Yoꞌoꞌ kaꞌán ndaꞌvi David xiinꞌ Ndiosí te̱ sa̱kakú ña̱ꞌaꞌ a̱
Ya̱a̱ ña̱ ni̱ xi̱ta̱ David ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ. Te̱ xiinꞌ ya̱a̱ kaa̱ꞌ xikán David nuu̱ꞌ Ndiosí ña̱ na̱ka̱ꞌanꞌ a̱ xaꞌa̱ꞌ ra̱.
70
Tákuiꞌe Ndiosí,
yatyi̱ va̱ u̱nꞌ te̱ ki̱xi̱n u̱nꞌ sa̱kakú u̱nꞌ yuꞌu̱,
yatyi̱ va̱ u̱nꞌ te̱ ki̱xi̱n u̱nꞌ tyi̱ndi̱e̱eꞌ u̱nꞌ yuꞌu̱.
2 Na ku̱ka̱ꞌa̱n nuu̱ꞌ sa̱kuuꞌ te̱ yivi̱ꞌ,
te̱ xikaꞌ ndukuꞌ ka̱ꞌni̱ꞌ yuꞌu̱,
te̱ na sa̱ndi̱e̱e̱ kuiꞌe tu̱ ña̱ꞌaꞌ u̱nꞌ nuu̱ꞌ ne̱ yivi̱ꞌ.
Na ku̱nu̱ sa̱kuuꞌ te̱ yivi̱ꞌ,
te̱ kuni sa̱ndii̱ꞌ xiinꞌ i̱,
te̱ na ku̱ka̱ꞌa̱n xa̱va̱ꞌa̱ ra̱ sa̱a̱ u̱nꞌ,
te̱ na̱ndi̱koꞌ ra̱ kuꞌu̱n ra̱.
3 Te̱ na sa̱ndi̱e̱e̱ kuiꞌe xa̱va̱ꞌa̱ u̱nꞌ,
te̱ sa̱kaꞌanꞌ xa̱va̱ꞌa̱ tu̱ u̱nꞌ sa̱kuuꞌ te̱ yivi̱ꞌ,
te̱ xakú ndi̱a̱a̱ yuꞌu̱ kaꞌán ra̱ ndii:
“A̱jaan,
a̱jaan,
vi̱ti̱n xna̱ꞌa̱ ndii,
ni̱ na̱ti̱i̱n ña̱ꞌaꞌ e̱ꞌ”,
katyi ra̱.
4 Ndisu̱ na na̱ku̱a̱tiaꞌ nimá sa̱kuuꞌ ne̱ nandukuꞌ yoꞌó,
te̱ na sii̱ꞌ tu̱ ku̱ni̱ nimá ni̱a̱ ku̱ni̱ ni̱a̱ yoꞌó.
Te̱ na i̱i̱n ni̱ nda̱ꞌaꞌ kaꞌa̱n sa̱kuuꞌ ne̱ kaꞌán va̱ nimá ña̱ sa̱kakú ña̱ꞌaꞌ u̱nꞌ ndii:
“Kaꞌnuꞌ va̱ ña̱ nduuꞌ Yahvé”,
katyi̱ ni̱a̱.
5 Te̱ yuꞌu̱,
Tákuiꞌe Yahvé,
tee̱ꞌ ndee te̱ ndaꞌvi kuuꞌ nduuꞌ i̱,
te̱ nduuꞌ tu̱ i̱ te̱ natiín va̱ ndii,
sa̱a̱ u̱nꞌ ña̱ va̱ꞌa̱ te̱ na̱ka̱ꞌanꞌ u̱nꞌ xaꞌa̱ꞌ i̱.
Sa̱kanꞌ ña̱ yoꞌó nduuꞌ ña̱ tyindieeꞌ yuꞌu̱,
te̱ su̱vi̱ tu̱ u̱nꞌ nduuꞌ ña̱ sakakú yuꞌu̱.
Tákuiꞌe Ndiosí mi̱iꞌ i̱,
sa̱a̱ u̱nꞌ ña̱ va̱ꞌa̱ te̱ numi̱ꞌ va̱ ki̱xi̱n u̱nꞌ.