Yoꞌoꞌ kaꞌán ndaꞌvi Asaf xiinꞌ Ndiosí te̱ tyi̱ndi̱e̱eꞌ ña̱ꞌaꞌ a̱
Ya̱a̱ ña̱ ni̱ xi̱ta̱ Asaf ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ. Na ka̱ta̱ ndo̱ꞌ ya̱a̱ kaa̱ꞌ xaꞌa̱ꞌ i̱ta̱ lirio.
80
Tákuiꞌe,
yoꞌó ña̱ nduuꞌ ña̱ pa̱xto nduꞌu̱,
ne̱ vi̱ꞌe̱ Israel,
sa̱a̱ u̱nꞌ ña̱ va̱ꞌa̱ te̱ ku̱ni̱ so̱ꞌo̱ u̱nꞌ ña̱ kaꞌán i̱ xiinꞌ u̱nꞌ,
yoꞌó,
ña̱ xitoꞌ nduꞌu̱,
ne̱ vi̱ꞌe̱ José,
te̱ nduuꞌ ndu̱ nde̱e̱ naa mbe̱e̱,
yoꞌó ña̱ nduꞌu̱ te̱i̱n ángele ña̱ naniꞌ querubín,
sa̱a̱ u̱nꞌ ña̱ va̱ꞌa̱ te̱ niaꞌa̱ u̱nꞌ ña̱ kaꞌnuꞌ u̱nꞌ xiinꞌ ña̱ nda̱tu̱nꞌ u̱nꞌ
2 nuu̱ꞌ ndu̱,
ne̱ vi̱ꞌe̱ Efraín,
xiinꞌ ne̱ vi̱ꞌe̱ Benjamín,
xiinꞌ ne̱ vi̱ꞌe̱ Manasés,
sa̱a̱ u̱nꞌ ña̱ va̱ꞌa̱ te̱ niaꞌa̱ u̱nꞌ ña̱ ndi̱e̱eꞌ kooꞌ tyukuuꞌ u̱nꞌ,
te̱ ki̱xi̱n sa̱kakú u̱nꞌ nduꞌu̱.
3 Tákuiꞌe Ndiosí,
sa̱a̱ u̱nꞌ ña̱ va̱ꞌa̱ te̱ na̱ti̱i̱n tu̱ku̱u̱ u̱nꞌ nduꞌu̱,
te̱ tu̱ku̱ sa̱kanꞌ va̱ꞌa̱ kuni u̱nꞌ ku̱ni̱ u̱nꞌ nduꞌu̱,
te̱ sa̱kakú u̱nꞌ ndu̱.
4 Yahvé Ndiosí,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ,
te̱ ndieeꞌ ndi̱viꞌ,
¿a̱ma̱ vi̱ꞌ kuꞌu̱n ndi̱koꞌ u̱nꞌ ña̱ xiꞌé u̱nꞌ xini u̱nꞌ si̱u̱ꞌunꞌ ña̱ kaꞌán nduꞌu̱,
ne̱ nduuꞌ kuenta u̱nꞌ,
xiinꞌ u̱nꞌ?
5 Nuu̱ꞌ a̱ ña̱ ta̱xi̱ u̱nꞌ ña̱ ku̱xi̱ ndu̱ ndii,
ña̱ sutyiꞌ i̱ni̱ ku̱i̱ti̱ꞌ ni̱ ta̱xi̱ u̱nꞌ ni̱ ndo̱ꞌo̱ ndu̱,
te̱ nuu̱ꞌ a̱ ña̱ ta̱xi̱ u̱nꞌ ti̱kui ko̱ꞌo̱ ndu̱ ndii,
ti̱kui nuu̱ꞌ ku̱i̱ti̱ꞌ ndu̱ kuaꞌa̱ꞌ xa̱va̱ꞌa̱ ni̱ sa̱koꞌoꞌ u̱nꞌ ndu̱.
6 Te̱ ni̱ sakaꞌanꞌ ne̱ tukuꞌ,
ne̱ ndieeꞌ ya̱ti̱n miiꞌ ndieeꞌ ndu̱,
nduꞌu̱ ni̱ xa̱a̱ u̱nꞌ,
te̱ sa̱kanꞌ tu̱ ne̱ ndasiꞌ taꞌanꞌ xiinꞌ ndu̱ ndii,
xandiꞌiꞌ ni̱a̱ xiinꞌ ndu̱.
7 Tákuiꞌe Ndiosí,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ,
sa̱a̱ u̱nꞌ ña̱ va̱ꞌa̱ te̱ na̱ti̱i̱n tu̱ku̱u̱ u̱nꞌ ndu̱,
te̱ tu̱ku̱ sa̱kanꞌ va̱ꞌa̱ kuni u̱nꞌ ku̱ni̱ u̱nꞌ nduꞌu̱,
te̱ sa̱kakú u̱nꞌ ndu̱.
8 Ni̱ ta̱va̱ꞌ u̱nꞌ ndu̱ nde̱e̱ nuu̱ꞌ ñu̱ꞌuꞌ Egipto,
te̱ ni̱ nduu̱ ndu̱ nde̱e̱ naa yo̱ꞌoꞌ uva,
ni̱ ta̱xiꞌ u̱nꞌ ne̱ tukuꞌ,
ne̱ ni̱ ndiee̱ nuu̱ꞌ ñu̱ꞌuꞌ yoꞌoꞌ,
te̱ ni̱ na̱ta̱ndi̱e̱e̱ u̱nꞌ nduꞌu̱ nuu̱ꞌ ñu̱ꞌuꞌ mi̱iꞌ u̱nꞌ yoꞌoꞌ nde̱e̱ naa xaaꞌ te̱ yivi̱ꞌ kii̱ꞌ natyiꞌiꞌ ra̱ yo̱ꞌoꞌ uva.
9 Ni̱ nda̱sa̱ ndo̱o̱ u̱nꞌ nuu̱ꞌ ñu̱ꞌuꞌ miiꞌ ku̱ndi̱e̱e̱ ndu̱,
te̱ ni̱ na̱taꞌvi̱ꞌ va̱ ndu̱,
te̱ ni̱ sa̱kutuꞌ ndu̱ ka̱niiꞌ nuu̱ꞌ ñu̱ꞌuꞌ ja̱a̱nꞌ.
10 Ni̱ ku̱kuaꞌa̱ꞌ xa̱va̱ꞌa̱ ndu̱,
te̱ ni̱ xi̱ku̱ndiee̱ ndu̱ ka̱niiꞌ xíniꞌ i̱kuꞌ,
te̱ ni̱ na̱kaa̱ ndu̱ ndieeꞌ ndu̱ nde̱e̱ xiki̱ꞌ miiꞌ yoo i̱tunꞌ cedro naꞌnuꞌ xa̱va̱ꞌa̱.
11 Te̱ ni̱ na̱kaa̱ tu̱ ndu̱ ndieeꞌ ndu̱ nde̱e̱ yu̱ꞌuꞌ mi̱ni̱ kaꞌnuꞌ,
te̱ siꞌe̱ ndu̱ ni̱ na̱kaa̱ ndieeꞌ nde̱e̱ yu̱ꞌuꞌ i̱ti̱a̱ Éufrates.
12 Ndisu̱ vi̱ti̱n ndii,
¿ndiotyun na ni̱ sa̱nduva u̱nꞌ nama̱ ña̱ ndasi i̱ꞌnu̱ miiꞌ ndieeꞌ ndu̱,
te̱ köo̱ꞌ ka̱ ña̱ tiasi ka̱ ñu̱u̱ ndieeꞌ ndu̱,
te̱ sa̱kuuꞌ ne̱ xkaꞌndíá kuaꞌa̱n i̱tyiꞌ xandii̱ꞌ xiinꞌ ña̱ tyiꞌiꞌ ndu̱,
mi̱iꞌ va̱ kuuꞌ ni̱a̱ xiinꞌ ndu̱?
13 Te̱ xaxi̱ꞌ tu̱ kini̱ i̱kuꞌ ña̱ tyiꞌiꞌ ndu̱ ja̱a̱nꞌ,
te̱ sa̱kuuꞌ nuu̱ꞌ ki̱tiꞌ i̱kuꞌ xaxi̱ꞌ a̱.
14 Xaꞌa̱ꞌ a̱ ja̱a̱nꞌ na kaꞌán ndaꞌvi ndu̱ xiinꞌ yoꞌó,
Tákuiꞌe Ndiosí,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ,
sa̱a̱ u̱nꞌ ña̱ va̱ꞌa̱ te̱ na̱ndi̱koꞌ u̱nꞌ vi̱ti̱n.
Ko̱to̱ u̱nꞌ nde̱e̱ ndi̱viꞌ miiꞌ nduꞌu̱ꞌ u̱nꞌ,
te̱ ku̱ni̱ u̱nꞌ ña̱ ndoꞌoꞌ ndu̱.
Ni̱a̱ꞌa̱ kiꞌi̱ꞌ te̱ tyi̱ndi̱e̱eꞌ u̱nꞌ nduꞌu̱,
ne̱ nduuꞌ nde̱e̱ naa yo̱ꞌoꞌ uva,
15 yo̱ꞌoꞌ uva ña̱ ni̱ tyi̱ꞌi̱ mi̱iꞌ u̱nꞌ xiinꞌ nda̱ꞌaꞌ u̱nꞌ,
nduꞌu̱ꞌ,
ne̱ nduuꞌ siꞌe̱ u̱nꞌ,
ne̱ ni̱ xi̱to̱ u̱nꞌ te̱ ni̱ xa̱ꞌnu̱ ndu̱.
16 Xaꞌni̱ꞌ te̱ ndasiꞌ taꞌanꞌ xiinꞌ e̱ꞌ nduꞌu̱,
te̱ xaꞌmiꞌ tu̱ ra̱ ñu̱u̱ ndu̱,
sa̱kanꞌ na kuiiꞌ,
nuu̱ꞌ a̱ ña̱ sa̱ndoꞌoꞌ u̱nꞌ nduꞌu̱ ndii,
nde̱e̱ tyaaꞌ ka̱ te̱ ja̱a̱nꞌ ka̱ꞌni̱ꞌ u̱nꞌ xiinꞌ ña̱ xiꞌé va̱ u̱nꞌ ja̱a̱nꞌ.
17 Ndisu̱ sa̱a̱ u̱nꞌ ña̱ va̱ꞌa̱ te̱ tyi̱ndi̱e̱eꞌ u̱nꞌ te̱ yivi̱ꞌ,
te̱ ku̱nduꞌu̱ꞌ nda̱ꞌaꞌ ku̱a̱ꞌa̱ u̱nꞌ,
te̱ ni̱ na̱ka̱xi̱n u̱nꞌ,
18 sa̱kanꞌ te̱ köo̱ꞌ kivi̱ꞌ na̱ko̱o̱ ka̱ ndu̱ yoꞌó,
ta̱xi̱ u̱nꞌ kivi̱ꞌ ñu̱u̱ ndu̱,
te̱ i̱i̱n nda̱a̱ꞌ yoꞌó ku̱i̱ti̱ꞌ sa̱kaꞌnuꞌ ndu̱.
19 Tákuiꞌe Ndiosí,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ,
sa̱a̱ u̱nꞌ ña̱ va̱ꞌa̱ te̱ na̱ti̱i̱n tu̱ku̱u̱ u̱nꞌ ndu̱,
te̱ tu̱ku̱ sa̱kanꞌ va̱ꞌa̱ kuni u̱nꞌ ku̱ni̱ u̱nꞌ ndu̱,
te̱ sa̱kakú u̱nꞌ nduꞌu̱.