Yoꞌoꞌ kaꞌán a̱ xaꞌa̱ꞌ ña̱ ku̱ndo̱ꞌo̱ ne̱ xaaꞌ ña̱ ni̱a̱ꞌa
Ya̱a̱ ña̱ ni̱ xi̱ta̱ Asaf.
73
Ña̱ ndi̱xa̱ nduuꞌ a̱ ndii,
va̱ꞌa̱ va̱ ña̱ nduuꞌ Ndiosí xiinꞌ yooꞌ,
ne̱ vi̱ꞌe̱ Israel,
va̱ꞌa̱ va̱ ña̱ nduuꞌ a̱ xiinꞌ ne̱ yoo va̱ꞌa̱ nimá nuu̱ꞌ a̱.
2 Ndisu̱ yuꞌu̱ ndii,
ndee tyaaꞌ va̱ te̱ na̱ko̱o̱ i̱ ña̱ i̱ni̱ xini i̱ yoꞌó,
ndee xa̱ku̱ꞌ va̱ te̱ ke̱ꞌniꞌ i̱ te̱ na̱ko̱o̱ i̱ i̱tyiꞌ u̱nꞌ,
ndee xa̱ku̱ꞌ ku̱i̱ti̱ꞌ te̱ na̱ko̱o̱ i̱ i̱tyiꞌ u̱nꞌ te̱ ku̱xikaꞌ i̱ nuu̱ꞌ u̱nꞌ.
3 Sa̱kanꞌ ña̱ ni̱ kaꞌa̱n va̱ nimá i̱ xaꞌa̱ꞌ ña̱ꞌa̱ ña̱ kumiꞌ ne̱ ñuñuꞌ,
kii̱ꞌ ni̱ xi̱ni̱ i̱ ña̱ so̱ꞌo̱ kuuꞌ vikaꞌ ka̱ ni̱a̱ tee̱ꞌ ndee xaaꞌ te̱ xaaꞌ ni̱a̱ ña̱ ni̱a̱ꞌa.
4 Te̱ ne̱ ja̱a̱nꞌ ndii,
kuäsa̱ꞌ tu̱ ndiꞌni̱ nimá ni̱a̱ xaꞌa̱ꞌ ña̱ ku̱vi̱ ni̱a̱,
sa̱kanꞌ ña̱ va̱ꞌa̱ va̱ kuni ni̱a̱,
te̱ kuäsa̱ꞌ tu̱ kuni ku̱vi̱ xa̱tyiꞌ ni̱a̱.
5 Köo̱ꞌ xa̱tyiꞌ tu̱ndoꞌo̱ꞌ yoo nuu̱ꞌ ni̱a̱ nde̱e̱ naa ndoꞌoꞌ i̱nga̱ ne̱ yivi̱ꞌ,
te̱ ni̱ nde̱e̱ köo̱ꞌ xa̱tyiꞌ tu̱ tu̱n ndiꞌni̱ yooꞌ nuu̱ꞌ ni̱a̱ nde̱e̱ naa ña̱ yoo nuu̱ꞌ sa̱kuuꞌ ne̱ yivi̱ꞌ.
6 Xaꞌa̱ꞌ a̱ ja̱a̱nꞌ na xakuitaꞌ ni̱a̱ nuu̱ꞌ ne̱ yivi̱ꞌ ña̱ ñuñuꞌ ni̱a̱,
te̱ nduuꞌ a̱ nde̱e̱ naa siki̱ suku̱nꞌ ni̱a̱,
te̱ ña̱ ndi̱e̱ni ni̱a̱ nduuꞌ nde̱e̱ naa toto̱ ña̱ niꞌnuꞌ ni̱a̱.
7 Ne̱ ja̱a̱nꞌ ndii,
xa̱ kuni ki̱e̱e̱ vi̱ꞌ ndu̱tyiꞌ nuu̱ꞌ ni̱a̱ ña̱ ñuñuꞌ ni̱a̱,
te̱ kuaa̱nꞌ vi̱ꞌ ku̱ni̱ e̱ꞌ nuu̱ꞌ ni̱a̱ sa̱kuuꞌ ña̱ ni̱a̱ꞌa ña̱ kaꞌán nimá ni̱a̱ sa̱a̱ ni̱a̱.
8 Xandiꞌiꞌ ni̱a̱,
te̱ xa̱ nuu̱ꞌ ña̱ ni̱a̱ꞌa kaꞌán ni̱a̱,
te̱ xaꞌa̱ꞌ a̱ ña̱ ñuñuꞌ ni̱a̱ ndii,
xaaꞌ ni̱a̱ ña̱ nduxa̱ꞌ te̱ sa̱ndoꞌoꞌ ni̱a̱ ne̱ yivi̱ꞌ.
9 Te̱ kaꞌán ki̱ni̱ ni̱a̱ xaꞌa̱ꞌ Ndiosí miiꞌ nduꞌu̱ꞌ a̱ ndi̱viꞌ,
te̱ i̱i̱n ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ xikaꞌ ndo̱so̱ꞌ ni̱a̱ kani̱a̱ꞌa ni̱a̱ xaꞌa̱ꞌ Ndiosí nuu̱ꞌ ne̱ yivi̱ꞌ i̱i̱n yivi̱ꞌ.
10 Sa̱kanꞌ na kuiiꞌ nde̱e̱ ne̱ yivi̱ꞌ,
ne̱ xikaꞌ i̱tyiꞌ Ndiosí,
kandixaꞌ ña̱ kaꞌán ni̱a̱,
te̱ sanaꞌ tu̱ xíniꞌ ni̱a̱,
sa̱kanꞌ ña̱ kandixaꞌ ka̱ ni̱a̱ ña̱ kaꞌán ne̱ xaaꞌ ña̱ ni̱a̱ꞌa ja̱a̱nꞌ,
te̱ nduuꞌ a̱ nde̱e̱ naa kuaꞌa̱ꞌ va̱ ti̱kui i̱ti̱a̱.
11 Te̱ kaꞌán xiinꞌ taꞌanꞌ ni̱a̱ ndii:
“Kü̱vi̱ xa̱tyiꞌ ku̱ni̱ Ndiosí ña̱ xaaꞌ e̱ꞌ kaa̱ꞌ,
te̱ ni̱ nde̱e̱ xïní tu̱ a̱ ña̱ xkaꞌndíá vi̱ti̱n”,
katyi ni̱a̱.
12 Ko̱to̱ ndo̱ꞌ ne̱ xaaꞌ ña̱ ni̱a̱ꞌa kaa̱ꞌ,
kuäsa̱ꞌ ndoꞌoꞌ xa̱tyiꞌ ni̱a̱ te̱ xikaꞌ ni̱a̱ i̱i̱n yivi̱ꞌ,
te̱ so̱ꞌo̱ nduuꞌ kuaꞌa̱ꞌ ka̱ tu̱ ña̱ vikaꞌ ni̱a̱.
13 Na sa̱kanꞌ ndii,
köo̱ꞌ nde̱e̱ i̱i̱n xaꞌa̱ꞌ nduuꞌ i̱ te̱ yivi̱ꞌ,
te̱ ndo̱o̱ nimá nuu̱ꞌ Ndiosí,
te̱ köo̱ꞌ tu̱ nde̱e̱ i̱i̱n xata̱ꞌ a̱ ña̱ nï̱ xa̱a̱ i̱ ku̱a̱tyi̱.
14 Te̱ ndu̱viꞌ yoo tu̱n kuiꞌe̱ nuu̱ꞌ i̱,
te̱ yoo tu̱ tu̱ndoꞌo̱ꞌ nuu̱ꞌ i̱ sa̱a̱ ni̱a̱ꞌa̱ i̱ꞌi̱n kivi̱ꞌ kuaꞌa̱n.
15 Naaꞌ sa̱kanꞌ te̱ ni̱ kaꞌa̱n yuꞌu̱ xiinꞌ nimá i̱ ndii:
“Nda̱tuꞌunꞌ i̱ sa̱a̱ niiꞌ ndatuꞌunꞌ ne̱ xaaꞌ ña̱ ni̱a̱ꞌa ja̱a̱nꞌ”,
katyi̱ i̱ ndii,
ku̱ni̱ xaꞌanꞌ i̱ ne̱ nduuꞌ kuenta yoꞌó,
Ndiosí.
16 Te̱ kii̱ꞌ ni̱ xika̱ i̱ ku̱nda̱ni̱ i̱ ndiotyun na kuvikaꞌ ka̱ ne̱ xaaꞌ ña̱ ni̱a̱ꞌa ja̱a̱nꞌ ndii,
ni̱ ku̱vixi xa̱va̱ꞌa̱ nuu̱ꞌ i̱ te̱ ku̱nda̱ni̱ e̱ꞌ e̱.
17 Sa̱kanꞌ na ni̱ xaꞌa̱n i̱ nuu̱ꞌ ki̱ꞌe̱ yu̱kunꞌ kaꞌnuꞌ,
Tákuiꞌe Ndiosí,
te̱ ni̱ ku̱nda̱ni̱ i̱ ndee ña̱ ku̱ndo̱ꞌo̱ ne̱ xaaꞌ ña̱ ni̱a̱ꞌa ja̱a̱nꞌ.
18 Ña̱ ndi̱xa̱ nduuꞌ a̱ ndii,
nuu̱ꞌ ña̱ kueinꞌ ni̱ ko̱ꞌni̱ u̱nꞌ ne̱ xaaꞌ ña̱ ni̱a̱ꞌa ja̱a̱nꞌ,
te̱ i̱kanꞌ sa̱koyó ña̱ꞌaꞌ u̱nꞌ miiꞌ nduxi̱n xa̱tyiꞌ ni̱a̱.
19 I̱i̱n xaa̱ ku̱i̱ti̱ꞌ ña̱ ku̱vi̱ sa̱kuuꞌ ni̱a̱ kii̱ꞌ köo̱ꞌ a̱ naá nimá ni̱a̱,
te̱ ndo̱ñuꞌuꞌ ndo̱o̱ ni̱a̱ sa̱a̱ ña̱ i̱yo̱ va̱.
20 Tákuiꞌe Ndiosí,
kii̱ꞌ nu̱ta̱ u̱nꞌ ndii,
kuaku̱ ndi̱a̱a̱ u̱nꞌ ne̱ yivi̱ꞌ ja̱a̱nꞌ xaꞌa̱ꞌ ña̱ kuäsa̱ꞌ kuní ña̱ xanini ni̱a̱,
nde̱e̱ naa xaaꞌ i̱i̱n ne̱ yivi̱ꞌ xakú ni̱a̱ xaꞌa̱ꞌ ña̱ ni̱ xa̱ni ni̱a̱ ñu̱u.
21 Sa̱kanꞌ te̱ ni̱ ku̱nda̱ni̱ i̱ ña̱ xa̱ ni̱ tyi̱tuꞌ vi̱ꞌ nimá i̱ ñuꞌuꞌ ña̱ xiꞌé i̱ ña̱ nduuꞌ nde̱e̱ naa ña̱ uva̱,
te̱ nde̱e̱ naa ni̱ ki̱niꞌ vi̱ꞌ ña̱ ja̱a̱nꞌ nimá i̱.
22 Te̱ xaꞌa̱ꞌ a̱ ña̱ ni̱ nduu̱ i̱ te̱ küuꞌ kaxiꞌ,
te̱ na̱a̱ tu̱ ni̱ ku̱u̱ i̱ ndii,
ni̱ ku̱u̱ i̱ xiinꞌ u̱nꞌ nde̱e̱ naa kuuꞌ i̱i̱n ki̱tiꞌ i̱kuꞌ.
23 Nde̱e̱ sa̱a̱ ka̱ ni̱ ndii,
köo̱ꞌ kivi̱ꞌ na̱ko̱o̱ i̱ yoꞌó,
sa̱kanꞌ ña̱ su̱vi̱ u̱nꞌ tiinꞌ nda̱ꞌaꞌ ku̱a̱ꞌa̱ i̱,
te̱ xikaꞌ i̱ i̱i̱n yivi̱ꞌ.
24 Te̱ niaꞌá u̱nꞌ yuꞌu̱ xiinꞌ tu̱ꞌu̱n nde̱iꞌ u̱nꞌ sa̱a̱ ka̱ka̱ i̱ i̱i̱n yivi̱ꞌ,
te̱ kii̱ꞌ kuꞌu̱n ndi̱koꞌ i̱i̱n yivi̱ꞌ ndii,
na̱ka̱ u̱nꞌ yuꞌu̱ te̱ ku̱nduꞌu̱ꞌ i̱ miiꞌ nda̱tu̱nꞌ kaaꞌ miiꞌ nduꞌu̱ꞌ u̱nꞌ.
25 Ku̱a̱tyi̱ ndii,
i̱i̱n nda̱a̱ꞌ yoꞌó ku̱i̱ti̱ꞌ nduuꞌ Ndiosí ña̱ ndiatuꞌ i̱ni̱ yuꞌu̱ tyi̱ndi̱e̱eꞌ yuꞌu̱ ndi̱viꞌ,
te̱ köo̱ꞌ ka̱ i̱nga̱ a̱.
Te̱ xaꞌa̱ꞌ a̱ ña̱ yoꞌó tyindieeꞌ yuꞌu̱ ndii,
kuäsa̱ꞌ ka̱ kaꞌán nimá i̱ xaꞌa̱ꞌ nde̱e̱ i̱i̱n ña̱ꞌa̱ ña̱ yooꞌ i̱i̱n yivi̱ꞌ yoꞌoꞌ.
26 Köo̱ꞌ ka̱ ndi̱e̱e̱ꞌ ñu̱ꞌuꞌ ndeꞌi̱ i̱,
te̱ sa̱kanꞌ tu̱ nimá i̱,
ndisu̱ Ndiosí nduuꞌ nde̱e̱ naa vi̱ꞌe̱ yuu̱ꞌ miiꞌ ku̱vi̱ kaku̱ nimá i̱,
te̱ su̱vi̱ tu̱ a̱ nduuꞌ ña̱ tyindieeꞌ yuꞌu̱ nde̱e̱ ndiꞌiꞌ ni̱ kivi̱ꞌ.
27 Sa̱kanꞌ ña̱ ndo̱ñuꞌuꞌ sa̱kuuꞌ ne̱ kuxikaꞌ nuu̱ꞌ yoꞌó,
te̱ mi̱iꞌ yoꞌó sa̱ndo̱ñuꞌuꞌ sa̱kuuꞌ ne̱ kuxiooꞌ nuu̱ꞌ u̱nꞌ.
28 Ndisu̱ yuꞌu̱ ndii,
va̱ꞌa̱ yaꞌa̱ nduuꞌ a̱ nuu̱ꞌ i̱ ña̱ kuyatinꞌ i̱ nuu̱ꞌ u̱nꞌ.
I̱i̱n nda̱a̱ꞌ yoꞌó,
Yahvé,
ña̱ xiinꞌ ña̱ꞌa̱ sa̱kuuꞌ ña̱ꞌa̱,
nduuꞌ ña̱ xitoꞌ yuꞌu̱,
te̱ kaꞌa̱n i̱ nuu̱ꞌ sa̱kuuꞌ ne̱ yivi̱ꞌ xaꞌa̱ꞌ sa̱kuuꞌ tyu̱u̱n kaꞌnuꞌ ña̱ xaaꞌ u̱nꞌ.