I̱i̱n nda̱a̱ꞌ Ndiosí nduuꞌ ña̱ ketaꞌ va̱ꞌa̱, te̱ su̱vi̱ tu̱ a̱ nduuꞌ ña̱ sanaꞌmá nda̱ku
Ya̱a̱ ña̱ ni̱ xi̱ta̱ Asaf nuu̱ꞌ Ndiosí ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ.
76
Yooꞌ,
ne̱ vi̱ꞌe̱ Judá ndii,
xiní e̱ꞌ Ndiosí,
yooꞌ,
ne̱ vi̱ꞌe̱ Israel ndii,
kiꞌinꞌ kaꞌnuꞌ ña̱ꞌaꞌ e̱ꞌ.
2 Ñu̱u̱ Jerusalén yoꞌoꞌ iinꞌ yu̱kunꞌ kaꞌnuꞌ a̱,
ñu̱u̱ Sión yoꞌoꞌ nduuꞌ miiꞌ nduꞌu̱ꞌ kutu̱ꞌ a̱.
3 Te̱ yoꞌoꞌ ni̱ xaꞌnu̱ tu̱ a̱ kuxi̱ ndatin te̱ ndasiꞌ taꞌanꞌ xiinꞌ a̱,
te̱ ni̱ sa̱kuatyiꞌ tu̱ a̱ ka̱a̱ tiꞌeꞌ ña̱ tiasi ti̱a̱ꞌni̱ ra̱ xiinꞌ ityi̱ ra̱
xiinꞌ sa̱kuuꞌ nuu̱ꞌ ña̱ xíinꞌ ña̱ ndisoꞌ ra̱ kuaꞌa̱n ti̱i̱n ra̱ ñuꞌu̱.
Selah
4 Nda̱tu̱nꞌ xa̱va̱ꞌa̱ yoꞌó,
Ndiosí,
te̱ ndi̱e̱eꞌ ka̱ u̱nꞌ te̱ sa̱kanꞌ i̱kuꞌ ya̱taꞌ miiꞌ kuaꞌa̱n te̱ yivi̱ꞌ xaꞌni̱ꞌ ra̱ ki̱tiꞌ.
5 Te̱ ndasiꞌ taꞌanꞌ xiinꞌ e̱ꞌ,
te̱ ndi̱e̱ni va̱ nimá ndii,
xiinꞌ ña̱ ndi̱e̱eꞌ ni̱ tu̱ꞌu̱n te̱ xíinꞌ ña̱ꞌa̱ nda̱ꞌaꞌ ra̱,
te̱ ni̱ xiꞌi̱ ndo̱o̱ ra̱ ndieeꞌ ra̱ ñu̱u̱ ndi̱i,
te̱ nde̱e̱ i̱i̱n te̱ yivi̱ꞌ,
te̱ ndi̱e̱eꞌ ja̱a̱nꞌ,
nï̱ tyi̱ꞌni̱ nda̱ꞌaꞌ nde̱e̱ siee.
6 Tákuiꞌe Ndiosí ña̱ xakaꞌnuꞌ nduꞌu̱,
ne̱ vi̱ꞌe̱ Jacob,
kii̱ꞌ ni̱ ndeꞌi̱ tiꞌeꞌ u̱nꞌ ndii,
ni̱ xi̱kuita̱ taxi̱nꞌ sa̱kuuꞌ carreta te̱ xíinꞌ ja̱a̱nꞌ,
te̱ ni̱ xi̱kuita̱ taxi̱nꞌ tu̱ kuei,
tiꞌ yoso̱ꞌ ra̱.
7 Sa̱kanꞌ na kuiiꞌ yiꞌvi va̱ ndu̱ xini ndu̱ ña̱ xaaꞌ u̱nꞌ,
Tákuiꞌe Ndiosí,
te̱ köo̱ꞌ nde̱e̱ i̱i̱n ne̱ yivi̱ꞌ,
ne̱ ku̱vi̱ ku̱i̱i̱n ndi̱tyi̱ nuu̱ꞌ u̱nꞌ kii̱ꞌ nasaáꞌ u̱nꞌ.
8 Nde̱e̱ ndi̱viꞌ ni̱ kaꞌa̱n tyuunꞌ u̱nꞌ ña̱ sa̱naꞌmá u̱nꞌ ne̱ yivi̱ꞌ i̱i̱n yivi̱ꞌ,
te̱ yiꞌvi va̱ sa̱kuuꞌ ne̱ yivi̱ꞌ i̱i̱n yivi̱ꞌ yoꞌó,
te̱ ku̱taxi̱nꞌ yu̱ꞌuꞌ sa̱kuuꞌ ni̱a̱ nuu̱ꞌ u̱nꞌ,
9 kii̱ꞌ ndo̱koo̱ u̱nꞌ te̱ sa̱naꞌmá u̱nꞌ ne̱ yivi̱ꞌ,
Tákuiꞌe Ndiosí,
te̱ sa̱kakú tu̱ u̱nꞌ sa̱kuuꞌ ne̱ maso nimá ndieeꞌ nuu̱ꞌ ñu̱ꞌuꞌ i̱i̱n yivi̱ꞌ.
Selah
10 Yoꞌó Ndiosí,
nde̱e̱ ña̱ nasaáꞌ xa̱va̱ꞌa̱ ne̱ yivi̱ꞌ nda̱sa̱ ndu̱u̱ u̱nꞌ ña̱ ki̱ꞌi̱n kaꞌnuꞌ ni̱a̱ yoꞌó,
te̱ ña̱ xiꞌé ne̱ ja̱a̱nꞌ ndii,
nda̱sa̱ nduuꞌ u̱nꞌ sa̱kuuꞌ a̱ ña̱ va̱ꞌa̱ mi̱iꞌ u̱nꞌ.
11 Ta̱xi̱ ndo̱ꞌ kuento ndo̱ꞌ nuu̱ꞌ Yahvé,
te̱ sa̱xinú ndo̱ꞌ a̱,
te̱ sa̱kuuꞌ ne̱ ndieeꞌ ñu̱u̱ ña̱ ñuꞌuꞌ ya̱ti̱n ndii,
na ki̱xi̱n tya̱ꞌvi̱ ni̱a̱ xu̱ꞌunꞌ yoo̱ꞌ nda̱ꞌaꞌ Ndiosí ña̱ sa̱kuuꞌ a̱ ku̱vi̱.
12 Ke̱ndoso̱ꞌ a̱ ña̱ ñuñuꞌ sa̱kuuꞌ te̱ xaꞌndia tyuunꞌ,
te̱ sa̱kuuꞌ rey,
te̱ yoo nuu̱ꞌ ñu̱ꞌuꞌ i̱i̱n yivi̱ꞌ,
yiꞌvi ña̱ꞌaꞌ.