Va̱ꞌa̱ va̱ ña̱ nduuꞌ Ndiosí xiinꞌ ne̱ Israel tee̱ꞌ ndee ni̱ xa̱a̱ naa ni̱ xa̱a̱ ne̱ ja̱a̱nꞌ ña̱ ni̱a̱ꞌa
Ya̱a̱ ña̱ ni̱ xi̱ta̱ Asaf ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ, te̱ xitaꞌ ya̱a̱ ti̱xi̱n yu̱kunꞌ kaꞌnuꞌ, na ka̱ta̱ ndo̱ꞌ ya̱a̱ kaa̱ꞌ xiinꞌ ñuu̱ꞌ.
81
Ni̱a̱ꞌa̱ ndo̱ꞌ,
te̱ va̱ꞌa̱ va̱ kuni ndo̱ꞌ te̱ ka̱ta̱ ndo̱ꞌ ya̱a̱ nuu̱ꞌ Ndiosí ña̱ xitoꞌ yooꞌ,
sii̱ꞌ ku̱ni̱ ndo̱ꞌ te̱ ka̱ta̱ ndo̱ꞌ ya̱a̱ nuu̱ꞌ Ndiosí ña̱ xakaꞌnuꞌ yooꞌ,
ne̱ vi̱ꞌe̱ Jacob.
2 Ka̱ta̱ ndo̱ꞌ ya̱a̱ nuu̱ꞌ Ndiosí,
te̱ ki̱si̱ ndo̱ꞌ ti̱ko̱ko̱,
te̱ nda̱tu̱nꞌ va̱ sa̱ndaaꞌ ndo̱ꞌ ñuu̱ꞌ ña̱ naniꞌ arpa xiinꞌ ñuu̱ꞌ ña̱ naniꞌ salterio nuu̱ꞌ a̱.
3 Ti̱vi̱ ndo̱ꞌ ndi̱kiꞌ mbe̱e̱ kii̱ꞌ nduuꞌ iti̱a̱ꞌ yoo̱ꞌ,
te̱ ti̱vi̱ tu̱ ndo̱ꞌ a̱ kii̱ꞌ nduuꞌ niiꞌ yoo̱ꞌ kivi̱ꞌ ña̱ nasukú vi̱koꞌ xaaꞌ e̱ꞌ.
4 Ku̱a̱tyi̱ ndii,
sa̱kanꞌ kaꞌán tyuunꞌ nde̱iꞌ ña̱ ni̱ ta̱xi̱ Ndiosí nda̱ꞌaꞌ yooꞌ,
ne̱ vi̱ꞌe̱ Israel,
ña̱ ja̱a̱nꞌ nduuꞌ nde̱iꞌ ña̱ kaꞌán tyuunꞌ Ndiosí ña̱ xakaꞌnuꞌ yooꞌ,
ne̱ vi̱ꞌe̱ Jacob.
5 Tu̱ꞌu̱n nde̱iꞌ ja̱a̱nꞌ nduuꞌ ña̱ ni̱ ta̱xi̱ a̱ nda̱ꞌaꞌ José kii̱ꞌ ni̱ sa̱ndoꞌoꞌ Ndiosí ne̱ ñu̱ꞌuꞌ Egipto,
te̱ sa̱kakú a̱ ne̱ xii̱ꞌ ya̱taꞌ ndu̱.
Ni̱ xi̱ni̱ so̱ꞌo̱ i̱ i̱i̱n tatyi̱ꞌ yu̱ꞌuꞌ ña̱ xïní i̱ kaꞌán a̱ xiinꞌ i̱ ndi̱i:
6 “Vi̱ti̱n ni̱ na̱ꞌi̱ i̱ ña̱ vie̱ ña̱ nduꞌu̱ꞌ soko̱ u̱nꞌ xikaꞌ u̱nꞌ,
te̱ xa̱ ni̱ sa̱ndoó ndiká i̱ yoꞌó nuu̱ꞌ tyu̱u̱n vie̱ ña̱ xaaꞌ u̱nꞌ.
7 Ni̱ kaꞌa̱n ndaꞌvi u̱nꞌ xiinꞌ i̱ kii̱ꞌ ni̱ yoo̱ tu̱ndoꞌo̱ꞌ nuu̱ꞌ u̱nꞌ,
te̱ ni̱ sa̱kakú i̱ yoꞌó,
te̱ nde̱e̱ te̱i̱n viko̱ꞌ nu̱ꞌuꞌ ni̱ ndeꞌi̱ savi̱ꞌ ni̱ na̱ku̱i̱i̱n i̱ ña̱ kaꞌán u̱nꞌ,
te̱ ni̱ xi̱to̱ ku̱a̱ꞌa̱ i̱ ña̱ i̱ni̱ u̱nꞌ xini u̱nꞌ yuꞌu̱
kii̱ꞌ köo̱ꞌ ti̱kui ko̱ꞌo̱ u̱nꞌ ni̱ yoo̱ nuu̱ꞌ ñu̱ꞌuꞌ miiꞌ i̱tyi kaaꞌ miiꞌ naniꞌ Meribá.
Selah
8 Ndoꞌó,
ne̱ nduuꞌ kuenta i̱,
ku̱ni̱ so̱ꞌo̱ ndo̱ꞌ ña̱ sakiꞌinꞌ kuento i̱ ndoꞌó,
ne̱ vi̱ꞌe̱ Israel,
xa̱va̱ꞌa̱ naaꞌ sa̱kanꞌ te̱ xiinꞌ ndo̱ꞌ ku̱ni̱ so̱ꞌo̱ ndo̱ꞌ yuꞌu̱.
9 Te̱ köo̱ꞌ kivi̱ꞌ sa̱kaꞌnuꞌ ndo̱ꞌ ndiosí ña̱ xakaꞌnuꞌ ne̱ tukuꞌ,
ni̱ nde̱e̱ kü̱i̱ta̱ xitiꞌ tu̱ ndo̱ꞌ nuu̱ꞌ ndiosí saka ja̱a̱nꞌ.
10 Sa̱kanꞌ ña̱ yuꞌu̱ nduuꞌ Yahvé Ndiosí ndo̱ꞌ,
ña̱ ni̱ ta̱va̱ꞌ ndoꞌó nuu̱ꞌ ñu̱ꞌuꞌ Egipto.
Kaka̱n ndo̱ꞌ nuu̱ꞌ i̱,
te̱ ta̱xi̱ i̱ kuaꞌa̱ꞌ va̱ ña̱ ka̱xi̱ꞌ ndo̱ꞌ nda̱ꞌaꞌ ndo̱ꞌ.
11 Ndisu̱ nï̱ xi̱i̱n ne̱ nduuꞌ kuenta i̱ ja̱a̱nꞌ ku̱ni̱ so̱ꞌo̱ ni̱a̱ ña̱ kaꞌán i̱ xiinꞌ ni̱a̱,
nï̱ xi̱i̱n ne̱ vi̱ꞌe̱ Israel ja̱a̱nꞌ sa̱xinú ni̱a̱ ña̱ ja̱a̱nꞌ.
12 Xaꞌa̱ꞌ a̱ ja̱a̱nꞌ na ni̱ na̱ko̱o̱ ña̱ꞌaꞌ i̱ te̱ ka̱ka̱ ni̱a̱ i̱i̱n yivi̱ꞌ sa̱a̱ ka̱ kaꞌán nimá mi̱iꞌ ni̱a̱,
te̱ sa̱a̱ ni̱a̱ ndee ka̱ ña̱ kuní mi̱iꞌ ni̱a̱.
13 Xa̱va̱ꞌa̱ naaꞌ sa̱kanꞌ te̱ ni̱ ta̱xi̱ so̱ꞌo̱ ne̱ nduuꞌ kuenta i̱ ña̱ kaꞌán i̱,
xa̱va̱ꞌa̱ naaꞌ sa̱kanꞌ te̱ ni̱ sa̱xinú ne̱ vi̱ꞌe̱ Israel ña̱ kuní i̱,
14 yatyi̱ xa̱va̱ꞌa̱ ka̱nandoo yuꞌu̱ te̱ ndasiꞌ taꞌanꞌ xiinꞌ ni̱a̱,
te̱ yatyi̱ xa̱va̱ꞌa̱ ka̱ꞌni̱ꞌ i̱ sa̱kuuꞌ te̱ ndasiꞌ taꞌanꞌ xiinꞌ ni̱a̱ ja̱a̱nꞌ.
15 Ne̱ ndasiꞌ Yahvé ndii,
sa̱na̱kuaꞌa sikiꞌ xiinꞌ mi̱iꞌ ni̱a̱ nda̱ꞌaꞌ a̱,
te̱ köo̱ꞌ kivi̱ꞌ ka̱ kuꞌu̱n ndi̱koꞌ ña̱ ku̱ndo̱ꞌo̱ ni̱a̱ sa̱a̱ a̱.
16 Ndisu̱ ndoꞌó,
ne̱ nduuꞌ kuenta mi̱iꞌ i̱ ndii,
sa̱mani̱ꞌ i̱ ndoꞌó xiinꞌ ndi̱kinꞌ trigo ña̱ va̱ꞌa̱ va̱,
te̱ ta̱xi̱ tu̱ i̱ kuaꞌa̱ꞌ va̱ ñuñu̱ꞌ ña̱ ñuꞌuꞌ te̱i̱n yuu̱ꞌ ko̱ꞌo̱ ndo̱ꞌ nde̱e̱ nda̱ꞌni̱ ndo̱ꞌ”,
katyi̱ a̱.