Yoꞌó kaꞌán xaꞌa̱ꞌ ña̱ ko̱o̱ i̱i̱n rey, te̱ sa̱tyuunꞌ nda̱ku nuu̱ꞌ kuꞌu̱n e̱ꞌ
Ya̱a̱ Salomón.
72
Tákuiꞌe Ndiosí,
sa̱a̱ u̱nꞌ ña̱ va̱ꞌa̱ te̱ tyi̱ndi̱e̱eꞌ u̱nꞌ rey te̱ ka̱ꞌndi̱a̱ tyuunꞌ nda̱ku ra̱ nde̱e̱ naa xaaꞌ yoꞌó.
Tyi̱ndi̱e̱eꞌ u̱nꞌ te̱ nduuꞌ siꞌe̱ rey ja̱a̱nꞌ,
te̱ ndoo̱ ka̱ꞌndi̱a̱ tyuunꞌ,
te̱ ka̱ꞌndi̱a̱ tyuunꞌ nda̱ku tu̱ te̱ ja̱a̱nꞌ sa̱a̱ niiꞌ xaꞌndia tyuunꞌ nda̱ku yoꞌó.
2 Sa̱kanꞌ te̱ ka̱ꞌndi̱a̱ tyuunꞌ nda̱ku ra̱ nuu̱ꞌ ne̱ nduuꞌ kuenta u̱nꞌ,
te̱ kaꞌnu̱ nda̱ku tu̱ ra̱ ku̱a̱tyi̱ xaꞌa̱ꞌ ne̱ ndaꞌvi kuuꞌ,
ne̱ nduuꞌ kuenta u̱nꞌ.
3 Te̱ sa̱kuuꞌ i̱kuꞌ ndii,
ta̱xi̱ a̱ ña̱ ku̱ndi̱e̱e̱ va̱ꞌa̱ sa̱kuuꞌ ne̱ yivi̱ꞌ,
te̱ sa̱kuuꞌ i̱tu̱n ndii,
ta̱xi̱ a̱ na̱ka̱ya̱ ne̱ yivi̱ꞌ kuaꞌa̱ꞌ ña̱ saviꞌ.
4 Na ka̱ꞌndi̱a̱ tyuunꞌ nda̱ku ra̱ nuu̱ꞌ ne̱ ñu̱u̱ ra̱,
ne̱ ndaꞌvi kuuꞌ,
te̱ na sa̱kakú ra̱ siꞌe̱ ne̱ natiín,
te̱ na ka̱ꞌni̱ꞌ ra̱ sa̱kuuꞌ te̱ sandoꞌoꞌ ne̱ yivi̱ꞌ ja̱a̱nꞌ.
5 Na ku̱ti̱a̱ku̱ ra̱ nde̱e̱ ndiꞌiꞌ ni̱ kivi̱ꞌ,
nde̱e̱ naa xaaꞌ ñu̱ꞌu̱ xiinꞌ nde̱e̱ naa xaaꞌ yoo̱ꞌ ña̱ yoo a̱ nde̱e̱ ndiꞌiꞌ ni̱ kivi̱ꞌ.
6 Te̱ na ku̱ndu̱u̱ rey ja̱a̱nꞌ nde̱e̱ naa savi̱ꞌ ña̱ kuunꞌ nuu̱ꞌ ñu̱ꞌuꞌ miiꞌ tyiꞌiꞌ te̱ yivi̱ꞌ,
te̱ na ku̱ndu̱u̱ tu̱ ra̱ nde̱e̱ naa yuyuꞌ ña̱ kosó nuu̱ꞌ ñu̱ꞌuꞌ i̱i̱n yivi̱ꞌ.
7 Te̱ sa̱kuuꞌ kivi̱ꞌ ña̱ ka̱ꞌndi̱a̱ tyuunꞌ ra̱ ndii,
ku̱ndi̱e̱e̱ va̱ꞌa̱ sa̱kuuꞌ ne̱ yivi̱ꞌ,
te̱ ko̱o̱ kuaꞌa̱ꞌ tu̱ ña̱ mani̱ꞌ te̱i̱n ni̱a̱ nde̱e̱ ska̱tyiꞌ kuꞌu̱n ndi̱koꞌ i̱i̱n yivi̱ꞌ,
te̱ köo̱ꞌ ka̱ tu̱ yoo̱ꞌ ko̱o̱.
8 Te̱ na xa̱ꞌaꞌ miiꞌ ka̱ꞌndi̱a̱ tyuunꞌ ra̱ yu̱ꞌuꞌ mi̱ni̱ kaꞌnuꞌ,
te̱ kuꞌu̱n ndi̱koꞌ a̱ nde̱e̱ tu̱ku̱ taꞌviꞌ xi̱o̱o̱ mi̱ni̱,
te̱ na xa̱ꞌaꞌ miiꞌ ka̱ꞌndi̱a̱ tyuunꞌ ra̱ nde̱e̱ i̱ti̱a̱ Éufrates,
te̱ kuꞌu̱n ndi̱koꞌ a̱ nde̱e̱ miiꞌ xaꞌa̱n ndi̱ꞌi̱ i̱i̱n yivi̱ꞌ.
9 Na ku̱i̱ta̱ xitiꞌ sa̱kuuꞌ te̱ ndasiꞌ taꞌanꞌ xiinꞌ rey,
te̱ ndieeꞌ miiꞌ i̱tyi kaaꞌ,
nuu̱ꞌ ra̱,
te̱ na na̱ku̱ndiee̱ ndi̱e̱e̱ sa̱kuuꞌ ra̱ nuu̱ꞌ rey ja̱a̱nꞌ,
te̱ tyi̱to ra̱ ñu̱ꞌuꞌ miiꞌ xeꞌní te̱ ja̱a̱nꞌ.
10 Sa̱kuuꞌ rey,
te̱ xaꞌndia tyuunꞌ nuu̱ꞌ ñu̱ꞌuꞌ Tarsis xiinꞌ te̱ ndieeꞌ ñu̱u̱ ña̱ ñuꞌuꞌ yu̱ꞌuꞌ mi̱ni̱ kaꞌnuꞌ ndii,
ki̱xi̱n tya̱ꞌvi̱ ra̱ xu̱ꞌunꞌ yoo̱ꞌ nda̱ꞌaꞌ te̱ ja̱a̱nꞌ,
te̱ rey,
te̱ xaꞌndia tyuunꞌ ñu̱u̱ Sabá,
xiinꞌ rey,
te̱ xaꞌndia tyuunꞌ ñu̱u̱ Seba ndii,
ki̱xi̱n ndi̱a̱ka̱ ra̱ tu̱mani̱ꞌ nuu̱ꞌ ra̱.
11 Sa̱kuuꞌ rey,
te̱ xaꞌndia tyuunꞌ nuu̱ꞌ ñu̱ꞌuꞌ i̱i̱n yivi̱ꞌ ku̱i̱ta̱ xitiꞌ nuu̱ꞌ rey ja̱a̱nꞌ,
te̱ sa̱kuuꞌ ne̱ tukuꞌ ka̱ka̱ nu̱u̱ nuu̱ꞌ ra̱.
12 Te̱ ne̱ ndaꞌvi kuuꞌ,
ne̱ kuꞌu̱n nuu̱ꞌ ra̱ te̱ kaꞌa̱n ndaꞌvi ni̱a̱ xaꞌa̱ꞌ ni̱a̱ ndii,
sa̱ndoó ndiká ña̱ꞌaꞌ ra̱,
te̱ tyi̱ndi̱e̱eꞌ tu̱ ra̱ ne̱ ndoꞌoꞌ xaaꞌ ne̱ yivi̱ꞌ,
ne̱ köo̱ꞌ yoo na̱kaꞌa̱n xaꞌa̱ꞌ.
13 Ku̱vi̱ta i̱ni̱ ra̱ xaꞌa̱ꞌ ne̱ ndaꞌvi kuuꞌ xiinꞌ xaꞌa̱ꞌ ne̱ köo̱ꞌ yoo xiinꞌ,
te̱ tä̱xi̱ ra̱ ka̱ꞌni̱ꞌ ne̱ yivi̱ꞌ ne̱ natiín.
14 Te̱ mi̱iꞌ ra̱ tya̱ꞌvi̱ xaꞌa̱ꞌ ne̱ yivi̱ꞌ,
te̱ sa̱kakú ña̱ꞌaꞌ ra̱ nuu̱ꞌ ña̱ xini xaꞌanꞌ ña̱ꞌaꞌ ne̱ yivi̱ꞌ xiinꞌ nuu̱ꞌ ña̱ mi̱iꞌ ku̱u̱ ne̱ yivi̱ꞌ xiinꞌ ni̱a̱.
Sa̱kanꞌ ña̱ ndiaa yaꞌviꞌ va̱ kivi̱ꞌ ñu̱u̱ ni̱a̱ nuu̱ꞌ rey ja̱a̱nꞌ.
15 Kaꞌnuꞌ va̱ te̱ nduuꞌ rey,
na na̱ta̱xi̱ ne̱ yivi̱ꞌ oro,
ña̱ kumiꞌ ne̱ ndieeꞌ nuu̱ꞌ ñu̱ꞌuꞌ Sabá,
nda̱ꞌaꞌ ra̱.
Na kaꞌa̱n te̱ kaꞌa̱n ne̱ yivi̱ꞌ xiinꞌ Ndiosí xaꞌa̱ꞌ ra̱,
te̱ na sa̱ñuꞌuꞌ ña̱ꞌaꞌ ni̱a̱ ndu̱viꞌ.
16 Na ko̱o̱ kuaꞌa̱ꞌ va̱ ndi̱kinꞌ trigo i̱i̱n ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ,
te̱ na ko̱o̱ kuaꞌa̱ꞌ tu̱ a̱ nde̱e̱ xíniꞌ sa̱kuuꞌ i̱kuꞌ,
te̱ kii̱ꞌ ndi̱e̱eꞌ xikoꞌ a̱ xaaꞌ tatyi̱ꞌ ndii,
nde̱e̱ tisó vi̱ꞌ a̱,
nde̱e̱ naa tisó nda̱ꞌaꞌ cedro,
tunꞌ itaꞌ i̱kuꞌ nuu̱ꞌ ñu̱ꞌuꞌ Líbano.
Te̱ na ko̱o̱ kuaꞌa̱ꞌ va̱ ña̱ savi̱ꞌ ka̱xi̱ꞌ ne̱ yivi̱ꞌ,
ne̱ ndieeꞌ ñu̱ꞌu̱ ja̱a̱nꞌ,
nde̱e̱ naa kuaꞌa̱ꞌ kuꞌu̱ nakún nuu̱ꞌ ñu̱ꞌuꞌ ja̱a̱nꞌ.
17 Na na̱ka̱ꞌanꞌ ne̱ yivi̱ꞌ xaꞌa̱ꞌ rey ja̱a̱nꞌ nde̱e̱ ndiꞌiꞌ ni̱ kivi̱ꞌ,
te̱ na kuaꞌa̱n na kuaꞌa̱n ra̱ ka̱ꞌndi̱a̱ tyuunꞌ ra̱ nde̱e̱ kuꞌu̱n ndi̱koꞌ i̱i̱n yivi̱ꞌ.
Te̱ xiinꞌ nda̱ꞌaꞌ te̱ ja̱a̱nꞌ sa̱ñuꞌuꞌ Ndiosí sa̱kuuꞌ ne̱ tukuꞌ,
te̱ kaꞌa̱n sa̱kuuꞌ ne̱ tukuꞌ ja̱a̱nꞌ ña̱ sañuꞌuꞌ va̱ ña̱ꞌaꞌ Ndiosí.
18 Kaꞌnuꞌ va̱ ña̱ nduuꞌ Yahvé Ndiosí,
ña̱ xakaꞌnuꞌ yooꞌ,
ne̱ Israel,
i̱i̱n nda̱a̱ꞌ ña̱ ja̱a̱nꞌ ku̱i̱ti̱ꞌ xaaꞌ sa̱kuuꞌ tyu̱u̱n ña̱ nandani̱ va̱.
19 Te̱ kaꞌnuꞌ va̱ tu̱ ña̱ nduuꞌ ña̱ ndi̱e̱eꞌ nda̱tu̱nꞌ a̱ nde̱e̱ ndiꞌiꞌ ni̱ kivi̱ꞌ,
te̱ na ku̱tuꞌ i̱i̱n ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ xiinꞌ ña̱ kaꞌnuꞌ a̱.
Sa̱kanꞌ na ku̱ndu̱u̱ a̱.
Sa̱kanꞌ na ku̱ndu̱u̱ a̱.
20 Yoꞌoꞌ ni̱ xaꞌa̱n ndi̱koꞌ si̱u̱ꞌunꞌ ña̱ ni̱ kaꞌa̱n David,
siꞌe̱ Isaí,
xiinꞌ Ndiosí.