Yoꞌoꞌ kaꞌán a̱ xaꞌa̱ꞌ ña̱ xixaꞌ ne̱ yivi̱ꞌ
71
Tákuiꞌe Yahvé,
nda̱ꞌaꞌ yoꞌó nduuꞌ miiꞌ ku̱vi̱ kaku̱ i̱,
te̱ tä̱xi̱ u̱nꞌ ña̱ sa̱kaꞌanꞌ ne̱ yivi̱ꞌ nuu̱ꞌ i̱.
2 Sa̱a̱ u̱nꞌ ña̱ va̱ꞌa̱ te̱ sa̱ndoó ndiká u̱nꞌ yuꞌu̱,
te̱ sa̱kakú tu̱ u̱nꞌ yuꞌu̱,
sa̱kanꞌ ña̱ yoꞌó ndii,
xatyuunꞌ nda̱ku u̱nꞌ.
Sa̱a̱ u̱nꞌ ña̱ va̱ꞌa̱ te̱ ku̱ni̱ so̱ꞌo̱ u̱nꞌ ña̱ kaꞌán i̱ xiinꞌ u̱nꞌ,
te̱ sa̱ndoó ndiká u̱nꞌ yuꞌu̱.
3 Yoꞌó ku̱ndu̱u̱ nde̱e̱ naa vi̱ꞌe̱ yuu̱ꞌ miiꞌ ku̱vi̱ kaku̱ i̱.
Kaꞌa̱n tyuunꞌ kiꞌi̱ꞌ te̱ ku̱ndu̱u̱ u̱nꞌ nde̱e̱ naa miiꞌ ku̱vi̱ kaku̱ i̱.
Sa̱kanꞌ ña̱ yoꞌó nduuꞌ nde̱e̱ naa vi̱ꞌe̱ yuu̱ꞌ miiꞌ ku̱vi̱ kaku̱ i̱,
te̱ nduuꞌ tu̱ u̱nꞌ ña̱ xitoꞌ yuꞌu̱.
4 Tákuiꞌe Ndiosí,
sa̱a̱ u̱nꞌ ña̱ va̱ꞌa̱ te̱ sa̱ndoó ndiká u̱nꞌ yuꞌu̱ nda̱ꞌaꞌ te̱ yivi̱ꞌ,
te̱ xaaꞌ ña̱ ni̱a̱ꞌa,
te̱ sa̱kakú u̱nꞌ yuꞌu̱ nda̱ꞌaꞌ te̱ xaꞌni̱ꞌ ne̱ yivi̱ꞌ.
5 Sa̱kanꞌ ña̱ yoꞌó,
Tákuiꞌe Yahvé,
nduuꞌ ña̱ ndiatuꞌ i̱ni̱ i̱ tyi̱ndi̱e̱eꞌ yuꞌu̱,
te̱ yoꞌó tu̱ nduuꞌ ña̱ i̱ni̱ i̱ xini i̱ nde̱e̱ kii̱ꞌ nduuꞌ i̱ te̱ sa̱va̱.
6 Te̱ yoꞌó nduuꞌ tu̱ ña̱ xitoꞌ yuꞌu̱ nde̱e̱ kii̱ꞌ ni̱ tuvi̱ i̱ i̱i̱n yivi̱ꞌ,
te̱ ni̱ xi̱to̱ tu̱ u̱nꞌ yuꞌu̱ nde̱e̱ kii̱ꞌ naá i̱ ti̱xi̱n si̱ꞌiꞌ i̱,
sa̱kanꞌ na kuiiꞌ nuu̱ꞌ yoꞌó ku̱i̱ti̱ꞌ ka̱ta̱ i̱ ya̱a̱ ña̱ xakaꞌnuꞌ i̱ yoꞌó sa̱a̱ kivi̱ꞌ.
7 Nuu̱ꞌ kuaꞌa̱ꞌ ne̱ yivi̱ꞌ ndii,
nde̱e̱ naa i̱i̱n ña̱ nandani̱ ña̱ xaaꞌ yoꞌó nduuꞌ a̱,
ña̱ kuuꞌ saaꞌ xikaꞌ ka̱ yuꞌu̱ i̱i̱n yivi̱ꞌ,
sa̱kanꞌ ña̱ yoꞌó nduuꞌ nde̱e̱ naa miiꞌ kutu̱ꞌ kaaꞌ miiꞌ ku̱vi̱ kaku̱ i̱.
8 Sa̱kanꞌ na kuiiꞌ nde̱e̱ i̱i̱n kivi̱ꞌ kü̱vi̱ na̱ko̱o̱ i̱ ña̱ xakaꞌnuꞌ i̱ yoꞌó,
te̱ sa̱a̱ kivi̱ꞌ kaꞌán i̱ ña̱ ña̱ kaꞌnuꞌ va̱ nduuꞌ u̱nꞌ.
9 Te̱ kii̱ꞌ ku̱i̱xa̱ velo va̱ i̱ ndii,
sa̱a̱ u̱nꞌ ña̱ va̱ꞌa̱ te̱ sä̱xi̱o̱o̱ u̱nꞌ yuꞌu̱ nuu̱ꞌ u̱nꞌ,
te̱ kii̱ꞌ ndo̱ko̱ ña̱ ndi̱e̱eꞌ i̱ ndii,
nä̱ko̱o̱ i̱i̱n nda̱a̱ꞌ u̱nꞌ yuꞌu̱.
10 Sa̱kanꞌ ña̱ te̱ ndasiꞌ taꞌanꞌ xiinꞌ i̱ ndii,
kani̱a̱ꞌa ra̱ xaꞌa̱ꞌ i̱,
te̱ te̱ xitoꞌ maña yuꞌu̱ ndii,
tyituní ingaꞌ ra̱ sa̱a̱ sa̱a̱ ra̱ te̱ ka̱ꞌni̱ꞌ ra̱ yuꞌu̱.
11 Kaꞌán xiinꞌ taꞌanꞌ ra̱ ndii:
“Xa̱ ni̱ na̱ko̱o̱ i̱i̱n nda̱a̱ꞌ ña̱ꞌaꞌ Ndiosí,
na ku̱ndiku̱n kiꞌi̱ꞌ ña̱ꞌaꞌ e̱ꞌ te̱ na̱ti̱i̱n ña̱ꞌaꞌ e̱ꞌ,
sa̱kanꞌ ña̱ köo̱ꞌ ka̱ yoo na̱kaꞌa̱n xaꞌa̱ꞌ ra̱”,
katyi ra̱.
12 Tákuiꞌe Ndiosí,
nä̱ko̱o̱ i̱i̱n nda̱a̱ꞌ u̱nꞌ yuꞌu̱,
Ndiosí mi̱iꞌ i̱,
ni̱a̱ꞌa̱ kiꞌi̱ꞌ te̱ tyi̱ndi̱e̱eꞌ u̱nꞌ yuꞌu̱.
13 Na sa̱kaꞌanꞌ u̱nꞌ nuu̱ꞌ sa̱kuuꞌ te̱ ndasiꞌ taꞌanꞌ xiinꞌ i̱,
te̱ na sa̱nduxín xa̱tyiꞌ ña̱ꞌaꞌ u̱nꞌ.
Na ku̱ka̱ꞌa̱n nuu̱ꞌ sa̱kuuꞌ te̱ yivi̱ꞌ,
te̱ xikaꞌ ndukuꞌ ka̱ꞌni̱ꞌ yuꞌu̱ sa̱a̱ u̱nꞌ,
te̱ na sa̱ndi̱e̱e̱ kuiꞌe tu̱ ña̱ꞌaꞌ u̱nꞌ nuu̱ꞌ ne̱ yivi̱ꞌ ja̱a̱nꞌ.
14 Ndisu̱ yuꞌu̱ ndii,
ku̱ndi̱a̱tu̱ na ndiatuꞌ i̱ni̱ i̱ ña̱ tyi̱ndi̱e̱eꞌ u̱nꞌ yuꞌu̱,
te̱ sa̱kaꞌnuꞌ na sakaꞌnuꞌ ka̱ i̱ yoꞌó.
15 Kaꞌa̱n i̱ nuu̱ꞌ sa̱kuuꞌ ne̱ yivi̱ꞌ xaꞌa̱ꞌ ña̱ xatyuunꞌ nda̱ku u̱nꞌ,
te̱ sa̱a̱ kivi̱ꞌ kaꞌa̱n tu̱ i̱ xaꞌa̱ꞌ sa̱kuuꞌ tyu̱u̱n kaꞌnuꞌ ña̱ xaaꞌ u̱nꞌ ña̱ sa̱kakú u̱nꞌ ndu̱,
tee̱ꞌ ndee näkaꞌanꞌ ka̱ i̱ sa̱a̱ taꞌanꞌ kuuꞌ a̱ ni̱ xa̱a̱ u̱nꞌ.
16 Tákuiꞌe Yahvé,
kaꞌa̱n ndo̱so̱ꞌ i̱ nuu̱ꞌ ne̱ yivi̱ꞌ xaꞌa̱ꞌ sa̱kuuꞌ tyu̱u̱n kaꞌnuꞌ ña̱ xaaꞌ u̱nꞌ,
te̱ kaꞌa̱n i̱ xiinꞌ sa̱kuuꞌ ne̱ yivi̱ꞌ ña̱ i̱i̱n nda̱a̱ꞌ yoꞌó ku̱i̱ti̱ꞌ nduuꞌ ña̱ xatyuunꞌ nda̱ku.
17 Tákuiꞌe Ndiosí,
yoꞌó ni̱ sa̱niaꞌá yuꞌu̱ nde̱e̱ kii̱ꞌ nduuꞌ i̱ te̱ sa̱va̱,
te̱ kuuꞌ saaꞌ kaꞌán ka̱ i̱ nuu̱ꞌ ne̱ yivi̱ꞌ nde̱e̱ vi̱ti̱n xaꞌa̱ꞌ tyu̱u̱n kaꞌnuꞌ ña̱ xaaꞌ u̱nꞌ.
18 Te̱ kii̱ꞌ ku̱i̱xa̱ velo i̱,
te̱ ku̱ya̱a̱ ndo̱o̱ i̱xiꞌ xíniꞌ i̱ ndii,
nä̱ko̱o̱ u̱nꞌ yuꞌu̱
nde̱e̱ ska̱tyiꞌ ndi̱ꞌi̱ kaꞌa̱n i̱ xaꞌa̱ꞌ u̱nꞌ nuu̱ꞌ ne̱ yivi̱ꞌ,
ne̱ yoo vi̱ti̱n,
te̱ kaꞌa̱n tu̱ i̱ xaꞌa̱ꞌ sa̱kuuꞌ ña̱ ndi̱e̱eꞌ u̱nꞌ nuu̱ꞌ ne̱ yivi̱ꞌ,
ne̱ ko̱o̱ nuu̱ꞌ kuꞌu̱n e̱ꞌ.
19 Tákuiꞌe Ndiosí,
nda̱ku xa̱va̱ꞌa̱ xatyuunꞌ yoꞌó nde̱e̱ ndi̱viꞌ naxaá ña̱ xatyuunꞌ nda̱ku u̱nꞌ ja̱a̱nꞌ.
Tákuiꞌe Ndiosí,
ni̱ xa̱a̱ u̱nꞌ kiꞌinꞌ tyu̱u̱n kaꞌnuꞌ kooꞌ tyukuuꞌ,
te̱ köo̱ꞌ nakuitá xa̱tyiꞌ xiinꞌ u̱nꞌ.
20 Xa̱ kuaꞌa̱ꞌ va̱ tu̱ndoꞌo̱ꞌ ni̱ ndo̱ꞌo̱ i̱ ni̱ xa̱a̱ u̱nꞌ,
te̱ ni̱ sa̱ndiꞌni̱ va̱ tu̱ u̱nꞌ nimá i̱,
ndisu̱ ta̱xi̱ tu̱ku̱u̱ u̱nꞌ kivi̱ꞌ ñu̱u̱ i̱ ña̱ köo̱ꞌ kivi̱ꞌ ndiꞌiꞌ,
te̱ xta̱ꞌniꞌ u̱nꞌ yuꞌu̱ ti̱xi̱n yavi̱ ndi̱i̱.
21 Te̱ ta̱xi̱ kuaꞌa̱ꞌ ka̱ u̱nꞌ ña̱ ki̱ꞌi̱n kaꞌnuꞌ ne̱ yivi̱ꞌ yuꞌu̱,
te̱ tu̱ku̱ ni̱ sa̱kiꞌví u̱nꞌ yuꞌu̱.
22 Te̱ yuꞌu̱ ndii,
ka̱ta̱ i̱ ya̱a̱ nuu̱ꞌ u̱nꞌ ña̱ taxiꞌ i̱ ña̱ tyi̱nda̱ni u̱nꞌ xandaaꞌ i̱ ñuu̱ꞌ ña̱ naniꞌ arpa nuu̱ꞌ u̱nꞌ,
Tákuiꞌe Ndiosí mi̱iꞌ i̱,
sa̱kanꞌ ña̱ xatyuunꞌ nda̱ku u̱nꞌ,
te̱ saxinú u̱nꞌ kuento ña̱ ni̱ ta̱xi̱ u̱nꞌ nuu̱ꞌ i̱.
Tákuiꞌe Ndiosí su̱ꞌu̱n,
ña̱ xakaꞌnuꞌ nduꞌu̱,
ne̱ vi̱ꞌe̱ Israel,
ka̱ta̱ i̱ ya̱a̱ nuu̱ꞌ u̱nꞌ xandaaꞌ i̱ ñu̱u̱ ña̱ naniꞌ lira.
23 Te̱ va̱ꞌa̱ va̱ kuni i̱ te̱ ka̱ta̱ i̱ ya̱a̱ nuu̱ꞌ u̱nꞌ,
te̱ sa̱kanꞌ tu̱ va̱ꞌa̱ kuni ka̱niiꞌ ñu̱ꞌuꞌ ndeꞌi̱ i̱ ña̱ ni̱ tya̱ꞌvi̱ u̱nꞌ xaꞌa̱ꞌ i̱ kii̱ꞌ ni̱ sa̱kakú u̱nꞌ yuꞌu̱.
24 Te̱ ndu̱viꞌ kaꞌa̱n i̱ xaꞌa̱ꞌ ña̱ xatyuunꞌ nda̱ku u̱nꞌ,
sa̱kanꞌ ña̱ sa̱kuuꞌ te̱ ni̱ kuni̱ ka̱ꞌni̱ꞌ yuꞌu̱ ndii,
ni̱ sa̱ndi̱e̱e̱ kuiꞌe ña̱ꞌaꞌ u̱nꞌ,
te̱ ni̱ sa̱kaꞌanꞌ tu̱ ña̱ꞌaꞌ u̱nꞌ.