Yoꞌoꞌ kaꞌán David ña̱ Ndiosí, ña̱ xakaꞌnuꞌ e̱ꞌ, nduuꞌ ña̱ sakakú yooꞌ nda̱ꞌaꞌ te̱ ndasiꞌ taꞌanꞌ xiinꞌ e̱ꞌ
Ya̱a̱ ña̱ ni̱ xi̱ta̱ David ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ.
68
Tákuiꞌe Ndiosí,
xa̱ꞌaꞌ kiꞌi̱ꞌ ku̱ntaꞌanꞌ u̱nꞌ,
te̱ ki̱ku̱ꞌ u̱nꞌ sa̱kuuꞌ te̱ ndasiꞌ taꞌanꞌ xiinꞌ u̱nꞌ,
te̱ na ku̱nu̱ sa̱kuuꞌ te̱ ndasiꞌ yoꞌó nuu̱ꞌ u̱nꞌ xaꞌa̱ꞌ a̱ ña̱ kuni kaku̱ ra̱.
2 Te̱ na i̱i̱n ndo̱yo̱ ku̱i̱ti̱ꞌ sa̱kuuꞌ ra̱ sa̱a̱ u̱nꞌ nde̱e̱ naa xaaꞌ ñuꞌma̱ ndoyoꞌ a̱ te̱i̱n tatyi̱ꞌ,
te̱ na ndu̱ti̱a̱ ndo̱o̱ ra̱ sa̱a̱ u̱nꞌ nde̱e̱ na ndutiaꞌ ñuma̱ꞌ nuu̱ꞌ ñuꞌu̱.
Sa̱kanꞌ sa̱a̱ Ndiosí xiinꞌ sa̱kuuꞌ te̱ xaaꞌ ña̱ ni̱a̱ꞌa ja̱a̱nꞌ,
te̱ ndo̱ñuꞌuꞌ ra̱ nuu̱ꞌ a̱.
3 Ndisu̱ ne̱ xatyuunꞌ nda̱ku ndii,
va̱ꞌa̱ ku̱ni̱ ni̱a̱,
te̱ na̱ku̱a̱tiaꞌ tu̱ ni̱a̱ nuu̱ꞌ Ndiosí,
te̱ nde̱e̱ ka̱nde̱ta̱ vi̱ꞌ ni̱a̱ nuu̱ꞌ a̱ ña̱ va̱ꞌa̱ kuni ni̱a̱.
4 Ka̱ta̱ ndo̱ꞌ nuu̱ꞌ Ndiosí,
te̱ ka̱ta̱ ndo̱ꞌ ya̱a̱ ña̱ kuiee kuaꞌa̱n nuu̱ꞌ a̱ xaꞌa̱ꞌ a̱ ña̱ kiꞌinꞌ kaꞌnuꞌ ña̱ꞌaꞌ ndo̱ꞌ,
ki̱ꞌi̱n kaꞌnuꞌ ndo̱ꞌ ña̱ yoso̱ꞌ kuei te̱ kuaꞌa̱n a̱ nuu̱ꞌ viko̱ꞌ,
Yahvé naniꞌ a̱,
te̱ na̱ku̱a̱tiaꞌ ndo̱ꞌ nuu̱ꞌ a̱.
5 Ndiosí nduuꞌ yu̱vaꞌ ne̱ ndaꞌvi,
ne̱ köo̱ꞌ yu̱vaꞌ siꞌiꞌ,
te̱ nduuꞌ tu̱ a̱ ña̱ nakaꞌán xaꞌa̱ꞌ ña̱ꞌaꞌ kuaa̱nꞌ,
te̱ nduꞌu̱ꞌ a̱ yu̱kunꞌ su̱ꞌu̱n.
6 Te̱ taxiꞌ a̱ vi̱ꞌe̱ ndieeꞌ ne̱ köo̱ꞌ yoo xa̱tyiꞌ xiinꞌ,
te̱ sandoó ndiká a̱ ne̱ ñuꞌuꞌ vi̱ꞌe̱ ka̱a̱,
te̱ ku̱ndi̱e̱e̱ va̱ꞌa̱ ni̱a̱,
ndisu̱ ne̱ xaso̱ꞌo̱ nuu̱ꞌ a̱ ndii,
nuu̱ꞌ ñu̱ꞌuꞌ miiꞌ i̱tyi kaaꞌ ku̱i̱ti̱ꞌ ta̱xi̱ a̱ ku̱ndi̱e̱e̱ ne̱ ja̱a̱nꞌ.
7 Tákuiꞌe Ndiosí,
kii̱ꞌ ni̱ ke̱ta̱ u̱nꞌ xiinꞌ ne̱ nduuꞌ kuenta u̱nꞌ nuu̱ꞌ ñu̱ꞌuꞌ Egipto,
xiinꞌ kii̱ꞌ ni̱ xika̱ u̱nꞌ xiinꞌ ni̱a̱ miiꞌ i̱tyi kaaꞌ ndii,
Selah
8 ndi̱e̱eꞌ va̱ ni̱ ka̱nda̱ ñu̱ꞌuꞌ i̱i̱n yivi̱ꞌ,
te̱ ndi̱e̱eꞌ va̱ tu̱ ni̱ ku̱u̱n kuiꞌe̱ savi̱ꞌ,
te̱ i̱kuꞌ Sinaí ndii,
ndi̱e̱eꞌ va̱ ni̱ ka̱nda̱ a̱ nuu̱ꞌ yoꞌó,
Ndiosí,
Ndiosí ña̱ xakaꞌnuꞌ nduꞌu̱,
ne̱ vi̱ꞌe̱ Israel.
9 Tákuiꞌe Ndiosí,
ni̱ sa̱kuunꞌ va̱ꞌa̱ va̱ u̱nꞌ savi̱ꞌ nuu̱ꞌ ñu̱ꞌuꞌ ndu̱,
te̱ ni̱ nda̱sa̱ vi̱ta u̱nꞌ ñu̱ꞌuꞌ ndu̱ ña̱ xa̱ ni̱ ku̱u̱ tiꞌeꞌ va̱.
10 Te̱ nduꞌu̱,
ne̱ nduuꞌ kuenta u̱nꞌ,
ni̱ ndoo̱ ndieeꞌ nuu̱ꞌ ñu̱ꞌuꞌ ja̱a̱nꞌ,
te̱ xaꞌa̱ꞌ a̱ ña̱ va̱ꞌa̱ nimá u̱nꞌ xini u̱nꞌ nduꞌu̱ꞌ,
ne̱ ndaꞌvi kuuꞌ ndii,
ni̱ ta̱xi̱ u̱nꞌ ñu̱ꞌuꞌ miiꞌ ku̱ndi̱e̱e̱ ndu̱.
11 Mi̱iꞌ Tákuiꞌe Ndiosí ni̱ ta̱xi̱ tu̱ꞌu̱n va̱ꞌa̱ nuu̱ꞌ ne̱ yivi̱ꞌ,
te̱ kuaꞌa̱ꞌ xa̱va̱ꞌa̱ ña̱ꞌaꞌ ni̱ ki̱e̱e̱ kaꞌán ndo̱so̱ꞌ ni̱a̱ xaꞌa̱ꞌ tu̱ꞌu̱n va̱ꞌa̱ ja̱a̱nꞌ.
12 Xinuꞌ sa̱kuuꞌ Rey,
te̱ xinuꞌ tu̱ sa̱kuuꞌ te̱ xíinꞌ ra̱,
te̱ ña̱ꞌaꞌ,
ne̱ ni̱ ndoo̱ ndieeꞌ vi̱ꞌe̱ ni̱a̱,
nataꞌviꞌ ña̱ꞌa̱ ña̱ ni̱ na̱tyiꞌi̱ꞌ te̱ yivi̱ꞌ nda̱ꞌaꞌ sa̱kuuꞌ rey ja̱a̱nꞌ kii̱ꞌ ni̱ xaꞌa̱n ti̱i̱n ra̱ ñuꞌu̱.
13 Nataꞌviꞌ ni̱a̱ ndi̱xi̱n paloma,
ña̱ ni̱ ku̱a̱ꞌa̱ xiinꞌ ka̱a̱ plata,
xiinꞌ tu̱mi̱,
ña̱ ni̱ ku̱a̱ꞌa̱ xiinꞌ mi̱iꞌ ndiꞌiꞌ oro nda̱tu̱nꞌ va̱.
Ndisu̱ ndoꞌó ndii,
ni̱ ndoo̱ ndo̱ꞌ ndieeꞌ ndo̱ꞌ kixín ku̱i̱ti̱ꞌ ndo̱ꞌ ti̱xi̱n ko̱rra miiꞌ ñuꞌuꞌ ki̱tiꞌ.
14 Kii̱ꞌ ni̱ ki̱ku̱ꞌ Ndiosí ña̱ sa̱kuuꞌ a̱ ku̱vi̱ sa̱kuuꞌ rey,
te̱ ndasiꞌ taꞌanꞌ xiinꞌ a̱ ndii,
ni̱ kiku̱ ra̱ ka̱niiꞌ xíniꞌ i̱kuꞌ Salmón nde̱e̱ naa xaaꞌ a̱ kii̱ꞌ kuunꞌ kuaꞌa̱ꞌ ka̱xi̱n xíniꞌ i̱kuꞌ ja̱a̱nꞌ.
15 Te̱ i̱kuꞌ ña̱ itaꞌ nuu̱ꞌ ñu̱ꞌuꞌ Basán ndii,
naꞌnuꞌ va̱ a̱ te̱ sukun va̱ tu̱ a̱,
te̱ i̱kuꞌ ja̱a̱nꞌ ndii,
sukun xa̱va̱ꞌa̱ a̱ ndee tyaaꞌ te̱ na̱xaa̱ a̱ nde̱e̱ ndi̱viꞌ.
16 Ndoꞌó,
i̱kuꞌ ña̱ sukun va̱,
¿ndiotyun na xakuiñu ndo̱ꞌ i̱kuꞌ Sión,
ña̱ ni̱ na̱ka̱xi̱n Ndiosí ku̱nduꞌu̱ꞌ a̱,
miiꞌ ni̱ na̱ka̱xi̱n mi̱iꞌ Yahvé ku̱nduꞌu̱ꞌ a̱ nde̱e̱ ndiꞌiꞌ ni̱ kivi̱ꞌ?
17 Karreta,
tunꞌ ñuꞌuꞌ te̱ xíinꞌ Ndiosí kuntaꞌanꞌ ra̱ ndii,
kuaꞌa̱ꞌ xa̱va̱ꞌa̱ mií kuuꞌ nu̱ꞌ,
te̱ ti̱xi̱n tunꞌ ja̱a̱nꞌ naá a̱ ni̱ ke̱ta̱ a̱ xíniꞌ i̱kuꞌ Sinaí,
te̱ ni̱ xa̱a̱ a̱ ti̱xi̱n yu̱kunꞌ a̱.
18 Te̱ kii̱ꞌ ni̱ ka̱a̱ u̱nꞌ ni̱ xi̱ku̱nduꞌu̱ꞌ u̱nꞌ miiꞌ sukun ndii,
ni̱ na̱ka̱ u̱nꞌ kuaꞌa̱ꞌ te̱ ni̱ xi̱kuꞌu̱n nda̱ꞌaꞌ u̱nꞌ u̱n te̱ kuaꞌa̱n ra̱ xiinꞌ u̱nꞌ,
i̱kanꞌ te̱ ni̱ na̱ti̱i̱n u̱nꞌ ña̱ nasoko̱ꞌ ne̱ yivi̱ꞌ i̱i̱n yivi̱ꞌ nuu̱ꞌ u̱nꞌ i̱kanꞌ,
nde̱e̱ ne̱ xateiꞌ nuu̱ꞌ u̱nꞌ ni̱ na̱soko̱ꞌ ña̱ꞌa̱ nuu̱ꞌ u̱nꞌ,
te̱ ni̱ ndoo̱ u̱nꞌ ku̱nduꞌu̱ꞌ u̱nꞌ te̱i̱n ndu̱.
19 Sa̱kaꞌnuꞌ ndo̱ꞌ Tákuiꞌe Ndiosí,
sa̱kaꞌnuꞌ ña̱ꞌaꞌ ndo̱ꞌ.
Ña̱ ja̱a̱nꞌ nduuꞌ ña̱ sakakú yooꞌ,
te̱ sa̱a̱ kivi̱ꞌ xitoꞌ a̱ yooꞌ.
Selah
20 Ndiosí,
ña̱ xakaꞌnuꞌ e̱ꞌ ja̱a̱nꞌ ndii,
Ndiosí ña̱ sakakú yooꞌ nduuꞌ a̱,
te̱ ku̱vi̱ tu̱ sa̱kakú Yahvé ja̱a̱nꞌ yooꞌ te̱ kä̱ꞌni̱ꞌ te̱ yivi̱ꞌ yooꞌ.
21 Ña̱ ndi̱xa̱ nduuꞌ a̱ ndii,
ta̱ꞌviꞌ Ndiosí xíniꞌ sa̱kuuꞌ te̱ ndasiꞌ taꞌanꞌ xiinꞌ a̱,
te̱ ta̱ꞌviꞌ a̱ i̱kiꞌ xe̱ꞌi̱n xíniꞌ sa̱kuuꞌ ne̱ xaaꞌ te̱ xaaꞌ ka̱ ku̱a̱tyi̱.
22 Ni̱ kaꞌa̱n Tákuiꞌe Ndiosí ndii:
“Sa̱na̱ndikoꞌ i̱ sa̱kuuꞌ ne̱ ndasiꞌ taꞌanꞌ xiinꞌ i̱ nde̱e̱ miiꞌ ndieeꞌ ni̱a̱ nuu̱ꞌ ñu̱ꞌuꞌ Basán,
te̱ ta̱va̱ꞌ tu̱ i̱ ne̱ ñuꞌuꞌ nde̱e̱ ma̱aꞌ ti̱xi̱n mi̱ni̱ kaꞌnuꞌ.
23 Te̱ ndoꞌó,
ne̱ nduuꞌ kuenta i̱ ndii,
na̱ti̱a̱ ndo̱ꞌ xaꞌa̱ꞌ ndo̱ꞌ xiinꞌ níiꞌ ne̱ ndasiꞌ taꞌanꞌ xiinꞌ i̱ ja̱a̱nꞌ,
te̱ naya̱ꞌ sana̱ ndo̱ꞌ ko̱ꞌo̱ níiꞌ ni̱a̱ ja̱a̱nꞌ”,
ni̱ katyi̱ a̱.
24 Tákuiꞌe Ndiosí,
Ndiosí ña̱ xakaꞌnuꞌ i̱,
ña̱ nduuꞌ rey nuu̱ꞌ i̱,
xa̱ tuviꞌ kendu̱u̱ u̱nꞌ xiinꞌ ne̱ yivi̱ꞌ kuaꞌa̱n ni̱a̱ xiinꞌ xatu̱nꞌ miiꞌ naá kuento u̱nꞌ ña̱ ni̱ ndoo̱ u̱nꞌ xiinꞌ nduꞌu̱,
ne̱ Israel,
miiꞌ iinꞌ yu̱kunꞌ u̱nꞌ.
25 Xi̱ꞌna̱ ka̱ te̱ xitaꞌ ya̱a̱ niꞌiꞌ i̱tyiꞌ kuaꞌa̱n te̱ sa̱kanꞌ ndikún te̱ xandaaꞌ ñuu̱ꞌ,
te̱ ma̱ꞌiꞌ ñuꞌuꞌ ña̱ꞌaꞌ ne̱ sa̱va̱ kuaꞌa̱n ni̱a̱ kisiꞌ ni̱a̱ ti̱ko̱ko̱.
26 Sa̱ñuꞌuꞌ ndo̱ꞌ Yahvé kii̱ꞌ nakayá kuaꞌa̱ꞌ va̱ ndo̱ꞌ,
te̱ sa̱kaꞌnuꞌ ndo̱ꞌ Tákuiꞌe Ndiosí,
ndoꞌó,
ne̱ si̱a̱niꞌ xikaꞌ ne̱ Israel.
27 Ko̱to̱ ndo̱ꞌ,
ne̱ vi̱ꞌe̱ Benjamín,
te̱ nduuꞌ la̱tunꞌ,
niꞌiꞌ i̱tyiꞌ kuaꞌa̱n ni̱a̱,
te̱ kuaꞌa̱n tu̱ kuaꞌa̱ꞌ xa̱va̱ꞌa̱ te̱ kuuꞌ nu̱uꞌ nuu̱ꞌ ne̱ vi̱ꞌe̱ Judá,
te̱ i̱kanꞌ kuaꞌa̱n sa̱kuuꞌ te̱ kuuꞌ nu̱uꞌ nuu̱ꞌ ne̱ vi̱ꞌe̱ Zabulón xiinꞌ te̱ kuuꞌ nu̱uꞌ nuu̱ꞌ ne̱ vi̱ꞌe̱ Neftalí.
28 Tákuiꞌe Ndiosí,
sa̱a̱ u̱nꞌ ña̱ va̱ꞌa̱ te̱ niaꞌa̱ u̱nꞌ ña̱ ndi̱e̱eꞌ u̱nꞌ nuu̱ꞌ ndu̱ vi̱ti̱n,
tu̱ku̱ sa̱kanꞌ niaꞌa̱ u̱nꞌ nuu̱ꞌ ndu̱ ña̱ ndi̱e̱eꞌ u̱nꞌ naa ña̱ ni̱ ti̱i̱n u̱nꞌ te̱ ni̱ tyi̱ndi̱e̱eꞌ u̱nꞌ ndu̱ xta̱ꞌanꞌ.
29 Sa̱kuuꞌ rey,
te̱ xaꞌndia tyuunꞌ nuu̱ꞌ ñu̱ꞌuꞌ i̱i̱n yivi̱ꞌ,
ki̱xi̱n ndi̱a̱ka̱ tu̱mani̱ꞌ ti̱xi̱n yu̱kunꞌ miiꞌ xakaꞌnuꞌ ndu̱ yoꞌó ñu̱u̱ Jerusalén.
30 Sa̱ndoꞌoꞌ kiꞌi̱ꞌ sa̱kuuꞌ ne̱ ndasiꞌ taꞌanꞌ xiinꞌ ndu̱ kaa̱ꞌ,
ne̱ nduuꞌ nde̱e̱ naa ki̱tiꞌ i̱kuꞌ,
tiꞌ ndieeꞌ níániꞌ riꞌ ndu̱ xaꞌa̱ꞌ tu̱nyoo̱ꞌ,
ne̱ ja̱a̱nꞌ ndii,
nduuꞌ ni̱a̱ nde̱e̱ naa kuaꞌa̱ꞌ si̱ndiki̱ꞌ kuiꞌe̱ va̱,
tiꞌ kaꞌni̱ te̱i̱n si̱ndiki̱ꞌ kuatyiꞌ.
Ka̱vikoꞌ uꞌvi̱ u̱nꞌ sa̱kuuꞌ ne̱ ja̱a̱nꞌ te̱ ki̱xi̱n ndi̱a̱ka̱ ni̱a̱ nuu̱ꞌ u̱nꞌ ka̱a̱ plata,
te̱ ku̱ndu̱u̱ a̱ nde̱e̱ naa ña̱ tya̱ꞌvi̱ ni̱a̱ yoꞌó xu̱ꞌunꞌ xaniꞌ.
Te̱ ki̱ku̱n u̱nꞌ sa̱kuuꞌ ne̱ tukuꞌ,
ne̱ xtani̱ va̱ ku̱ntaꞌanꞌ xiinꞌ ne̱ yivi̱ꞌ.
31 Ki̱xi̱n te̱ kuuꞌ nu̱uꞌ,
te̱ xaꞌndia tyuunꞌ nuu̱ꞌ ñu̱ꞌuꞌ Egipto,
xiinꞌ tu̱mani̱ꞌ ña̱ ndiaa yaꞌviꞌ xa̱va̱ꞌa̱ nuu̱ꞌ u̱nꞌ,
te̱ yatyi̱ va̱ nda̱ni̱ꞌi̱ tu̱ te̱ kuuꞌ nu̱uꞌ,
te̱ xaꞌndia tyuunꞌ nuu̱ꞌ ñu̱ꞌuꞌ Etiopía,
nda̱ꞌaꞌ ra̱ nuu̱ꞌ yoꞌó ña̱ kiꞌinꞌ kaꞌnuꞌ ra̱ yoꞌó,
Tákuiꞌe Ndiosí.
32 Sa̱kuuꞌ ndoꞌó,
te̱ xaꞌndia tyuunꞌ i̱i̱n ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ,
ka̱ta̱ ndo̱ꞌ ya̱a̱ nuu̱ꞌ Ndiosí,
ka̱ta̱ ndo̱ꞌ ya̱a̱ ña̱ kuiee kuaꞌa̱n nuu̱ꞌ xto̱ꞌo̱ e̱ꞌ.
Selah
33 Ka̱ta̱ ndo̱ꞌ nuu̱ꞌ Ndiosí e̱ꞌ,
ña̱ yoso̱ꞌ kuei,
te̱ xikaꞌ a̱ xata̱ꞌ ndi̱viꞌ ña̱ yoo nde̱e̱ xta̱ꞌanꞌ kivi̱ꞌ,
ku̱ni̱ so̱ꞌo̱ ndo̱ꞌ tatyi̱ꞌ a̱ ña̱ tiakú kaꞌán tiꞌeꞌ a̱ nde̱e̱ ndi̱viꞌ.
34 Kaꞌa̱n ndo̱so̱ꞌ ndo̱ꞌ xaꞌa̱ꞌ ña̱ ndi̱e̱eꞌ Ndiosí,
te̱ xiinꞌ xaꞌa̱ꞌ tyu̱u̱n kaꞌnuꞌ ña̱ xaaꞌ a̱ xaꞌa̱ꞌ yooꞌ,
ne̱ vi̱ꞌe̱ Israel,
ku̱vi̱ ku̱ni̱ e̱ꞌ ña̱ ndi̱e̱eꞌ a̱ xiinꞌ ña̱ kaꞌnuꞌ a̱.
Te̱ ña̱ ndi̱e̱eꞌ a̱ ndii,
naxaá a̱ nde̱e̱ nuu̱ꞌ ndi̱viꞌ miiꞌ ndi̱ꞌeꞌ.
35 I̱yo̱ va̱ kaaꞌ Ndiosí nde̱e̱ miiꞌ nduꞌu̱ꞌ a̱ ti̱xi̱n yu̱kunꞌ a̱,
ña̱ ja̱a̱nꞌ nduuꞌ Ndiosí,
ña̱ xakaꞌnuꞌ yooꞌ,
ne̱ vi̱ꞌe̱ Israel,
te̱ taxiꞌ a̱ ña̱ ndi̱e̱eꞌ xiinꞌ ña̱ ndi̱e̱ni nda̱ꞌaꞌ yooꞌ,
ne̱ nduuꞌ kuenta a̱.
Kaꞌnuꞌ va̱ ña̱ nduuꞌ Ndiosí.