Yoꞌoꞌ kaꞌán David xiinꞌ Ndiosí te̱ ko̱to̱ ña̱ꞌaꞌ a̱ nuu̱ꞌ ña̱ tyituní si̱ꞌe te̱ ndasiꞌ taꞌanꞌ xiinꞌ ra̱
Ya̱a̱ ña̱ ni̱ xi̱ta̱ David ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ.
64
Tákuiꞌe Ndiosí,
sa̱a̱ u̱nꞌ ña̱ va̱ꞌa̱ te̱ ku̱ni̱ so̱ꞌo̱ u̱nꞌ ña̱ kaꞌán ku̱a̱tyi̱ i̱ nuu̱ꞌ u̱nꞌ,
te̱ ko̱to̱ u̱nꞌ kivi̱ꞌ ñu̱u̱ i̱ te̱ kä̱ꞌni̱ꞌ te̱ ndasiꞌ taꞌanꞌ xiinꞌ i̱ yuꞌu̱.
2 Ti̱si̱ꞌe u̱nꞌ yuꞌu̱ nuu̱ꞌ ña̱ tyituní si̱ꞌe te̱ xaaꞌ ña̱ ni̱a̱ꞌa ja̱a̱nꞌ sa̱a̱ ra̱ xiinꞌ i̱,
te̱ sa̱kanꞌ tu̱ nuu̱ꞌ ña̱ nakataꞌ ra̱ kuento ra̱ sa̱a̱ ra̱ xiinꞌ i̱ ja̱a̱nꞌ.
3 Te̱ kuento ña̱ kaꞌán ra̱ ndii,
satuxuꞌví a̱ nde̱e̱ naa i̱i̱n ityi̱ ña̱ xíinꞌ va̱,
te̱ kii̱ꞌ kaꞌán ra̱ xata̱ꞌ ne̱ yivi̱ꞌ ndii,
mi̱iꞌ ndiꞌiꞌ kuento xatu̱ kaꞌán ra̱,
te̱ nduuꞌ a̱ nde̱e̱ naa kuxi̱.
4 Ndieeꞌ si̱ꞌe ra̱ xaꞌa̱ꞌ kuꞌu̱ te̱ kiniꞌ ra̱ ne̱ yivi̱ꞌ,
ne̱ köo̱ꞌ ku̱a̱tyi̱,
te̱ i̱i̱n kuunꞌ ku̱i̱ti̱ꞌ ña̱ꞌaꞌ ra̱,
te̱ kuäsa̱ꞌ yiꞌvi xa̱tyiꞌ ra̱ te̱ xaaꞌ ra̱ ña̱ ja̱a̱nꞌ.
5 Tyuꞌu̱ꞌ taꞌanꞌ ra̱ te̱ xaaꞌ ra̱ ña̱ ni̱a̱ꞌa,
te̱ ndatuꞌunꞌ tuní xiinꞌ taꞌanꞌ ra̱ sa̱a̱ sa̱a̱ ra̱ te̱ ku̱ndi̱e̱e̱ si̱ꞌe ra̱ te̱ ka̱ꞌni̱ꞌ ra̱ ne̱ yivi̱ꞌ,
te̱ kaꞌán xiinꞌ taꞌanꞌ ra̱ ndii:
“Nde̱e̱ i̱i̱n ne̱ yivi̱ꞌ kü̱vi̱ ku̱ni̱ ña̱ xaaꞌ e̱ꞌ ja̱a̱nꞌ”,
katyi ra̱.
6 Te̱ kii̱ꞌ ndatuꞌunꞌ tuní ra̱ xaꞌa̱ꞌ ña̱ ni̱a̱ꞌa ña̱ sa̱a̱ ra̱,
te̱ kaꞌán ra̱ ndii:
“Va̱ꞌa̱ xa̱va̱ꞌa̱ ni̱ ke̱ta̱ ña̱ ni̱ tyi̱ntuní e̱ꞌ vi̱ti̱n”,
katyi ra̱.
Ña̱ nda̱ku nduuꞌ a̱ ndii,
ña̱ xanini te̱ yivi̱ꞌ xiinꞌ ña̱ kaꞌán nimá ra̱ xaꞌa̱ꞌ ndii,
köo̱ꞌ xiní xa̱tyiꞌ nde̱e̱ ña̱ nduuꞌ a̱.
7 Ndisu̱ mi̱iꞌ Ndiosí ki̱niꞌ ña̱ꞌaꞌ xiinꞌ kuxi̱ a̱,
te̱ ki̱niꞌ ña̱ꞌaꞌ a̱ kii̱ꞌ köo̱ꞌ a̱ naá nimá ra̱.
8 Ña̱ ni̱a̱ꞌa ña̱ kieeꞌ yu̱ꞌuꞌ mi̱iꞌ ra̱ sa̱a̱ sa̱kanꞌ te̱ ku̱vi̱ ra̱,
te̱ ne̱ yivi̱ꞌ,
ne̱ ku̱ni̱ ña̱ ku̱ndo̱ꞌo̱ ra̱ ja̱a̱nꞌ ndii,
ku̱ndi̱ꞌi̱ va̱ sa̱kuuꞌ ni̱a̱ xiinꞌ ra̱ sekoꞌ ni̱a̱ xíniꞌ ni̱a̱.
9 Xaꞌa̱ꞌ a̱ ja̱a̱nꞌ na sa̱kuuꞌ ne̱ yivi̱ꞌ i̱i̱n yivi̱ꞌ ndii,
ki̱ꞌi̱n kaꞌnuꞌ ni̱a̱ Ndiosí,
te̱ kaꞌa̱n ndo̱so̱ꞌ ni̱a̱ xaꞌa̱ꞌ tyu̱u̱n kaꞌnuꞌ ña̱ xaaꞌ a̱,
te̱ ku̱nda̱ni̱ tu̱ ni̱a̱ sa̱kuuꞌ tyu̱u̱n kaꞌnuꞌ ña̱ ku̱vi̱ xaaꞌ Ndiosí.
10 Te̱ ne̱ xatyuunꞌ nda̱ku ndii,
na̱ku̱a̱tiaꞌ nimá ni̱a̱ ku̱ni̱ ni̱a̱ Yahvé,
te̱ i̱ni̱ tu̱ ni̱a̱ ku̱ni̱ ña̱ꞌaꞌ ni̱a̱.
Te̱ sa̱kaꞌnuꞌ ña̱ꞌaꞌ sa̱kuuꞌ ne̱ xatyuunꞌ nda̱ku ja̱a̱nꞌ.