e̱e̱ꞌ ni̱a̱,
te̱ kii̱ꞌ na̱xaa̱ ni̱a̱ ñu̱u̱ Jerusalén ndii,
i̱ꞌi̱n ni̱a̱ kuꞌu̱n ku̱ya̱ti̱n nuu̱ꞌ Ndiosí,
te̱ ku̱ni̱ ña̱ꞌaꞌ ni̱a̱.
8 Yahvé Ndiosí,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ,
sa̱a̱ u̱nꞌ ña̱ va̱ꞌa̱ te̱ ku̱ni̱ so̱ꞌo̱ u̱nꞌ si̱u̱ꞌunꞌ ña̱ kaꞌán i̱ xiinꞌ u̱nꞌ,
Ndiosí,
ña̱ xakaꞌnuꞌ nduꞌu̱,
ne̱ nduuꞌ ne̱ vi̱ꞌe̱ Jacob,
sa̱a̱ u̱nꞌ ña̱ va̱ꞌa̱ te̱ ku̱ni̱ so̱ꞌo̱ u̱nꞌ ña̱ kaꞌán i̱ xiinꞌ u̱nꞌ.
Selah
9 Tákuiꞌe Ndiosí,
ña̱ nduuꞌ nde̱e̱ naa ka̱a̱ tiꞌeꞌ ña̱ tiasi ti̱a̱ꞌni̱ i̱,
sa̱a̱ u̱nꞌ ña̱ va̱ꞌa̱ te̱ ko̱to̱ u̱nꞌ rey,
sa̱a̱ u̱nꞌ ña̱ va̱ꞌa̱ te̱ ku̱vi̱ta i̱ni̱ u̱nꞌ xaꞌa̱ꞌ yuꞌu̱,
rey,
te̱ ni̱ na̱ka̱xi̱n u̱nꞌ.
10 Sa̱kanꞌ ña̱ va̱ꞌa̱ ka̱ nduuꞌ a̱ ña̱ ko̱o̱ i̱ i̱i̱n nda̱a̱ꞌ kivi̱ꞌ nuu̱ꞌ ki̱ꞌe̱ u̱nꞌ,
te̱ sa̱kanꞌ ña̱ ko̱o̱ i̱ i̱i̱n mií kivi̱ꞌ miiꞌ ka̱ tu̱ku̱ xaanꞌ.
Va̱ꞌa̱ ka̱ nduuꞌ a̱ ña̱ ku̱ndu̱u̱ i̱ te̱ xitoꞌ yiꞌeꞌ vi̱ꞌe̱ Ndiosí ña̱ xakaꞌnuꞌ i̱,
te̱ sa̱kanꞌ ña̱ ku̱nduꞌu̱ꞌ i̱ vi̱ꞌe̱ ne̱ xaaꞌ ña̱ ni̱a̱ꞌa.
11 Sa̱kanꞌ ña̱ Yahvé Ndiosí nduuꞌ ñu̱ꞌu̱ tuún nuu̱ꞌ e̱ꞌ,
te̱ su̱vi̱ tu̱ a̱ nduuꞌ nde̱e̱ naa ka̱a̱ tiꞌeꞌ ña̱ tiasi nuu̱ꞌ e̱ꞌ nuu̱ꞌ ña̱ kueinꞌ,
te̱ su̱vi̱ tu̱ a̱ nduuꞌ ña̱ sañuꞌuꞌ yooꞌ.
Taxiꞌ a̱ ña̱ kiꞌinꞌ kaꞌnuꞌ nda̱ꞌaꞌ e̱ꞌ,
te̱ taxiꞌ tu̱ a̱ ña̱ nda̱tu̱nꞌ nda̱ꞌaꞌ e̱ꞌ.
Te̱ köo̱ꞌ kivi̱ꞌ ku̱xindi̱a̱ꞌ a̱ ña̱ va̱ꞌa̱ nuu̱ꞌ ne̱ xikaꞌ nda̱ku i̱tyiꞌ a̱.
12 Yahvé Ndiosí,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ,
va̱ꞌa̱ va̱ kuni ne̱ i̱ni̱ xi̱ni̱ yoꞌó.