Yoꞌoꞌ kaꞌán a̱ ña̱ va̱ꞌa̱ ka̱ nuu̱ꞌ Ndiosí ku̱ya̱ti̱n e̱ꞌ kii̱ꞌ yoo tu̱ndoꞌo̱ꞌ nuu̱ꞌ kivi̱ꞌ ñu̱u̱ e̱ꞌ
Ya̱a̱ ña̱ ni̱ xi̱ta̱ Asaf nuu̱ꞌ Ndiosí.
74
Tákuiꞌe Ndiosí,
¿ndiotyun na ni̱ sa̱xi̱o̱o̱ u̱nꞌ ndu̱ nuu̱ꞌ u̱nꞌ nde̱e̱ ndiꞌiꞌ ni̱ kivi̱ꞌ?
Te̱,
¿ndiotyun na xiꞌé niatu̱ u̱nꞌ xini u̱nꞌ nduꞌu̱,
ne̱ xitoꞌ u̱nꞌ nde̱e̱ naa mbe̱e̱?
2 Na̱ka̱ꞌanꞌ u̱nꞌ ña̱ nduꞌu̱ꞌ nduuꞌ ne̱ ni̱ na̱ka̱xi̱n u̱nꞌ nde̱e̱ xta̱ꞌanꞌ kivi̱ꞌ,
nduꞌu̱ nduuꞌ ti̱ꞌvi̱ ne̱ ni̱ tya̱ꞌvi̱ u̱nꞌ xaꞌa̱ꞌ kii̱ꞌ ni̱ sa̱kakú u̱nꞌ ndu̱,
te̱ ku̱ndu̱u̱ ndu̱ kuenta mi̱iꞌ u̱nꞌ.
Te̱ na̱ka̱ꞌanꞌ u̱nꞌ xaꞌa̱ꞌ ñu̱u̱ Jerusalén miiꞌ nduꞌu̱ꞌ u̱nꞌ i̱i̱n yivi̱ꞌ yoꞌoꞌ.
3 Ni̱a̱ꞌa̱ te̱ ku̱ni̱ u̱nꞌ miiꞌ ni̱ sa̱ndu̱xin xa̱tyiꞌ te̱ yivi̱ꞌ yu̱kunꞌ yoꞌoꞌ,
ko̱to̱ u̱nꞌ ka̱niiꞌ yu̱kunꞌ ni̱ sa̱nduxín te̱ ndasiꞌ taꞌanꞌ xiinꞌ e̱ꞌ.
4 Te̱ ndasiꞌ taꞌanꞌ xiinꞌ u̱nꞌ ndii,
ma̱ꞌiꞌ yu̱kunꞌ miiꞌ xakaꞌnuꞌ ndu̱ yoꞌó ni̱ ndiee̱ ra̱,
te̱ kuaaꞌ tiꞌeꞌ ra̱ ña̱ ni̱ ke̱ta̱ va̱ꞌa̱ ra̱,
te̱ i̱kanꞌ tu̱ ni̱ xa̱ni̱ ra̱ ta̱tunꞌ ra̱ ña̱ niaꞌá ña̱ xa̱ ni̱ ka̱nandoo ra̱ te̱ ndieeꞌ ñu̱u̱ ja̱a̱nꞌ.
5 Ni̱ xa̱a̱ ra̱ nde̱e̱ naa te̱ sanduva i̱tunꞌ naꞌnuꞌ va̱ xaꞌa̱ꞌ kuꞌu̱ xi̱xa̱ xiinꞌ yatya.
6 Ni̱ ti̱i̱n ra̱ yatya xiinꞌ ka̱a̱ vie̱,
te̱ ni̱ sa̱kuatyiꞌ ndo̱o̱ ra̱ vitu̱ꞌ,
tunꞌ ndondia to̱koꞌ nama̱ ti̱xi̱n yu̱kunꞌ kaꞌnuꞌ.
7 Ni̱ xa̱ꞌmi̱ ndo̱o̱ ra̱ yu̱kunꞌ u̱nꞌ,
te̱ ni̱ xe̱ꞌnaꞌ ra̱ xiinꞌ vi̱ꞌe̱ miiꞌ xakaꞌnuꞌ ndu̱ yoꞌó ja̱a̱nꞌ nde̱e̱ ni̱ ndu̱va̱ xa̱tyiꞌ a̱.
8 Te̱ ni̱ kaꞌa̱n ra̱ xiinꞌ nimá ra̱ ndii:
“Na sa̱nduxín kiꞌi̱ꞌ ña̱ꞌaꞌ e̱ꞌ”,
ni̱ katyi̱ ra̱.
Te̱ ni̱ xa̱ꞌmi̱ tu̱ ra̱ sa̱kuuꞌ vi̱ꞌe̱ miiꞌ nakayá ndu̱ xakaꞌnuꞌ ndu̱ yoꞌó i̱i̱n ka̱niiꞌ nuu̱ꞌ ñu̱ꞌuꞌ yoꞌoꞌ.
9 Köo̱ꞌ ka̱ tyu̱u̱n kaꞌnuꞌ xaaꞌ u̱nꞌ te̱ ku̱nda̱ni̱ ndu̱ ña̱ yoo u̱nꞌ xiinꞌ ndu̱,
ni̱ nde̱e̱ köo̱ꞌ ka̱ tu̱ te̱ kaꞌán tiakú tu̱ꞌu̱n yu̱ꞌuꞌ u̱nꞌ,
te̱ ni̱ nde̱e̱ köo̱ꞌ tu̱ nde̱e̱ i̱i̱n te̱ yivi̱ꞌ,
te̱ ku̱vi̱ kaꞌa̱n xiinꞌ ndu̱ a̱ma̱ vi̱ꞌ kuꞌu̱n ndi̱koꞌ sa̱kuuꞌ ña̱ kaa̱ꞌ.
10 Tákuiꞌe Ndiosí,
¿a̱ma̱ vi̱ꞌ kuꞌu̱n ndi̱koꞌ te̱ ndasiꞌ taꞌanꞌ xiinꞌ ndu̱ ña̱ kuntaꞌanꞌ ra̱ xiinꞌ ndu̱?
¿Ñáá ta̱xi̱ u̱nꞌ ña̱ kuaꞌa̱n na kuaꞌa̱n te̱ ndasiꞌ taꞌanꞌ xiinꞌ u̱nꞌ ña̱ kani̱a̱ꞌa ra̱ xaꞌa̱ꞌ u̱nꞌ nde̱e̱ ndiꞌiꞌ ni̱ kivi̱ꞌ?
11 ¿Ndiotyun na xïtoꞌ ka̱ u̱nꞌ ndu̱ xiinꞌ ña̱ ndi̱e̱eꞌ u̱nꞌ?
¿Ndiotyun na köo̱ꞌ xa̱tyiꞌ a̱ xaaꞌ u̱nꞌ te̱ sa̱ndo̱ñuꞌuꞌ u̱nꞌ sa̱kuuꞌ te̱ ndasiꞌ taꞌanꞌ xiinꞌ ndu̱,
te̱ numiꞌ nda̱ꞌaꞌ ku̱i̱ti̱ꞌ u̱nꞌ?
12 Ndisu̱ Ndiosí,
yoꞌó nduuꞌ rey ña̱ xaꞌndia tyuunꞌ nuu̱ꞌ ndu̱ nde̱e̱ xta̱ꞌanꞌ kivi̱ꞌ,
yoꞌó nduuꞌ tu̱ ña̱ xa̱ ni̱ xa̱a̱ kuaꞌa̱ꞌ tyu̱u̱n kaꞌnuꞌ,
te̱ ni̱ sa̱kakú u̱nꞌ ndu̱ nuu̱ꞌ ñu̱ꞌuꞌ yoꞌoꞌ.
13 Yoꞌó ni̱ na̱ta̱ꞌviꞌ ti̱kui mi̱ni̱ kaꞌnuꞌ xiinꞌ ña̱ ndi̱e̱eꞌ u̱nꞌ,
te̱ ni̱ sa̱kuatyiꞌ tu̱ u̱nꞌ xíniꞌ tiꞌ naꞌnuꞌ i̱yo̱ va̱ iinꞌ ñuꞌuꞌ ti̱xi̱n mi̱ni̱ kaꞌnuꞌ.
14 Te̱ ni̱ sa̱kuatyiꞌ tu̱ u̱nꞌ sa̱kuuꞌ xíniꞌ ku̱a̱kuꞌ,
tiꞌ naniꞌ leviatán,
te̱ ni̱ ta̱xi̱ u̱nꞌ nde̱i̱ꞌ riꞌ ni̱ xa̱xi̱ꞌ ki̱tiꞌ,
tiꞌ yoo miiꞌ i̱tyi kaaꞌ.
15 Yoꞌó ni̱ xa̱a̱ sa̱kanꞌ te̱ ni̱ ki̱e̱e̱ ti̱kui ti̱ko̱ꞌyoꞌ xiinꞌ i̱ti̱a̱,
te̱ ni̱ sa̱na̱yaaꞌ tu̱ u̱nꞌ ti̱kui i̱ti̱a̱ tee̱ꞌ ndee kuaꞌa̱ꞌ xa̱va̱ꞌa̱ ti̱kui ni̱ yoo̱.
16 Kuenta yoꞌó nduuꞌ kivi̱ꞌ,
te̱ sa̱kanꞌ tu̱ ñu̱u,
yoꞌó ni̱ xa̱ꞌa̱ yoo̱,
te̱ su̱vi̱ tu̱ u̱nꞌ ni̱ xa̱ꞌa̱ ñu̱ꞌu̱.
17 Yoꞌó ni̱ kaꞌa̱n tuní ka̱niiꞌ miiꞌ kuꞌu̱n ndi̱koꞌ xeꞌinꞌ ñu̱ꞌuꞌ i̱i̱n yivi̱ꞌ,
te̱ yoꞌó tu̱ ni̱ xa̱ꞌa̱ yoo̱ꞌ i̱ꞌniꞌ xiinꞌ yoo̱ꞌ vi̱xi̱n va̱.
18 Yahvé,
na̱ka̱ꞌanꞌ u̱nꞌ ña̱ te̱ ndasiꞌ taꞌanꞌ xiinꞌ u̱nꞌ nduuꞌ te̱ kani̱a̱ꞌa xiinꞌ u̱nꞌ,
te̱ i̱i̱n ti̱ꞌvi̱ ne̱ küuꞌ kaxiꞌ nduuꞌ ne̱ ndatuꞌunꞌ ki̱ni̱ xaꞌa̱ꞌ u̱nꞌ.
19 Tä̱xi̱ u̱nꞌ ka̱ꞌni̱ꞌ ne̱ nduuꞌ nde̱e̱ naa ki̱tiꞌ i̱kuꞌ kaa̱ꞌ nduꞌu̱ꞌ,
ne̱ nduuꞌ nde̱e̱ naa ndi̱ku̱kú sana̱ u̱nꞌ,
te̱ köo̱ꞌ kivi̱ꞌ na̱ndoso̱ꞌ u̱nꞌ xaꞌa̱ꞌ ndu̱,
ne̱ nduuꞌ kuenta u̱nꞌ,
ne̱ ndoꞌoꞌ va̱ xaaꞌ ne̱ yivi̱ꞌ.
20 Na̱ka̱ꞌanꞌ u̱nꞌ kuento ña̱ ni̱ ndoo̱ u̱nꞌ xiinꞌ ndu̱ kii̱ꞌ ni̱ ta̱xi̱ u̱nꞌ u̱n nuu̱ꞌ ndu̱,
sa̱kanꞌ ña̱ tyituꞌ vi̱ꞌ i̱i̱n ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ yoo ña̱ xaꞌni̱ꞌ taꞌanꞌ ne̱ yivi̱ꞌ.
21 Sa̱a̱ u̱nꞌ ña̱ va̱ꞌa̱ te̱ tä̱xi̱ u̱nꞌ sa̱ndi̱e̱e̱ kuiꞌe tu̱ku̱u̱ ne̱ yivi̱ꞌ,
ne̱ xa̱ ndoꞌoꞌ xaaꞌ ne̱ yivi̱ꞌ,
sa̱kanꞌ ña̱ ne̱ ndoꞌoꞌ xaaꞌ ne̱ yivi̱ꞌ ja̱a̱nꞌ xiinꞌ ne̱ ndaꞌvi kuuꞌ nduuꞌ ne̱ sa̱kaꞌnuꞌ yoꞌó.
22 Ndo̱koo̱ kiꞌi̱ꞌ,
Tákuiꞌe Ndiosí,
te̱ na̱kaꞌa̱n u̱nꞌ xaꞌa̱ꞌ u̱nꞌ,
te̱ na̱ka̱ꞌanꞌ u̱nꞌ ña̱ sa̱a̱ kivi̱ꞌ xïkuiín te̱ küuꞌ kaxiꞌ ña̱ kani̱a̱ꞌa ra̱ xiinꞌ u̱nꞌ.
23 Te̱ nä̱ndoso̱ꞌ u̱nꞌ ña̱ ni̱ kaꞌa̱n ki̱ni̱ te̱ ndasiꞌ taꞌanꞌ xiinꞌ u̱nꞌ ja̱a̱nꞌ xaꞌa̱ꞌ u̱nꞌ,
ni̱ nde̱e̱ nä̱ndoso̱ꞌ tu̱ u̱nꞌ xaꞌa̱ꞌ ña̱ naku̱tyi ra̱ te̱ kuaaꞌ ra̱,
te̱ naxaá tatyi̱ꞌ yu̱ꞌuꞌ ra̱ nde̱e̱ miiꞌ nduꞌu̱ꞌ u̱nꞌ.