Yoꞌoꞌ kaꞌán xiꞌé Ndiosí nuu̱ꞌ kuesí, te̱ xäꞌnú nda̱ku ku̱a̱tyi̱ ne̱ yivi̱ꞌ
Ya̱a̱ ña̱ ni̱ xi̱ta̱ Asaf nuu̱ꞌ Ndiosí.
82
Nduꞌu̱ꞌ Ndiosí miiꞌ nakayá te̱ nduuꞌ nde̱e̱ naa ndiosí,
te̱ te̱i̱n te̱ nduuꞌ nde̱e̱ naa ndiosí ja̱a̱nꞌ xaꞌnú tu̱ a̱ ku̱a̱tyi̱ te̱ ja̱a̱nꞌ.
2 ¿A̱ma̱ vi̱ꞌ kuꞌu̱n ndi̱koꞌ ndo̱ꞌ ña̱ xäꞌnú nda̱ku ndo̱ꞌ ku̱a̱tyi̱ ne̱ yivi̱ꞌ,
te̱ nakaꞌán ndo̱ꞌ xaꞌa̱ꞌ ne̱ xaaꞌ ña̱ ni̱a̱ꞌa?
Selah
3 Va̱ꞌa̱ ka̱ kaꞌnu̱ nda̱ku ndo̱ꞌ ku̱a̱tyi̱ xaꞌa̱ꞌ ne̱ ndaꞌvi kuuꞌ xiinꞌ xaꞌa̱ꞌ ne̱ ndaꞌvi,
ne̱ köo̱ꞌ yu̱vaꞌ siꞌiꞌ,
te̱ na̱kaꞌa̱n tu̱ ndo̱ꞌ xaꞌa̱ꞌ ne̱ ndoꞌoꞌ xaaꞌ ne̱ yivi̱ꞌ xiinꞌ xaꞌa̱ꞌ ne̱ natiín sa̱a̱ niiꞌ kande̱iꞌ.
4 Sa̱ndoó ndiká ndo̱ꞌ ne̱ ndoꞌoꞌ xaaꞌ ne̱ yivi̱ꞌ,
te̱ sa̱kanꞌ tu̱ ne̱ natiín,
sa̱ndoó ndiká ña̱ꞌaꞌ ndo̱ꞌ nda̱ꞌaꞌ ne̱ xaaꞌ ña̱ ni̱a̱ꞌa.
5 Sa̱kanꞌ ña̱ ne̱ xaaꞌ ña̱ ni̱a̱ꞌa ja̱a̱nꞌ ndii,
kündani̱ ni̱a̱ nde̱e̱ siee ña̱ kande̱iꞌ,
ne̱ xikaꞌ i̱i̱n yaví nduuꞌ ni̱a̱,
tee̱ꞌ nde̱e̱ ta̱a̱n ka̱niiꞌ xaꞌa̱ꞌ ñu̱ꞌuꞌ i̱i̱n yivi̱ꞌ,
te̱ xa̱ xitoꞌ ndo̱ñuꞌuꞌ a̱.
6 Te̱ ni̱ kaꞌa̱n yuꞌu̱ xiinꞌ ndo̱ꞌ ndii:nduuꞌ ndoꞌó,
te̱ sa̱kuuꞌ ndo̱ꞌ nduuꞌ siꞌe̱ Ndiosí,
ña̱ nduꞌu̱ꞌ ndi̱viꞌ.
7 Ndisu̱ sa̱kuuꞌ ndo̱ꞌ ku̱vi̱ sa̱a̱ niiꞌ xiꞌí sa̱kuuꞌ ne̱ yivi̱ꞌ i̱i̱n yivi̱ꞌ,
te̱ nde̱e̱ naa xiꞌí ndiaa ka̱ te̱ xaꞌndia tyuunꞌ ku̱vi̱ tu̱ ndoꞌó.”
8 Tákuiꞌe Ndiosí,
ndo̱koo̱ kiꞌi̱ꞌ te̱ sa̱naꞌmá u̱nꞌ ne̱ yivi̱ꞌ i̱i̱n yivi̱ꞌ,
sa̱kanꞌ ña̱ ña̱ꞌa̱ yoꞌó nduuꞌ sa̱kuuꞌ ñu̱u̱ kaꞌnuꞌ ña̱ ñuꞌuꞌ nuu̱ꞌ ñu̱ꞌuꞌ i̱i̱n yivi̱ꞌ.