Yoꞌó kaꞌán a̱ ña̱ Ndiosí nduuꞌ ña̱ sanaꞌmá ne̱ yivi̱ꞌ
Ya̱a̱ ña̱ ni̱ xi̱ta̱ Asaf ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ. Ya̱a̱ ña̱ kaꞌán ndii, kä̱ꞌni̱ꞌ ña̱ꞌaꞌ ndo̱ꞌ.
75
Taxiꞌ ndu̱ ña̱ tyi̱nda̱ni u̱nꞌ,
Tákuiꞌe Ndiosí,
taxiꞌ ndu̱ ña̱ tyi̱nda̱ni u̱nꞌ,
sa̱kanꞌ ña̱ ya̱ti̱n yoo u̱nꞌ xiinꞌ ndu̱,
te̱ miiꞌ ka̱ ndatuꞌunꞌ ne̱ yivi̱ꞌ xaꞌa̱ꞌ tyu̱u̱n kaꞌnuꞌ ña̱ xaaꞌ u̱nꞌ.
2 Te̱ kaꞌa̱n Ndiosí ndii:
“Mi̱iꞌ yuꞌu̱ xiní a̱ma̱ xaa̱ kivi̱ꞌ ña̱ sa̱naꞌmá nda̱ku i̱ ne̱ yivi̱ꞌ.
3 Tee̱ꞌ ndee ndi̱e̱eꞌ kanda ñu̱ꞌuꞌ i̱i̱n yivi̱ꞌ xiinꞌ sa̱kuuꞌ ne̱ yivi̱ꞌ,
ne̱ ndieeꞌ nuu̱ꞌ a̱ ndii,
yuꞌu̱ nduuꞌ ña̱ tiinꞌ a̱ te̱ tä̱xi̱ i̱ tani̱ a̱.
Selah
4 Te̱ kaꞌán i̱ xiinꞌ ne̱ ñuñuꞌ ndii:
‘Kü̱ndu̱u̱ ka̱ ndo̱ꞌ ne̱ ñuñuꞌ’,
katyi i̱.
Te̱ kaꞌán tu̱ i̱ xiinꞌ ne̱ xaaꞌ ña̱ ni̱a̱ꞌa ndii:
‘Kä̱ni̱ꞌi̱ xiinꞌ miiꞌ ka̱ ndo̱ꞌ’,
katyi i̱.
5 Te̱ käꞌa̱n ñuñuꞌ tu̱ ndo̱ꞌ xaꞌa̱ꞌ ña̱ kaꞌnuꞌ ndo̱ꞌ nuu̱ꞌ Ndiosí,
ni̱ nde̱e̱ käꞌa̱n ni̱nu̱ tu̱ ndo̱ꞌ xaꞌa̱ꞌ ña̱ ndi̱e̱eꞌ mi̱iꞌ ndo̱ꞌ”,
katyi Ndiosí.
6 Sa̱kanꞌ ña̱ köo̱ꞌ nde̱e̱ i̱i̱n ne̱ yivi̱ꞌ,
ne̱ ku̱vi̱ sa̱tyiee̱ xiinꞌ miiꞌ te̱ ku̱vi̱ sa̱naꞌmá ni̱a̱ ne̱ yivi̱ꞌ,
ni̱ nde̱e̱ ne̱ ndieeꞌ miiꞌ ketaꞌ ñu̱ꞌu̱,
ni̱ nde̱e̱ ne̱ ndieeꞌ miiꞌ ketá a̱,
ni̱ nde̱e̱ köo̱ꞌ tu̱ ni̱a̱ ndieeꞌ miiꞌ i̱tyi kaaꞌ.
7 Sa̱kanꞌ ña̱ i̱i̱n nda̱a̱ꞌ Ndiosí ku̱i̱ti̱ꞌ nduuꞌ ña̱ sanaꞌmá nda̱ku ku̱a̱tyi̱ ne̱ yivi̱ꞌ i̱i̱n yivi̱ꞌ,
te̱ xa̱ mi̱iꞌ a̱ sakaꞌanꞌ ne̱ yivi̱ꞌ uun kaniꞌiꞌ ña̱ꞌaꞌ a̱.
8 Te̱ xa̱ ni̱ kaya̱ kuaꞌa̱ꞌ va̱ ña̱ xiꞌé Yahvé xini a̱ ne̱ yivi̱ꞌ nda̱ꞌaꞌ a̱,
te̱ nduuꞌ a̱ nde̱e̱ naa i̱i̱n copa ña̱ tyituꞌ vi̱ꞌ ñu̱ꞌu̱ vino xiyáꞌ,
tyituꞌ copa ja̱a̱nꞌ ñuꞌuꞌ vino xiyáꞌ teꞌ saká kuꞌu̱ xavixínꞌ xiinꞌ.
Te̱ kii̱ꞌ ka̱ti̱a̱ Ndiosí vino ja̱a̱nꞌ ndii,
sa̱kuuꞌ ne̱ xaaꞌ ña̱ ni̱a̱ꞌa yoo nuu̱ꞌ ñu̱ꞌuꞌ i̱i̱n yivi̱ꞌ na̱ti̱i̱n tu̱ndoꞌo̱ꞌ ña̱ nduuꞌ nde̱e̱ naa vino ja̱a̱nꞌ.
9 Ndisu̱ yuꞌu̱ ndii,
köo̱ꞌ kivi̱ꞌ na̱ko̱o̱ i̱ ña̱ kaꞌán i̱ xaꞌa̱ꞌ ña̱ xaaꞌ Ndiosí,
te̱ ka̱ta̱ i̱ ya̱a̱ nuu̱ꞌ Ndiosí ña̱ xakaꞌnuꞌ yooꞌ,
ne̱ vi̱ꞌe̱ Israel.
10 Sa̱kanꞌ ña̱ kaꞌán Ndiosí ndii:
“Sa̱ndo̱ñuꞌuꞌ i̱ ña̱ ndi̱e̱eꞌ sa̱kuuꞌ ne̱ xaaꞌ ña̱ ni̱a̱ꞌa,
ndisu̱ ne̱ xatyuunꞌ nda̱ku ndii,
so̱ꞌo̱ ta̱xi̱ ka̱ i̱ ña̱ ndi̱e̱eꞌ ni̱a̱”,
katyi a̱.