Yoꞌoꞌ sakiꞌinꞌ kuento David sa̱kuuꞌ ne̱ yivi̱ꞌ i̱i̱n yivi̱ꞌ ña̱ na sa̱kaꞌnuꞌ na ni̱a̱ Ndiosí
Ya̱a̱ ña̱ ni̱ xi̱ta̱ David nuu̱ꞌ Ndiosí kii̱ꞌ ni̱ xa̱ndaaꞌ ra̱ ñuu̱ꞌ. Te̱ nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ kuaꞌa̱n ya̱a̱ kaa̱ꞌ.
67
Na ku̱vi̱ta na i̱ni̱ Ndiosí ku̱ni̱ a̱ yooꞌ,
te̱ na sa̱ñuꞌuꞌ na a̱ yooꞌ,
te̱ na kuaku̱ vi̱ꞌ a̱ ña̱ va̱ꞌa̱ kuni a̱ xini a̱ yooꞌ.
Selah
2 Sa̱kanꞌ te̱ ku̱nda̱ni̱ sa̱kuuꞌ ne̱ yivi̱ꞌ i̱i̱n yivi̱ꞌ i̱tyiꞌ a̱,
te̱ ku̱ni̱ tu̱ sa̱kuuꞌ ne̱ ndieeꞌ nuu̱ꞌ ñu̱ꞌuꞌ i̱i̱n yivi̱ꞌ ña̱ sakakú ña̱ꞌaꞌ a̱.
3 Tákuiꞌe Ndiosí,
na sa̱kaꞌnuꞌ ne̱ yivi̱ꞌ i̱i̱n yivi̱ꞌ yoꞌó,
sa̱kuuꞌ ne̱ yivi̱ꞌ i̱i̱n yivi̱ꞌ na sakaꞌnuꞌ yoꞌó.
4 Na ka̱ta̱ sa̱kuuꞌ ne̱ yivi̱ꞌ i̱i̱n yivi̱ꞌ ya̱a̱ nuu̱ꞌ u̱nꞌ xaꞌa̱ꞌ a̱ ña̱ va̱ꞌa̱ va̱ kuni ni̱a̱,
sa̱kanꞌ ña̱ xaꞌndia tyuunꞌ nda̱ku u̱nꞌ xiinꞌ ña̱ sa̱naꞌmá u̱nꞌ sa̱kuuꞌ ne̱ yivi̱ꞌ i̱i̱n yivi̱ꞌ.
Te̱ ko̱to̱ u̱nꞌ sa̱kuuꞌ ne̱ yivi̱ꞌ i̱i̱n ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ nde̱e̱ naa xaaꞌ te̱ pa̱xto xitoꞌ ra̱ mbe̱e̱ sana̱ ra̱.
Selah
5 Tákuiꞌe Ndiosí,
na sa̱kaꞌnuꞌ ne̱ yivi̱ꞌ i̱i̱n yivi̱ꞌ yoꞌó,
sa̱kuuꞌ ne̱ yivi̱ꞌ i̱i̱n yivi̱ꞌ na sakaꞌnuꞌ yoꞌó.
6 Sa̱kanꞌ te̱ ta̱xi̱ ñu̱ꞌuꞌ i̱i̱n yivi̱ꞌ kuaꞌa̱ꞌ ña̱ savi̱ꞌ.
Te̱ na sa̱ñuꞌuꞌ va̱ Ndiosí,
ña̱ xakaꞌnuꞌ e̱ꞌ,
yooꞌ.
7 Na sa̱ñuꞌuꞌ Ndiosí,
ña̱ xakaꞌnuꞌ e̱ꞌ ja̱a̱nꞌ,
yooꞌ,
te̱ na ki̱ꞌi̱n kaꞌnuꞌ ña̱ꞌaꞌ sa̱kuuꞌ ne̱ yivi̱ꞌ i̱i̱n yivi̱ꞌ.